A mulher sábia

Ақылдылық және аңғалдық

1 Ақылды әйел үйін өркендетер,

Ақылсыз әйел үйін өз қолымен күйретер.

10 Даналықтың бастауы — Жаратқан Иені

Терең қастерлеп, Оған мойынсұну,

Һәм ақыл-парасат — Киелі Құдайды

Және Оның еркін жақыннан тану.

33 Жаратқанды шын қастерлеу даналыққа үйретер

Және кішіпейіл жанның абыройы өсер.

5 Ал егер кейбіреулерің даналыққа мұқтаж болсаңдар, Құдайдан сұраңдар, Ол береді. Тәңір Иеміз еш жазғырмай-ақ бәріне жомарттықпен бере салады.*

11 Иемізге әрі құдіретіне ден қойыңдар,

Дәйім Оның еркін білуге ұмтылыңдар.*

Жақсы әйел — даналықтың үлгісі

10 Еңбекқор,* жақсы әйелді кім таба алар?

Ол інжу-маржаннан* да бағалы болар!

25 Осылай ол бөленеді күш пен салтанатқа,

Шаттықпен қарайды жарқын болашаққа.

26 Аузынан шыққан сөзі — нағыз даналық,

Берген тәлімі — мейірімді жақсылық.

28 Балалары тұрып, аналарын дәріптейді,

Күйеуі де оны былай деп құрметтейді:

29 «Көп әйел заты еңбекқор, жақсы екен,

Бірақ барлығынан да асып түстің сен!»

30 Әсемдік өткінші, алдамшы сұлулық та,

Тәңір Иені қастерлейтін әйел лайық мадаққа.

4 Ізгі әйел күйеуінің абыройын асырар,

Арсыз әйел күйеуінің қуатын тауысар.*

16 Сүйкімді әйел абыройға бөленер,

Күш сала істеген байлықты иемденер.*

14 Үй мен мал-мүлкің — мұраң әке-шешеңнен,

Ал ақылды әйелің — сыйың Жаратқан Иеңнен.

3 Сол сияқты, егде әйелдердің жүріс-тұрыстары Құдайға бағышталған әйелдерге лайықты болуы қажет: олар ешкімге жала жаппай, арақ-шарапқа салынбай, қайта, басқаларды жақсылыққа үйрететін болсын. 4 Егде әйелдер қыз-келіншектерді күйеулері мен балаларын сүйіп, 5 байсалды, кіршіксіз таза, үй шаруасына ұқыпты әрі мейірімді болып, күйеулеріне мойынсұнуға жігерлендіріп үйретсін. Осылайша олар Құдай сөзінің жамандалуына жол бермесін.

11 Сондай-ақ (қауым қызметшілерінің) әйелдері* де байыпты, өсек айтпайтын, салауатты, қай нәрседе де адал болуға тиіс.

Күйеу жігітті қарсы алмақ болған он қыз туралы астарлы әңгіме

1 Сол кезде Құдай Патшалығындағы жағдай мынаған ұқсас болады: он бойжеткен қолдарына шамдарын ұстап, күйеу жігітті қарсы алуға шығыпты. 2 Олардың бесеуі ақылды, бесеуі ақылсыз* екен. 3 Ақылсыз қыздар шамдарын алғанмен, құятын артық май алмай шығады. 4 Ал ақылдылары шамға қоса майға толы құмыраларын да ала жүреді. 5 Күйеу жігіт ұзақ кешіккендіктен, барлығы қалғып, ұйықтап қалады.

6 Бірақ түн ортасында: «Күйеу жігіт келіп қалды! Қарсы алуға шығыңдар!» — деген дауыс естіледі. 7 Сонда қыздардың бәрі де орындарынан тұрып, шамдарын жөндейді. 8 Ақылсыздары ақылдыларына:

— Майларыңнан беріңдерші, шамдарымыз сөнейін деп жатыр, — дейді. 9 Ал олар:

— Бізге де, сендерге де жетпей қалғанша, өздерің сатушыларға барып, май сатып алғандарың жөн, — деп жауап береді. 10 Әлгілер майға кеткенде күйеу жігіт келіп, дайын тұрғандар онымен бірге тойға кіріп кетеді де, есіктер жабылып қалады.

11 Кейін майға кеткен қыздар да келіп:

— Тақсыр мырза! Есікті аша көріңіз! — деп өтінеді. 12 Ал күйеу жігіт оларға:

— Шын айтамын, сендерді танымаймын!* — деп жауап береді.

13 Сондықтан сергек болыңдар! Себебі сендер Мен Билеуші ретінде көктен келетін күнді де, сәтті де білмейсіңдер.