28 Yesu niyo amanya kugamba yose yachinta, chani Mawandiko Yakukile yachinte, agamba, "Nina nchilu." 29 Aho na hana chiya chimemile siki. Niyo watweza lendele mwe divai igwaduke, waika mlanga mwe tete, niyo wamwinkiliza mo mnomo.

30 Yesu eze afyose iyo idivai, agamba, "Yachinta."

Akaheza enamiza umtwi abanika.

23 Wankondo weze wamtungika Yesu, niyo waguha izisuche zakwe, wazika machisa mane, kwa chila yumwenga chisa dyakwe. Naho niyo waguha suche yakwe ntuhu, suche iyo nahaina msumo. 24 Wadya wankondo niyo wagambilana, "Chisekuitatula, mna chiitoile tegatega naimgwele yuhi." Mbuli ino naidamanyika chani yachinte Mawandiko ya Kukile ivyo yakulanga,

"Wapangana izisuche zangu,

na isuche yangu waitoila tegatega."

Ivyo nivyo wadamanye wankondo awo.

25 Haguhi no msalaba wakwe Yesu wendaga wachimala mamiyakwe na lumbudye dya mamiyakwe na Maliyamu mkaza Kilopa na Maliyamu Magidalena. 26 Yesu eze amwone mamiyakwe, ne haguhi hakwe kachimala yudya mwanampina amungile, amgamba mamiyakwe, "Mnala, kaula, yuno nuyo mwanawo."

27 Vikaheza amgamba yudya mwanampina, "Haluse yuno nuyo mamiyako." Kukongela aho yudya mwanampina niyo amguha ekale naye kukaya kwakwe.

33 Weze wabule hantu hakwitangwa, "Gobela dya mtwi", niyo wamtungika Yesu mo msalaba, na hamwenga na wadya wabanasi waidi, yumwenga ntendelo ya kulume yumwenga kumoso kwakwe. 34 Akaheza Yesu agamba, "Walekeile, Tate kwaviya hawamanyize diya wakudamanya."

Niyo wapangana izisuche za Yesu kwa kuzitoila tegatega. 35 Wantu nawachimala hadya wakakaula kuno vilongozi wa Wayahudi wakamtila wakagamba, "Ambulaga wantu watuhu, haluse neambule mwenye hegu nuyo Kulisito yudya asagulwe ni Chohile!" 36 Wankondo nawo niyo wamtila, wamwigaila divai igwaduke, 37 na kumgamba, "Kweambule mwenye hegu weye wi seuta ywa Wayahudi!"

38 Ulahi na uwandikwa savino kulanga kwakwe, "Yuno nuyo Seuta ywa Wayahudi." 39 Yumwenga mwa wadya wabanasi atundikwe mo msalaba amhuluta, akamgamba, "Weye hwi Kulisito? Elo kweambule mwenye ukaheza uchambule naswi!"

40 Mna yudya mnyawe niyo amkwahila, amgamba, "Weye hukumogoha Chohile? Hata hegu waungwa uhokele kanto seiyo. 41 Suwe, ivyovili, vyachiwagila, kwaviya chongigwa chinkigwe kanto kwa yadya chidamanye, mna yuno mntu hana icho abalange." 42 Niyo amgamba Yesu, "Unikumbuke, Yesu, mo Useuta wako!"

43 Yesu niyo amhitula amgamba, "Chindedi dyelo dino nautende hamwenga nami hantu hahoile."

33 Ize ibule sa mtandatu nomsi, isi yose igubikwa ni chiza chibwile kubula saa chenda nomsi. 34 Saa chenda nomsi, niyo Yesu aila kwa izwi kulu, "Eloi, Eloi, lama sabakitani?" Nivyo kugamba, "Chohile ywangu, Chohile ywangu, nimbwani ukunileka?"

51 Aho paziya dye Nyumba nkulu ya Chohile dyatatuka hagati, kukongela kulanga kubula hasi. Si niyo yengilwa nichisingisa, mayuwe makulu yatulika. 52 Mbila zagubuka, na wantu wa Chohile walozize wabanikaga chikale wauyuswa. 53 Weze wauyuke mwe zimbila zawo, naho Yesu eze auyuke niyo wengila Yelusalemu mo mzi Ukukile, wantu walozize wawawona.

54 Ivyo yudya mkulu ywa wankondo, na wadya wendile wehamwenga nauyo wakamdima Yesu, weze wawone ichisingisa cheisi na mbuli zilaile, wogoha vidala, wagamba, "Chindedi mntu yuno nani Mwana Chohile."

13 Hahana mta ungi mkulu ukujinka ungi wa mntu akulavya ujima wakwe kwa chausa cha wambuya zakwe.

16 Kwaviya Chohile kaungisa isi vilekile amlavye Mwanawe ywe ichedu, chani chila mntu namzumile asekwaga mna enkwe ujima mazuwa yose.

10 Hegu hadya chendaga wankondo wa Chohile, Chohile kachitenda chivane kwa file ya mwanawe. Vyatenda zeze haluse chiwambuya wa Chohile, nachambulwe kwa ujima wa Kulisito.

16 Suwe chimanya kugamba ungi ni mbwani kwa viya Kulisito alavyaga ujima wakwe kwa chausa chetu. Suwe naswi ivyo chaungwa chilavye ujima wetu kwa chausa cha walukolo wetu.

2 Kulisito nuyo alavigwe ntambiko chani ause masa yetu chinanayo mna siyo masa yetu du mna na masa ya wantu wose we isi.

8 Kanyanyahala na kwiva kubula kubanika,

hata kubanika kwakwe mo msalaba.

9 Kwaviya chivimanya kugamba Kulisito kauyuka, habanike naho, file haimdahe naho. 10 Kabanika lumwenga du kwachausa cha masa. Habanike naho ekala kwa kumwagila Chohile.

3 Togola hamvimanyize kugamba chabatizwaga mwe file ya Yesu Kulisito? 4 Chize chibatizwe chihambwa hamwenga na uyo mwe file yakwe, chani saviya Kulisito auyuke kwa ukulu wa Tate, suwe naswi chikale mwe ujima mhya.

27 Saviya wantu weikiwe kubanika lumwenga du ukajika wakantilwa ni Chohile. 28 Seivyo Kulisito naye kelavya ntambiko nkanana imwenga abanike chani ause masa ya wantu walozize. Aho nalaile nkanana ya kaidi suko kwa kutowana na masa mna kwachausa cha kuwambula wadya wakumgoja kwa nkwina.

22 Nyuwe wagosi wa Waizulaeli tegelezani, Yesu ywa Nazaleti nani mntu udahi wakwe kulaila kwa Chohile wikwa holumpe mwenyu kwa vilagiso na mpituko Chohile adamanye mwakwe. Nyuwe wenye muimanya imbuli iyo kwaviya ilaila mwenyu. 23 Chohile amanyaga mzungu wakwe mwenye, kugamba Yesu kenkizwa mwe imikono yenyu, mumkoma kwa kuwalekela wantu wavu wamkome kwa kumtundika mo msalaba. 24 Mna Chohile kamuyusa, kamtenda udahi wa file usekumdaha, kwaviya kalekeilwa mwa masulumizo ya file.

11 "Miye ni mdimi ywedi. Mdimi ywedi alavya ujima wakwe kwa chausa cha ngoto zakwe.

26 Kwaviya chila mkadya mgate uno na kunywela ichikombe chino, mwalonga ifile ya Zumbe, kubula aho akwizila vituhu.