28 Paľis, sar imar dikhľa o Ježiš, hoj hin savoro dokerdo a hoj pes te naplňinel oda, so hin pisimen, phenďa: „Smedno som!" 29 Sas ode čaro, andre savo sas šut. Močinde e špongija andro šut, phandle la pre izoposkri paca a thode leske la paš o vušta. 30 Sar o Ježiš koštoľinďa o šut, phenďa: „Dokerdo hin!" Zmukľa tele o šero a mukľa avri peskre duchos.

23 Sar imar o slugaďa ukrižinde le Ježiš, rozďelinde leskre gada pro štar kotora, dojekhe slugaďiske jekh kotor. Ile the o teluno gad, savo na sas sido, ale sas jekhe pochtanestar uprunestar dži tele 24 a phende peske: „Na čhingeras les, ale losinas vaše, kaskro ela." Aleha pes ačhiľa oda, so hin pisimen:

„Rozďelinde peske maškar peste mire gada

a vaš miro ruchos peske čhide losos."

Kada hin oda, so kerde o slugaďa.

25 Paš o kerestos le Ježišoskro ačhelas leskri daj, leskra dakri pheň, e Maria, so sas romňi le Kleofašiskri, the e Maria Magdalena. 26 Sar o Ježiš ode dikhľa peskra da a the le učeňikos, saves kamelas, hoj ačhel paš late, phenďa peskra dake: „Džuvľije, dikh, tiro čhavo!" 27 Paľis phenďa le učeňikoske: „Dikh, tiri daj!" Akorestar la iľa oda učeňikos ke peste.

33 Sar avle pre oda than, so pes vičinel Lebka, ode les ukrižinde a leha the ole živaňen – jekhes pal e čači sera a dujtones pal e baľogňi. 34 O Ježiš phenďa: „Dado, odmuk lenge, bo na džanen, so keren!" Paľis peske rozďelinde leskre gada a losinenas vaše.

35 O manuša ačhenas a dikhenas. O židovika vodci lestar asanas a phenenas: „Avren zachraňinelas! Mi zachraňinel the korkoro pes, te hino o Mesijašis, oda avrikidlo le Devleskro!"

36 Asanas lestar the o slugaďa, avenas a denas les šut. 37 Phenenas: „Te sal tu oda kraľis le Židengro, zachraňin tut!"

38 Upral leste sas pisimen: „Kada hin o kraľis le Židengro!"

39 Jekh olendar, so leha sas ukrižimen, vakerelas pre leste: „Či na sal tu o Kristus? Zachraňin the tut the amen!"

40 Ale oka dujto leske dovakerďa zorales: „Na daras tut le Devlestar? Se the tu sal odsudzimen avke sar ov! 41 Amen sam marde čačipnaha vaš oda, so kerďam, ale ov na kerďa ňič nalačho!"

42 A phenďa: „Ježiš, leper tuke pre ma, sar aveha andre tiro kraľišagos."

43 O Ježiš leske phenďa: „Čačipen tuke phenav, adadžives aveha manca andro rajos."

33 Dešuduj (12) orendar* pro dilos avľa kaľipen pal caľi phuv a ľikerďa dži trin ori* pal o dilos. 34 A trin orendar o Ježiš zorales vičinďa: „Eloi, Eloi, lama sabachtani?" – so hin prethodo: „Devla miro, Devla miro, soske man omukľal?"

51 Akor o pochtan, so sas figimen andro chramos, phariľa pro jepaš uprunestar dži tele, e phuv razisaľolas a o skali pharonas. 52 O hrobi pes phundravenas a but sveta manuša ušťile andral o meriben. 53 Avle avri andral o hrobi paloda, sar o Ježiš ušťiľa andral o meriben, a gele andro sveto foros, kaj pes sikade but dženenge.

54 Sar dikhľa o veľiťeľis the ola, ko leha stražinenas le Ježiš, hoj e phuv razisaľolas, a the oda savoro, so pes ačhelas, igen pes daranas a phenenas: „Ov sas čačes o Čhavo le Devleskro!"

5 No ov sas predemado vaš amare bini,

zorales mardo vaš amare nalačhipena;

pre leste sas thodo o trestos, hoj pre amende te avel o smirom,

a leskre ranenca sasťiľam avri.

6 Amen savore samas sar o našade bakrore;

sako džahas peskre dromeha,

ale o RAJ thoďa pre leste

amare savoredženengre nalačhipena.

7 Mučinenas les, ale ov oda pokorňe zľidžalas

a na phundraďa peskro muj.

Avke sar o bakroro, saves ľidžan te murdarel,

sar e ovečka, savi hiňi čhit anglal oda, ko la strihinel,

na phundraďa peskro muj.

16 Šukes mange hin andro muj sar pal o prachos

a e čhib pes mange prichudňa andro muj;

mukľal man te merel andro prachos.

17 O rikone aven pre ma,

rozthoven pes pašal ma o nalačhe manuša,

predemen mange o vasta the o pindre.

18 Savore kokala mange dičhol;

on dikhen a den pre ma avri o jakha.

7 Ale me som sar kirmo a na manuš;

dojekheske som pro asaben, sako man dikhel tele.

8 Savore, so man dikhen, keren mandar pheras;

banďaren pre mande o muja

a keren le šerenca.

13 Ňikas nane bareder kamiben sar oles, ko del peskro dživipen vaš peskre prijaťeľa.

16 Bo o Del avke kamelas o svetos, hoj diňa peskre jekhore Čhas, hoj ňiko, ko pačal andre leste, te na merel, ale te avel les o večno dživipen.

10 Prekal o meriben leskre Čhaskro samas zmjerimen le Devleha mek akor, sar samas leskre ňeprijaťeľa. Avke akana džanas, hoj avaha zachraňimen leskre dživipnaha, te sam imar leha zmjerimen.

16 Pal oda prindžarďam le Devleskro kamiben, hoj ov diňa peskro dživipen vaš amenge. Avke the amen mušinas te del peskro dživipen vaš o phrala.

2 Prekal leskri obeta amenge hin odmukle o bini – no, na ča amenge, ale the cale svetoske.

8 Poňižinďa pes

a sas poslušno dži o meriben

– dži o meriben pro kerestos.

9 Se džanas, hoj o Kristus ušťiľa andral o meriben, imar buter na merel a imar nane tel e zor le meribnaskri. 10 Bo ov muľa jekhvar a pro furt a le binos nane upral leste ňisavi zor, ale o dživipen, so dživel, dživel le Devleske.

3 Abo so, na džanen, hoj savore, ko samas bolde andro Ježiš Kristus, bolde sam andre leskro meriben? 4 Le boľipnaha samas jekhetane leha parunde andro meriben, hoj avke, sar sas o Kristus uštado andral o meriben le Dadeskra slavaha, the amen te dživas andro nevo dživipen.

27 Avke sar hin dino le manušenge jekhvar te merel a paľis ela o sudos, 28 avke the o Kristus pes jekhvar obetinďa, hoj te odlel o bini but manušengre a sar pes dujtovar sikavela, oda imar na ela vašoda, hoj te odlel o binos, ale hoj te spasinel olen, ko pre leste užaren.

22 Muršale andral o Izrael, šunen kala lava: O Ježiš Nazaretsko sas oda murš, savo sas le Devlestar maškar tumende dokazimen la bara zoraha the le zazrakenca, save prekal leste o Del kerelas, avke sar oda the tumen korkore džanen. 23 Ale o Del imar anglal džanelas, so pes ačhela, a oda sas leskro planos, hoj tumen ole muršes te zalen a prekal o vasta le binošnengre te primaren pro kerestos a te murdaren. 24 No o Del les uštaďa andral o meriben a iľa lestar o meribnaskre dukha, se aňi pes na delas, hoj les o meriben te ľikerel andre peskri zor.

11 „Me som o lačho Pasťjeris. O lačho Pasťjeris del peskro dživipen vaš o bakrore.

26 Bo kecivar chan kada maro a pijen andral kadi kuči, ľidžan o hiros pal o meriben le Rajeskro, medik na avela.