28 Yárbaade, Isá ye hárr kessú goijjá óigiyoi de híyan hoi fari, pak-kalam fura ói bolla hoór de, "Añr ttu tirác laiggé." 29 Hé zagat eggwá sírkar* tára buágaraiya accíl; ítara híbat ekkán esfónj* burai yore hísop-gas or eggwá ḍéeilar matát bazáidi Isár gal ot diiyé. 30 Zeñtté Isá ttu hé sírka háiya óiye, Íba ye hoór de, "Goijjá óigiyoi." Tarfore matá re hémmikka gorí Íbar foran difélaiye.

23 Fóous ókkole Isá re kúruc ot dí baade, ítara Íbar uoror hoor kúli looi sair bák goijjé, ek fóous olla ek bák or dóre; ítara Íbar zubba wa yó loiyé. Hé zubba wa honó zuradiya sára, aar uottú lóti nise foijjonto ek hoor.

24 Ítara ezzon ore ezzone hoór de, "Añára e zubba wa no fáṛi, bólke loṭári mari saái yibá har héṛe fore."*

Híyan etollá óiye, zeéne pak-kalam or yián fura ó,

"Ítarar bútore añr hoor ore borat goijjé,

aar ítara añr hoor olla loṭári maijjé."

Fóous súne héndilla híin hétolla goijjé deh.

25 Isár kúruc or ḍáke Íbar maa, Íbar maar bóin, aar Klopas or bou Moriyam edde Moriyam Makdálini tíyai accíl. 26 Zeñtté Isá ye Nizor maa re edde Nize ador goittó de cárit twa re ḍáke tíyaiya deikké, Íba ye maa re hoór de, "Ó maa, soó tuáñr fua óilde ibá."

27 Baade hé cárit twa re hoór de, "Soó, tuáñr maa óilde ibáh." Héñtte lóti hé cárit twa ye híba re yóggwar nizor gór ot loigílgoi.

33 Ítara zeñtté Matár Mala hoó de zaga híyan ot foóñicce, héṛe ítara Íba re edde hé acámi gún ore kúruc ot díye, ezzon ore Íbar den ḍák ottu edde ar ezzon ore Íbar ban ḍák ottu. 34 Isá ye hoór de, "Ó Baf, itará re maf goró; kiyólla-hoilé itará kii gorér de híyan itará no zane."

Baade ítara loṭári mari ítarar bútore Íbar hoorsuor ore bák goijjé.

35 Manúc ókkole tíyai saái táikkil. Yohúdir neta ókkole yó Íba re ṭátṭai gorí hoór de, "Ibá ye toh oinno zon ore basaitó; zodi Ibá Allar Baiccá Mosih wa de óile, yala Nizoré Nize basouk sái."

36 Fóous ókkole yó ḍáke aái Íba re ṭátṭai gorát accíl. Ítara Íba re hái bolla sírka* dii 37 hoór de, "Zodi Tui Yohúdir Baáñcca de óile, yala Nizoré Nize basa sái!"

38 Íbar matár uottú ekkán sáainbúṭ óu maridiíl, ziyán ot leikké de, "Ibá óilde Yohúdi ókkol or Baáñcca."

39 Kúruc ot díya giyéh de acámi ttu ezzone Íba re beizzoti gorí hoór de, "Tui ki Mosih no? Nizoré edde añára re basa sená."

40 Montor oinno acámi wa ye ítare jéjjeṛai zuwab der de, "Tui ki Alla re úddwa no ḍooros? Tui yó de ekí ḍóilla sáñza foór. 41 Becók añárar sáñza hókkot, kiyólla-hoilé añára nizor ham olla ziyán laayek híyan fair deh, lekin e Manúc cwa ye toh honó hosúri nó goré."

42 Tarfore yóggwa ye hoór de, "Ó Isá, Tuñí Nizor raijjot aibá de októt añré yaad raikkó."

43 Isá ye yóggwa re hoór de, "Añí tuáñre sóiyi hoóir, aijja tuñí Añr fúañti jonnotul-férodus ot óiba."

33 Baade zeñtté duúñijja baró wa baijjé, héñtte lóti tin nwá báze fán guñṛa mulluk andár ói accíl. 34 Tin nwá baijjé de októt Isá ye eggwá ḍoóñr abase guzori hoór de, "Elói, Elói, lamá sabakhṭáni?" ziyán or torjuma óilde, "Ó Añr Alla, ó Añr Alla, Tuñí Añré kiyólla sáridiyo?" *

51 Hétunot baitul-mukaddos or foroda gán uottú lóti nise foijjonto fáṛi dui bák óigiyoi; aar zobin ot búsal baiyé, ḍoóñr-ḍoóñr cíl ókkol fáṛigiyoi, 52 hobor ókkol kúligiyoi, edde Allar pak bonda ókkol zetará moot or gúm ot accíl ítara boóut zon ore zinda gorá gíyeh. 53 Isá mora ttu zinda ói baade, ítara hobor ottu neeli aáigiyoi aar pak cóor ot zai boóut maincóre dahádiye.

54 Romi cáap* edde yóggwar fúañti zetará Isá re faára díyat accíl, ítara zettót búsal edde aró kii-kii ór de híin deikké, ítara bicí ḍooraigiyói aar hoór de, "Sóiyi Ibá Allar Fua accíl!"

13 Ezzone nizor dustó ókkol olla nizor zan diféle de híyan or túaro toh ar ḍoóñr muhábbot nái.

16 "Kiyólla-hoilé Alla ye duniyair maincóre etó muhábbot goijjé, Íba ye Nizor lehár ek Fua dan gorífelaiye; zeéne zee kiyé hé Fuar uore iman ané yóggwa nac no, bólke ofúrani zindigi faa.

10 Kiyólla-hoilé añára toh age Allar duccon accílam, montor Íbar Fuar moot or usílaye Íba llói añárar bonot óigiyoi. Añárar bonot zettót óigiyoi, añára toh hámaha Íbar zibone nejat faiyum.

16 Añára toh Mosih ye añára lla Nizor zan dyíl de híyan ottu muhábbot kiyó re hoó de zani faijjí. Hétolla, añára ttu yó nizor báiboináin ókkol olla nizor zan diyar fóros.

2 Íba Nize óilde añárar gunár koffara; siríf añárar no, bólke fura duniyair maincór gunár óu.

8 Íba ye insáni cokóle táki,

moot foijjonto, hoitó sailé, kúruc or uore more foijjonto fórmadar ói yore

Nizoré niróc goijjíl.

9 añára toh zani, Mosih re zettót mora ttu zinda gorá gíyeh, Íba ar honódin no moribó; moot ottu Íbar uore ar honó kémota nái. 10 Kiyólla-hoilé zeñtté Íba moijjíl, Íba toh ekbar ot hámica lla gunár hókumot ottu morigiyói; montor yala Íba ye ze zindigi haṛar, híyan Alla lla beh haṛar.

3 Tuáñra kí no zano, añára zedúne Mosih Isá llói ek óibar bápṭisma loiyí, añára hé bápṭismar duara Íbar fúañti morigiyígoi dé? 4 Hétolla añára bápṭismar duara Íbar fúañti morigiyígoi de híyane dahá de, añára re Íbar fúañti dohón gorá gíyeh, zeéne Alla Bafe Nizor mohímaye Mosih re zendilla mora ttu zinda goijjé, héndilla añára yó noya zindigi haṛai.

27 Zendilla, insán ottu ekbar mora foribó de aar yárbaade bisar óibo de híyan ṭík gorá gíyeh, 28 héndilla, Mosih ye yó boóut maincór gunár fuñzá boi bolla ekbar beh kurbani óiye. Íba dusárabar zahér óibo, gunár fuñza boi bolla no, bólke uitará re nejat di bolla zetará azzur sáañte Íbar entezar ot asé.

22 "Ó Boni Isráil ókkol, hotá iín fúno: Isá Nasári, Zibár duara Alla ye tuáñrar hañse keramot, taajuippa harhána edde illayi-nicán ókkol dahái sábut goijjé de, Íba óilde Allar torfóttu; tuáñra nize toh híyan zano. 23 Alla, zibá ye muúmor hálot zane, Íba ye age lóti fáisela goijjé de, Isá re tuáñrar át ot gosáidi bolla. Aar tuáñra toh Íba re bedini ókkol or áta kúruc ot dí mariféla báila. 24 Montor Alla ye Íba re moot or duk ottu azad gorí abar zinda goijjé, kiyólla-hoilé moote Íba re nizor kobzat rakí nó fare.

11 Gom bérasóol soroya óilam de Añí. Gom soroya ye toh bérasóol ókkol olla Nizor zan deh.

26 Kiyólla-hoilé zetóbar tuáñra e ruṭi háiba edde e fiyala ttu fiíba, hétobar tuáñra Malik or moot or elan gorór deh, zetódin níki Íba nú aiyé.