2 Te, na ama kaniga, God sitimo, dumo Jerusalem kor i, God moglmara heven ibo yei, ede atne ugo, na kaniga. Abu ta ede yagl enabedi pre yoba ekin wakai gagl teimere mere yegl, God ye dumo Jerusalem kor i, ere wakai ere yei kodidre, ede atne edugwa. 3 Ede atne edugo, yoba ta sia king yomara mogl, ka podo ta dugo, na prika. Ye yegl dugwa, Ene kanio! God sel yugumo erme yoba meglmara suna yenan, God ye yoba meglmara suna kipai moran, yoba i ye yobama moraiglkwa. God ye meglmara suna moglsre, 4 kaino nuglo ta yage sinabuka i koko ede tenabuka. Te, yoba okuo ta goglkribi,* yoba kai ersre, kai giglage sigwa ya giugl prikwa i, okuo ama ta manabuka. I siragl pre taragl kane kane okna pamere yegl ta paikrabuka. Dudumiwe di, yegl dugwa.

10 Ye yegl dugo, God Murubuglomo na moglmara si kau si naruko, angelo i ye na ake i pi, muglo ta yei ede mitna kaima omara i edidre, God sitimo, dumo Jerusalem, God heven ibo moglmara yei, ede atne ugwa ikra obuno di narukwa. 11 Dumo Jerusalem i, God abuglagemo mina abuglage sugwa. Abuglage sugwa i, kobuglo ta mige podo boglkwa, kagie jaspa we digwa i abuglage sumere yegl sidre, glas pogl dumere mere yegl ama pogl dugwa.

12 Ana na dumo Jerusalem kaniga i, kobuglo togl podo ta ere winabo digo, togl dra 12-pela yogwa. Togl dra swara swarade i, Israel yoba yugobuno 12-pela meglmere i, kagno beglkwa paugwa. Te, togl dra swara swarade i, angelo swara swarade sugl kan meglkwa. 13 Togl dra i, ade umara suota yogo, ade beimara ama suota yogwa. Te, nigl bre suota yogo, nigl beye ama suota yogwa. 14 Te, kobuglo togl ere winabo dimara i, kobuglo 12-pela komono kana padiglsre, kobuglo tau tebe yei ede kuglo eigwa. Kobuglo 12-pela i mina, sipsip nagigle dedugwa yagl 12-pela meglmere i, kagno paugwa.

22 Ana na dumo Jerusalem kaniga i, God yugumo suna i ta yogo, kankrika. I siragl pre Yagl Kade God ye yobuglomo pai kawa togwa i, ya te sipsip nagigle yene taun suna miurka pre yugu ta yenabuka i ta paikrukwa. 23 Te, dumo i ama ade mo ba abuglage sinabrika i ta paikrukwa. I siragl pre God abuglagemo dumo i abuglage si togo, te sipsip nagigle i, dumo i ken lamo mere yegl moglkwa.

1 Ana okuo, angelo i ere mogl, nigl ta yoba nedre, kor aimadi moraiglkwa ikra obuno di naruko, kaniga. Nigl i, God ya sipsip nagigle sia kingno yomara ogo bei ede meda udre, glas mere yegl pogl dugwa. 2 Nigl i, dumo Jerusalem konbaunamo yomara suna ede ime pi, ede ta paimara i koglo koglo ede, suna ede ogwa. Ede i, yoba mogomo uro nebi, kor aimadi moraiglkwa. Bugla yugu swara mina, ba yomere yomere, ege 12-pela ede i mogo koglkwa. Te, ede i yaudomo, yoba yugobuno pere pere meglkwa i, idre, wakai kaima moraiglkwa pre yogwa.

3 Ana God okna ibo dumo makan ere kide erumere mere yegl, dumo i mina ta erekrabuka, dudunabuka. Te, dumo Jerusalem suna i, God ya sipsip nagigle ye sia kingno suna i yenan, God niglmo kogonmo yoba ye niglmo kogonmo ersre, 4 God guma dra kanaiglkwa. Te, God kagie ye mabro mina bogl padran, panabuka. 5 Igne i, eduer ta yeikran, ermine keme yenabuka. Te, ken lam mo ade ta abuglage sinabuka i, ta paikrabuka. I siragl pre Yagl Kade God yene abuglage si tenabuka. Te, ye niglmo kogonmo yoba i, God bogl aimadi kamin taragl mudu ere yogwa i, bitno mogl, sugl moraiglkwa.

16 Ba ye ede ikne enamnedi prikrikwa. Ye dumo ta wakai kaima yei, makandigle dumo egre atne edugwa i, inamnedi prikwa. Ye heven dumo ta inamnedi prikwa pre diga. Yegl pre yoba i ere mogl, God no Godno moglmiwe dinaiglkwa i, God agai ta goglkrukwa. I siragl pre God yene siti ta ye kipai moraiglmedi ere wakai ere togwa.

22 Ba ene ede muglo Saion udre, God kor aimadi moglkwa i dumomo, Jerusalem ta heven ibo yomara i, u kodigwa mere yegl paugwa. Dumo i, angelo mere kide kaima, nono ta keremun, kuno erekrabuka i, gun yei, makai si meglkwa. 23 Te, heven ibo i, God gagiglma ye kagno heven bukmo mina paugo, ye ede okna eigwa meglkwa i, makai sigo, te God ye yoba mudu jasno moglkwa i moglko, erimara i, ede suna wigwa mere yegl paugwa. Te, heven ibo i, yoba ta du moglsre, u wakai pi kodigwa i, kiano bogl meglko, 24 Heven ibo Jisas moglko, bormaimo ama yogwa. Abel goglkwa igne, ye bormaimo God Kein si gorabedi agle dugwa ba Jisas bormaimo nono mina si plai si edidre, ka wakai keme di moglkwa. Te, nono God bogl kuda ikne ikne munga ikra, promis kor ake ple di norabedi Jisas suna mogl, bo buko di norsre, deno muduno wida di inaiglmedi erukwa. Taragl mudu i, heven ibo yogo, ene heven ibo ede suna u kodigwa mere yegl paugwa.

26 Ba Abraham ebie kaima Sara i, ye nono mano mere yegl moglsre, dumo Jerusalem pere ta heven ibo yogwa i, i nogugl edugwa. I siragl pre ye kane yoba moglkrumere mere yegl nono lo mina atne kane paikrumga.

1 Ana Jisas ka ta ama yegl dugwa, Ene deno muduno yubun dekrano. Ene God pre mediglsre, na ama pre medilo. 2 Na Nina yugumogl i, ene againo mogl pai eraiglkwa mere yogwa. Ta yekruma, ene di teigo. Na pi ene moraiglmara ere wakai eraglka. 3 Te, na pi ene moraiglmara ere wakai ere tebo, na aglke ede ikne u ene na moglmara akie moramnedi agre i ede enaglka.

11 Na ede ikne unaglka i, magigl erukwa pre ene na mabunona erikwa i, ake gi di molo. Ake gi di meglbi, yoba swara ta ene praisno i eglke edenaiglkwa i, kuno erekrabuka.

12 Yagl Kade yegl didre, ama yegl dugwa, Yoba ta kuda yobuglo erabuka i, na ere mogl, ye na Godna yugumo mina yugu kauglage mere yegl morabedi eribo, ye God yugumo yomara keme moglsre, okuo ede meda ta pikrabuka. Te, na Godna kagie i, yoba i ogono nagino mina bogl atne edidre, na kagna kor yenabuka i ama ye mina bogl atne edidre, na Godna dumomo kagie ama ye mina bogl atne edenaglka. God dumomo we diga i, Jerusalem kor heven ibo, na Godna moglmara yei, ede atne unabuka i pre diwe dugwa.

19 Te, yoba ta ka magigl paugwa i tau i eglke edenan, God ye buk i mina taragl wakai wakai pre dugwa i, ye morabara i eglke edenabuka. Na diga i, ede ta yoba mogomo uro nebi, kor moraiglkwa ikra ye mogomo uro ne dinabedi ersre, God dumomo, siti kor ta yenabara suna i, ama taragl wakai wakai i tenabuka igne, ye ta ikrabuka pre diga.