28 Gena ḏua, Yesus ra waro mangale mo-moini gena-ge 'i ḏu-ḏuanga ḏua re la mo-moini 'oru ga’a 'i silefo ḏua toma Boku 'Ofi-'Ofi ri sitotomo, Unanga 'o kanau, "Ngoi 'Ari camala dudungu."✝

29 Toma ngi’i gena-ge, 'age rema sawo’o rimoi ma dara 'anggur ko-kowi’i. Ananga 'aḏi 'oro bunga karang ya tono toma 'anggur ko-kowi’i re ya sitopo’o toma hisop ma umanga, kara ya situbo ie ra Yesus 'ai 'uḏu ma betu’u di’a Unanga 'a cono’o. 30 Yesus 'a ḇowisi ma 'anggur gena-ge togumu i’a, Unanga 'o kanau, "Togumu ḏua!" Gena ḏua, Unanga 'a ruku tala 'Ai sae’e re 'Ai sangagara 'i togumu.

23 Sordado-Sordado gena-ge 'aḏi sisalib Yesus togumu i’a, ananga ya 'oro Yesus 'ai pakeanga, kara ya sibalangu balangu rata, la matengo-matengo 'aḏi sanga balangu moi. Gena ḏua, ananga ya 'oro ḏi’i Yesus 'ai juba, enanga kama dini ua da’u situwaḏi. 24 Sordado gena-ge 'aḏi makanau matengo re matengo, "'Ai juba nena-ne ngene wa tola’a awa, ino ngene wo 'a’a loterei, la ngasamoi 'i eta’a ra guna."

Gena-ge 'i dadi 'i sitotomo 'oru ga’a 'i silefo pasala ḏua toma Boku 'Ofi-'Ofi so’o ne:

"Ananga ya sibalangu 'Ari pakeanga.

Re 'Ari juba 'aḏi 'a’a loterei."

Dadi sordado gena-ge ananga ya si’a’a so’o gena-ge.✝

25 Co-cori Yesus 'ai salib, 'age rema we-were’a nga muḏuo i’a 'aḏi made-de’oso: Yesus 'ai ngina, re 'Ai ngina 'ami nongoḏu, Maria 'a Klopas 'ai were’a, re ngo Maria Magdalena. 26 Wakutu Yesus 'o oḏi’i 'Ai ngina re 'Ai me-mete’e ga’a Unanga ya’u dadalara, ananga gena-ge 'aḏi made-de’oso toma ngi’i gena-ge, Unanga 'o kanau i’a Tai ngina, "Ngina, nena-ne 'ani ngowa’a nau’u." 27 Re Yesus 'o kanau i’a Tai me-mete’e matengo, "Munanga nena-ne ngana 'ani ngina." Dadi mulaingi nange-ne re si’a Yesus 'ai me-mete’e matengo gena-ge 'o dawongo Yesus 'ai ngina tai wala.

33 Wakutu 'aḏi ngadolo toma ngi’i ma lomanga "Ḏoḏowi",* sordado-sordado Roma 'aḏi sisalib 'a Yesus re ngowa’a ma jira nga muḏiḏi gena-ge ya’u sisalib ḏi’i: matengo Tai kuwiḏa re matengo Tai kuḇali. 34 Ḏua Yesus 'o manyiata, "Baba, singi-ngiranga manga ḏosa, sababu 'oru ga’a ananga ya 'a’a 'i mete’e tamanga waro ua ma dara." Gena ḏua, sordado-sordado 'aḏi 'a’a loterei, la 'a guna 'o sanga Unanga 'ai pakeanga.✝

35 Ngowa’a kawasa 'aḏi matai sapolo toma ngi’i gena-ge di’a uningi 'a Yesus. Yahudi manga bi-biri’i 'aḏi je-jengere Unanga, re 'aḏi kanau, "Na’o Unanga mode-mode’e 'O Kristus ga’a Ma Jou’ongu Madutu 'o cumutu ḏua, tai’i i’a nange-ne Unanga masiretene 'a sisalamata 'Ai diri ma tero sa’olo 'O sisalamata ngowa’a ma lelegu."✝

36 Sordado-sordado ḏi’i 'aḏi je-jengere Unanga. Ananga 'aḏi sapolo di’a 'aḏi pula’a 'anggur ko-kowi’i ra Unanga re✝ 37 ananga 'aḏi kanau, "Na’o Ngana ngowa’a Yahudi manga 'Olana, no sisalamata 'Ani diri masiretene!"

38 Tai sae’e ma re’u toma salib co-cori ma tubu, sordado 'aḏi sipaku i’a papanga 'i silefo Mahkamah 'Agama manga da’awa ra Unanga ma betongo so’o ne:

"Unanga nena-ne,

ngowa’a Yahudi manga 'Olana."

39 Ngowa’a ma jira nga muḏiḏi gena-ge ga’a sanga salib simete’e ra Yesus, matengo 'o je-jengere re 'o kanau, "Na’o Ngana 'O Kristus, na sisalamata 'Ani diri masiretene re sisalamata ngomi ḏi’i!"

40 Mada’a matengo ḏi’i 'u ḇangata unanga ga’a 'o je-jengere Yesus, "Ngana no mojongo Ma Jou’ongu Madutu ua! Ngana sanga hukumu sengene mamete’e ra Unanga. 41 Pa’i ngene nga muḏiḏi ḇato patasa wo sanga hukumu sengene mete’e ngene nanga ga’a. Mada’a Unanga 'ai sala ceka’a i’a mai ua!" 42 Ḏua unanga gena-ge 'o kanau, "Yesus no 'elingi ngoi wakutu no sapolo sa’olo 'olana."

43 Yesus 'o kanau ra unanga, "No ngaku mode-mode’e 'Ari demo-demo nena-ne: Wangere nange-ne, ngana no mamete’e ra Ngoi toma Firdaus."

33 Re wakutu ca’olo nyagi moi re romoḏiḏi wangere 'olona tala, wangere ma la’o 'i taḏusu, re daeraha gena-ge mo-moini 'i dadi hafu-hafu singadolo ca’olo ro’ange wangere so’o ne’o. ✝ 34 Toma ca’olo ro’ange wangere so’o ne’o, Yesus 'o poa’a 'a siduga-duga, "Eloi, Eloi lama sabakhtani" ma ngale: " 'Ari Jou’ongu Madutu, 'Ari Jou’ongu Madutu, i’a sa’olo No sieanga Ngoi?"✝

51 Ngalana ma da-daku kole-kole* ra Ma Jou’ongu Madutu 'ai Wala ma dara, enanga 'i raca kaci ḏiḏi, da’u singadolo dau. Ḏua wusu 'i dadi re maḏi lamo’o 'i tiwa’a.✝ 52 Kubu-kubu ma repe matai welanga re Ma Jou’ongu Madutu 'ai ngowa-ngowa’a manga repe ga’a raḏi sengene, ananga dadunu 'aḏi 'ahu moju. 53 Ananga gena-ge 'aḏi supu tamanga kubu. Mada’a ananga pa’i 'aḏi osama toma limau Yerusalem wakutu Yesus dadunu ro 'ahu moju.* I’a da’a, ngowa’a repe ya’u oḏi’i ananga.

54 Sordado ma sae’e remanga sordado-sordado ga’a dadanu Yesus, ananga 'aḏi matai mojongo sababu 'aḏi basono wusu re raḏi oḏi’i 'ori i’a i’a 'i dadi. Ḏua ananga 'aḏi kanau, "Unanga nena-ne mode-mode’e Ma Jou’ongu Madutu 'ai Ngowa’a Nau’u!"

13 Dadalara ga’a lai lamo’o so’o ne: Matengo i’a ga’a 'o dadalara 'ai ḏagilomu, singadolo 'o sipula’a 'ai 'ahu, la 'ai ḏagilomu 'o 'ahu.

16 Ma Jou’ongu Madutu 'o dadalara manusia toma dungia ma tero so’o ne: Unanga ro 'utusu 'Ai Ngowa’a Nau’u pa’i matengo, la 'a guna ḇato 'o ngaku 'Ai Ngowa’a Nau’u gena-ge, 'o iranga ua kasingado-ngadolo i’a, mada’a 'o sanga 'ahu kasingado-ngadolo i’a.

10 Sababu na’o wakutu ngene Ma Jou’ongu Madutu 'ai lawana, Unanga 'o sirimoi ngene ra Unanga sababu 'Ai Ngowa’a Nau’u 'ai se-sengene; tantu ḏua toma 'orasa nange-ne, wakutu ngene rewo marimoi ra Ma Jou’ongu Madutu, Kristus ḏuanga i’a 'o sisalamata ngene sababu Unanga dadunu 'o 'ahu moju!

16 Gena-ge 'i sijumu ra ngene mangale ma’u dadalara ma ngo’omo: Yesus Kristus nyengara ra sipula’a 'ai 'ahu, la ngene wo sanga salamata. Sababu gena-ge, ngene ḏi’i balasu wo nyengara wa sipula’a nanga 'ahu di’a nanga ioronongoḏu ngo-ngaku rimoi!

2 Yesus gena-ge 'o dadi nanga du-duusu sababu Unanga 'o sidoa’a 'ai lese sa’olo jou-jou di’a nanga ḏosa-ḏosa. Sababu gena-ge Ma Jou’ongu Madutu nga’unu 'o singi-ngiranga nanga ḏosa-ḏosa. Re pa’i ngene nanga ḏosa ḇato ua, mada’a ngowa’a mo-moini manga ḏosa toma dungia sitabi donga ḏi’i.

8 Unanga 'o maholo 'Ai diri, re 'O 'ahu mete’e mode-mode’e ra Ma Jou’ongu Madutu singadolo ngowa’a 'U sisengene:

Unanga 'U sisalib ma tero sa’olo ngowa’a ma jira.

9 Sababu ngene rewa waro mangale Kristus dadunu ro 'ahu moju, dadi 'O sengene riwara; Unanga ro bebasa toma sengene ma kuasa. 10 Kristus pa’i 'O sengene soi moi ḇato, di’a 'O siwejere kasingado-ngadolo i’a ḏosa ma kuasa. Mada’a nange-ne, Unanga 'o 'ahu di’a Ma Jou’ongu Madutu ḇato.

3 Tantu ḏua ngini reni waro nena-ne: Ngene mo-moini ga’a wo sanga baptis, ngene sirimoi ra Kristus Yesus. Dadi gena-ge ma tero sa’olo ngene rewo sengene marimoi ra Unanga. 4 Sababu gena-ge, wakutu ngene wo sanga ḇanyo, 'i ma tero sa’olo ngene siotomo marimoi ra Kristus, la ma tero sa’olo Kristus 'o dadunu 'ahu moju Tai sengene sababu 'Ai Ḇaḇa ma kuasa ga’a mulia, so’o gena ḏi’i ngene wo sanga 'ahu su-sungi.✝

27 Re mete’e Ma Jou’ongu Madutu 'ai 'akala ma mau, manusia 'aḏi sengene pa’i soi moi ḇato. Togumu i’a kara Unanga na sijuruhakimi. 28 So’o gena ḏi’i, Kristus ro sidoa’a 'Ai lese masiretene soi moi ḇato sa’olo jou-jou ra Ma Jou’ongu Madutu, la 'O singi-ngiranga ngowa’a repe manga ḏosa. Re ḏuanga i’a Unanga dadunu 'o sapolo moju ma soi ḏiḏi, Unanga 'o singi-ngiranga ḏosa riwara, mada’a 'O gasa salamata di’a ngowa’a ga’a 'aḏi totoma Unanga.✝

22 Petrus dadunu 'o kanau moju, "Ioronongoḏu ngowa’a Israel! 'Oru ga’a ngoi ta siajele, balasu na 'isene. Ma Jou’ongu Madutu 'o sitantukanga Yesus, ngowa’a Nazaret, so’o ne: Unanga 'o pula’a kuasa ra Yesus, la 'o 'a’a ga’a hera-heranga, didina’o heranga re 'ori i’a hera-heranga, la ngini na waro ḏua Unanga gena-ge ra Ma Jou’ongu Madutu tala. Ngini mo-moini gena-ge ni waro masiretene 'i dadi mode-mode’e. 23 Kalaha Ma Jou’ongu Madutu 'a waro ḏua 'oru ḏuanga i’a 'i dadi, Unanga 'o sipula’a Yesus ra ngini: Enanga gena-ge 'i mete’e Ma Jou’ongu Madutu 'ai 'akala ma mau. Wakutu gena-ge, ngini nu sisengene Unanga sababu ngini nu sipula’a Unanga toma ngowa-ngowa’a ga’a 'aḏi mete’e ua Ma Jou’ongu Madutu 'ai hukumu, kara ananga 'U salib Unanga.✝ 24 Mada’a, Ma Jou’ongu Madutu dadunu 'o si’ahu moju Yesus toma ngowa’a senge-sengene manga sigolona. Mete’e Ma Jou’ongu Madutu 'ai 'akala ma mau, Yesus balasu 'o basono sangisara singadolo 'O sengene, mada’a mete’e Ma Jou’ongu Madutu 'ai 'akala ma mau ḏi’i, sanga ua Unanga 'o sieanga i’a Yesus 'o sengene sikiḏanga.✝

11 Ngoi nena-ne Sowohi ma La-La. Sowohi ma La-La sidoa’a 'ai 'ahu di’a sisalamata doba-doba.

26 Dadi soi rai o’o i’a ngini ni oromo roti re ni ka’e 'anggur gena-ge, ngini ni singadolo Ma Jou 'ai se-sengene singadolo Unanga 'o dadunu sapolo moju.