18 En Nyasaye mane machalo kodi

ma ngʼwono ne joge modongʼ,

kendo weyonegi richogi?

Iyi ok wangʼ nyaka chiengʼ,

to imor mar kecho jogi.

1 Kecha, yaye Nyasaye,

kaluwore gi herani ma ok rem;

gol kethona duto oko

kuom ngʼwononi maduongʼ.

2 Luok rochruokna duto oko

kendo pwodha kuom richona.

6 Par kechni maduongʼ gi herani, yaye Jehova Nyasaye,

nikech gisebedo ka gintie nyaka aa chon.

7 Kik ipar richo mane atimo kapod an rawere

kod yorena mobam;

para kaluwore gi herani,

nikech iber, yaye Jehova Nyasaye.

1 Aywakni ka an e chuny bur matut, yaye Jehova Nyasaye,

2 Yaye Jehova Nyasaye, yie iwinj dwonda.

Chik iti ne ywakna ma aywaknigo

mondo ikecha.

11 Kik itamri kecha, yaye Jehova Nyasaye;

mad herani gi adierani osik ka rita.

6 Adier, ber gihera biro luwa

ndalo duto mag ngimana,

kendo abiro dak e od Jehova Nyasaye

nyaka chiengʼ.

13 Mana kaka wuoro kecho nyithinde,

e kaka Jehova Nyasaye kecho joma omiye luor;

15 Mich mar Nyasaye ok chal gi timo richo. Nikech ka ji mangʼeny notho nikech timo richo mar ngʼat achiel, to nobedo maber manade ka ngʼwono mar Nyasaye kod mich manobiro kuom ngʼwono mar ngʼat achielno, ma en Yesu Kristo, nochiw mogundho ni ji mangʼeny.

15 To koro wanyalo wacho angʼo? Dwasik mana ka watimo atima richo nikech wan e bwo ngʼwono, to ok e bwo Chik? Ooyo, gima kamano kik timre!

4 To kuom hera maduongʼ mane Nyasaye oherowago kod kechne mogundho, 5 nomiyo wabedo mangima kuom Kristo, kata obedo ni ne watho nikech kethowa, osewaru kuom ngʼwono.

9 to ne odwoka niya, "Ngʼwonona mamiyi oromi, nikech kama nyawo nitie ema tekona tiyoe moloyo." Emomiyo, abiro medo pakora gi ilo kuom nyawona, eka teko mar Kristo osik kuoma.

13 Ngʼat mapando richone ok dhi maber,

to ngʼat ma hulo richone kendo oweyogi yudo ngʼwono.

7 Ngʼama timbene achach mondo owe yorene,

kendo ngʼama parone opongʼ gi timbe richo mondo owe.

Onego oduog ir Jehova Nyasaye,

kendo enobed gi ngʼwono kuome mi enowene richone.

18 Kata kamano pod odwaro nyiso

ngʼwono mare kuome; obiro mondo onyisu kech mare.

Nimar Jehova Nyasaye en Nyasaye ma ja-adiera.

Jogo duto mogeno kuome ogwedhi.

13 To dhiuru upuonjru tiend wachni, ‘Gima adwaro en ni ukech joweteu, to ok ni uchiwna misango.’* Nimar ok ne abiro mondo aluong joma kare, to nabiro mondo aluong joricho."

21 Eka Petro nobiro ir Yesu mopenje niya, "Ruoth, owinjore awe ne owadwa ndalo adi kokethona? Nyaka ndalo abiriyo koso?"

22 Yesu nodwoke niya, "Awachoni ni ok nyadibiriyo to nyadi piero abiriyo nyadibiriyo.

14 Nimar ka uweyo ne ji ka gikethonu, eka Wuonu manie polo biro weyonu.

31 To e ngʼwono mari makende ne ok itiekogi chuth bende ne ok ijwangʼogi, nikech in Nyasaye ma jangʼwono kendo makecho joge.

5 Ngʼama ngʼwon ma holo ji gige gi chuny maler biro neno ber

ngʼat matiyo tijene gi adiera.

17 Mad ngʼwono mar Ruoth Nyasachwa obed kodwa;

yie igurnwa tich mar lwetwa,

ee gurnwa tich mar lwetwa.

16 Kuom mano, wasuduru but kom duongʼ mar ngʼwono ka wan gi chir, mondo wayud kech gi ngʼwono e sa mwadware kony.

1 Emomiyo, jowetena, ajiwou kuom ngʼwono mar Nyasaye, mondo uchiw ringreu kaka misango mangima maler kendo ma Nyasaye morgo, nikech mano e yor lemo makare.

16 "Nikech Nyasaye nohero piny ahinya, omiyo nochiwo Wuode ma miderma, mondo ngʼato angʼata moyie kuome kik lal, to obed gi ngima mochwere.

29 Nikech dhial museyudo kuom Kristo ok en mana mondo uyie kuome kende, to oseluongu bende mondo une masiche nikech en,

1 Hezekia nooro wach ni jo-Israel duto gi jo-Juda kendo nondiko barupe ni jo-Efraim kod jo-Manase kokwayogi mondo gibi Jerusalem e hekalu mar Jehova Nyasaye mondo gitim Sap Pasaka ni Jehova Nyasaye ma Nyasach jo-Israel. 2 Ruoth gi jodonge kod joma nochokore Jerusalem nowinjore ni gitim Sap Pasaka e dwe mar ariyo. 3 Ne ok ginyal time e kinde mane onego otime nimar jodolo moromo ne pok opwodhore to ji bende ne pok ochokore Jerusalem. 4 Chenroni ne berne ruoth kod joma nochokore. 5 Negingʼado bura mondo giland wachni e Israel duto kochakore Bersheba nyaka Dan kagiluongo ji mondo gibi Jerusalem otim Pasaka mar Jehova Nyasaye Nyasach Israel nikech ne pok otime gi ji mangʼeny kaka ondiki.

6 Omiyo joote nodhi Israel gi Juda duto kaka ruoth nochiko ka gitingʼo barupe mane oa ir ruoth kod jodonge mondikie niya,

"Jo-Israel dwoguru ir Jehova Nyasaye ma Nyasach Ibrahim gi Isaka kod Israel mondo mi oduog iru un joma odongʼ mosetony e lwet ruodhi mag Asuria. 7 Kik ubed ka kwereu gi oweteu mane oweyo luwo Jehova Nyasaye ma Nyasach kwereu momiyo gidoko gima iluoro mana kaka uneno sani. 8 Kik ubed gi tok matek kaka kwereu nobedo, bolreuru ni Jehova Nyasaye. Biuru e kama ler mar lemo ma osepwodho nyaka chiengʼ. Tineuru Jehova Nyasaye ma Nyasachu mondo mi mirimbe mager owuog kuomu. 9 Ka udwogo ir Jehova Nyasaye eka joweteu gi nyithindu notimnegi ngʼwono mi nowegi giduogi e pinygi kod joma noterogi e twech nikech Jehova Nyasaye ma Nyasachu en jangʼwono kendo en gihera maduongʼ omiyo ok noloknu ngʼeye ka udwogo ire."

10 Joote nodhi e dala ka dala e piny Efraim gi Manase duto nyaka ochopo Zebulun to ji nocharogi kendo nyierogi. 11 To kata kamano jo-Asher moko kod jo-Manase kaachiel gi jo-Zebulun nobolore modhi Jerusalem. 12 To e piny Juda bende ema ne lwet Nyasaye ne nitie kuom jogo mondo omigi bedo e paro achiel mondo gitim gima ruoth gi jodonge nochiko kaluwore gi wach mar Jehova Nyasaye.

13 Ji mangʼeny nochokore Jerusalem e dwe mar ariyo mondo gitim Sap Makati ma ok oketie Thowi. 14 Negigolo kende mag misango miwangʼoe liswa mane nitie Jerusalem kaachiel gi kende mag misango miwangʼoe ubani mi giwitogi e Holo mar Kidron.

15 Ne giyangʼo nyarombo mar Pasaka Chiengʼ mar apar gangʼwen mar dwe mar ariyo jodolo kod jo-Lawi noyudo wichkuot omiyo negipwodhore mi gikelo misengini miwangʼo pep e hekalu mar Jehova Nyasaye. 16 Bangʼe negikawo keregi mapile kaka ondikie chike Musa ngʼat Nyasaye. Jodolo nokiro remo manomigi kod jo-Lawi. 17 Nikech ji mangʼeny ei oganda ne pod ok opwodhore, nochuno jo-Lawi mondo oyangʼ nyirombe mag Sap Pasaka ni jogo duto mane ok ler kendo ne ok nyal chiwo nyirombegi ni Jehova Nyasaye. 18 Kata obedo ni ji mathoth manowuok e piny Efraim gi Manase gi Isakar kod Zebulun ne ok opwodhore, to kata kamano negichamo Pasaka ka ok giluwo gima nondiki. To Hezekia nolamonigi kawacho niya, "Mad Jehova Nyasaye mangʼwon owene ngʼato angʼata, 19 moseketo chunye mondo oluw Nyasaye ma en Jehova Nyasaye ma Nyasach kwerene kata obedo ni ok oler kaluwore gi chike mag kama ler mar lemo." 20 Omiyo Jehova Nyasaye nowinjo kwayo mar Hezekia mochango jogo.

21 Jo-Israel mane nitiere Jerusalem notimo Sap Makati ma ok oketie Thowi kuom ndalo abiriyo ka gimor gi-ilo maduongʼ ka jo-Lawi kod jodolo werne Jehova Nyasaye pile ka pile ka gigoyo thumbe mag pak mar Jehova Nyasaye.

22 Hezekia nojiwo jo-Lawi duto mane ongʼeyo tich mar tiyo ne Jehova Nyasaye. Kuom ndalo abiriyo negichamo chiemo mane opognigi kendo negitimo misango mar lalruok kagipako Jehova Nyasaye ma Nyasach kweregi.

23 Jogo mane ochokore nowinjore mondo gimed timo sawoni ndalo abiriyo mamoko, omiyo kuom ndalo abiriyo mamoko negitimo kamano gi mor. 24 Hezekia ruodh Juda nochiwo ni joma nochokore rwedhi alufu achiel kod rombe gi diek alufu abiriyo, to jodonge nochiwonegi rwedhi alufu achiel kod rombe gi diek alufu apar. Jodolo mangʼeny ahinya nopwodhore. 25 Joma nochokore duto mane oa Juda kaachiel gi jodolo kod jo-Lawi kod joma nochokore koa Israel kaachiel gi jodak mane odak Israel kod mane odak Juda ne mor gi ilo. 26 Ne nitie mor maduongʼ Jerusalem mapok nobedo Jerusalem chakre ndalo Solomon wuod Daudi ma ruodh Israel. 27 Jodolo gi jo-Lawi nochungʼ mondo ogwedh ji, kendo Nyasaye nowinjogi nikech lembgi nochopo e polo kar dakne maler.

1 Jehova Nyasaye wacho niya,

"Ka dichwo oriembo chiege

kendo chiege odhi moweye mi okende gi dichwo machielo,

bende dodog ir dhakoni kendo?

Donge pinyni dibed mochido chuth?

To isedak kaka ochot man-gi johera mangʼeny

bende koro diduog ira?

2 Tingʼ wangʼi malo mondo ingʼiane

kuonde motimo ongoro motingʼore mondo ine.

Bende nitiere kamoro amora modongʼ

e piny mapok iterorigo?

E dir yo ne ibet piny ka irito johera magi,

ibet piny ka jakwath mamanyo pi ne dhoge e piny motwo.

Isedwanyo piny gi chode mari,

kod timbegi mamono.

3 Emomiyo osetuonu koth,

kendo kodh chwiri pod ok ochwe.

Kata kamano in gi neno

machalo gi mar ochot;

wiyi bende ok kuodi nikech ionge gi wichkuot.

4 Donge koro eka iwachona kama:

Wuonwa, osiepna chakre tin-na,

5 inisik ka iyi owangʼ?

Bende mirimbi biro bedo manyaka chiengʼ?

Ma e kaka iwuoyo,

to itimo timbe mamono duto minyalo."

6 E kinde mar loch Ruoth Josia, Jehova Nyasaye nowachona niya, "Bende iseneno gima Israel ma ok ja-ratiro otimo? Osedhi ewi gode duto matindo maboyo kendo e bwo yiende duto motimo otiep mi osechodo kanyo. 7 Ne aparo ni kane osetimo magi duto to ne odhi duogo ira makmana ne ok odwogo, kendo kata mana nyamin mare ma Juda ma ok ja-ratiro noneno mano. 8 Ne amiyo Israel maonge gi yie baruwa mar weruok kendo mi ariembe nikech timbene duto mag chode. Kata kamano ne aneno ka nyamin-gi ma Juda maonge ratiro ne ok oluor; en bende nodhi kendo ochodo. 9 Nikech anjawo mar Israel nonenore gima tin, ne gidwanyo piny ka gilamo kite kod bepe. 10 To kuom magi duto, nyamin mare ma Juda ma ok ja-adiera ka en ne ok odwogo ira gi chunye duto, to mana kuom wuondruok," Jehova Nyasaye ema owacho.

11 Jehova Nyasaye nowachona niya, "Israel maonge gi yie ler moloyo Juda ma ok ja-adiera. 12 Dhi mondo iland wachni yo nyandwat ni:

"Jehova Nyasaye wacho niya,

‘Duogi in Israel maonge gi yie,

ok anabed gi mirima kodi kendo,

nimar an jangʼwono,

iya ok bi wangʼ kodi nyaka chiengʼ.

13 Yie kethoni kende nikech isengʼanyone

Jehova Nyasaye ma Nyasachi,

isekayo timbegi mag ngʼwono mana ne nyiseche manono

e bwo yiende motimo otiep,

kendo pod ok iluora,’ "

Jehova Nyasaye ema owacho.

14 Jehova Nyasaye wacho niya, "Dwoguru ira, un joga maonge yie, nimar an e chworu. Abiro yierou ka ngʼato achiel oa e dala to ji ariyo koa e anywola mi akelu Sayun. 15 Eka anamiu jokwath ma chunygi chal koda, mabiro telonu gi rieko kod winjo." 16 Jehova Nyasaye wacho niya, "E ndalogo, kakwanu osemedore mangʼeny e piny, ji ok nochak owuo kawacho ni, ‘Sandug Muma mar singruok mar Jehova Nyasaye.’ Ok enodonji e parogi bende ok ginipare; ok nodware, kata moro ok nolosi kendo. 17 E kindeno gibiro luongo Jerusalem ni Kom Loch mar Jehova Nyasaye, kendo ogendini duto nochokre ei Jerusalem mondo omi nying Jehova Nyasaye duongʼ. Ok ginichak gitim tim wich teko, bende ok ginibed gi chuny mar timo richo. 18 E ndalogo od Juda biro riwore gi od Israel, kendo giduto ginibi ka gia e piny ma yo nyandwat nyaka e piny mane amiyo kwereu kaka girkeni.

19 "An awuon ne awacho niya,

" ‘Mano kaka dabed mamor ka akawou kaka yawuota

kendo amiu piny mowinjore,

girkeni maber mogik mar piny moro amora.’

Ne aparo ni unyalo luonga ni ‘Wuonwa,’

kendo ni ok unuwe luwa.

20 To mana ka dhako ma ok ja-ratiro ne chwore,

omiyo usebedo maonge gadieri kuoma, yaye od Israel,"

Jehova Nyasaye ema owacho.

21 Ywak iwinjo e kuonde motingʼore motimo ongoro,

en kuyo gi secho mar jo-Israel,

nikech gisejwangʼo yoregi,

kendo wigi osewil gi Jehova Nyasaye ma Nyasachgi.

22 "Dwoguru, un joma onge yie;

abiro thiedhou kuom baro weyo yo."

"Ee, wabiro biro iri,

nimar in Jehova Nyasaye ma Nyasachwa.

23 Adiera lamo nyiseche mopa ewi gode matindo,

kod gode madongo en wuond;

adier kuom Jehova Nyasaye, ma Nyasachwa,

ema warruok mar Israel yudore.

24 Chakre tinwa nyiseche manono mag wichkuot

osechamo olemb tije wuonewa,

ma gin kweth mar jamni,

kod kweth mag dhok, yawuotgi kod nyigi.

25 We wanind piny e wichkuot marwa,

kendo we timbewa maricho oumwa.

Wasetimo richo ne Jehova Nyasaye ma Nyasachwa,

wan kaachiel gi wuonewa;

chakre ndalo mane wan rowere nyaka odiechiengni

pod ok waluoro Jehova Nyasaye ma Nyasachwa."