28 Ngemva kwalesosikhathi, uJesu esesazi ukuthi konke kwasekuphelele njalo ukuze umbhalo ugcwaliseke, wathi, "Ngomile." 29 Kwakubekwe imbodlela yewayini yeviniga khonapho, basebegxamuza kuyo uzipho baluxhuma eluthini lwesihlahlakazana sehisophi, baluphakamisela endebeni zikaJesu. 30 Esenathile wathi, "Sekuphelile." Esetshonjalo wagobisa ikhanda lakhe wafa.

23 Kwathi amabutho esembethele uJesu, athatha izigqoko zakhe azabelana, zaba zingxenye ezine, zilingene ibutho linye ngalinye, kwasala isigqoko sangaphansi. Sona sasingelamthungo, silukwe sonke kusukela phezulu kusiya phansi.

24 Bacebisana bathi, "Kasingasidabuli. Kasikhetheni ngenkatho ukuthi sibe ngesikabani."*

Lokhu kwenzakala ukuze kugcwaliseke umbhalo owathi:

"Babelana izembatho zami

benza inkatho ngezigqoko zami."

Yikho lokhu amabutho akwenzayo.

25 Eduze kwesiphambano sakhe uJesu kwakumi unina, udadewabo kanina, uMariya umkaKlopasi loMariya Magadalini. 26 UJesu wathi ebona unina lapho lomfundi ayemthanda emi lapho eduze, wathi kunina, "Mama, nansi indodana yakho," 27 wathi kumfundi, "Nangu unyoko." Kusukela kulesosikhathi umfundi lowo wamthatha unina wamusa ekhaya lakhe.

33 Bathi sebefike endaweni ethiwa luKhakhayi bambethela esiphambanweni kanye lezigebenga lezo, omunye ngakwesokunene kwakhe, omunye ngakwesokhohlo. 34 UJesu wathi, "Baba, baxolele, ngoba kabakwazi abakwenzayo." Njalo basebesabelana izigqoko zakhe ngokutshaya inkatho.

35 Abantu bema bakhangela, ababusi bona bamklolodela. Bathi, "Wasindisa abanye, laye kazisindise nxa enguKhristu kaNkulunkulu, oKhethiweyo."

36 Amabutho lawo eza amklolodela. Amnika iwayini elimunyu 37 athi, "Nxa uyinkosi yamaJuda, zisindise."

38 Kwakulombhalo wokwazisa ngaphezulu kwakhe owawusithi:

Lo yiNkosi yamaJuda.

39 Omunye wezigebenga owayelenga khonapho wamthuka wathi, "Kanti kayisuwe uKhristu? Zisindise wena kanye lathi!"

40 Kodwa esinye isigebenga samkhuza sathi, "Kawumesabi na uNkulunkulu, njengoba ulesigwebo sinye laye. 41 Thina sijeziswa ngokusifaneleyo ngoba sizuza lokho okufanele izenzo zethu. Kodwa umuntu lo kenzanga lutho olungalunganga."

42 Wasesithi, "Jesu, ungikhumbule nxa ungafika embusweni wakho."

43 UJesu wamphendula wathi, "Ngiyakutshela iqiniso ngithi, lamuhla uzakuba lami epharadise."

33 Ngehola lesithupha ubumnyama bembesa ilizwe lonke kwaze kwaba lihola lesificamunwemunye. 34 Kwathi ngehola lesithathu emini uJesu wakhala ngelizwi elikhulu wathi, "Eloyi, Eloyi, lamasabakithani?"* (okutsho ukuthi, "Nkulunkulu wami, Nkulunkulu wami, ungitshiyelani na?").

51 Ngalesosikhathi ikhetheni lethempeli laqhekezeka kabili kusukela phezulu kusiya phansi. Umhlaba wazamazama lamatshe aqhekezeka. 52 Amathuna avuleka, izidumbu zabantu abanengi abangcwele abafayo zavuswa kwabafileyo. 53 Baphuma emathuneni, kwathi ngemva kokuvuka kukaJesu kwabafileyo baya edolobheni elingcwele bavela ebantwini abanengi.

54 Kwathi ukuba induna yekhulu kanye lalabo ababelinde uJesu bebona ukuzamazama komhlaba kanye lakho konke okwakwenzakele, besaba kakhulu, bababaza bathi, "Ngempela ubeyiNdodana kaNkulunkulu!"

5 Kodwa wagwazwa ngenxa yezono zethu,

wachobozwa ngenxa yokona kwethu,

ukuhlutshwa kwakhe kwasilethela ukuthula,

njalo sasiliswa ngamanxeba akhe.

6 Thina sonke silahlekile njengezimvu,

munye ngamunye wethu uphambukele endleleni yakhe;

njalo uThixo ubeke phezu kwakhe

ukona kwethu sonke.

7 Wancindezelwa wahlutshwa,

kodwa kawuvulanga umlomo wakhe;

wakhokhelwa ukuyabulawa njengewundlu,

njalo njengemvu ithule phambi komgundi wayo,

laye kawuvulanga umlomo wakhe.

16 Izinja sezingihanqile;

ixuku labantu ababi selingihonqolozele,

sebengigwaze izandla lezinyawo.

17 Ngingawabala wonke amathambo ami;

abantu bayanginyonkoloza bangiklolodele.

18 Behlukaniselana izembatho zami

njalo benze inkatho ngezigqoko zami.

7 Bonke abangibonayo bayangihleka;

bayangithethisa baze banyikinye amakhanda:

8 "Uthemba uThixo

lowo Thixo kamkhulule.

Kamsindise njengoba ethokoza ngaye."

13 Kakho olothando olukhulu kulonikela ukuphila kwakhe ngenxa yabangane bakhe.

16 UNkulunkulu walithanda ilizwe kangaka waze wanikela iNdodana yakhe eyiyo yodwa ukuze kuthi loba ngubani okholwa kuyo angabhubhi, kodwa abe lokuphila okungapheliyo.

10 Ngoba ngesikhathi sisaseyizitha zikaNkulunkulu, sabuyiselwa kuye ngokufa kweNdodana yakhe, kuzakuba kukhulu kangakanani, sesibuyiselwe, sahlengwa ngokuphila kwakhe!

16 Nanku esazi ngakho ukuthi uthando luyini: UJesu Khristu wadela ukuphila kwakhe ngenxa yethu. Lathi kufanele sidele ukuphila kwethu ngenxa yabazalwane bethu.

2 Ungumhlatshelo wenhlawulo yezono zethu, kungasizono zethu kuphela kodwa lezono zomhlaba wonke.

8 Wathi ebunjwe wabonakala njengomuntu,

wazehlisa

walalela kwaze kwaba sekufeni,

ukufa kwasesiphambanweni!

9 Ngoba siyazi ukuthi njengoba uKhristu wavuswa kwabafileyo, angeke afe futhi; ukufa akuselawo amandla phezu kwakhe. 10 Ukufa akufayo wakufela bonke kanye ngenxa yesono; kodwa ukuphila akuphilayo, ukuphilela uNkulunkulu.

3 Kumbe njalo kalazi yini ukuthi sonke thina esabhaphathizelwa kuJesu Khristu sabhaphathizelwa ekufeni kwakhe na? 4 Ngakho sangcwatshwa laye ngokubhaphathizelwa ekufeni, ukuze kuthi njengoba uKhristu wavuswa kwabafileyo ngobukhosi bukaYise, lathi siphile ukuphila okutsha.

27 Njengalokhu umuntu wamiselwa ukufa kanye, kuthi emva kwalokho abhekane lokwahlulelwa, 28 ngokunjalo uKhristu wanikelwa kanye ukuba asuse izono zabantu abanengi; njalo uzabonakala okwesibili, hatshi ukuthwala isono, kodwa ukuletha ukusindiswa kulabo abamlindeleyo.

22 Bantu bako-Israyeli, lalelani lokhu: UJesu waseNazaretha wayeyindoda eyamiswa nguNkulunkulu kini, ngezimangaliso lezibonakaliso uNkulunkulu azenzayo phakathi kwenu ngaye, njengoba lina ngokwenu lisazi. 23 Umuntu lo wanikelwa kini ngecebo likaNkulunkulu ayelimisile langolwazi lokuzayo; njalo lina lincediswa ngabantu ababi,* lambulala ngokumbethela esiphambanweni. 24 Kodwa uNkulunkulu wamvusa kwabafileyo, wamkhulula ebuhlungwini bokufa ngoba ukufa kwakungelamandla okumncindezela.

11 Ngingumelusi olungileyo. Umelusi olungileyo unikela ukuphila kwakhe izimvu zakhe.

26 Ngoba lapho lisidla isinkwa lesi linatha lenkezo le, litshumayela ukufa kweNkosi ize ibuye.