18 Ego pira sa vei sa na vavakatona na podona i Jisu Karisito. I Mere, isa na tinana i Jisu, sa perangana tu sa tavaiviva vakole vania i Josepa. Ba totonai qai oqoro mekarai suvere vaikamu ira karu, sa i Mere sa sa tei vaporeni iapana tu na Gagala Tabuna. 19 I Josepa na marenena api sa kai tinoni tuvisina sisa. Ko sake nyogua vavotuni vavakato vaivakeana isa si Mere, ko sa roroqua ko bi koroto golomo palenia isa si Mere sau. 20 Ba totonai sa korapa rorove vei inara i Josepa, poni sa api sa votu tana pa putagita sa kai mateana tana Bangara, ko pira saunia, <<Josepa, ao na tuna i Devita! Muke matagutu tekua ao si Mere ko mi maqotamu, ura isa sa pidoko pa iapana isa sa na Gagala Tabuna tu sa veinia. 21 Kode mina vapodoa isa sa kai koburu marene, ko muna vakukunia ao nisongona i Jisu* sisa, ura isa kode mina aloria pa dia sela sira na ona tinoni,>> sau sa na mateana.

22 Ego doru sakasava aipira sa qai taroiti ko qai vagore votua sa na paranga perangana tu sa pojai na Bangara tana tinoni kokorotai i Aisea, pira sau,

23 <<Vainongoro! Kai rereko koregana* mina pore iapana

ko mina vapodoa kai koburu marene,

ko na isongona sa mai vakukunia i Imanuela,>>✝ sau.

Na ginuana na paranga Imanuela sa Na Tamasa sa suvere tavitigita.

24 Pa liguna na putagita sa sa dorava si Josepa ko sa roitinia isa sisa vei sa garununia na mateana tana Bangara ko sa sa tekua isa si Mere ko na maqotana. 25 Ko sake puta tavitia i Josepa si Mere tinganai sa vapodoa tu isa na tuna marene. Ko sa vakukunia i Jisu isa na isongona.

26 Ego totonai sa vonomo si Elizabeti, sa sa garunia na Tamasa sa na mateana i Qebereli ko sa lao pa kai gugusu pa Qalili, na isongona pa Nazareti. 27 Ko sa lao sa tana kai rereko koregana, isa sa tei tavaiviva vakolena tu ko mina alavia kai marene na isongona i Josepa, kai tinoni sa podo lame vei pa tutina i Devita na bangara. Ko na isongona na rereko koregana isa si Mere.

30 Ba sa paranga lao tana sa na mateana, <<Mere, muke matagutu! Ura sa qeranigo na Tamasa sao. 31 Ko doro! Kode muna bogata sao ko muna vaporea sa kai tumu marene ko muna vakukunia i Jisu ao sisa. 32 Kode mina poreveveina sisa beto mina tagigala na Tuna na Tamasa ululuna jola, beto na Tamasa isa na Bangara sa mina vania na binangara ti Devita isa na ona tite pa moa. 33 Ko mina bangaraniria isa sira na bubutuna i Jekopi kamua na kamua beto ko na ona binangara sa mina kepore na vinabetona,>> sau sa na mateana.

34 Poni sa oe lao tana mateana si Mere, <<Ai sa vei mina boka gore votu sa vei qu pojai ao, ura qa oqoro laoa kai marene sara?>> sau.

35 Poni sa oe laoa na mateana sisa, pira saunia, <<Na Gagala Tabuna mina lagere tamu ko mina ongugo sao. Ko sa vei isa sa na koburu mina podo sa mina tagigala na liosona beto na Tuna na Tamasa.

14 Ba pira sau i Jisu, <<Mu vamalumuria sira na koburu ko mai lame taqu, muke suquturia. Ura tadira tugu vevei aipira sa na binangara pa noka,>> sau sisa.

4 Isa na tinoni gu sa vaikete mule veinia na koburu ikete api, sa isa sa poreveveina jola pa binangara pa noka. 5 Isa sa vatoga vatalea pa isongoqu ara sa kai koburu ikete vevei api sa sa vakamusiu tugu sara,>> sau si Jisu.

16 Beto sa aru vakataparia isa sira na koburu ko sa vaoponiria na limana ko sa mananiria.

3 Poni sa oea i Jisu sisa, pira saunia, <<Sosoto pa sosoto ma pojanigo ara sao: kepore sa kai tinoni mina boka batia na binangara tana Tamasa, vei minake podo mule* mai tu sisa,>> sau.

21 Totonai mi popodo sau sa na rereko bogatana sa sa kolea isa sa na takulanga, ura sa kamua sa nona totoso okotona. Ba pa liguna sa tei vaporea tu isa sa na koburu, poni sa sa muma pale isa sa na vitigi ura sa qerania isa sa kai tinoni sa tei podo lame tu pa kasia gusu.

9 Na tinoni sa podo tana Tamasa sa sake roitinia na sela, ura na kiko toa tana sa sa togasa tana. Beto na tinoni isa sa sake boka sela ura isa sa tei podo tu tana Tamasa.