2 So ngoi tamake 'o Kota 'Itebi-tebini ge’ena la 'o Yerusalem ma sungi,* ma Jo’oungu ma Dutu wosigutiku daku 'o sorogaaku. 'O kota ge’ena 'idua-duangou 'isoka monga-ngaamoko mimoi mipakekou ma ngale mongaamokou de wimoi gee wominga-ngaamoko. 3 Ge’enaka de to’isene 'o 'ilingi 'o koana ma go-gogerino 'imapoaka yakua-kuatie 'ingose 'ato, <<Ma 'orasi ne’ena, ma Jo’oungu ma Dutu 'awi gogere naga 'o nyawa ma sigoronaka! 'Una naga de de 'ona, de 'ona yodadi to 'una 'awi kawasa. 'Una ma sirete naga de de 'ona de wodadi to 'ona manga Jo’oungu ma Dutu. 4 'Una 'asa wakoki’ikiri to 'ona manga kongoro manga akoka. 'O nyawa 'asa koyosongenuawau. 'O nyawa dua koyobalisawau, koyo’ariwau, bolo koyokasiriwau sababu 'o dunia ma sira 'iisangokau.>>

10 So 'o Ngomasa 'Itebi-tebini 'iparetano, de 'o mala’ekati ge’ena ngoi 'i’asa 'o gigie 'ikuru-kurutie ma dekude. Ge’enaka de 'isidumutu 'o Yerusalem, 'o Kota 'Itebi-tebini ge’ena. 'O kota ge’ena daku 'o sorogaaku ma Jo’oungu ma Dutu wosigutiku. 11 Ma kota ge’ena posironga 'ikinitaroka sababu ma Jo’oungu ma Dutu 'awi kumati ma cahaya. De ma letongo 'isoka 'o teto 'ihali-hali 'i’ijo-'ijo, de mita ma dodono 'isoka 'o kaca. 12 Ma be-beno 'o gurutie, ma ngorana ma amoko 'o ngai mogiooko de modidioka. 'O ngorana 'o ngai moi 'o mala’ekati ngai moi yajaga. Ma ngorana 'isinoimi 'isilefoka 'o Israeloka manga suku 'o ngai moi ma ronga. So 'o ngorana 'o ngai mogiooko de modidi ge’ena 'isilefoka 'o Israeloka manga suku 'o ngai mogiooko de modidi ma ronga-ronga. 13 Ma be-beno gee 'o wange ma siwarisa 'ita-taari ma ngorana 'o ngai sa’ange, daukuku 'o koremieku 'ita-taari ma ngorana ngai sa’ange, dakuie 'o koresarade 'ita-taari ma ngorana ngai sa’ange de daioko 'o wange ma dumunoko 'ita-taari 'o ngai sa’ange. 14 'O kota ge’ena ma be-beno 'isigoko 'o teto 'ila-laagomo 'o ngai mogiooko de modidi ma dekude. Ma teto 'isinoimika 'isitulisika 'o ronga 'o ngai yamo-moi. 'O ronga-ronga 'isilefo-lefoka ge’ena la 'o Domba ma Ngowaka 'awi su-suloko yamogiooko de modidi manga ronga-ronga.

22 De ngoi kotamakewa ma Jo’oungu ma Dutu 'awi Woa ge’ena ma kota ma dodaka, sababu ma Jo’oungu ma Dutu wi Woa ge’ena ma Jouou ma sirete, ma Jo’oungu ma Dutu gee 'awi kuasa ma batingi koi’iwa, de 'o Domba ma Ngowaka gu’una. 23 'O kota ge’ena koiparaluuwa 'o wange bolo 'o mede yodisiwara, sababu ma Jo’oungu ma Dutu 'awi kuasa ma cahaya yodisiwara, de mita 'o Domba ma Ngowaka 'awi cahaya ma siwara so ge’enau ma silo.

1 'O mala’ekati gee 'isidumutoka 'o kota ge’ena, deika 'isidumutoli 'o ngairi gee ma 'akere 'o nyawa yosi’ahu-'ahu. 'O ngairi ge’ena 'iletongo de 'idodono 'isoka 'o kasinaa de 'i’uisi dokaino ma Jo’oungu ma Dutu de 'o Domba ma Ngowaka manga pareta ma go-gogere ma timino, 2 de yaboa 'o ngekomo ma goronako ma kotaka ge’ena. Ma ngairi ge’ena ma batingi songona de songona yodogo’oo 'o gota gee ma sowoko 'o nyawa yosi’ahu-'ahu. Ma gota ge’ena 'isowoko 'o taunu moi ma mogiooko de modidi, ge’ena la 'o mede moi ma moi. Ma soka 'o nyawa 'o duniaka yapake ma ngale manga panyake yosisouru. 3 Ma kota ge’ena ma dodaka koi’iwa 'o kianikia ma Jo’oungu ma Dutu 'awi gorosau yadaene.

Ma Jo’oungu ma Dutu de 'o Domba ma Ngowaka manga pareta ma go-gogere dua ge’ena ma kota ma dodaka. 'O nyawa gee wile-leleani ma Jo’oungu ma Dutu 'asa wisuba de wisiarene ma Jo’oungu ma Dutu, 4 de 'asa wimake. De 'awi ronga 'asa 'isilefo manga mengaka. 5 'Ona dua koyoparaluuwa 'o silo bolo 'o wange ma siwara, sababu 'o obiri koi’iwau, de ma Jo’oungu ma Dutu ma sirete 'asa wakidisiwara, so 'ona 'asa yopareta yokoana kaisi’ado-'adonika.

16 Ma ma nyo-nyata, 'ona 'ifoloi yoduaka 'o daeraa moi gee 'ifoloiosi yaowa, ge’ena la 'o daeraa gee 'o sorogaaka. Sababu ge’ena ma Jo’oungu ma Dutu kowimaekuwa nako 'ona yongose 'ato 'una ge’ena to 'ona manga Jo’oungu ma Dutu, sababu ma Jo’oungu ma Dutu wadua-duangou manga kota 'o ngai moi.

22 Ma ngini niongaku-ngaku gee niaikakau 'o Sion ma gigieka de ma Jo’oungu ma Dutu wowango-wango wi kotaka, ge’ena la 'o Yerusalem 'o sorogaaka gee ma mala’ekati 'icaanoka. 23 Ngini niamotekokau 'o lo-lomu moi 'irame-rame, ge’ena la 'o nyawa yongaku-ngaku gee manga ronga-ronga 'ilefokou 'o sorogaaka manga lo-lomu. 'Ona ge’ena matero ka ma Jo’oungu ma Dutu wi ngowa-ngowaka 'o riakoka. Ngini nioboakau ma Jo’oungu ma Dutuka gee wahaki-hakimi 'o nyawa 'iodumu. De ngini naga de 'o nyawa ma owa gee yakisitotomokau. 24 Ngini nioboakau 'o Yesusika gee ma ngekomo 'una so 'idadi 'o jaji ma sungi ge’ena. Ngini nioboa 'unaka ma ngekomo 'awi 'aunu 'ipoa de wosongene. 'Awi 'aunu 'ipoa de wosongene ge’ena ma ngale watuusu 'o sowono, ge’enau 'isitantuuokau 'okia sonaa 'ifoloi yaowa-owa so koimaterowa de gee to Habel wi 'aunu.*

26 Ma 'o Yerusalem gee 'o sorogaaka, ge’ena 'o Yerusalem gee ko 'o yongosuwa, de ge’enau matero ka to ngone nanga 'esa.

1 'O Yesus wongose 'awi do-domoteika, << 'Uwa nia singina 'isusa. Salingou niongaku ma Jo’oungu ma Dutuka de mita ngoino. 2 'Ai Dea 'awi woaka 'o ngii pomanoa-noa 'o gudaioka. Ngoi totagi ge’enaka ma ngale takalari to ngini 'ania ngii. Ngoi ma rai kotinidongosewa nako la ge’ena ko ma gounguwa. 3 'Ania ngii takalari 'iduanga, 'asa tainoli tini’ese, la kiaka naga ngoi, ngini mita ge’enaka.

11 Ngoi rekeni toboaka! Ngini salingou kaniaga-gao niosidiaino 'okia naga gee nginioka, la 'o nyawa ka moi ma 'uwa ya’ora nia parasengi ma ngale ngini nialaku-laku 'o dorou ma pareta. 12 'O nyawa gee yalaku-laku 'o dorou ma pareta, 'asa takidiai matero ka ma Jo’oungu ma Dutu gee towile-leleani 'awi Woa ma ngasuku 'ikua-kuata. De 'ona 'asa ge’enakau kaisi’ado-'adonika. 'Asa tosilefo 'onaka ma Jo’oungu ma Dutu gee towile-leleani 'awi ronga, de mita 'awi kota ma ronga ge’ena la 'o Yerusalem ma sungi gee dua wosiguti daku 'o sorogaaku. To ngoi 'ai ronga ma sungi mita 'asa tosilefo 'onaka.

19 De nako nago’ona yosikurangi 'o kianikia moi ma Jo’oungu ma Dutu 'awi demo-demoka ne’ena, ge’ena ma Jo’oungu ma Dutu mita 'asa wosikurangi to 'ona manga bo-bula gee 'isidemokau 'o buku ma dodaka ne’ena. Ma Jo’oungu ma Dutu 'asa kowakisidabiwa 'ona ya’odomo 'o gota ma sowoko gee 'o nyawa yosi’ahu-'ahu, de kowakisidabiwa yomanoa 'awi kotaka.