As 10 parábolas mais importantes de Jesus

3 Kamooggan ayeenssa masuussayi haa ame segeera, «Otate kabaraare ibaaddoti koo wut’a wut’ayin bee. 4 Wut’ataa giraanna wut’a gamisa raa giridii iyye, kimbirnna emeetegure abaabate aame. 5 Gamisa wut’a tafufudi shak’umooltti erree iyye, errena tafufudi mankkoleetette maraan wut’a saame alate. 6 Ayesuun goɂameen ariti kakkobiyaatte goorata k’oore hidiid aaloo dagisanawattikko kakkeeyi angage. 7 Gamisa wut’ana eɂeen kaɂabo huura orroo iyye, eɂeeninna jiinaattegudde kaɂalatero wut’a marggisse orroo haasse. 8 Kakkalee wut’a ade taɂidan erree gutii iyye, alategure il yelate, koo bool, koo lootam, koonna sonddom il sise. 9 Nebe kaɂaba hamaalo!»

Kaɂidankki kasamaraawi ibaaddoti

25 Hikkima arri too, seera kamuse kakkasanaaye koo Yesuusa c’aafin dootere, «Kaɂagaalssisatto,» jiruu jiroommakki giri eelin «Me fella?» ame. 26 Yesuusana, «Seeraayi kas’aafamera meyya? Misii nabbabatta?» ame abbaabe. 27 Ibaaddotina abbaabere, « ‹Goottaa Hedokkaa taɂammagantte wodanakko, taɂammagantte neefoo, kaɂammagame hunnakkona taɂammagantte k’ofakko geelaa, ollaattaa isiɂoottaa malee geelana› » amara ame. 28 Yesuusana, «Likkii abbaabttetta, atina usumalee feli, jiruu jiroommakki giri girnnatta» ame. 29 Ibaaddotina isiɂootteessa k’ulluukki yelayiin dootatere, «Amiinna ollaatti ayyotta» ame. 30 Yesuusana usuun abbaabe, «Ibaaddoti koo Iyyerusaalemikko Iyyarkko tos dagaa giraan gene tashittaayi iyye. Sarssina k’aareen boc’c’een, goyi hiɂi gutii lugudeen seeteen. 31 Tuuk’aamo koo derɂa hassu raandde metegamatto hegelddee dagaa deegure fakki ame roore. 32 Adena woyyuuti koo ese banɂe goggogeeyi deegure usuna fakki ame roore. 33 Koo samaraawiti goɂameen lukitarooraroo seetaa giraan ibaaddoti takkogiro banɂe gee. Kakkodeyaare goorata nenɂeyisate, 34 Gabbalamere meeggal gutii zayitiinna kawoyinii t’amo kibere shiye; tatteessa demeer gutii kayegure martti kakkobaraatto min geese. Eseenna karkkaree. 35 Tallami arri t’agaraa lama beesere martti kakkobaraatto minkokki odomineetun sisegure, ‹Hikka ibaaddoti hadara deena. Hikkakko kanjiin ati kabbeesatto maragade ani abbaabataa kuun murrowa› ame.

36 «Goortta, hinɂa seedkko shittoolee genee kaɂiyyero ibaaddotin ollaa kalleere eeki aani laara?» ame. 37 Seera kakkasanaayena «Kanenɂeeyisateroyolla» ame.

Yesuusana, «Atina seedde usumalee feli» ame.

4 «Isin orrokko koowun idaad bool gogire usukkona koo gobaye, saagaalttamikko saagaal diidaa lugudigure kabayero taahelaroo dootayiin kanbeenoon ayyoyya? 5 Kakkohelate gooratana geggelaataa haankkeessayi sidatere, 6 Minkkeessa tos abbaabatara. Usu ogeelaatarona ollaatteessa raattoo uumegure, ‹Kabayero idaadokkee helayera inne wota geggelaayen› amara. 7 Ani isinne haa amara, hikkamalee no c’ubbo lakkoɂabnno k’ullooleenna oɂamaraan saagalttamkko saagalkko c’ubbokko kagula galaro c’ubbaaleessa kooyi daruurii geggeloo oɂatii linnaraan.»

Baye kahelamero unnutikokki masuussa

11 Adena Yesuusa haa ame, «Ibaaddoti koowun yiis lama gire. 12 Isokkona ere kic’c’ar Aabbokkeessane, ‹Aabbokkee, durummattaakko k’ooba iin sisi› ame. Aabbokkeessana durummatteessakko yiiskkeessawun hedeede.

13 «Arri tanjiin haɂadallaannooni, ere kic’c’ar k’oobakkeessa dubba kukkuyisatere ul kaɂeer seete, eseenna goggogeelatee urrawoɂoottessa adda darɂaate. 14 Usuna kaɂabo dubba kakkogussatare goorata, usu ul dubbaa kaɂatii uɂi lee, rakkatano haggaɂabe. 15 Haanssun hassu ulkokki ibaaddoti koo tos gabbalame, ibaaddotina booyyee usu goggofoofiroo ira fare. 16 Booyyeel kaɂaamaro dink’k’ena aamin halchchaa gire, ayesuun goɂameen hikka usuun kasisira ibaaddo koonna lakkogire.

17 «Wodana usuun kakkoɂabbaabatte goorata ade haa ame, ‹Aabbokkeewuun kafelaro ibaaddo miyyaakko babo hese kamadarraamara? Ani ade hittanii uɂii goyin gabbalamera! 18 Kiigure Aabbokkee, tos seeyire, haa aminara, Aabbokkee, Waayinna ku horee ani baasera. 19 Goortta erekkaa amami uumamin lakkodootisaro. Minii hamas’s’eeren ofelaraankko koo aani in tootiina aminara.› 20 Haanssunna keegure Aabbokkeessa tos seete.

«Ayesuun goɂameen usu ganaa ebbaa giraan, Aabbokkeessa usu deegure nenɂeyisate, usu tonssa tiyaa seetegure kabalate abate anggate.

21 «Unnuna, ‹Aabbokkee, Waayinna ku horee ani baasera, goortta erekkaa amami uumamin lakkodootisaro ame.›

22 «Aabbokkeessana goɂameen usuun ohandaareenne haa ame, ‹Saama dubbaankkona kaɂidan kalleero sarssi keenaddeen usu sarssisa, feruun firaantta, lukuun keferroo tabsa. 23 Kak’aabaan kurkkuraa kor keenaddeene enɂaa, aamina, geggelaanna. 24 Hikki unnukki goyera ame ani gire, gidda goɂameen neefo helatera, baye gire, helamera.› Esekko geggelaatano haggaɂabeen.

25 «Usu goorata ere kanjiin iraa gire, hassekkona abbaabate min tos kakkogabbalamare goorata, tadudduroonna tamadarri yaaye maale. 26 Usuna ohandaareenkko koo uumere meya kamisileera? Ame hoosate. 27 Kahandaarena, ‹Abbikka gamatera,› nogoddanna fayyaaleessa lee mankkogamatero maraan ‹Aabbokka kurkkuraakki kor kak’aabaan usuun enɂeera› ame.

28 «Kanjiin abbikkeessa amaraatere, mininna tabin lakkodootero, Aabbokkeessana sar beegure usu min goggotabroo ebaate. 29 Usu goɂameen abbaabe Aabbokkeessane haa ame, ‹Hikka, gitakki gees diyyii aani ani kuun handdayera, ajajaakkaakko koonna ade lakkohank’isero, ati goɂameen ani kageelaataro wota goggogeggelaroo c’ibaare too suure lakkosissetto. 30 Ayesuun goɂameen hikki unnu urrawoɂoottaa sharmmut’aalnne wota darɂaate baasategure goɂemeete, kak’aabaan kurkkuraa kor usuun enɂiite.›

31 «Aabbokkeessana usuun haa ame, ‹Unnukkee,› ati arggetto inne wota gitta, kakkee kalleera dubba kakkaayya. 32 Hikki abbikkakka ade goyera ame gire, neefo helatera, baye gire helamera; haanssun aaloo geggelaayinna dootisara.»

45 «Usumaleenna wononnati kadaruure kaɂidankki ink’uu iminayin kadootataro nagaadeti aani laara. 46 Aaloo awɂallokki ink’uu kakkohelatare goorata seetegure kaɂabo dubba daddalategure usu ink’uu iminate.

Kafarasaawinna k’arat’a kakukkuyisarokokki masuussa

9 Debeenna Yesuusa noo k’ulluunɂinna amaa isiɂoottisooyi odhadataraanna kakkalee ibaaddona otuffataraawun, hikka masuussa segee. 10 «Ibaaddojja lama Waa ebaayin k’ulluukki min kawaa seeteen, koo Farasaawiti kakkalee k’arat’a kakukkuyisaroyeen. 11 Farasaawiti kale aalleere isiɂoottessaawun haa amaa ebaataa gire. ‹Kawaaye, ani ibaaddo kakkalee dubba aani kasaamaro, kameellankki, kasharmmut’aaro, hassukona hikka k’arat’a kakukkuyisaro aani laana mankkowaaye maraan ani ku galataara; 12 Todoba tooyi lama gale agabuwara, kahelataro dubbakko gene tomonkko barkkintte beesara.›

13 «K’arat’a kakukkuyisare goɂameen ebbaa aalleegure, daruur tos t’ok’k’i ami din duuddo lakkodootero, ayesuun goɂameen geegiyo bobboc’aata, ‹Kawaaye, in c’ubbaaleessa maari› amare.

14 «Ani isinne haa amara, Farasaawitikko roore hikkina Waayi dollee k’ulluukki aani lee tootaame minkkeessa abbaabate. Isiɂoottessa kat’ok’k’i t’ok’k’iɂisatara dubba hussi aminara, isiɂoottessa kahussi hussiɂisatara goɂameen t’ok’k’i aminara.»*

Ohandaaran seedkokki masuussa

14 «Wononnati kadaruuree ibaaddoti koo usuun ohandaareen isi tos uumegure oɂabo urrawoɂoottessa hadara sisegure ul kakkalee seeyin kakkeero ibaaddoti aani laara.✝ 15 Odo odoo feloɂoottisokki malee koowun t’agaraa ken, koowun lama, koowun ade t’agaraa too sisegure goorsewa ul kakkalee iise seete. 16 T’agaraa ken kaɂatatera ibaaddoti goorsewa daddalatano haggaɂabere takkalee t’agaraa ken worɂe helate. 17 Usumaleenna t’agaraa lama kaɂataterena t’agaraa lama worɂe helate. 18 T’agaraa too kaɂatatera goɂameen ul oshegure maragade kagoottaa k’amale.

19 «Ohandaaraankokki goottaa mankkoseeteroo tanjjiin adallaate emetere tasisero t’agaraa tootaayi din haggaɂabe. 20 T’agaraa ken kaɂatatere takkalee t’agaraa ken worɂe helate aate emeetegure, ‹goottaa!› Ati iin t’agaraa ken sissette, hikkima takkalee t’agaraa ken worɂe helera ame.

21 «Goottakkeessana ‹Goɂidan felttetta, ati kaɂidankki kaɂabddantte, kic’c’arkki ayeesii kaɂabddantte mankkolleete maraan kamooggan ayeesii ani ku shuuminara, goottakkaanɂi geggeloo tos tabi› ame.

22 «Usumaleenna t’agaraa lama kaɂatatera kahandaara emeetegure ‹goottaa!› ati iin t’agaraa lama sissette, hikkima t’agaraa lama daddalegure takkalee t’agaraa lama worɂe helera ame.

23 «Goottakkeessana ‹Goɂidan felttetta, ati kaɂidankkina kaɂabddantte kahandaatta kic’c’arkkiin kaɂabddantte mankkolleete maraan kamooggan ayees gutii ani ku shuuminara, goottakkaanɂi geggeloo tos tabi› ame.

24 «T’agaraa too kaɂatatere kahandaarokkina emeetegure ‹gootta!› Ati kawut’annon gitto kamat’aratto, kadarɂinnon gitto kakukkuyisaatto bogikaɂatii ibaaddoti laano kasowa, 25 Haannuun abssayere, ‹T’agaraattaa erree k’amalera, hikkima maragadekka› ame.

26 «Goottakkeessana abbaabere, ‹Ati kameellankkina boozzakki kahandaatta, kawut’annon giro kamat’aratarona, kadarɂinnon giro kakukkuyisataro laanokkee kasso? 27 Hayya ani kakkoɂabbaabataro goorata t’agarattee worɂene wota goggoɂataroo odaddalatarawun sisano dootisare.

28 « ‹Goorittanuu t’agaraa aatagudden t’agaraa tomon kaɂaboon sisa, 29 kaɂaboon adamara, moggaatara, kallayiikkikko goɂameen hassu kagirawa atamara.✝ 30 Hikka laɂo kallayiikki kahandaaro oottanna ilkko fooc’ano mankkogiro sarre kagiro t’illinggakki mugud tos beesa shafa› ame.✝

Dureessakki ibaaddotina Alaazari

19 Adena Yesuusa haa ame, «Heela buraaburre awɂallokki sarssi kasarsatere arggetto barsano oɂidanɂiinna geggelooyi kagire dureessakki ibaaddoti koo gire. 20 Eseenna, meegga maar dubba kakkoɂeelttette Alaazari kaɂamamare hiyyeessati koo usu dureessakki ibaaddotikokki gooc’aa horee keenen kaaren. 21 Dureessakki ibaaddotikotti dugudkko taɂiyaatto orroontti aamin halchchaa gire, keroornna emeetegure meeggatatteessa hellefataa gire.

22 «Hikki hiyyeessati goye, erggichchaalnna Abraame tos geesen. Dureessakki ibaaddotina ade goye k’amalame. 23 Bowwa orroonna abboosaama giraan t’ok’k’i amere ebbaa Abraame dee, Alaazarina dollee kaɂabatero dee. 24 Usuna, ‹Aabbokki Abraame, nenɂeyisana, ani hikka lac’aa mankkoɂabboosamaro maraan, Alaazari fertteessatti birt’ee beke dinire errebkkee ambbal goggoyelloo maganne fari amaa iyyee.›

25 «Abraamena ade usune haa ame, ‹Unnukkee, ati girikkaa kaɂuleetii kaɂidan kooko goggoɂatattettoo, Alaazarina ade kameellan kooko kaɂatatero shaadi, gidda ade usu hittanii goggeelaaro ati adde abboosa gutii gitta. 26 Hikka dubbakko hittakko isin tos roorin odootataran odanddeenon laano, aanttinne ogiraanna adeen no tos goggonak’oonkko, noyyenna isin t’eɂee laga kaɂatii gira.›

27 «Usuna haa ame, ‹Aabbokkee Abraame, goortta Alaazari Aabbokkeekki min goggofartton ani ku ebaatara. 28 Abbilaal kenno iin mankkogitto maraan, isona hitta taɂabboosa banɂe tos goggoɂemennoonkko seeyire iso haɂaddeesiso.›

29 «Abraame ade, ‹Isoon kamusena kahegeroolkokki mas’aafajjol esee giraan isona hamaaleen› ame.

30 « ‹Usuna, Aabbokki Abraame lakkohaayyo;› odo koo goyikko kiigure seetewa c’ubbokko gula galareenwa ame.

31 «Abraamena ‹Kamusena kahegerookokki mas’aafajjol ommaaloon golleen, odo koo goyikko kiigure goseetena lakkoɂammannaan ame.› »

Sharafakkotti masuussa

24 Yesuusa kakkalee masuussa haa ame segee, «Wononnati kadaruure iraayi wut’a kaɂidan kawut’atero ibaaddoti aani laara. 25 Ayesuun goɂameen ibaaddo dubba huddure giraan diinakkeessa emetegure darggamaatteessa orroo sharafa wut’e seete. 26 Darggamaanna alattedde il yelatano kakkohaggaɂabatte goorata sharafana wota mute.

27 «Odo iraan ofelaraan usu tos emetengureen ‹Gootta! Iraa orroo laa wut’a kaɂidan wunt’t’ennella? Hayya sharafa haggekko emete?› ameen.

28 « ‹Usuna, hinɂi felo odiinayaan› ame.

«Ohandaareenna ‹Seeyigunne sharafa goggotattaginnon dootatta?› ameen hoosaten.

29 « ‹Usu goɂameen laa› ame, ‹Aalanttina isin sharafa tataganna amaa darggammaa wota tatayiddaanwa; 30 Isaaga, kaami kukku takkoɂamaro arri taageeron raattoo hajiinaate, eserri omat’aranaanne t’aa sharafa tataga, eleenii goggogubamiro kabal kabalii shaa, darggammaa goɂameen kukkuyisaguddeen gootaraatteeyi kiba ani aminara ame.› »

Deeleeljja tomonkokki masuussa

1 «Hassu goorata wononnati kadaruure dab abateenguren mashaashe k’op’ayin obeeraan deeleeljja tomon aani laara.✝ 2 Iso orrokko deeleeljja kenno gowwaa, deeleeljja kenno adeen k’arooleeyyen. 3 Gowoolee dab abateenguren lanbbaa minjja lakkoɂabateeren, 4 K’aroolee goɂameen dabkkisoonne wota lanbbaa minjja t’armmusiyi abateen gireen. 5 Kamashaashee kakkoɂadallaatere goorata dubbana hudduro kakkodutisatte goorata huddureen.

6 «Ul hemeen t’eɂe kakkolaare goorata ‹Kamaashaashee emeetara biyaa k’op’ayeen taɂamatta uumit maalssantte.›

7 «Hassu goorata deeleeljja dubba keengureen dabkkisoo hank’k’ayisaten ekkaasateen. 8 Gowoolee k’arooleenne ‹Dabkkaani bayinara laanbbaatisinkko noon sisa,› ameen.

9 «K’arooleenɂi deeleeljja goɂameen abbaabenguren no taɂabnna laanbbaa ‹Noyeenna isinuunna laanawaayin daanddaatta, seyeenddeene laanbbaa kadaddalatarokko ussun iminayeen› ameen.

10 «Laanbbaa iminayin kakkobiyaaren goorata kamashaashee emeete, ekkaasateen ogireen deeleeljjana kahaassinoo aamo takkoɂekkaatero banɂe usune wota tabeen, ufana c’ufame.

11 «Adallaaten oɂemeeteran okkalee deeleeljja, ‹Goottaa! Goottaa!› maganne ‹Noon ufa banina› ameen.

12 «Usu goɂameen, ‹Ani rumminaa amara ani isin laakkaso› ame isoon abbaabe.✝

13 «Goorttanu isin arri goorttun saatii mankkokasoon maraan isiɂekkaasayeen oora.