5 Mugese kamba viyagesile Yesu Kilisito.

6 Kilisito viyali kakala kweli Mulungu,

lakini hagesile bule kamba kuigala na Mulungu kinhu cha kunanahila,

7 lakini kwa kulonda mwenyego,

kaleka vinhu avo vose kaitenda kamba viyali mtumwa,

kaleligwa kamba viwoleligwa wanhu,

kaoneka kwa kihanga cha wanhu.

8 Kaitenda mwenyego mdodo, munhu yotegeleza mbaka ifa yake,

ona ifa yake mumsalaba.

4 Lakini vikivikile kipindi kinogile, Mulungu kamtuma mwanage mwenyego, yaleligwe na mtwanzi, na kalongozigwa na Malagizo, 5 muladi yawakombole wanhu waja wose watawaligwe na Malagizo, ili tuwe wana wa Mulungu.

14 Avo kwavija wana awo ni wanhu weli na lukuli na damu, vivija Yesu nayo keza kawa kamba wao na kuilumba muunhu wao. Katenda vivo, muladi kubitila ifa yake yamuhume Mwenembago, yakalile na udahi wa ifa. 15 Lakini vivija Yesu kafa kuwalekesa waja kwa bwembwe da ifa wakala watumwa muugima wao wose.

17 Lekaavo kalondeka yaigale na ndugu zake kwa kila nzila, muladi yawe Mulava nhosa Mkulu yotamaniligwa na yeli na bazi mwiisang’hano yake kwa Mulungu, muladi nzambi za wanhu zigeligwe kumgongo.

16 Avo, Mulungu kawanogela wanhu wa mwiisi mbaka kamulava Mwanage yeli yaiyeka, muladi munhu yoyose yonda yamtogole sekeyapotele lakini yawe na ugima wa mazuwa gose.

18 Kuvumbuka kwa Yesu Kilisito kukala vino, Malia yafungiligwe zengele na Yusufu, lakini wang’hali hawanakala hamoja kamba mbigalo na mtwanzi, Malia koneka kana inda kwa udahi wa Loho Yang’alile.

20 Viyakalile kogelegeza vivo, msenga wa kuulanga wa Mndewa kamulawilila mzinzozi na kamulongela, "Yusufu mzukulu wa Daudi, sekeudumbe kumsola Malia yawe mwehe wako, kwavija inda yake kaipata kwa udahi wa Loho Yang’alile. 21 Kolela mwana wa kimbigalo na gweye komgwaa twaga da Yesu, kwavija kowakombola wanhu zake mzinzambi zao."

22 Gano gose gatendeka kutenda galongigwe na Mndewa kubitila mtula ndagu wake galawilile, 23 "Mhambe kogoga inda, na kolela mwana wa kimbigalo, nao womkema Imanueli," fambulo jake, "Mulungu kahamoja na tweye."

24 Avo Yusufu viyalamuke muutulo, kamsola Malia kamba viyalongeligwe na imsenga wa Mndewa. 25 Lakini hatembele nayo mbaka viyalelile mwana na Yusufu kamgwaa twaga mwana ayo Yesu.

30 Msenga ija kamulongela, "Malia, sekeudumbe, gweye kupata ng’hekewa ya Mulungu. 31 Kogoga inda na kolela mwana wa kimbigalo, nayo komkema Yesu. 32 Kokuwa munhu mkulu, kokemigwa Mwana wa Mulungu yeli Uchanha Ng’hani. Mndewa Mulungu komgwaa kigoda cha undewa, kamba viyakalile Daudi muhenga wake. 33 Kokuwa mtawala wa lukolo lwa Yakobo siku zose, na undewa wake wokuwa wa mazuwa gose!"

4 Yusufu kasegela kudibuga da Nazaleti mwiisi ya Galilaya, kachola kudibuga da Beselehemu mwiisi ya Yudea, hanhu hayavumbuke mndewa Daudi. Yusufu kachola kuko kwavija kolawa mulukolo lwa Daudi. 5 Kachola na Malia kupetigwa, yakalile yamfungile zengele. Nayo Malia kakala na inda. 6 Viwakalile kudibuga da Beselehemu, kipindi cha Malia kuifungula kivika. 7 Kaifungula mwanage wa chaudele wa kimbigalo, kamvaza vikumbi. Abaho kamtambaliza hanhu hoodimiligwa ng’ombe, kwavija hawapatile gati mzing’anda za wageni.

10 Lakini msenga ija kawalongela, "Sekemudumbe! Niye niwagalila mbuli inogile, mbuli yonda itende wanhu wose wadeng’helele. 11 Lelo kudibuga da Daudi, Mkombola wenu kavumbuka, ayo Kilisito Mndewa! 12 Kino acho kilaguso kumwenu, momvika mwana king’hele kavazigwa vikumbi, katambalizigwa hanhu hoodimiligwa ng’ombe."

15 Wasenga wa kuulanga viwabwelile kuulanga, wasusilaji wailongela, "Tucholeni Beselehemu tukailole mbuli ino ilawilile, yailongile Mndewa."

16 Avo walopola kuchola, wawavika Malia na Yusufu, na wamona imwana king’hele katambalizigwa hanhu hoodimiligwa ng’ombe. 17 Wasusilaji viwamone imwana, wawalongela kija kiyawalongele msenga wa kuulanga mbuli ya imwana. 18 Wanhu wose wahulike kija kiwalongile wasusilaji, wakanganya.

37 Avo Pilato kamuuza, "Vino gweye kwa mndewa?"

Yesu kamwidika, "Gweye kolonga niye na mndewa. Niye nivumbuka mbuli ya gano, na mbuli ya gano niza mwiisi, kulonga mbuli ya ukweli. Munhu yoyose younogela ukweli konhegeleza."

9 Viwamalile kumtegeleza, walawanya, mnzila wayona nhondo iija iwayone mwambu wa kudilawila zuwa, iwalongolela na kwima hanhu aho kuyavumbuke imwana. 10 Viwayone inhondo, wadeng’helela ng’hani. 11 Avo wengila mng’anda, wamona imwana na Malia mamake, wamfugamila na kumtambikila. Abaho wamgwaa nhunza za zahabu, mavumba na mavuta ga bei ng’hulu gokemigwa manemane.

12 Abaho wabwela ukayao kwa kubitila nzila iyagwe, kwavija Mulungu kawazuma mzinzozi sekewabwele kwa Helode.