As 10 parábolas mais importantes de Jesus

Muele wa Musamalia mulweela

25 Biibi ukila, mundu yumu mulangidijyi wa Buta* haya tebema, haya muyujya na umutega: «Mulangidijyi, naati bini koo boya tii, na yaani na buumi bwa milumbu na milumbu?» 26 Na Yeesu haya mu lunga tii: «Babu sinya bini mu Buta bwiitu*? Na gulu ga telegejya bini hoolu ga buulula?» 27 Yuugu mundu wa Buta* haya mu lunga Yeesu binu: «Yilu ku haajya umu vudi Vidi-nyambi Kabejya woobe mu tima dyoobe dyooso na mubuyaani boobe booso na butangala boobi booso na mu nyinyi yoobe yooso na: ‹Vula mundu gudi hangondo goobe, byeebye byoolu yi vula beebe mu nindu.›»* 28 Umongo, Yeesu haya mu sawiila tii: «Wa lunga bilegela! Tanga biibi mweena lusu; byeebya na wa yananga.»* 29 Ihani yuugu mulangidijyi wa buta* gubu vula uyi monesha tii, gudi mu buludi, Ihani haya mu yuujya Yeesu: «Haboobwa inaani gudi watonono naami?» 30 Yeesu haya mu lunga tii: «Mundu yumu gubuhuma u Yelusalema, haya sala mu zila yilu yelela u Yeliko. Hebwa nangi mu zila, haya hulu’a mu babo’o ga bilwanyi. Baaba bilwanyi, haba kuujya bindu byaayi byooso, haba mu tutugula na haba mu siga muu huminina.

31 Hakwa huma, Mupelu yumu haya kidila mu yanga yeeya zila, haŋa heebu mu moona yuugu mundu gubu teebwa, haya kila hangondo na haya weena.* 32 Mulawi* yumu na eyu hayafi’a haŋa heebu mumona yuugu mundu, haya mu heenga hangondo na haya weena.

33 Ihani Musamaliya yumu, gubwa nangi mu lugendu lwayi, haŋa heebu mu mona yoowa mundu, haya mu fwiila lusa.* 34 Haya sheena kwebwanangi, haya tumba malonda gaayi na umuhudila divai hamonga na maŋani na ubiganga. Na haya mu bandisha heegulu wa punda yaayi, haya mu shwaala na u mufisha u yende kya banyini tii, bamu buke. 35 Bwesha bwaayi, yoowa Musamaliya haya loosha dinari yi bidi* haya mu gabila mwiini wa yendi kya banyini na haya mu sawiila: ‹Umubuke, yuugu mundu bilegela, haŋa handa galushanga naku gabilanga mona yooso ya heegula ya wa looshanga koo mu fuhulula.›»

36 Ihani Yeesu haya mu yuujya yuugu mulangidijyi wa Mahuya Golulu* tii: «U mesu goobe, munda mwa baba bandu basatu, inaani gudi mundu watonono wa yuugu mundu gubu hulu’a mu mabo’o ga bilwanyi?» 37 Yuugu mulangidijyi wa buta* haya mu lunga tii: «Na niijya tii, ni yuugu gubu mu fwiila lusa.»

Ihani Yeesu haya mu sawiila: «Inanga, na beeba inanga tanga byeebya bibuta yuugu mundu wa bu satu.»

4 «Mundu yumo hamukidi hiinu wayakana na mikooko yaye mia yiyimo, umo hamukidi haayo itu wazizimina, ukibambana kuta kaayi? Miti husama yeya makumi kitema na kitema mubua dyakuyidishila na kuyena kukakeba wowa huumo uva zizimina, mupaka wauyimona! 5 Ishu waumona, wayi shwaala mu mahehe gaayi na eyu muu sehelela kwa butu. 6 Hi sosokeeye kwaaye, utaana bamonyi baaye, na bandu ba tonono naye na kubasaudila ti: ‹Museelele kukumo naami! Kumona namona yeya mikoko yaami yivazizimina.› 7 Unindu nami sawiila ti ni byakebee bikiyakananga Kabejya mukuseelela kwabule itu yidi na bubi yumo wasama bubi bwaaye. Kokwa kuseela kwaye kukiyakananga kukata kukila bandu makumi kitema na kitema basikikeba lungi kufuka kwa tima.»*

Muele wa henda we zizimina na kumoneka

11 Yeesu haya boya lungi ti: «Mundu yumo wenange na baana baaye babidi babaabalume. 12 Lusu lumo, yowa wa mwina mubaa baana babidi haya jyongodela shaye ti: ‹Shaami, ngi kuajya ngwabile mbyana yaami mumona yoobe.› Aŋo shaabo haya aba bindu byaye kudi wamukulu na wa mwina.

13 Mafuku ma shoo kukila, yowa wamwina haya hudisha mbyana yaye yooso, haya yena na falanga yaye kukisi kya kulakula. Kokwa haya yakana mukuvundanya yeya falanga. 14 Aŋa heeweye kuvundanya yeya falanga, hakwa nyomokela kamesha mukekya kisi. Naiye hasikikushwa nembidyazi byakudya. 15 Aŋo haya yena kukavubila mundu yumo wakyekisi. Yowa mundu haya mushwala kumakunda maaye ti wakamudindikijyile bizazako byaye. 16 Yowa henda hasikivuleeye kudya nee bidyazi bikidya bizazakoo, bobwa ndakwenee mundu we mwabila beebya bidyazi.

17 Aŋo, hayasomba kuhejya mutima dyaye ti: Hee! ‹Bavubi ba shaami booso bakidya bidyazi na kubisoba, ila miimi haŋa mukumota nazala! 18 Si haluka kudi shaami na nikamujyongodele ti: Shaami naata bubi busu bwa Kabejya na busu bwoobe. 19 Sikibambana ku taanibwa lungi mwana woobe. Ngwate sasa bidi yumo muvubi woobe!›

20 Haŋo, yowa henda somba luendo bya haluka kudi shaye. Kumona wenange ukidi munonga na kyende kyaabo, shaye bya mumona, na bya mufiila lusa. Bya yena kabilo kukamusambitila na kumuyambitila. 21 Mwaana waaye haya mujyongodela ti: ‹Shaami, nata bubi kudi Kabejya, na kudi beebe. Kwa biibi sikibambana lungi kutaanibwa mwana woobe.› 22 Ila, shaye bya saudila bavubi baaye: ‹Muvishe yayaya ngubu yileela mumutubile! Mumutubile jyumu ya munyu na makubaati ku maulu!* 23 Muvishe byakebee mutubwatubwa wa ŋombe munune mu shiijye; tuseelele bashu mukudya! 24 Kumona ti mwaana waami yuhu we mota ila wafukuka. Uvanange wazizimina, ila wa moneka lungi.› Habasomba kusehelela.

25 Mukekya kindi mbadi wa tata wene kuma kunda. Aŋa hehalukeeye ndatee tonono na kyende, bya teejya kijyeejye kya simo na singi. 26 Haya taana yumo muvubi wa shaye, haya muyuujya ti: ‹Kukyende kudi kaayi?› 27 Yowa muvubi haya muyaka ti: ‹Mwinawoobe ni waaluka, na shoobe wamushijyila mutubwatubwa wa ŋombe yinune, kwa kumona ti mwaana waaye waaluka mwejyo.› 

28 Yowa mukulu bandu hakeaŋa bya zinguka, na kubenga nengushwela kukyende. Shaye bya nyomoka haaza na kukwihaya naye washweele kukyende. 29 Ila mukulu bandu haya yaka shaye ti: ‹Teejya bangu! misha yabule yiiyi yangi kuvubila, nee lumo lusu sikikolemanga mubyooso bikinguboya beebe. Ila nembiino ndwengwabila nee mubamba wa mbuzi ti miimi na sehelele na kudya nabeezi nami! 30 Ila bobwa bwava mwana wobe, yuhu va vundanya bindu byobe byoso mubabakazi bamasenga wasosoka, wamushijyila mutubwatubwa wa ŋombi yinune!›

31 Aŋo shaye bya mujyongodela ti: ‹Hamwaana waami! Beebe udinaami kukumo mafuku mooso, na byooso byambidinabyo mbyobe bobo. 32 Miti yivatuajya bashu kukumaana na kusehelela! Kumona yuhu mwinawobe uvanange wamota, ila wafukuka. Wene buzizimine, ila wamoneka›»!

Muele wa Mufalisayo* na mundu gulu haajya mulambu

9 Kwenange bandu bene mukukwimona badi buludi busu bwa Kabejya na kumona bangi busadi. Ni* Yeesu haya ba teela huu muele: 10 *«Lusu lumu, bandu babidi bava yena ku Lubunga* kukahaajya Kabejya. Yumu gubwanangi mu Falisayo*, na yungi uvanange gulu haajya mulambu. 11 Yuugu mu Falisayo*, haya talu’a, na heekilu haajya Kabejya munda mwa tima dyaayi ti: ‹Ha Kabejya waami, noota abee koodi beebe manee miimi sikiyakananga bidi bangi bandu. Ibo bakiyakananga bakiyiba, lungi bakibembela, lungi bamasenga. Na kuteela abee manee miimi shidi bidi yuugu lu haajya mulambu.* 12 Mala kabidi mu yinga, Ngiajyanga kusidi kudya. Na nilu tuula luba lwa kumi lwa bindu byaami byooso.›

13 *Ila, yoowa hulu haajya mulambu iye, haya tebemena munonga, ndavaheleka nee kutundula meeso maaye haulu. Ila, uvanange bobo mukukwituta biboko muanga dyaye na susu, mukuajya lusa ti: ‹Kabejya waami, nguviile lusa! Miimi mbidi mundu kita bubi!› »

14 Ni Yeesu bya boya ti: «Namujyongodela ti yuu kihajya mulambu we haluka kukyende kyaaye na Kabejya wamumona bidi mundu yidi buludi busu bwaaye. Ila, yowa Mufalisayo*, ndabeebya! Kumona kila yowa kikwibajyanga ushajyibwanga. Ila kila yowa kikwishajyanga iye ubajyibwanga.»

Muele wa kabobo na Lazalo

19 Yeesu byata lungi huu muele: «Kwenange kabobo yumo. Yowa kabobo wene muku tubila ngubu yilweela na ya muulu ubande. Wene mukuta biandu byakuseelele lusu kwa lusu. 20 Kwene byakebee kauku kamo ketaanibwa Lazalo. Yowa Lazalo wene na tusungu lukoba lwooso wene mukuyakana kukibelo kya kyende kya yowa kabobo. 21 Wevula kudya makombwa mee honanga kunyomokela ku meza ya yowa kabobo; na mbooze byakebee yeviyanga na kulemba tusungu twaye.

22 Lumo lusu, Lazalo byamota, ba malaika* haba kumushwaala tonono na Abulaamu. Nyuma ya haŋo, kabobo naaye bya mota, habamuzika. 23 Yowa kabobo bya suba kwabule kokwa kunengo. Byatundula meeso maye, bya mona Abulaamu mumunonga, na bya mona Lazalo tonono naye. 24 Haŋo, bya bajya muuya ti: ‹Hee tata shami Abulaamu, ungu fiile lusa! jyongodela Lazalo wa tabike songo ya munyu waye mu meema, wangujyajyile mbombo dimo dyameema kwaku boya ti na talajye ludimi lwaami, kumona nasuba kwabule muune mumudilo.›

25 Ila, Abulaamu bya muyaka ti: ‹Ee! ha mwana waami! Hejya ti beebe mu mwejyo woobe wene nakuseelala kwa bule. Ila Lazalo we vuka bobo kusuba. Haŋa leelo iye ndate mukuseelela na beebe ndute mukusuba. 26 Lungi, hamukidi hiinu na bashu kudi kineene kikaata. Kwakuboya ti baaba bakivula kunyomoka kuune kwatudi bayene kokwa kwamudi ndabakusamuna. Byakebee baaba badi kokwa kwamudi, naibo ndaba kusamuna kuva kuuku kwatudi.› 27 Yowa kabobo bya saula ti: ‹Tata itu mbebya, ngikwiaya noobe ti yiisha Lazalo wayene kukilongo kiitu, 28 kumona mbidi nabakwami batanoo, wayeene kukabamanye ngasi ibo na ibo baviyaa kuune mudiino bua dyakusuba.› 29 Ila Abulaamu bya mujyongodela ti: ‹Bakwobe badi na businye bwa Musa na bwa Babushi.** Bayakane mukuteejya beebya bya bukiyakula!› 30 Ila yowa kabobo bya jyongola ti: ‹Ndabeebyo, tata Abulaamu, yeeya ndayikibambana. Ila itu mundu yumo wanyomokela kokwa ku nengo na wayena kwabadi, bifundulujya matima maabo.› 31 Ila Abulaamu byamujyongodela ti: ‹Itu baaba bakwoobe ndabavasamuna kuteejya beebya biki saula Businye bwa Musa na bwa babushi* byabukisaula, ndabakuteejya nee itu mundu wa zikuka kunengo.›»