28 Yesu walenshiba kwambeti lino byonse bilakwanilishiwa. Lino kwambeti bikwanilishiwe byonse byalambwa mumabala, nendi walambeti "Nkute inyotwa." 29 Popelapo palikuba nsupa yesula waini wasasa. Bashilikali basa balasabika cisambo mu waini wasasa usa, nekucisomeka kukatondo ka hisopi nekukashikisha pamulomo pakendi. 30 Yesu mpalasupita waini wasasa walambeti, "Byonse bilakwanilishiwa." Lino walakotama mutwi nekufwa.

23 Bashilikali basa mpwobalapopa Yesu, balamanta bayakufwala byakendi nekutwamunamo tumpansha tuna, mushilikali uliyense walamanta kampansha kakendi. Balamanta kayi nemwinjila wakendi uyo walikuba watungwa necikwisa cimo kayi nkawalikuba ne lupeto. 24 Lino bashilikali abo balambilaneti, "Katutautwamuna sobwe, nsombi twinse nsolo kwambeti twinshibe na nibani eshi aumante." Byalenshika mushoboyo kwambeti bikwanishiwe balambwa mumabala,

"Balayabana byakufwala byakame,

kayi mwinjila wakame balawinshila nsolo."

Weco ncobalensa bashilikali basa.

25 Nomba pepi ne lusanda palemana banyina, ne mukwabo banyina, kayi palikuba Maliya mukashendi klopa ne Mariya wa ku magadalena. 26 Lino Yesu mpalabona banyina ne shikwiya usa ngwalikusuna nkabalibemana pepi, walambila banyina eti, "Ma mwanenu uno." 27 Walambila kayi shikwiya usa eti, "Banyoko aba." Lino kufumina popelapo shikwiya usa walabamanta batukashi abo ne kutatika kubasunga cena kwakendi.

33 Mpobalashika kumusena walikukwiweti cifupa ca mutwi, balapopa Yesu palusanda. Kopeloko balapopako bakapondo basa palusanda, umbi kululyo naumbi kucipiko. 34 Yesu walambeti, "Ta, kamubalekelela pakwinga nkabacinshi ncobalenshinga."

Lino balensa nsolo nekuyabana byakufwala byakendi. 35 Bantu balikuba bemana popelapo kabebela. Nomba bamakulene ba Bayuda abo kabaweluluka Yesu nekwambeti, "Walapulusha bambi, lino neye alipulushe mwine, na ni Mupulushi uyo Walaiwa ne Lesa."

36 Bashilikali naboyo balamuseka, balesa pepi nekumupa waini wasasa eti anwe. 37 Nekumwambileti, "Na njobe Mwami wa Bayuda, lipulushe omwine."

38 Pelu palusanda palikuba palembweti, "Uyu emwami wa ba Yuda."

39 Kapondo umo walikuba wapopwa pamo ne Yesu, walamucobola Yesu eti, "Sena ntobe mupulushi washomeshewa? Lipulushe nenjafwe utupulushe."

40 Nsombi umbi walakalilila munendi nekumwambileti, "Sena obe nkotini Lesa? Tulapopwa pamo twense mu mapensho. 41 Nsombi afwe tobabili twelela kupopwa pakwinga tulatambulunga cilambo celela pa bintu mbyotwalikwinsa. Lino uyu neye kuliya caipa ncalensapo." 42 Lino walambila Yesu eti "Mukanganuke mwakesa mu Bwami bwenu."

43 Lino Yesu walamwambileti, "Cakubinga ndakwambilinga lelo, nukekale nenjame mu Paladaiso."

33 Cindi mpocalashika muma 12 koloko munshi, mucishico mwalaba mushinshe mpaka cindi ca 3 koloko mansailo. 34 Pacindi ca muma 3 koloko Yesu walabilikisha ne liswi lyangofu "Eloi Eloi Lama sabakatani!" Uku ekwambeti, "Lesa wakame, Lesa wakame, mulanshiyi aconi ndenka!"

51 Lino kamubonani, cisa cikwisa calikuba mu Ng’anda ya Lesa, calatwamuka pakati kufumina pelu mpaka panshi. Kwalaba mukunkumo, ne mabwe alapasauka. 52 Manda alacaluka ne mibili yabantu ba Lesa bangi bona mu manda balapundushiwa. 53 Mpolabapula mu manda, Panyuma pa kupunduka kwa Yesu, balaya kwingila mu Yelusalemu Mushi Waswepa. Ne kuboneka ku bantu bangi.

54 Abo balikuba ne mushilikali mukulene kabapembelela Yesu, mpobalabona mukunkumo ne bintu nabimbi byalenshika, balaba ne buyowa bunene, balambeti, "Cakubinga muntuyu wanga Mwanendi Lesa."

13 Kuliya muntu ukute lusuno lwapita ulu lwakutaya buyumi bwakendi pacebo cabanendi.

16 Kayi Lesa walabasunisha bantu pacishi capanshi, ecebo cakendi walayaba Mwanendi umo enka, kwambeti uliyense eti akamushome akacane buyumi butapu.

10 Afwe twalikuba balwani ba Lesa, nsombi lufu lwa Mwanendi elwalatubwesha mubwanse nendiye. Neco mpotuli banendi Lesa twashoma kwambeti nakatupulushe kupitila mubuyumi bwa Klistu.

16 Yesu walayaba buyumi bwakendi pacebo canjafwe. Nenjafwe twelela kubenga buyumi bwetu pacebo ca banse betu.

2 Yesu enshila bwipishi bwetu mobukte kulekelelwa, kutambowa eti bwipishi bwetu bonka nsombi ne bwa bantu nabambi bonse.

8 Walalicepesha, kayi walenda mubuyumi

bwakunyumfwila mpaka kushikila ku lufu lwakendi

lwapalusanda.

9 Tucinsheti Klistu walapunduka kubafu, kayi nteshi akafwepo. Lufu luliyapo ngofu pali endiye. 10 Kufwa kwakendi kwalikuba kwa kulekana ne bwipishi, kayi walafwa kamo konka. Lino buyumi mbwakute cino cindi ni buyumi bwekatana ne Lesa.

3 Sena nkamucinshi kwambeti twense afwe twalekatana pamo ne Yesu Klistu kupitila mulubatisho lwakendi, kayi twalabatishiwa pamo mu lufu lwakendi? 4 Weco pakubatishiwa twalabeti twalafwa ne kubikwa mumanda pamo nendiye, kwambeti mbuli Yesu ncalapunduka kubafu ne ngofu shabulemeneno bwa Bata, nenjafwe twikale ne buyumi bwalinolino.

27 Muntu wela kufwa kankanda kamo nanshi, kufumapo lombolosho 28 Kwelana neco, Klistu nendi walatwala mulumbo kankanda kamowa kufunya bwipishi bwa bantu bangi. Nakese katubili nteko kusa kufunya bwipishi sobwe, nsombi kwisa kupulusha bantu balamupembelelenga.

22 Petulo walapitilisha kwambeti, "Amwe Baislayeli, kamunyumfwani maswi awa, alambanga sha Yesu waku Nazaleti. Lesa walashomesha kwambeti walamutuma kuli njamwe pakwinsa bishomesho byangofu ne bishikukankamanisha, kayi ne bingashilo. Mucinshico, pakwinga byalenshika pakati penu. 23 ✝Lesa walikuba wabibambilalimo kwambeti, Yesu nakayabwe kuli njamwe ne kumushina pakumutwala mumakasa abantu baipa abo balamupopa palusanda. 24 ✝Nomba Lesa walamusungulula kubishikubaba bya lufu ne kumupundusha kubafu, pakwinga calikuba capatali kwambeti lufu lumukome."

11 Ame njame mwembeshi waina. Mwembeshi waina ukute kutaya buyumi bwakendi pacebo cambelele shakendi.

26 Pakwinga cindi conse mwalyanga shinkwa nekunwina munkomeshi iyi, mukute kukambauka shalufu lwa Mwami mpaka cindi nceti akese.