6 Takkha tuunchu, Jisu diang khan inmani ta neek-ah akalok thiampu chuon kha inpejei, ajarchu hiwahi akathakhet chong-inkhitna inkhat ejarra, Pathian li ama mi ngai karra inadapi inzootna kha-um akatha alei eii.

7 Inzootna mansakhet khan insialna leiommak inchu, inni huuina hi arei enunijei.

13 Inzootna kathar khat nirilna hin, Pathian in ma-insa kha amaruo min-ejei; halli amaruo khat-um kheella hongkamaruo rakip kha innot-ah amangsik ejei.

22 Khawajarra, hiwa inteina hin, Jisu hi kathakhet inzootna kanapepa kha amin-ejei.

20 Khawale in-angnga waipool kha inbak suoli rabing kha aleiya aleiti, "Hiwa rabinghi nangni sikbeiya akasar kei thisen makheiya inzootna kathar kha eii.*"” Jer 31:31-34

27 Halli ama’n rabing aleiya, Pathian diang rawaan apeli, inmani diang apeya, "Nangni rakip hiwahi inru"” ati;

28 "Ajarchu khawa chong-inkhitna, manu rakip ngaidamnasik ah akasar kei kathisen kha eii. Suok 24:8; Jer 31:31-34

14 Hiwahi akadik ejarra, Christa thisen khan angtuk kheeldoomma akatha min-eme! Hektik kaboi Ratha khan ama atheinuo ah puikatung dooiphur eya Pathian diang ipekha ejei. Eini’n akaringchak Pathian sepa nithotheina sik anemna kaommak sinadan ngai khanna inphut, eini kase katha jetna malung hi ama thisen khan anaminthiang pisik eii.

15 Hiwasik bit-ah akathar inzootna kanaboolpipa kha Christa kha ejei, ama’n ma-insa inzootna nuoiya kaom chongpeii kamakoi ngaikha masuona sik-ah ama’n anathipijei, hiwahi chong lei-inkhitna hektik kaboi munasik kasuok kha ikoi inmani’n inmunasik ejei.

16 Lungdou injia inkhat kha inthiangnga malarsik hi arei ejarra khawa lungdou kaboolpa kha akathi ejei, 17 ajarchu lungdou kaboolpa kha aringlaiseng khawa lungdou kha iteii nemnamak; ama athisuoli bit ranak inei eii. 18 Khawajarra inzootna* ma-insa kha-um thisen inneimanlibit ranak kaom eii.

19 Mansakhet-ah, Moses in mi ngaidiang Dan suungnga kaom chongpeii rakip ngaikha aleirilpi. Khawa suoli tuile inminchun keel ngaili saraatchal ngai thisen ama’n aleiya samul kasenli khuoichubor neimanna Dan larik khat-um mi rakip kha leikathingthuon. 20 Ama’n aleiti, "Hiwahi Pathian in nangnidiang juisik ah inapeii inzootna thisen kha eii."” Suok 24:6-8

1 Jihudi ngai Dan kha chu akatha phur lakajuosik raliim kha eii halli ka-etak phur ngaikha emak. Khawa jarra kumsuo ah inmani’n inchatlekleiya inpeii dooiphur ngaikhan heikaluut mi ngaikha angtikniteii pui mintungmak. 2 Pathian chubeikatho mi ngaikha inmanuwa inphut inthiangtak in e-inchu, manu jarra kahoimak woikhat inlet-ah inmani diang suok khainuni jei, halli dooiphur rakip ngaikha inleidasik ejei. 3 Takkha kum rakip-ah dooiphur inpekhan mi ngaikha inmanu ngaikha inminngaidon. 4 Ajarchu saraatchal li keel ngai thisen khan manu ngaikha angtikniteii khaimatormak.

17 Khawa jarra tu e-innum Christa le inchun mi khachu akathar miring inkhat ejei, akamaruo kha athengjei, enru, akathar kha aheitungjei. 18 Hiwa rakip hi Pathian itho eii, Ama’n keini hi Christa jarra ama inhalpui kinlei eya inphut ama sap namin-ejei halli keini diang-um mi leiilak ngaikha ama sap kamin esik ah chuon kha anapejei. 19 Keini chongroon khachu, Christa jarra Pathian in miring rakip asap min-enasik iboolhi eii.* Inmani manu kha Pathian in teelpi makjei, halli angtho thoa ama’n inmani kha sap ah iboolme ti chongkha ama’n keinidiang anapejei.

20 Khawa jarra, Pathian ama tak-in keini diangnga iril angnga, Keini Christa sik chongkaril ngaikha kin-eii, Khawa jarra Christa rathuulla nangnidiang kinnati eii, Pathian in nangni kha na-inhalpuiya inphut asap namin erase. 21 Christa kha manu neimak eii, takkha eini ama le ni-inchunna suungnga Pathian dikna kha nichang suomnasik, Pathian in eini manu kha ama tum namin epijei.

4 Keini’n Christa jarra Pathian diang inngamna kinnei jarra hiwahi kinril eii. 5 Hiwa chuon rakip thomatorna keinidiang iteii tisik neimung; takkha keini thomatorna khachu Pathian diangnga inphut akajuo eii.

6 Ama’n keini hi inzootna thar suungnga chuonkathosik rahoi kasuok namin-ejei; hiwahi injia dan khan emak, takkha Ratha khan eii. Ajarchu injia dan khan thina amasuok, takkha Ratha khan ringna apejei. Jer 31:31

11 Inpum tak-in wunkatan kin-eii kati (taksa-ah wun intan) inmani’n nangni naneiya inphut wunkatanmak Zaatlop ning eii natikha ngaidonru. 12 Khawa phakhan Christa diang leiom makchu, Pathian ikadang mi ngai lei-emak chu, Pathian le inzootna khan ram leiilaak mi ning-eii, manmasituolla ngamna khat-um Pathian kajetmak ninglei eii itikha ngaidonru. 13 Takkha apha khat-ah kalaak-ah kaleiom nangni ngaikha tuunchu Christa Jisu thisen khan Christa diang kanaiya inaheiruoi kha ning ejei.*

10 Hiwa hi-eii minriang: eini’n Pathian kha niminriang emak takkha ama’n eini inaminriang eii halli ama’n Asapa kha apesuok ah eini manu ngaidamnasik ah ajuotir.