Nascimento: o que a Bíblia diz sobre a vida e a fé

13 काबरकि तेंह मोर भीतरी भाग ला बनाय हस;

तेंह मोर दाई के गरभ म मोला एक संग जोड़े हस।

14 मेंह तोर परसंसा करथंव काबरकि मेंह भयानक अऊ अद्भूत रीति से बनाय गे हवंव;

तोर काममन अद्भूत अंय,

मेंह ओला बने करके जानथंव।

15 जब मोला गुपत जगह म बनाय गीस,

जब मोला धरती के गहरई म एक संग बुने गीस,

त मोर ढांचा ह तोर ले छुपे नइं रिहिस।

16 तोर आंखी ह मोर बिगर आकार के देहें ला देखिस;

मोर देहें के अंग, जऊन मन बनत जावत रिहिन,

ओमन रचे जाय के पहिले तोर किताब म लिखाय रिहिन।(भजन-संहिता 139:13-16)

5 "गरभ म रचे के पहिले ही मेंह तोला जानत रहेंव*,

तोर जनम के पहिले ही मेंह तोला अलग करे हंव;

मेंह तोला देस-देसमन बर अगमजानी ठहिराय हंव।"(यरमियाह 1:5)

9 तभो ले तेंह मोला गरभ ले बाहिर लानय,

जब मेंह दूध पीयत लइका रहेंव, तब ले तेंह मोला तोर ऊपर भरोसा करे बर सिखोय हस।(भजन-संहिता 22:9)

10 जनम ले ही मोला तोर देखरेख म छोंड़ दिये गीस;

जब मेंह मोर दाई के गरभ म रहेंव, तब ले ही तेंह मोर परमेसर अस।(भजन-संहिता 22:10)

6 जनम ले ही मेंह तोर ऊपर भरोसा रखे हंव;

तेंह मोला मोर दाई के गरभ ले बाहिर लानय।

मेंह हमेसा तोर परसंसा करहूं।(भजन-संहिता 71:6)

15 "का कोनो दाई अपन दूध पीयत लइका ला भुला सकत हे

अऊ अपन जनमाय लइका ऊपर कुछू दया नइं करय?

हां, ओह तो भुला सकत हे,

पर में तोला नइं भुलावंव!(यसायाह 49:15)

9 का में लइका जनमाय के समय ला लाथंव

अऊ लइका ला पईदा होवन नइं दंव?"

यहोवा ह कहत हे।

"जब में लइका जनमाय के समय ला लाथंव

त का में कोख ला बंद कर देथंव?"

तुम्हर परमेसर ह कहत हे।(यसायाह 66:9)

14 येकर कारन, परभू ह खुद तुमन ला एक चिनहां दीही: सुनव, एक कुंवारी ह गरभवती होही अऊ एक बेटा जनमही, अऊ* ओकर नांव इमानुएल* रखही।(यसायाह 7:14)

26 इलीसिबा के देहें म रहे के छठवां महिना म, परमेसर ह जिब्राएल स्वरगदूत ला गलील प्रदेस के नासरत नांव के नगर म एक कुंवारी छोकरी करा पठोईस। 27 ओ छोकरी के मंगनी यूसुफ नांव के एक मनखे संग होय रिहिस, जऊन ह दाऊद राजा के बंस के रिहिस। ओ कुंवारी के नांव मरियम रिहिस।(लूका 1:26,27)

30 पर स्वरगदूत ह ओला कहिस, "हे मरियम, झन डर! काबरकि परमेसर के दया तोर ऊपर होय हवय। 31 देख, तेंह देहें म होबे अऊ एक बेटा ला जनम देबे, अऊ तेंह ओकर नांव यीसू रखबे। 32 ओह महान होही अऊ सर्वोच्च परमेसर के बेटा कहाही। परभू परमेसर ह ओला ओकर पुरखा दाऊद राजा के सिंघासन दीही, 33 अऊ ओह याकूब के बंस ऊपर सदाकाल तक राज करही; ओकर राज के अन्त कभू नइं होही।"(लूका 1:30-33)

34 मरियम ह स्वरगदूत ले पुछिस, "मेंह तो एक कुंवारी छोकरी अंव। येह कइसने हो सकथे?"

35 स्वरगदूत ह जबाब दीस, "पबितर आतमा ह तोर ऊपर उतरही, अऊ सर्वोच्च परमेसर के सक्ति ह तोर ऊपर छइहां करही। एकरसेति ओ पबितर जन जऊन ह जनमही, ओह परमेसर के बेटा कहाही।(लूका 1:34,35)

18 यीसू मसीह के जनम ये किसम ले होईस। यीसू के दाई मरियम के मंगनी यूसुफ के संग होय रिहिस, पर एकर पहिली कि ओमन दूनों घरवाला-घरवाली के रूप म एक संग होतिन, मरियम ह पबितर आतमा के जरिये पेट म पाय गीस। 19 काबरकि मरियम के होवइया घरवाला यूसुफ ह एक धरमी मनखे रिहिस अऊ ओह मरियम ला मनखेमन के आघू म बदनाम करे नइं चाहत रिहिस, एकर खातिर ओह ओला चुपेचाप छोंड़ देय के बिचार करिस।

20 पर ओकर ये बिचार करे के पाछू, परभू के एक स्वरगदूत ह ओला सपना म दिखिस अऊ ओ स्वरगदूत ह ओला कहिस, "हे यूसुफ, दाऊद के संतान, तेंह मरियम ला अपन घरवाली के रूप म घर लाय बर झन डर, काबरकि जऊन ह ओकर गरभ म हवय, ओह पबितर आतमा के तरफ ले अय। 21 ओह एक बेटा ला जनम दीही अऊ तें ओकर नांव यीसू* रखबे, काबरकि ओह अपन मनखेमन ला ओमन के पाप ले छुटकारा दीही।"(मत्ती 1:18-21)

22 ये जम्मो बात एकर खातिर होईस कि जऊन बात, परभू ह अगमजानी के जरिये कहे रिहिस, ओह पूरा होवय: 23 "देखव, एक कुंवारी ह गरभवती होही, अऊ ओह एक बेटा जनमही, अऊ ओकर नांव इमानुएल रखे जाही"* (जेकर मतलब होथे "परमेसर हमर संग")।

24 जब यूसुफ ह नींद ले जागिस, त ओह वइसनेच करिस जइसने परभू के स्वरगदूत ह ओला हुकूम दे रिहिस अऊ ओह मरियम ला अपन घरवाली के रूप म अपन घर ले गीस। 25 पर जब तक मरियम ह बेटा ला जनम नइं दीस, तब तक यूसुफ ह ओकर करा नइं गीस। अऊ ओह ओकर नांव यीसू रखिस।(मत्ती 1:22-25)

3 लइकामन यहोवा के दुवारा दिये गय भाग होथें,

लइका ह ओकर कोति ले दिये गय एक ईनाम ए।(भजन-संहिता 127:3)

27 येह ओ लइका ए, जेकर बर मेंह पराथना करे रहेंव, अऊ यहोवा ह मोला मोर मुहूं मांगा बर दे हवय।(1 समूएल 1:27)

21 जब एक माईलोगन ह लइका जनथे, त ओला पीरा होथे काबरकि ओकर बेरा ह आ गे हवय; पर जब ओला लइका हो जाथे, त आनंद के मारे कि एक लइका ह संसार म पईदा होईस, ओह पीरा ला भुला जाथे।(यूहन्ना 16:21)

4 एकरसेति जऊन ह अपनआप ला ये लइका के सहीं नम्र करथे, ओह स्वरग के राज म सबले बड़े अय। 5 अऊ जऊन ह मोर नांव म अइसने छोटे लइका ला गरहन करथे, ओह मोला गरहन करथे।(मत्ती 18:4,5)

14 यीसू ह कहिस, "छोटे लइकामन ला मोर करा आवन दव, अऊ ओमन ला झन रोकव काबरकि स्वरग के राज ह अइसने मन बर अय।"(मत्ती 19:14)

16 अऊ ओह लइकामन ला अपन कोरा म पाईस अऊ ओमन ऊपर अपन हांथ रखके ओमन ला आसीस दीस।(मरकुस 10:16)

3 यीसू ह ओला ये जबाब दीस, "मेंह तोला सच-सच बतावत हंव, जब तक कोनो मनखे के नवां जनम नइं होवय, तब तक ओह परमेसर के राज ला नइं देख सकय।"(यूहन्ना 3:3)

9 जऊन ह परमेसर ले जनमथे, ओह पाप करतेच नइं रहय, काबरकि परमेसर के सुभाव ओमा बने रहिथे। ओह पाप नइं कर सकय, काबरकि ओह परमेसर ले जनमे हवय।(1 यूहन्ना 3:9)