Morte de Jesus

A Yeshu Bhanawa

28 Kungai, a Yeshu akuno bhalikumumanya kuti gowe gamalile, nkupinga Majandiko ga Ukonjelo gatimilile, gubhashite, "Njikola njota." 29 Penepo jashinkupagwa bhakuli jigumbeywe divai ja shashama. Bhai, gubhashubhikenje shiponji mmakuli ja divai ja shashama jila, gubhatabhilenje nnubhalabhala lwa nkongo ushemwa ishopo, gubhaabhishilenje pa kang’wa. 30 Bhai a Yeshu bhakapapileje divai ja shashama jila, gubhashite, "Gamalile!" Kungai gubhakotime nntwe, gubhamalile.

23 Ashimanjola bhala bhakaabhambanjeje a Yeshu munshalabha, gubhatolilenje nngubho yabho, gubhagebhenyenje maungu nsheshe, malinga shibhalinginji. Gubhatolilenje na kanshu jabho, jenejo pujaliji ja lukwa. 24 Bhai, gubhalugulilenenje, "Tunajipapule, ikabhe tutende shikoma jibhe jika gani." Genego gashinkutendeka nkupinga gatimilile Majandiko ga Ukonjelo ga taya,

"Bhashinkugabhananga nngubho yangu,

Na nngubho jangu gubhaagulenje kwa shikoma."

Bhai nneyo, ni shibhatendilenje ashimanjola bhala.

25 Tome na nshalabha gwa a Yeshu bhashinkujimangana anyinabhabho, na a Malia akulu bhabho anyinabhabho akongobhabho a Kileopashi, na a Malia Magidalena. 26 Bhai, a Yeshu bhakaabhoneje anyinabhabho na nkujiganywa jubhampinjile jula ajimi patome, gubhaalugulile anyinabhabho, "A Mama! Munnole, mwanagwenu." 27 Kungai gubhaannugulile nkujiganywa jula. "Mwaalole, anyina bhenu." Kutandubhila penepo, bhaajiganywa bhala gubhaatolile anyina bhabho a Yeshu bhakatame kunngwabho.

33 Bhakaikanganeje pashemwaga, Shibhanga sha Ntwe, penepo gubhaakomelenje munshalabha a Yeshu na bhandunji bhabhili bhaalebhanga bhala, jumo kunkono nnilo, na juna kunkono nshinda. 34 A Yeshu gubhashite, "Atati mwaaleshelelanje, pabha bhakakwimanyanga ibhatendanga." Gubhagebhenenje nngubho yabho kwa tendela shikoma.

35 Bhandunji gubhajimingene bhalilosheyanga. Na bhalabhonji ashikalongolele bha Shiyaudi gubhaatendelenje mbenji bhalinkutinji, "Bhashikwatapulanga bhananji, nnaino bhaitapule bhayene, monaga bhenebha bhali a Kilishitu bha a Nnungu!"

36 Ashimanjola nneyo peyo gubhaatendelenje mbenji a Yeshu, gubhaajendelenje nikwaapa divai ja shashama bhapapile, 37 bhalinkutinji, "Monaga mmwe nni A mpalume bha Bhayaudi, mwiitapule mmayene."

38 Na pantundu nshalabha gwabho pashinkujandikwa mmbila "BHENEBHA A MPALUME BHA BHAYAUDI."

39 Na nkulebha jumo akomelwe munshalabha jula, gwabhatukene alinkuti, "Bhuli, igala mmwe nngati a Kilishitu? Bhai mwiitapule mmayene, ntutapule na uwe."

40 Ikabheje nkulebha juna jula gwankalipile mwine alinkuti, "Ugwe ukakwaajogopa a Nnungu? Numbe uli na ukumu jojo. 41 Uwe tushiukumulwa kwa aki, kwa itendi yetu. Ikabheje abha bhandubha shakwapi shoshowe shibhalebhile." 42 Kungai nigwashite, "Mmwe a Yeshu! Nngumbushile pushinnjinjile mu Upalume gwenupo."

43 A Yeshu gubhannjangwile, "Kweli ngunakuubhalanjila, lelope shuubhe na nne kupaladisho."

Kuwa kwa a Yeshu

33 Tandubhila malanga ga shaa shita mpaka shaa tisha, lubhindu gulutotile shilambo showe. 34 Malanga ga shaa tisha, a Yeshu gubhautiye lilobhe bhalinkuti, "Eloi, Eloi, lama shabhakitani?" Malombolelo gakwe, "A Nnungu bhangu, a Nnungu bhangu, pakuti nshineka?"

51 Penepo lipashiya lyaliji nkati liekalu gulipapwishe ipande ibhili, tandubhila kunani mpaka pai, shilambo gushiungumile na maganga makulu gakukaikaga, 52 makabhuli gakuunukaga na bhandunji bha ukonjelo bhawilenje gubhayushiywenje, 53 na bhalabhonji bhakayukanjeje na a Yeshu bhakayusheje, gubhapitengene ku shilambo sha ukonjelo, yani ku Yelushalemu, gubhaakoposhelenje bhandunji bhabhagwinji.

54 Bhai, bhakulungwa bha manjola na ashimanjola bhalinginji muulinda gwa a Yeshu, bhakabhonanjeje litaka liliungumila na yowe yakoposhele ila, gubhajogopenje kwa kaje, gubhashitenje, "Kweli aju munduju paaliji Mwana jwa a Nnungu."

13 Kwakwa kupinga kupundile, kwa mundu kwiishoya gumi gwake kwa ligongo lya ashaambwiga ajakwe.

A Nnungu Bhanakushipinga Shilambolyo

16 Pabha a Nnungu bhashinkwaapinganga bhandu pa shilambolyo, mpaka gubhampeleshe mwanagwabho jwa jika, nkupinga jojowe shankulupalile anaobhe, ikabhe akole gumi gwa pitipiti.

10 Putwaliji mmagongo na a Nnungu, gubhatupatanishe kwa shiwo shika Mwana gwabho. Na punda penepo, nnaino tushipatanishwa na bhenebho, shibhatutapule kwa gumi gwabho.

16 Uwe putukumanyi kupingana ni nneino. A Yeshu Kilishitu bhashinkwiishoya gumi gwabho kwa ligongo lyetu uwe, numbe uwe tunapinjikwa kwiishoya gumi gwetu kwa ligongo lya bhaakulupalilanga ajetu

2 Bhenebho ni mbepei jishoshiywe kwa ligongo lya leshelelwa yambi yetu, wala nngabha kwa ligongo lya yambi yetu pe, ikabheje kwa ligongo lya yambi ya bhandu bhowe.

8 Bhakabhonesheje malinga mundu, nikwiinyegaya na kunda mpaka kuwa,

elo, kuwa munshalabha.

9 Pabha tumumanyi kuti a Kilishitu bhakayusheje, bhakawa kabhili. 10 Pabha kuwa kwabho kula, bhashinkuwila yambi kamope, na nnaino tama kwabho, bhanatama pamo na a Nnungu.

3 Eu, nkakumumanyanga kuti uwe tubhatishwe na lundana na a Yeshu Kilishitu, nneila peila tushilundanywa nshiwo shabho? 4 Bhai putwabhatishwe twashinkulundana nabho, gutushishilwe pamo na bhenebho, nkupinga malinga a Kilishitu pubhayushiywe kwa ukonjelo gwa Atati, nneyo peyo na uwe tutame nndamo ja ambi.

27 Bhai malinga shiikubha, mundu anawa kamope na awaga anaukumulwa na a Nnungu. 28 Nneyo peyo, a Kilishitu na bhalabho bhashinkwiishoya bhayene kubha mbepei kamope, kwa ligongo lya leshelela ilebho ya bhandu bhabhagwinji. Pushibhaishe gwa bhili nngabha kuleshelela ilebho, ikabheje kukwaatapulanga bhene bhakwaalindanga kwa amu bhala.

22 "Mmashilambo bha pa Ishilaeli, mpilikananje agano malobhe gano! A Yeshu Bhanashaleti bhashinkukong’ondelwa kunngwenunji kwa itendi ya ilapo, na ilangulo ibhatendaga a Nnungu kwa nkono gwabho, malinga shimmumanyinji. 23 Kutolelela na shibhapanjile bhayene a Nnungu na bhamumanyi kuti, mmanganya shimwaakamulanje na kwaabhulaga kwa kwaaleshelanga bhandunji bhangali bha mmbone bhaakomelanje munshalabha. 24 Ikabheje a Nnungu gubhaayushiye, gubhatapwilwe kumboteko ya shiwo pabha ikanatendeshe shiwo shaakamule.

11 "Nne nshunga jwa mmbone. Nshunga jwa mmbone akajogopa shoya gumi gwakwe kwa ligongo lya ngondolo yakwe.

26 Pabha kila punkulyanganga gwene nkate guno, na ng’wa shene shikombe shino, nnalunguyanga kuwa kwa Bhakulungwa mpaka pushibhaishe.