2 Nyona buga ding’alile, Yelusalemu ya sambi, dihumuluka kulawa kuulanga. Dikala ditandigwe vinogile kamba mtwanzi yosoligwa viyohambigwa yakaiting’hane na mkasano wake. 3 Abaho mhulika sauti ng’hulu kulawa kukigoda cha undewa, "Sambi kae ya Mulungu ya hamoja na wanhu! Kokala nao, na wao wokuwa wanhu zake. Mulungu mwenyego kokuwa nao. Nayo kokuwa Mulungu wao. 4 Nayo kowahangusa mahozi gao gose. Ifa honda iwe kuko kabili hebu kunyunyuwala hebu kulila hebu usungu. Kwavija mbuli za umwaka zibita."

10 Ving’alile nolongozigwa na Loho wa Mulungu nyona nosoligwa na msenga wa kuulanga mbaka kuinhembeti ya lugongo lukulu na lutali. Kandagusila Yelusalemu, Buga ding’ala, dohumuluka kulawa kuulanga kwa Mulungu, 11 ding’ala kwa ukulu wa Mulungu. Buga dija ding’ala kamba dibwe da bei ng’hulu ng’hani kamba yasipi na kamba kiyoo. 12 Buga dijo dikala na luwa mtali na mkulu, lukalile na milango mikulu longo na mibili na wasenga wa kuulanga longo na wabili wakala wokaliza. Uchanha ya kila mulango mkulu gandikigwa matwaga ga makabila longo na mbili za wanhu wa Izilaeli. 13 Kila ubanzi kukala na milango mikulu midatu, milango mikulu midatu mwambu wa kudilawila zuwa, midatu kudihongela zuwa, midatu kusini na midatu kasikazini. 14 Luwa lwa buga dijo luzengigwa mna ichandusilo cha mabwe longo na mabili, uchanha ya kila dibwe jandikigwa twaga dimoja da waja watumigwa longo na wabili wa Mwanang’hondolo.

22 Siyonile bule Ng’anda ya Mulungu kudibuga dijo kwavija Mndewa Mulungu yeli na Udahi wose na Mwanang’hondolo wao Ng’anda ya buga dijo. 23 Buga dijo hadilonda zuwa hebu mwezi wa kumwemwesela, kwavija ukulu wa Mulungu wodimwemwesela na Mwanang’hondolo ayo taa ya buga dijo.

1 Vivija ayo imsenga wa kuulanga kandagusila lwanda lwa mazi ga ugima, gong’ala kamba kiyoo, golawa mkigoda cha undewa wa Mulungu na cha Mwanang’hondolo. 2 Lwanda ulo lukilima hagati ha nzila ng’hulu ya buga. Kila mwambu wa lwanda ulo kukala na mbiki wa ugima, ulela matunda miyanza longo na mibili kwa mwaka, ndiyo kulonga, ulela kila mwezi na majani gake dawa ya kuwahonya wanhu wa isi zose. 3 Kuduhu chochose kiduiligwe na Mulungu chonda kikale kudibuga dijo.

Kigoda cha undewa wa Mulungu na cha Mwanang’hondolo chokuwa kudibuga dijo, na wasang’hanaji zake womsang’hanila. 4 Wochona kihanga chake, na twaga jake dokuwa mvihanga vao. 5 Honda kuwe na ikilo kabili, na wanhu wokala mumo honda walonde taa hebu zuwa, kwavija Mndewa Mulungu kokuwa mulenge wao, na wotawala kamba wandewa siku zose.

16 Lakini wasulukila isi inogile ng’hani, isi ya kuulanga. Avo Mulungu hakona kinyala awo kumkema heyo Mulungu wao, kwavija kawatandila buga jao.

22 Lakini mweye muvika kuna Ulugongo lwa Sayuni, kudibuga da Mulungu yeli mgima, najo dijo Yelusalemu ya kuulanga. Muvika mumting’hano wa deng’ho da wasenga wa kuulanga magana kwa magana. 23 Mweye muvika kuna ikibumbila cha wana wa chaudele wa Mulungu, waja matwaga gao gandikigwe kuulanga. Mweye mwiza kwa Mulungu yeli msemi wa wanhu wose na mwiza mziloho za wanhu wanogile watendigwe watelele. 24 Muvika kwa Yesu yogala kuilumba kwa lagano da sambi na damu yake imizigwe na ilonga mbuli zinogile ng’hani kubanza damu ija ya Habili.

26 Lakini Yelusalemu ili kuulanga ni buga dikomboligwe, najo dijo mamaetu.

1 Yesu kawalongela, "Sekemudumbe na kunyawanyawa. Momtogola Mulungu, nhogoleni na niye vivija. 2 Mng’anda ya Tatangu kuna magati mengi, maza haili vivo sambi niwalongele. Nochola kuwatandileni hanhu. 3 Nahachola na kuwatandileni hanhu, nobwela na kuwasola ili mkale na niye aho honikala.

11 Hima nokwiza. Goga ng’hani kija kiulinacho muladi munhu yoyose sambiyakuboke nhunza yako ya kuhuma. 12 Ija yonda yahume nomtenda mhanda mng’anda ya Mulungu wangu, na honda yalawe bule mumo. Nokwandika kumwake twaga da Mulungu wangu na twaga da buga da Mulungu wangu, Yelusalemu ya sambi, yonda ihumuluke kuulanga kwa Mulungu wangu. Vivija nokwandika kumwake twaga jangu da sambi.

19 Na munhu yoyose yahasegeza mbuli yoyose kulawa mkitabu kino cha ulaguzi, Mulungu komsegezela hanhu ha fungu mna umbiki wa ugima na mna dibuga ding’ala, vilongigwe mna ikitabu kino.