As 10 parábolas mais importantes de Jesus

3 AYeso ka ba nye ncɛɛt zizɛɛt ayet igorok icɛɛt, a fɛ̀ ni ba: <<Anet ikap akak kin tsɛ a nas ija wu. 4 Ni izen fɛ́ a se ni inas e, ikak kpas naton irèn, wɛt nanon berem na tang ide. 5 Ikak kpas na agbondong, narɔ fɛ da ntong mak di se awo. I tang i wat i rasak, nek ntong e se gbɛngɛjɛng. 6 Wat izen fi kunom ngarak nate, ku shosh ide, i wat nkoot, nek aney e tsang nɔ yik-yik ayet mben awo. 7 Ikak kpas ayɛt itsitsan, itsitsan rasak i ki de ro ni kurasak. 8 Wat ikak kpas ni ntong ntek, ites ica, ikak anakat, ikak nsɔk karataat, ikak nsɔk ntaat. 9 Ayɔng fɛ́ a bɛ́ kuto, won na a fok ifɛ̀.>>

45 <<Kpaf anɔng, igwɔm azanɛn se tɛ agbat anet ijik fɛ́ a shashang ata fɛ́ a bi itsɔm makiyi. 46 Fɛ́ a sɛ kuta kutek kuzining kufi itsɔm makiyi, a tsɛ rɛɛs ngma ikyɛng fɛ́ a bɛ̀, a tsɛ a di shan iko.

Igorok icɛɛt naton basam bataat

14 <<Igwɔm azanɛn bi se tɛ ane: anet akak bɛ̀ kutseet ashon wu, wɛt a yes basam wu, a ka ba kaba kurúm wu. 15 A nɔɔk azining atalen atoon*, a nɔɔk anet afɛ́ afaa me atalen afaa, anet afɛ́ ataat, a ku nɔɔk izining, a nɔɔk kaangan kpaf na agap wu. Ama anɔng, a nye kutseet wu me. 16 Anet yɔng fɛ́ a shan atalen atoon e, wat a kpa tirisi ina ni ijik, a sɛ ibarang akak atoon naton na. 17 Kpaf anɔng, fɛ́ anet atalen afaa, di sɛ ibarang akak afaa. 18 Awɛt anet fɛ́ ba ku nɔɔk izining e, a tsɛ a ta ibong aben, a di nɛt atalen atekari wu me.

19 <<Ama izen isɔp, atekari basam e, bɛ́s wu, a fɛ̀ ni iba, na ba ku tak ikyɛng fɛ́ ba di nye na atalen wu. 20 Anet fɛ́ ba ku nɔɔk atalen atoon e, bɛ́ na akak atoon. A fɛ̀, <Atekari, ngɔn kin di nɔɔk atalen atoon, di, in mi di sɛ ibarang atoon.>

21 <<Atekari wu, fɛ̀ ni iwu, <Show! Ngɔn yet asam atek fɛ́ anet di ki te iyɛ! Ngɔn mi tonong atsak ni ikyɛng ibaane; Imi da ka nɔɔk iratek naton ikyɛng igbat e. Nɔ i da fɔɔn ni iyɛ ikan aze ni imi!>

22 <<Anet fɛ́ ba ku nɔɔk atalen afaa, bɛ́ na akak afaa. A fɛ̀, <Atekari, ngɔn kin di nɔɔk atalen afaa, di, in mi di sɛ ibarang afaa.>

23 <<Atekari wu, fɛ̀ ni iwu, <Show! Ngɔn yet asam atek fɛ́ anet di ki te iyɛ! Ngɔn mi tonong atsak ni ikyɛng ibaane, imi da ka nɔɔk iratek naton ikyɛng igbat e. Nɔ i da fɔɔn ni iyɛ ikan aze ni imi!>

24 <<Wat anet yɔng fɛ́ ba kin ku nɔɔk atalen azining e, a bɛ́, a fɛ̀, <Atekari, imi irēn nse ngɔn se gadiring, i tsɛk narɔ fi da ngɔn di tuus awo, itusung narɔ fi da ngɔn di waat awo. 25 Nek anɔng, imi fok nnyim, in tsin in da nɛt atalen ngɔn ni ibong. Nga ikyɛng ngɔn de.>

26 <<Atekari wu, fɛ̀ ni iwu, <Ngɔn aduk asam arut! Ɔɔ ngɔn irēn fok imi tsɛk narɔ fi da imi di tuus awo, ni in tusung narɔ fi da imi di waat ija awɛ? 27 Ey ya! Ki i se anɔng, ki ngɔn tsi i di sak atalen hom ni imyɛ itsɔm, nɔng imi bi fi in bɛ́s yin, ni in tsin shan ide ni ibarang naton e.>

28 <<Ama anɔng, atekari me fɛ́rɛ́ng na basam wu, <Shan yin atalen e ni bɔk wu, nɔɔk yin anet yɔng fɛ́ a bɛ̀ atalen kusɔk e. 29 Nek ngma ayɔng fɛ́ a bɛ̀, ba bi ku barang mo, nɔng a da bin sɛ shɛrɛk, wɛt ayɔng fɛ́ a se vit ikyɛng, igyet e dɔng fɛ́ a bɛ̀, ba da shan ide ni wu. 30 Tekap yin kufunam yɔng, barak yin amaan ayɛt ahwyi, narɔ fɛ́ a da ya ának, na ros anyi.>

Igorok icɛɛt naton agam nɛ alikama

24 AYeso tɛ a ka ba nye igorok icɛɛt ikak: Igwɔm azanɛn se tɛ anet fɛ́ a tsɛ a tuus ija itek ni ikɔ wu. 25 Awɛt ni izen fɛ́ kaangan se ni nda, anet ifa ni wu, tsɛ a di tuus agam ayɛt alikama me, a tseng akɔɔn wu. 26 Izen fɛ́ alikama bɛ́ a rasak, a tes ice, agam dorok bà.

27 Basam atek ikɔ me tsɛ ba ku sɛ, ba fɛ̀ ni wu, <<Atekari, i kin yet ija itek fi ngɔn kin tuus awɛ? Wat agam e yong, nɛ a ne akɛ?>>

28 <<Atekari me fɛ̀ ni iba, <Anet ifa ni imi yɔng, a tsɛ nye kutomong yɔng.>

<<Basam e ku rip yɛ, <Ki ngɔn shim ni in tsin ngaa yit ina yɛ?>

29 <<A fɛ̀ ni iba, <Awɛy, nek kɔng ni izen ingaa agam me, i bi wɛt i di ngaa yin alikama i di moon yin. 30 Won yin ide ni i rasak gung sak izen itusung nayak. Ni izen e yɔng, imi bi tak banet itusung e: Tusung yin agam e, rosom yin nsom-nsoom e, di te yin árong; Tusung yin alikama me, da tse yin ne ni imyɛ.> >>

Igorok icɛɛt naton nanamang kusɔk

1 <<Ni izen e yɔng, igwɔm azanɛn bi se ane: Nanamang nakak kusɔk, fɛ́ na sok agaramun na, na tse ishan amatek agol. 2 Batoon ayɛt ba yet áshɔp e nɛ batoon batsitsɛng e. 3 Áshɔp átoon e, sok agaramun bá, vit dang bereng name fɛ́ ba di ki barang. 4 Wat batsitsɛng e, berese agaramun bá name na atsung name bà. 5 Amatek agol e, a sok izen ishɔp dang bɛ́, ngma ba nda ka ba yisik, ba men nda.

6 <<Nasamang a te tuk, ba fok iyes fok, <Amatek agol e yong a wuruk! Bi ku shan yin!>

7 <<Wat ngma nanamang kusɔk e, dorok ni nda, ba di barasa nrong agaramun bá. 8 Áshɔp átoon e, fɛ̀ na batsitsɛng e, <Ki nang yit name yin, nek agaramun yit, tseng sak ikus.>

9 <<Ba ka ba bun ni ifɛ̀ yɛ, <Awɛy, na da ki kyem yit ngma ni iyin awo. Tseng yin sak na bayɔng fɛ́ ba rɛs name me, nɔng i da bin shan yin na fiin.>

10 <<Na anɔng wu, fɛ́ áshɔp ánamang e, di berem narɔ ishan name me. Wat ama fɛ́ ba mi tseng, amatek agol e bɛ́ a ta. Nanamang natoon fɛ́ na mi ka na nye, nɔ gung ni iwu sak narɔ fɛ́ ba mi nye nek amok e, ba ma fam katitu.

11 <<Ama anɔng, áshɔp ánamang e, bɛ́s na, ba fɛ̀ ni iwu, <Atekari! Atekari! Ki tarak yit katitu!>

12 <<Awɛt iwu fɛ̀ ni iba, <Atsak fi in tsin ki tak yin, Imi ki irēn yin awo.> >>

13 Nek anɔng, aYeso gang ifɛ̀ wu yɛ, <<Kana nye yin kaaki izen, nek da i irēn yin kunom e ki izen e awo.