28 Yesu kajuwa kamba kulawa sambi kila kinhu kimala, na ili kutenda Maandiko Gang’alile gavikizwe, Kalonga, "Nokona ng’hilu."

29 Baho kukala na kikonha kimemile divai ya ugwadu, avo wavabika didodoki mna idivai wadinanika mna ulubiki lwa hisopo, wadika mna umulomo wa Yesu. 30 Yesu viyang’wile ija idivai, kalonga, "Gamala!"

Kaidulika kafa.

23 Wakalizi viwamambukize kumuwamba Yesu mumsalaba, wasola viwalo vake na kuvigola mafungu mane, kila mkalizi kapata dimoja. Vivija wasola kiwalo chake kiyagwe kikalile hakisonigwe bule lakini kilukigwa. 24 Wakalizi wailongela, "Kino sikutukidege, leka tubwanhe simbi tulole yomgwila nani." Mbuli ino itendeka kutenda Maandiko Gang’alile galawilile.

"Waigolela viwalo vangu,

wakibwanhila simbi kiwalo changu."

Na vino vivo viwatendile iwakalizi.

25 Wemile behi na msalaba wa Yesu wakala mamake na mamake mkulu na Malia mtwanzi wa Kilopasi na Malia Magidalena. 26 Yesu viyamone mamake na mwanahina wake yamnogele ng’hani wema aho, kamulongela mamake, "Mama, sambi ino ayo mwanago."

27 Abaho kamulongela mwanahina ayo, "Sambi ino ayo mamako." Kulawa siku dijo mwanahina ayo kamsola na kukala nayo ukae kumwake.

33 Viwavikile hanhu hakemigwe, "Fumvu da Pala," wamuwamba Yesu mumsalaba, hamoja na waja wabananzi wabili, imoja mwambu wa mkono wake wa kudila na iyagwe mwambu wa mkono wake wa kumoso. 34 Yesu kalonga, "Tata, gela kumgongo nzambi zao, kwavija hawakijuwa kiwotenda."

Waigolela viwalo vake kwa kubwanha simbi. 35 Wanhu wema aho olola, kuno wakulu wa Wayahudi omzeha Yesu, walonga, "Kawakombola wayagwe, leka yaikombole mwenyego, kamba heyo ayo Kilisito, yasaguligwe na Imulungu!"

36 Vivija wakalizi wamzeha, wamcholela wamgwaa divai ya ugwadu, 37 kuno olonga, "Kamba gweye kwa Mndewa wa Wayahudi, ikombole mwenyego!"

38 Uchanha ya msalaba wake wandika vino, "Ino ayo Mndewa wa Wayahudi."

39 Imoja wa waja wabananzi yawambigwe mumsalaba, kamuliga Yesu, kalonga, "Vino gweye siyo Kilisito Mkombola? Ikombole mwenyego na siye!"

40 Lakini ija iyagwe kamkomhokela miyage, kalonga, "Vino, gweye humdumba Imulungu bule? Na gweye kutagusigwa kamba heyo. 41 Gweye na niye totagusigwa goya, kwavija tobokela fungu da sang’hano zetu, lakini munhu ino hatendile mbuli yoyose ihile." 42 Abaho munhu ija kamulongela Yesu, "Yesu, ung’humbuke wahengila Muundewa wako!"

43 Yesu kamulongela, "Nokulongela ukweli, lelo kokuwa na niye Paladiso."

33 Viivikile saa sita imisi, isi yose ikala igubikigwe na ziza totolo, ziza dijo dikala kwa masaa madatu. 34 Viivikile saa tisa imisi, Yesu kalila kwa sauti ng’hulu, "Eloi, Eloi, lama, sabakitani?" Fambulo jake, "Imulungu wangu, Imulungu wangu, habali kundeka?"

51 Bahaja panziya da Ng’anda ya Imulungu digola gati da Ng’anda ya Imulungu na hanhu hong’ala ng’hani, didegeka mhande mbili, kulawa uchanha mbaka hasi. Isi itigisika na mibwe itulika. 52 Mapanga gafunhuka na wanhu wengi wa Imulungu wakalile wafile wazilibuka. 53 Walawa mna gamapanga, na Yesu viyazilibuke wachola Yelusalemu kudibuga ding’alile, na wanhu wengi wawona.

54 Mkulu wa wakalizi na wakalizi wakalile omkaliza Yesu, viwayone isi yotigisika na mbuli ziyagwe zilawilile, wadumba ng’hani na kulonga, "Kweli ino kakala Mwana wa Imulungu!"

16 Umbwa wanizunguluka,

iwanhu wehile wanizunguluka,

wanitobola mmagulu na mmakono.

17 Nisigala mizege iyeka,

iwanhu onihila onilola na kunisimanga.

18 Oigolela viwalo vangu,

wakibwanhila simbi kiwalo changu.

7 Wose onilola oniseka ng’hani,

oniliga na ominula milomo yao.

8 Olonga, "Kamtamanila Mndewa Imulungu,

leka Imulungu yamkombole!

Kamba Imulungu komnogela beta yamkombole!"

13 Kuduhu unogelwa mkulu kubanza uno, wa munhu kuulava ugima wake mbuli ya mbwiga zake.

16 Avo, Imulungu kawanogela wanhu wa mwiisi mbaka kamulava Mwanage yeli yaiyeka, ili munhu yoyose yonda yamtogole sikuyapotele lakini yawe na ugima wa milele.

10 Vitukalile tuihila na Imulungu, tuilumba nayo kubitila ifa ya mwanage. Sambi tuilumba na Imulungu, yokuwa vinoga ng’hani na kweli tokomboligwa kwa ugima wa Kilisito.

16 Vino avo vitujuwa unogelwa viwili, Kilisito kaulava ugima wake mbuli ya siye. Vivija na siye tuulave ugima wetu mbuli ya ndugu zetu!

2 Kilisito ayo nhosa isegesa nzambi zetu na siyo siye twiiyeka, lakini vivija na nzambi za wanhu wose wa mwiisi.

8 Kaitenda mwenyego mdodo, munhu yotegeleza mbaka ifa yake,

ona ifa yake mumsalaba.

9 Kwavija tojuwa kamba Kilisito kazilibuka kwa wafile na honda yafe kabili, ifa honda imtawale kabili. 10 Avo kwavija kafa mwanza umoja, nzambi yabule udahi kumwake na sambi kokala kwa Imulungu.

3 Vino hamujuwile kamba siye wose tubatizigwe kwa kuilumba na Yesu Kilisito tubatizigwa mwiiifa yake? 4 Vitudidimizigwe mgamazi, kamba tuzikigwa hamoja nayo na tuilumba mwiiifa yake, avo kamba vija Kilisito viyazilibuke mwiiifa kwa ukulu wa Tata, vivija na siye tudahe kukala muugima wa sambi.

27 Kamba vija kila munhu kofa mwanza umoja, abaho kotagusigwa na Imulungu, 28 vivo ili vivija kwa Kilisito kalavigwa nhosa mwanza umoja kusegesa nzambi za wanhu wengi. Kolawilila mwanza wa kabili, hasang’hanila nzambi, ila kuwakombola wanhu waja ombeta kwa kusulukila.

22 "Wanhu wa Izilaeli! Tegelezeni mbuli zino, Yesu wa Nazaleti kakala munhu wa udahi na kalagusigwa kumwenu kwa unzonza na vilaguso viyatendile Imulungu kubitila kumwake. Mweye wenyego muijuwa mbuli ino kwavija ilawilila bahano hamwenu. 23 Toka mwaka Imulungu kajuwa na kalonda mweye mumgoge Yesu na mweye mumkoma kwa kuwaleka wanhu otenda nzambi wamuwambe mumsalaba. 24 Lakini Imulungu kamzilibula kulawa kwa wafile, kamulekesa kulawa muusungu wa ifa, kwavija havidahike ifa imwike mkifungo.

11 "Niye ayo msusilaji yanogile. Msusilaji yanogile koulava ugima wake mbuli ya ng’hondolo.

26 Kwavija mwahaja gate dino na kung’wela kikasi kino cha divai, mowapetela wanhu ifa ya Mndewa mbaka vonda yeze kabili.