18 Úati amu Bungiu kei buguya,

ladüga feruduna bumuti wuribani,

bulíei bumuti hariban fiuraü

hádangiñe bumutuniña ha.

Arufuda bumuti bínsiñehabu woun,

meredetibu lau igañi lun sun dan.

1 Gudemená bun Bungiu Baba luagu bínsiñehabu;

luagu lueirin bubuidun, ferudunabéi nidurun.

2 Chibabana lídangiñe wuribani le gádanbalina!

Harumagüdabana lídangiñe nifigoun!

6 Nabureme,

haritaguabá luagu ínsiñehabuni luma gudemehabu

le arufuda báalibei woun súnwandan

7 gama lumoun maritaguabá luagu nifigoun,

ni luagu wuribati le meha nadügübei dan meha nibureingidina.

Haritaguabá nuagun, Bungiu,

luagu lueirin bínsiñehabu luma bareini.

1 Nabureme, agúahatina bun lídangiñe

lilulin-agei huyu.

2 Aganbabéi numalali Aburemei!

Tenilá barigeirugu lun nagúaragun ayumuragua!

11 Nabureme, mamaharabá lau bínsiñehabu nun!

Góunigilana bínsiñehabu luma binarün súnwandan!

6 Falá lumutina bareini luma bínsiñehabu

lidan sun nabagaridun,

ani naganóuba tidan buban Nabureme lun súnwandan.

13 Areidati Aburemei houn ha inebehabubaña lun

kei ligaburi aban úguchili hama lirahüñü;

15 Gama lumoun mítaranti idewesei le líchugubei Bungiu kei lumaganbadin Adán, ladüga anhein hilagua habéi saragu luagu lifigoun ábanrügü, gánwounguati lugudemehabu luma lidewese Bungiu houn saragu luagu lugudemehabu ábanrügü, Hesukrístu.

15 Wafigouhamemebati luéigiñerügü mámaadiwa lan lábugiñe lúrudu, luéigiñe lábugiñehadiwa lan lareini Bungiu? Uá mama luba!

4 Gama lumoun wéiriti wagudemen luma wínsiñe lun Bungiu; 5 aba líchugun ibagari woun lídangiñe Kristu lau sun meha hilañugidiwa lan ladüga wafigoun. Sálbatün lubeiti luagu lareini Bungiu.

9 lariñaga Nabureme nun: «Anahein buma lau nínsiñehabu, ani buídurügüti lira lun bawanduni sun asufuriruni; buítimati larihín nubafu buagu dan le débili ban». Gúndaatina lubeiti lau nidebilin, lun larufuduni Kristu lubafu nuagu.

13 Ha adouragutiña lau hafigoun, mídinbei houn buidu,

ánhaña ha agufeserútiña hafigoun, aba hígiruni,

feruduna lubaña Bungiu.

7 Ígiralei wügüri le wuribabei lagübüri lémeri,

ígiraleime salufuriti luriban lisaminan;

giribu humá lun Aburemei ábame gudemehabu lan hun;

giribu humá lun Wabungiute, le mánginbei lun feruduna lanün.

18 Gama lumoun lagurabuñadün Wabureme lau lugudemehabu hun; busenti larufuduni línsiñehabu hun, lugundun richati Wabureme le Wabungiute. Fuleseiwatiña sun ha hemenigibaña luagu!

13 Furendei huméi ka lan lanichigubei le uágubei lariñaga Bungiu tidan Lererun: "Busentina lun gudemehabu humá, mama lun hadagaragüdün animaalugu nun". Mama niábiña áluahaña ha richaguabaña ligibugiñe Bungiu, niábiña áluahaña gafigountiña lun hasansiruni ligaburi hóuserun.

21 Aba layarafadun Féduru lun Hesusu, aba lariñagun lun:

—Nabureme, átiribei san wéiyaasu ladügün níbiri aban wuribani nun lun ferudunameme nani? Darí san sedü wéiyaasu?

22 Aba lariñagun Hesusu lun:

—Mariñaguntina bun luagu darí lan sedü wéiyaasu lunti feruduna bani, darí ǘrüwa-wein-diisi wéiyaasu sedü.

14 «Ítara liña lubeiti, ánhaña feruduna humá amu luagu wuribati le adüga hamaalibei hun, feruduna lubadün giñe Húguchi Bungiu le siélubei;

31 Gama lumoun ladüga lueirin bugudemehabu, máfaragun bumutiña, mágurun bumutiña giñe; ladüga aban lan Bungiu gudemehabuti buguya.

5 gürigia ha buídubaña,

rútiña furedeiti lau areini,

adüga hamuti hamarasun lau arumani;

17 Ñeinlá lareini Aburemei le Wabungiute wawagu.

Bungiu adügabá lun derebugu lan buadigimari wadan! Anha Bungiu, derebugugüdabei buadigimari wadan!

16 Ligía lunti lubéi wayarafadun lau afiñeni lun lálana larúeihan Bungiu le hínsiñehabubei woun, lun gudemehabu lan woun, íderagua láwame lau lareini lidan wemegeirun.

1 Amuriahatina lubeiti huma, niduheñu, lun hederegeragun hungua sunsuinagubei lun Bungiu keisi adagaragüdüni wínwanti, sánduti ani le auti lagundaara Bungiu, anihán lichugúniwa uéiriguni le lunbei híchuguni.

16 Aba lasigirun Hesusu ariñaga:

«Ladüga wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi.

29 Ladüga Kristu, gayaraati mámarügü lun hafiñerun luagu, gayaraati giñe hasufurirun luéigiñe.

1 Aba lóunahan Esekíasi awisaha lidan sun Ísüraeli luma Hudá, óunaha ligía gárada houn lílana Éfürain luma Manasési, amisurahaña lun houdin litenpulunrugu Wabureme uburugu Herusalén efeduhei lani Wabureme le Lubungiute Ísüraeli Luéyuri Esefuruni. 2 Lárigiñe lálügüdagun urúei lungua hama lánigu luma hama sun lílana Herusalén, aba hariñagun lun hefeduhani Luéyuri Esefuruni lidan libiaman hati, 3 kei siñá lan buga lefeduhani lidan lidaani lugundun lougua hamá fádirigu ha arumadaguagüdütiña houngua ligibugiñe Wabungiute, móundaragun hagía lílana fulasu Herusalén. 4 Keiti dandu lubéi urúei kei sun lílana fulasu gúndaatiña lun ítara luba lan, 5 aba hadügün lun haburuchaguagüdüni ñunsu houn sun lílana Ísüraeli lúmagiñe Bérüsewagiñe darí Dan, lun houdin Herusalén efeduhei lani Wabureme le Lubungiute Ísüraeli Luéyuri Esefuruni. Lugundun mefeduhan hamutiñaha hau saragu gürigia kei bugaha labürüdüni ítara luba lan lefeduhóuniwa.

6 Ábati háfuridun láutiña uganu lidoun sun Ísüraeli luma Hudá tau gárada lúmagiñetu urúei hama lánigu lun lagidenehoun lererun urúei:

«Ísüraelina: Giribu humá lun Wabungiute le Lubungiute Abüraámü, Isaakü luma Hakobu, ábame giñe lagiribudun hun, huguya ha esefurubaña háhaburugugiñe lurúeitegu Asiria. 7 Mítaran humá kei hagüchagu luma kei híbirigu ha bugaha lederegerubaña Wabungiute lun hagünrinchawagun, ladüga múaran lan hóuserun ligibugiñe Wabungiute le Habungiute hagüchagu. 8 Mamaganbadi humá lubeiti kei meha hagüchagu; tulé huméi húhabu lun Wabureme lun hiseridagüdüni daradu, ñübuin humá tidoun litenpulun to lanúadiruboun lun súnwandan. Seriwi humá lun Wabureme le Hubungiute ábame lerederun lagañidun hun. 9 Anhaün agiribuda lun Wabureme hagudemeduba híbirigu hama hirahüñü houn áganiñu ha gámabaliña adaürǘwa ábame hígiragüdüniña lun hagiribudun lidoun ageiraü le, lugundun Wabureme le Hubungiute, buiti ani gudemehabu ligía, ani mamahanbei leresibirunün anhaün agiribuda lun».

10 Éibuga hamuti láutiña uganu sun lumúan Éfürain luma Manasési lídangiñe aban uburugu lun lidoun aban darí hachülürün Sabulón. Gama lumoun ábaha héherahan mutu hau, adaagua hagía bula hau. 11 Gama lumoun ñéinñanu fiu wügüriña hádangiñe lani Aserü, Manasési luma Sabulón türibu aba hǘnabudaguagüdün houngua ligibugiñe Wabungiute, aba houdin Herusalén. 12 Ru lumuti giñe Wabungiute tidoun hanigi lílana Hudá lun húaraduba lan lun hagunfuliruni lererun urúei hama lúrudugu, según le lariñagubei Wabureme.

13 Aba lubeiti lóundaragun aban óunwenbu adamurini Herusalén lidan libiaman hati lun hefeduhani tufedun fein maganatu lébini. 14 Aba hagumeserun lau hagidahani sun latarü luma burí fulasu le lágudaagüle kupali le Herusalénbei, aba hachagaruni lidoun lidunari Sedurón. 15 Weyu katorusu lidan libiaman hati ligía háfaruni mudún le lánina Luéyuri Esefuruni. Aba habusigaridagun fádirigu habu Lewitagu hámawagua, ligía harumadaguagüdünbei houngua, aba hanügün animaalugu lun adagaragüdüni gudawarügüti litenpulunrugun Wabungiute. 16 Lárigiñe aba hárügüdüni habara tidan ténpulu según larufudun lidan lilurudun Moisesi le luwügürin Wabungiute. Ábaha habahichaguni fádirigu hitaü le hederegerubei Lewitagu houn. 17 Ñéinñanu saragu gürigia ha marumadaguagüdüngiña houngua ligibugiñe Wabungiute, ligía lubeiti háfarunbaliña Lewitagu mudún ha hadewese sun gürigia ha marumadaguagüdüngiñabaña houngua lidan Luéyuri Esefuruni, lun hederegeruniña lun Wabungiute. 18 Saragu haña lubeiti gürigia lílana Éfürain, Manasési, Isakárü luma Sabulón gadan lumutiña leigín léigina Luéyuri Esefuruni gama lumoun mama lau úarani luma lubudubu lugundun marumadaguagüdüntiña houngua ligibugiñe Wabungiute. Gama lumoun furíeiti Esekíasi hawagu, lariñaga:

—Wabungiute areidati, ferudunabaña sun ha áluahabalibu tau sun hanigi, 19 Wabureme, Habungiute wagüchagu, ferudunabaña lau sun marumadaguagüdün hamá houngua kei lariñaguni tilurudun ténpulu.

20 Aba laganbuni Wabungiute lafurieidun Esekíasi, aba feruduna lániña. 21 Ítara liña lubeiti, lidan sedü weyu, efeduha hamuti Ísüraelina ha Herusalénbaña tufedun fein maganatu lébini, lau saragu ugundani. Sagü weyu heremuhan fádirigu hama Lewitagu lun Wabungiute lau katei burí lánina íñaahani luma áfaruni le sagüráuburibei. 22 Aba ladimurehan Esekíasi buidu houn Lewitagu luagu lubuidun hadundehani kultu lánina lalawahóun Wabungiute.

Lárigiñeti heigin lidan éigini lánina fedu luagu sedü weyu, dagagüda hagía adagaragüdüni lánina arandaruni, eremuha hagía lun Wabungiute le Habungiute hagüchagu, 23 aba hachawaraguni sun lílana fulasu fedu luáguya sedü weyu, le hadügübei lau saragu ugundani; 24 lugundun edewehati Esekíasi le lurúeite Hudá milu bágasu wügüriña ha ñǘbürigiña hama sedü-milu mudún houn, edeweha hagía lúrudugu milu bágasu wügüriña ñǘbürigiña hama diisi-milu mudún houn lílana fulasu. Saragu haña fádirigu arumadaguagüdütiña houngua ligibugiñe Wabungiute. 25 Gúndaatiña sun lílana Hudá, dandu fádirigu, Lewitagu hama sun gürigia ha ñǘbuinbaña Ísüraeligiñe, hama terencha ha ñǘbuinbaña lumúanrugugiñe Ísüraeli o ha lan aganóubaña Hudá. 26 Ñeinñein lubeiti saragu ugundani Herusalén, lugundun lúmagiñe bugaha lidaani urúei Salomón le liráü Dawidi, masuseredunti katei líbeina le ñein. 27 Lárigiñe rara hagía fádirigu hama Lewitagu, aba habiniruniña lílana fulasu, ani aganba lumutiña Wabungiute, chülüti hafurieidun sielu le ñein lubéi laganawa Wabungiute le Sándubei.

1 Lariñahare Aburemei:

«Anhein ígiragua aban wügüri tuma lúmari,

aba tamarieidun luma amu wügüri,

móundarundigiaalime le furumiñeti tumoun,

lugundun ábanbei anabawaguni wéiriti lira lun hageira.

Lau sun lira, buguya Ísüraeli,

ahoruhaadibu hama saragu ubúaligu,

ani guentó, busentibu bagiribudun nun!

Au le Aburemei ariñagubalin».

2 «Arihabéi burí wübü hiyaali, arihabéi buidu:

Anihein funa fulasu le ñein lumuti marounrun ban kei horu?

Ñurutibu kei Arawiana lidan fulasu mageirawati,

agurabahaña bubúaligu laru üma.

Dasei baali fulasu lau bahoruhan luma buriban.

3 Ligía mégeihali lubéi huya lidan lidaani.

Mabusigaritibu kei aban horu;

Nibusigarírügütibu hamuga!

4 Málügili lúmagiñe bariñagunñaha nun:

"Núguchi, numada lúmagiñe niñüraü,

5 gáñibadibu san súnwandan?

Laduraruba san bigañi lun sun dan?"

Gama lumoun sun abunha lan álügüdaguana

abunha adügei sun wuribati le biyaraati».

6 Aba lariñagun Aburemei nun lidaaniwagu urúei Hosíasi:

—Ariha baali san le tadügübei mabuchahatu Ísüraeli? Rúguatu tungua ahoruha luagu sun wübü íñuti luma lábugiñe sun tídibu wewe hilumati. 7 Naritagun yebe luagu tagiribuduba lan nun, lárigiñe sun le adüga táalibei, gama lumoun magiribudúntu. Ariha tumuti Hudá to tamulelua to giñe mabuchahaboun sun le; 8 ariha tumuti giñe luagu ígira nanu mabuchahatu Ísüraeli, ani nígirunbarun lan ladüga agabarahani le tadügübei. Gama lumoun Hudá to móusanboun to tamulelua Ísüraeli, manufudeduntu, aba giñe tíchaagun tungua lun ahoruhani. 9 Ani tadügei lau saragu lumenrengun darí lun tawiyeduni fulasu. Aba tadügün maricharaguni áhuduragua lun dübü luma burí lun tídibu wewe 10 Lárigiñe sun le, magiribudúntu maricharaguntu Hudá numoun tau sun tanigi, yéedaguarügütana. Au le Bungiu ariñagubalin.

11 Aba lariñagun Bungiu nun:

—Ísüraeli to dereboun aganbun, maweirinti tidurun kei Hudá to maricharagunboun. 12 Beiba, bariñageime uganu le, lau bigibu luagun nórute:

«Lariñahare Aburemei:

"Giribubá nun, mabuchahatu Ísüraeli!

Meresibirun nubadibu lau luriban,

magañidun aume lun sun dan, lugundun gudemehabutina.

Au le Aburemei ariñagubalin.

13 Buídurügüti lun bánharun luagu adügaadibu lan wuribani,

ani mabuchaha ban lun Wabureme le Bubungiute;

luagu ñüdün ban áluaha hínsiñehabu terencha

lábugiñe tídibu wewe hilumatu,

luagu madügün ban gasu lau nererun.

Au le Aburemei ariñagubalin" ».

14 Lariñahare Aburemei:

—Giribu humá nun isaanigu mabuchahatiña, lugundun au Haburemebei. Nanügüba aban lídangiñe kada uburugu, biámame hádangiñe kada iduheñu, ábame nagiribudagüdünün uburugun Sión. 15 Níchuguba arúeihatiña hun ha áutiña nagundaara, lun hadundehanün lau lichú aau luma gunfurandaü. 16 Danme le gíbeguaadün fulasurugu, danme gíbeeña hisaanigu, madimurehóunhalime tuagu lubagüsinina lidaradun Aburemei; masaminarúnwabei maritawagún ligíame tuagun; memegeirúnwaarume, madügǘniwa tuguyame teweñegua. Au le Aburemei ru numuti nererun. 17 Ligíameti dan ligía laguarúniwa lun Herusalén lálana larúeihan Aburemei hóundaraguba sun néchanigu ñein, lun híchugun uéiriguni nun, mafaladigia hamaalime wuribani le tídanbei hanigi.

18 —Danme lachülürün weyu ligía, lóundaruba Hudá lumoun Ísüraeli, ábame hagiribudun úara lídangiñe ageiraü le nóruterugubei lidoun múa le níchugubei houn hagüchagu kei halagante.

19 «Ísüraeli, busentina yebe neresibirunibu kei niráü,

lun níchugun aban fulasu gimugawati bun,

ageiraü le buídutimabei ubouagu.

Naritagun yebe luagu bagúaruba lan nun núguchi,

luagu madisedunbadibu lan hamuga nuéi.

20 Gama lumoun kei aban würi to maricharaguntu lun túmari,

ítara liña maricharagun humá nun.

Au, le Aburemei ariñagubalin».

21 «Aganbúati umalali luagu burí wübü le maganóunwati luagu:

Hamalali Ísüraelina ha ayahubaña, amuriaha gudemehabu!

Geyerügütiña luéi üma le surubei, ani aba habulieidagun nuéi,

au le Aburemei le Habungiute.

22 Giribu humá nun, isaanigu mabuchahatiña,

ábame nagaranihan hun luéi mabuchahaü».

«Awanhán, wayabiña bun,

ladüga buguya Aburemeibei le Wabungiute.

23 Málati woudin luagun burí wübü agúaraha;

lídanrügüñein Aburemei le Wabungiute

ladarirei Ísüraeli lesefurun.

24 Le meha habihubei wagübürigu lúmagiñe ñǘbürigidiwa,

mudún, bágasu hama isaanigu,

féridigüdala bulíeiguaü woun.

25 Rugua wamá lubeiti woungua ǘnabu,

lau busiganu luma maweiriguni,

lugundun lúmagiñe ñǘbürigidiwa chülǘ lumoun dan le,

dandu wagía kei wagüchagu,

afigouhaadiwa ligibugiñe Aburemei le Wabungiute,

ani madügün wamuti le lubeibei».