Misericórdia
A misericórdia de Deus é eterna e inesgotável. Ele se compadece dos que sofrem, perdoa os arrependidos e derrama graça sobre os que não merecem. Grande é a sua fidelidade.
A misericórdia de Deus
Quem é Deus como tu, que perdoa a iniquidade? Ele se deleita em ter misericórdia e não retém a ira para sempre.
तोर सहीं अऊ कोन परमेसर हवय,
जऊन ह अपन निज भाग के बांचे मनखेमन के
पाप अऊ अपराधमन ला छेमा करथे?
तोर कोरोध ह हमेसा बर नइं रहय
पर दया देखाय म तोला खुसी होथे।
हे परमेसर, अपन बड़े मया के मुताबिक
मोर ऊपर दया कर;
अपन बड़े करूना के मुताबिक
मोर अपराधमन ला मिटा दे।
मोर जम्मो अधरम ला धो डार
अऊ मोर पाप ले मोला सुध कर।
हे यहोवा, अपन बड़े दया अऊ मया ला सुरता कर,
काबरकि ओमन पुराना जमाना ले हवंय।
मोर जवानी के पाप
अऊ मोर बिदरोही काममन ला सुरता झन कर;
अपन मया के मुताबिक मोला सुरता कर,
काबरकि हे यहोवा, तेंह बने अस।
हे यहोवा, मेंह निरासा के गहरई म ले तोला पुकारत हंव;
हे परभू, मोर अवाज ला सुन।
तोर कानमन दया के मोर गोहार ला
धियान देके सुनंय।
हे यहोवा, मोर ऊपर ले अपन दया ला झन हटा;
तोर मया अऊ बिसवासयोग्यता हमेसा मोर बचाव करय।
खचित तोर भलई अऊ मया
मोर जिनगी भर मोर संग रहिही,
अऊ मेंह सदा-सर्वदा यहोवा के घर म
निवास करहूं।
जइसे एक ददा ह अपन लइकामन ऊपर दया करथे,
वइसे ही यहोवा ह ओमन ऊपर दया करथे, जऊन मन ओकर भय मानथें;
Graça e perdão
Onde o pecado abundou, superabundou a graça. Deus convida todos ao arrependimento e promete perdão total aos que confessam.
पर परमेसर के बरदान ह पाप के सहीं नो हय। काबरकि यदि एक मनखे के पाप के कारन बहुंते झन मरिन, त परमेसर के अनुग्रह अऊ बरदान ह बहुंते मनखेमन ऊपर बहुंतायत ले आईस। अऊ ये बरदान ह एक मनखे याने कि यीसू मसीह के अनुग्रह के दुवारा आईस।
त का होईस? का हमन पाप करन काबरकि हमन मूसा के कानून के अधीन नइं पर अनुग्रह के अधीन म हवन? बिलकुल नइं!
पर परमेसर जऊन ह कि दया के धनी अय, हमर बर अपन बड़े मया के कारन, ओह हमन ला मसीह के संग जियाईस, जब हमन अपराध म मर गे रहेंन—अनुग्रह के दुवारा तुम्हर उद्धार होईस।
पर ओह मोला कहिस, "मोर अनुग्रह ह तोर बर बहुंते ए, काबरकि मोर सामर्थ ह दुरबलता म सिद्ध होथे।" एकरसेति खुसी ले, मेंह अपन दुरबलता के ऊपर अऊ घमंड करहूं, ताकि मसीह के सामर्थ ह मोर ऊपर बने रहय।
जऊन ह अपन पाप ला छुपाथे, ओह नइं बढ़य,
पर जऊन ह अपन पाप ला मान लेथे अऊ ओमन ला छोंड़ देथे, ओकर ऊपर दया करे जाथे।
दुस्ट ह अपन चालचलन
अऊ अधरमी ह अपन सोच-बिचार छोंड़य।
ओमन यहोवा कोति फिरंय, अऊ ओह ओमन ऊपर दया करही,
अऊ हमर परमेसर कोति फिरंय, काबरकि ओह बिगर कोनो दाम के छेमा करही।
तभो ले यहोवा ह तुम्हर ऊपर अनुग्रह करे के ईछा रखथे;
एकरसेति ओह तुम्हर ऊपर दया देखाय बर ठाढ़ होही।
काबरकि यहोवा ह नियाय के परमेसर अय
धइन अंय ओ जम्मो, जेमन ओकर ऊपर आसा लगाय रहिथें!
Misericórdia e compaixão
Misericórdia quero e não sacrifício. Deus nos chama a ser misericordiosos como Ele é, perdoando e acolhendo o próximo.
जावव अऊ सीखव कि परमेसर के ये बचन के का मतलब होथे: ‘मेंह बलिदान नइं, पर दया चाहथंव।’ काबरकि मेंह धरमीमन ला नइं, पर पापीमन ला बलाय बर आय हवंव।"
तब पतरस ह यीसू करा आईस अऊ पुछिस, "हे परभू, यदि मोर भाई ह मोर बिरोध म पाप करथे, त मेंह कतेक बार ओला छेमा करंव? का सात बार?"
यीसू ह ओला कहिस, "मेंह तोला नइं कहत हंव कि सात बार, पर सात बार के सत्तर गुना तक।
यदि तुमन ओ मनखेमन ला छेमा करथव, जऊन मन तुम्हर बिरोध म पाप करे हवंय, त तुम्हर स्वरगीय ददा घलो तुमन ला छेमा करही।
पर अपन बड़े दया के कारन तेंह ओमन के नास नइं करय या ओमन ला नइं तियागय, काबरकि तेंह अनुग्रहकारी अऊ दयालु परमेसर अस।
ओमन के भलई होही, जऊन मन उदार मन के अंय अऊ खुले मन से उधार देथें,
जऊन मन अपन काम म नियाय के बरताव करथें।
परभू हमर परमेसर के अनुग्रह हमर ऊपर बने रहय;
हमर बर हमर हांथ के काम ला बनाय रख—
हव, हमर हांथ के काम ला बनाय रख।
Acessar a misericórdia
Cheguemos com confiança ao trono da graça. Ali encontramos misericórdia e graça para socorro no tempo oportuno.
एकरसेति आवव, हमन बिसवास के संग अनुग्रह के सिंघासन करा चलन, ताकि हमर ऊपर दया होवय अऊ जरूरत के बखत, हमन ला मदद करे बर अनुग्रह मिलय।
एकरसेति, हे भाईमन हो! परमेसर के दया के कारन, मेंह तुम्हर ले बिनती करत हंव कि अपन देहें ला जीयत बलिदान के रूप म परमेसर ला दे दव अऊ अपनआप ला निस्कलंक बनाके परमेसर के अइसने सेवा करव कि ओह खुस होवय—एहीच ह परमेसर बर तुम्हर सही अराधना अय।
"काबरकि परमेसर ह संसार ले अइसने मया करिस कि ओह अपन एकलऊता बेटा ला दे दीस, ताकि जऊन कोनो ओकर बेटा ऊपर बिसवास करय, ओह नास नइं होवय, पर परमेसर के संग सदाकाल के जिनगी पावय।
काबरकि मसीह कोति ले, तुमन ला ये मऊका देय गे हवय कि न सिरिप तुमन ओकर ऊपर बिसवास करव, पर ओकर बर दुख घलो उठावव।
हिजकियाह ह जम्मो इसरायल अऊ यहूदा म खबर भेजिस अऊ एपरैम अऊ मनस्से ला घलो नेवता देवत चिट्ठी लिखिस कि तुमन यरूसलेम म यहोवा के मंदिर म आवव अऊ यहोवा, इसरायल के परमेसर के फसह के तिहार मनावव। राजा अऊ ओकर करमचारी अऊ सभा के जम्मो मनखेमन यरूसलेम म दूसर महिना म फसह के तिहार मनाय के फैसला करिन। ओमन ये तिहार ला नियमित रूप म नइं मनाय पाय रिहिन, काबरकि परयाप्त पुरोहितमन अपन संस्कार नइं करे रिहिन अऊ मनखेमन यरूसलेम म संकलाय नइं रिहिन। ये योजना ह राजा अऊ जम्मो सभा ला सही लगिस। ओमन पूरा इसरायल म बेरसेबा ले लेके दान तक एक घोसना करे के फैसला करिन कि मनखेमन यरूसलेम आवंय अऊ यहोवा, इसरायल के परमेसर के फसह के तिहार मनावंय। काबरकि ओमन अतेक बड़े संखिया म येला नइं मनाय रिहिन, जइसे कि किताब म लिखे गे रिहिस।
राजा के हुकूम ले, दूतमन राजा अऊ ओकर अधिकारीमन के चिट्ठी लेके इसरायल अऊ यहूदा के पूरा देस म गीन, अऊ चिट्ठी म ये लिखाय रहय:
"हे इसरायल के मनखेमन, यहोवा करा लहुंट आवव, जऊन ह अब्राहम, इसहाक अऊ इसरायल के परमेसर अय, ताकि ओह तुम्हर करा लहुंट आवय, जेमन बचे हवव, जेमन अस्सूर के राजामन के हांथ ले बांच गे हवव। अपन दाई-ददा अऊ अपन संगी इसरायलीमन असन झन बनव, जेमन यहोवा, अपन पुरखामन के परमेसर बर बिसवासघाती हो गीन, जेकर कारन ओह ओमन ला आतंक के चीज बना दीस, जइसे कि तुमन देखत हवव। अपन पुरखामन असन हठी झन बनव; यहोवा के अधीन होवव। ओकर पबितर-स्थान म आवव, जेला ओह हमेसा बर संस्कार करे हवय। यहोवा अपन परमेसर के सेवा करव, ताकि ओकर भयंकर कोरोध ह तुम्हर ले दूरिहा हो जावय। यदि तुमन यहोवा करा लहुंट आहू, त तुम्हर संगी इसरायली अऊ तुम्हर लइकामन ऊपर ओमन के कैद करइया दुवारा दया देखाय जाही अऊ ओमन ये देस म लहुंट आहीं, काबरकि यहोवा तुम्हर परमेसर ह अनुग्रह करइया अऊ दयालु अय। यदि तुमन ओकर करा लहुंट आहू, त ओह तुम्हर ले अपन मुहूं नइं मोड़य।"
दूतमन एपरैम अऊ मनस्से म नगर-नगर ले होवत जबूलून के इलाका तक गीन, पर मनखेमन ओमन के अपमान अऊ ठट्ठा करिन। तभो ले, आसेर, मनस्से अऊ जबूलून के कुछू मनखेमन अपनआप ला नम्र करके यरूसलेम चले गीन। यहूदा म घलो परमेसर के हांथ मनखेमन ऊपर रिहिस कि ओमन यहोवा के बचन म चलत राजा अऊ ओकर अधिकारीमन के हुकूम ला पूरा करे बर एक मन हो गीन।
दूसर महिना म अखमीरी रोटी के तिहार मनाय बर यरूसलेम म मनखेमन के एक बड़े भीड़ जूर गीस। ओमन यरूसलेम म बेदीमन ला हटा दीन अऊ धूप के बेदीमन ला हटाके ओमन ला किदरोन घाटी म फेंक दीन।
ओमन दूसर महिना के चौदहवां दिन फसह के मेढ़ा-पीला बलिदान करिन। पुरोहित अऊ लेवीमन सरमिंदा होईन अऊ ओमन अपनआप ला पबितर करिन अऊ यहोवा के मंदिर म होम-बलिदान लाईन। तब ओमन परमेसर के जन मूसा के कानून के मुताबिक अपन नियमित जगह ला लीन। पुरोहितमन लेवीमन के दुवारा देय गे खून ला बेदी म छिंच दीन। काबरकि भीड़ म बहुंते अइसे मनखे रिहिन, जेमन अपनआप ला पबितर नइं करे रिहिन, तेकर खातिर लेवीमन ला ओ जम्मो मनखेमन बर फसह के मेढ़ा-पीलामन ला मारे ला पड़िस, जेमन बिधि के मुताबिक सुध नइं होय रिहिन अऊ अपन मेढ़ा-पीलामन ला यहोवा बर संस्कार नइं कर सके रिहिन। हालाकि एपरैम, मनस्से, इस्साकार अऊ जबूलून ले आय बहुंत अकन मनखेमन अपनआप ला सुध नइं करे रिहिन, तभो ले कानून म लिखे बात के उल्टा ओमन फसह ला खा लीन। पर हिजकियाह ह ये कहिके ओमन बर पराथना करिस, "यहोवा, जऊन ह बने अय, जम्मो ला छेमा करय जऊन ह ओमन के मन ला अपन परमेसर के खोज म लगाथे—यहोवा, ओमन के पुरखामन के परमेसर—भले ही ओमन पबितर-स्थान के नियम के मुताबिक सुध नइं अंय।" अऊ यहोवा ह हिजकियाह के पराथना ला सुनिस अऊ मनखेमन ला चंगा करिस।
जऊन इसरायलीमन ओ समय यरूसलेम म रिहिन, ओमन सात दिन ले अखमीरी रोटी के तिहार अब्बड़ आनंद के संग मनाईन, जबकि लेवी अऊ पुरोहितमन हर दिन बाजामन के अवाज के संग यहोवा के परसंसा करत रिहिन।
हिजकियाह ह ओ जम्मो लेवीमन ला उत्साह के बात कहिस, जेमन यहोवा के सेवा म बने समझदारी देखाईन। काबरकि सात दिन तक ओमन अपन ठहिराय भाग ला खाईन अऊ मेल-बलिदान चघाईन अऊ यहोवा, अपन पुरखामन के परमेसर के परसंसा करिन।
तब सभा के जम्मो मनखेमन तिहार ला अऊ सात दिन तक मनाय बर सहमत हो गीन; एकरसेति अऊ सात दिन तक ओमन आनंद सहित तिहार मनाईन। यहूदा के राजा हिजकियाह ह सभा बर एक हजार बईला अऊ सात हजार भेड़ अऊ बकरी दीस, अऊ अधिकारीमन ओमन ला एक हजार बईला अऊ दस हजार भेड़ अऊ बकरी दीन। अब्बड़ संखिया म पुरोहितमन अपनआप ला पबितर करिन। यहूदा के जम्मो सभा ह पुरोहित अऊ लेवीमन संग आनंद मनाईस अऊ ओमन घलो जेमन इसरायल ले जमा होय रिहिन, ओमा ओ परदेसीमन घलो रिहिन, जेमन इसरायल ले आय रिहिन अऊ ओमन घलो जेमन यहूदा म रहत रिहिन। यरूसलेम म बहुंत आनंद मनाय गीस, काबरकि इसरायल के राजा दाऊद के बेटा सुलेमान के दिन ले यरूसलेम म अइसन उत्सव नइं मनाय गे रिहिस। पुरोहित अऊ लेवीमन मनखेमन ला आसीरबाद देय बर ठाढ़ हो गीन, अऊ परमेसर ह ओमन के सुनिस, काबरकि ओमन के पराथना ह स्वरग म, ओकर पबितर निवास म हबर गीस।
"यदि कोनो मनखे ह अपन घरवाली ला तियाग देथे
अऊ ओ माईलोगन ह ओला छोंड़के आने आदमी ले बिहाव कर लेथे,
त का ओ पहिला आदमी ला ओ माईलोगन करा फेर वापिस जाना चाही?
का ओ देस ह पूरा असुध नइं हो जाही?
पर तेंह कतको मयारूमन संग एक बेस्या सहीं रहे हस—
त फेर, का अब तेंह मोर करा लहुंटके आबे?"
यहोवा ह ये घोसना करत हे।
"बंजर टीलामन कोति आंखी उठाके देख।
कोनो अइसने जगह हवय, जिहां तेंह कुकरम नइं करे हस?
तेंह सड़क-तीर म अइसने बईठके मयारूमन के बाट जोहय,
जइसने एक घुमंतू मनखे ह सुन्ना जगह म बईठे रहिथे।
तेंह अपन बेभिचार अऊ दुस्टता के काम ले
देस ला असुध कर दे हस।
एकरसेति, बरसात ला रोक दे गे हवय,
अऊ बसन्त रितु के बारिस नइं होईस।
तभो ले, तेंह एक बेस्या सहीं दिखत हस;
तोर म सरम नांव के चीज ही नइं ए।
का तेंह अभी मोला ये कहिके नइं बलाय:
‘हे मोर ददा, हे मोर जवानी के संगी,
का तेंह हमेसा गुस्सा करत रहिबे?
का तोर कोरोध ह सदाकाल तक बने रहिही?’
तेंह अइसने गोठियाथस,
पर तेंह ओ जम्मो दुस्ट काम करथस, जेला तेंह कर सकथस।"
योसियाह राजा के सासन के समय, यहोवा ह मोला कहिस, "का तेंह देखे हस कि बिसवासहीन इसरायल ह का करे हवय? ओह जम्मो ऊंच पहाड़ अऊ जम्मो छायादार रूखमन के खाल्हे म जाके बेभिचार करे हवय। मेंह सोचत रहेंव कि ये जम्मो काम करे बाद, ओह मोर करा लहुंटके आ जाही पर ओह नइं आईस, अऊ ओकर बेईमान बहिनी यहूदा ह येला देखिस हे। मेंह बिसवासहीन इसरायल ला ओकर जम्मो बेभिचार के कारन, ओला तियाग पतर देके भगा दे हंव। तभो ले, मेंह देखेंव कि ओकर बेईमान बहिनी यहूदा म कोनो डर नइं रिहिस; ओह घलो बाहिर जाके बेभिचार करिस। काबरकि इसरायल के छिनारीपन ह ओकर बर नानकून बात रिहिस, एकरसेति ओह देस ला असुध करिस अऊ पथरा अऊ कठवा के संग बेभिचार करिस। ये जम्मो होय के बावजूद, ओकर बेईमान बहिनी यहूदा ह अपन पूरा मन से मोर करा नइं लहुंटिस, पर लहुंटे के सिरिप दिखावा करिस," यहोवा ह ये घोसना करत हे।
यहोवा ह मोला कहिस, "बिसवासहीन इसरायल ह बिसवासघाती यहूदा ले जादा धरमी अय। जा अऊ उत्तर दिग म ये संदेस के घोसना कर:
" ‘हे बिसवासहीन इसरायल, लहुंट आ,’ यहोवा ह ये घोसना करत हे,
‘मेंह तोर ऊपर अब गुस्सा नइं करंव,
काबरकि मेंह बिसवासयोग्य अंव,’ यहोवा ह ये घोसना करत हे,
‘मेंह सदाकाल बर गुस्सा नइं होवंव।
सिरिप अपन दोस ला मान ले—
तेंह यहोवा अपन परमेसर के बिरूध बिदरोह करे हस,
तेंह जम्मो छायादार रूखमन के खाल्हे
बिदेसी देवतामन बर अपन मया देखाय हस,
अऊ मोर बात ला नइं माने हस,’ "
यहोवा ह ये घोसना करत हे।
"हे बिसवासहीन मनखेमन मोर करा लहुंट आवव," यहोवा ह ये घोसना करत हे, "काबरकि मेंह तुम्हर घरवाला अंव। मेंह तुमन ला चुनहूं—एक नगर ले एक झन अऊ एक बंस ले दू झन—अऊ तुमन ला सियोन म लानहूं। तब मेंह अपन मन मुताबिक तुमन ला चरवाहा दूहूं, जऊन मन गियान अऊ समझ के संग तुम्हर अगुवई करहीं। ओ दिनमन म, जब तुम्हर गनती ह देस म बढ़ जाही," यहोवा ह ये घोसना करत हे, "मनखेमन फेर ये नइं कहिहीं, ‘यहोवा के करार के सन्दूक।’ ये बात ह ओमन के मन म कभू नइं आही या येला ओमन कभू सुरता नइं करहीं; ओकर कमी महसूस नइं होही, अऊ न ही दूसरा बनाय जाही। ओ बेरा म, ओमन यरूसलेम ला यहोवा के सिंघासन कहिहीं, अऊ जम्मो जाति के मनखेमन यहोवा के नांव ला आदर देय बर यरूसलेम म जूरहीं। ओमन अपन पापी हिरदय के ढीठपन के पाछू फेर नइं चलहीं। ओ दिनमन म, यहूदा के मनखेमन इसरायल के मनखेमन संग मिल जाहीं, अऊ ओमन एक संग उत्तर दिग के एक देस ले ओ देस म आहीं, जेला मेंह तुम्हर पुरखामन ला एक उत्तराधिकार के रूप म देय रहेंव।
"मेंह खुद कहेंव,
" ‘कतेक खुसी से मेंह तोला अपन लइकामन सहीं समझके
तोला एक मनभावन देस दे हंव,
जऊन ह कि कोनो भी देस के सबले सुघर उत्तराधिकार अय।’
मेंह सोचेंव कि तेंह मोला ‘ददा’ कहिबे
अऊ मुहूं फेरके दूरिहा नइं जाबे।
पर जइसने ओ माईलोगन, जऊन ह अपन घरवाला संग बिसवासघात करथे,
वइसने ही, हे इसरायल, तेंह घलो मोर संग बिसवासघात करे हस,"
यहोवा ह ये घोसना करत हे।
बंजर टीलामन ले एक अवाज आवथे,
इसरायली मनखेमन के रोये अऊ गोहारे के अवाज सुनई देवत हे,
काबरकि ओमन अपन सही रसता ला छोंड़ दे हवंय
अऊ यहोवा अपन परमेसर ला भुला गे हवंय।
"हे बिसवासहीन मनखेमन, लहुंट आवव;
मेंह तुम्हर भटकई ला सुधार दूहूं।"
"हव, हमन तोर करा आबो,
काबरकि तेंह यहोवा हमर परमेसर अस।
सच म पहाड़ी अऊ पहाड़मन म
मूरती-पूजा के कोलाहल ह एक धोखा अय;
निस्चय ही यहोवा हमर परमेसर म
इसरायल के उद्धार हवय।
हमर जवानी के समय ले ओ कलंकित देवतामन
हमर पुरखामन के कमई के फर ला—
ओमन के भेड़-बकरी, गाय-बईला,
अऊ बेटा-बेटीमन ला खा डारे हवंय।
आवव, हमन लज्जित होके लेट जावन,
अऊ हमर कलंक ह हमन ला ढांप लेवय।
काबरकि हमर पुरखामन अऊ हमन घलो
यहोवा हमर परमेसर के बिरूध पाप करे हन;
हमर जवानी के समय ले लेके आज तक
हमन यहोवा हमर परमेसर के बात ला नइं माने हन।"