As 10 parábolas mais importantes de Jesus

3 Yeesu abayigiriza myaazi minene kulengera emigani. Ababwira ntya: «Haliiri omuhinzi muguma wajaaga kubyaala. 4 Abeere ali abyaala, embeke ziguma zarhogera aha burhambirhambi bw’enjira. Enyunyi zayinja n’okulya zo. 5 Ezindi zarhogera omu lukalabuye, ahantu aharhali budaka bunene. Zamera juba kwenge obudaka bwabaaga bugeehere. 6 Aliko ezuuba lyabeere lyakola, lyaziyoosa. Na kwenge zirhaligwerhe emizi minene, zayuuma. 7 Ezindi zarhogera omu mishaaki. Eyo mishaaki yabeere yakula, yazifundeeza. 8 Aliko ezindi mbeke zarhogera omu budaka bwinja. Zabeere zakula, zayeeza amalehe. Ziguma zayeeza amalehe egana, n’ezindi makumi gali ndarhu, n’ezindi makumi masharhu. 9 Ola ogwerhe amarhwi ayunve!»

Omugani g’oMusamariya mwinja

25 Buzinda bw’ebi, mwigiriza muguma w’amarhegeko ayimanga n’okubaza Yeesu ntya omu kumurhega: «Mwigiriza, bichi nkwaneene kujira yi mbona akalamo k’esiku n’amango?» 26 Yeesu amushubiza ntya: «Bichi biyandikirwe omu Rhegeko? Gurhe oliyunva eyi walisoma?» 27 Omwigiriza w’amarhegeko ashubiza ntya: «Osiime Nnaweerhu Nnamahanga waawe n’omurhima gwawe gooshi, n’emisi yaawe yooshi n’obwenge bwawe bwooshi. Kandi: Osiime n’omutuuranyi waawe nka okw’ochisiima wenyine.»* 28 Yeesu aja amubwira ntya: «Washubiize bwinja. Ojire ebyoola oderhere, nji waalama.» 29 Aliko yeewe ashonda kuyeerekana okw’akwaneene. Abaza Yeesu ntya: «Omutuuranyi waani ye nde?»

30 Yeesu ashuba kumubwira ntya: «Haliiri muntu muguma warhengaga eYerusaleema guchimira eYeeriko. Abeere ali omu njira, abugaanana n’ebishumuusi. Byamunyega byooshi aligwerhe, bamushuurha banagenda eyi bamulekere nka mufu. 31 Haahulukira omudaahwa muguma wachimaga mw’eyo njira, abeere abona oyo muntu, achigerera oku lwindi lunda lw’enjira, naye achigendera. 32 oMulaawi muguma naye agera ahoola, abona oyo muntu, achigerera oku lwindi lunda lw’enjira, anachigendera. 33 Aliko, oMusamariya muguma waliiri lugenzi, ahika hoofu naye. Amubwene, amubeera obonjo. 34 Ashegera aha ali, amushomoola ebibihulu omu kubisheeshera kw’amavurha n’edivaayi, abirhuba n’ebiraka. Amubarhulira oku ndogomi yaage, amuheeka omu nju y’abagenzi, anamulanga. 35 Eseezi ly’aho, oyo Musamariya akuula dinaari ebiri omu shaho yaage, aziheereza nyina enju y’abagenzi n’okuderha ntya: ‹Obuke bwinja oyu muntu. Hano ngaluka, nakujuha nyenyine ebindi byooshi waaba wakoleeseze k’oyu muntu.›» 36 Yeesu aja abaza ntya ola mwigiriza w’amarhegeko: «Nd’obwene mw’aba bantu basharhu walibeere mutuuranyi w’oyu muntu wabugaananaga n’ebishumuusi?» 37 Omwigiriza w’amarhegeko ashubiza ntya: «Ola muntu wamubeeraga obonjo.» Yeesu amubwira ntya: «Genda, nawe ojire ntyo.»

4 «Nde omu mwabo, nk’agwerhe ntaama egana, agaheza nguma omu zo, k’arhakaleka zila zindi makumi gali mwenda na mwenda omu mpinga y’aja gushonda ela eherere kugera amango ayibona? 5 N’akayibona, anayihira oku birhugo byaage n’obushagaluke bunene, 6 anagaluka emwage, anahamagala beera baage n’abatuuranyi baage n’okubabwira ntya: ‹Mushagaluke haguma naani, bulaala nabwene entaama yaani yali herere.› 7 Na ntyo mbabwirire byo, nji haaba obushagaluke bunene omu mpingu oku munyabyaaha muguma olekere ebyaaha byaage, ahaali h’abantu makumi gali mwenda na mwenda bakwaneene barhakeneere okuleka ebyaaha byaabo.»

Omugani g’omusole w’aliherere anashuba kubonekana

11 Yeesu ashuba kuderha ntya: «Haliiri muntu muguma waligwerhe bagala babiri. 12 Omudoorho abwira eshe ntya: ‹Daarha, ompe echaani chigabi ch’agashambala chikwaneene kuba chaani.› Eshe abagabira bombi. 13 Enyuma wa siku zigeeke, omugala mudoorho aguza omwandu gwage n’okugenda omu gihugo cha hale. Mw’echo gihugo ashandaguza ebikulo byaage omu boorhere bubi. 14 Amalire kubishandaguza byooshi, enzara nene yaba mw’echo gihugo, arhondera kubula ngasi chintu. 15 Aja agenda gukolera omuntu muguma w’echo gihugo. Oyo muntu amurhuma omu mashwa maage kulagira engulube. 16 Oyo murhabana alema agifiija kulya oku biryo by’engulube sy’aliko ntaaye wamuheere byo. 17 Buzinda agishuba ko, aderha ntya: ‹Abakozi booshi ba daarha bali omu muhimbo, n’obo nyoono hano ndi naafa n’enzara! 18 Nagaluka emwa daarha, nanamubwira ntya: "Daarha, najirire echaaha embere za Nnamahanga n’embere zaawe. 19 Ntachikwaneene kuyirikwa mugala waawe. Oje wantoola nka muguma w’omu bakozi baawe."› 20 Ava agaluka, aja emw’eshe.

«Abeere achiri hale n’aha mwabo, eshe amulangiira, amuyunvira obonjo bunene. Alibirha kumulinga, amuhoobera. 21 Omugala aj’amubwira ntya: ‹Daarha, najirire echaaha emwa Nnamahanga n’emwawe, ntachikwaneene guhamagalwa mugala waawe.› 22 Aliko eshe abwira abaja baage ntya: ‹Muyanguhe, muleerhe omwambalo gukwiriire bweneene mumuyambise go, mumuyambise olupeta oku mudoke munamuyambise ebiraato. 23 Muleerhe enyana eshishire muyibaage; rhujire edinye rhunasiime, 24 bulaala oyu mugala waani abaaga afiire leero afuukire, abaaga aherere leero abonekere.› Banarhondera edinye.

25 «Mw’ako gashanji, omugala w’efula aliiri omu shwa. Abeere agaluka, n’okuyegeera aha mwabo, ayunva abantu bali kuyimpa n’okuzina. 26 Ahamagala muguma omu bakozi b’eshe, amubaza bichi byabeere. 27 Omukozi amubwira ntya: ‹Mudoorho waawe agalukire bobunoola yisho ayirhire enyana eshishire, bulaala amubwene mugumaguma.› 28 Oyo mugala w’efula ayunva oburhe, alahira kuja omu nju. Eshe ahuluka kumurhebeereza aje mo. 29 Aliko abwira eshe ntya: ‹Tala! Hamaagera myaaka minene bweneene eyi ndi nagukolera. Ntashubiraga kuvuna erhegeko lyaawe chiro n’eliguma. N’obo orhashubiraga kumpa chiro omwana gw’empene yi nshagaluka haguma na beera baani. 30 Aliko oyu mugala waawe wahezeze ebikulo byaawe omu bubaraga, abeere agaluka, wamubagiire enyana eshishire!› 31 Eshe amubwira ntya: ‹Mwana waani, oli haguma naani esiku zooshi, na byooshi ngwerhe biri byaawe. 32 Sy’aliko byaalihemere rhujire edinye n’ogushagaluka, bulaala oyu mwene wenyu abaaga afiire, aliko afuukire; abaaga aherere, aliko abonekere!›»

45 «oBwami bw’empingu bushushanyiizwe kandi n’omurhimbuuzi muguma walishondeere kugula amagerha m’egichiiro. 46 Abeere abona eyanga liguma lyagachiiro, aja kuguza ebintu byaage byooshi n’okuligula.»

Omugani g’oMufarisaayo n’omufurhiisa w’amakooli

9 Yeesu ashuba gucha ogu mugani oku bantu baliiri guchiibona oku bakwaneene n’ogukena abandi bantu: 10 «Lusiku luguma, bantu babiri baja gusaliira omu Nju ya Nnamahanga. Muguma aliiri Mufarisaayo n’owindi aliiri mufurhiisa w’amakooli. 11 oMufarisaayo ayimanga, asaliira ntya omu murhima gwage: ‹Nnamahanga wee, nguheere obukuuze bulaala ntali kuguma n’abandi bantu. Boowe bali bishumuusi, barhakwaneene, bali bahushi. Kandi ntali kuguma n’oyu mufurhiisa w’amakooli. 12 Nanchiibuza kulya kabiri omu boso, nampaana chigabi chiguma ch’ekumi ch’ebintu mbona.› 13 Aliko omufurhiisa w’amakooli yeewe, aliyimangire hale. Chiro arhanagalaga kuyinamula ameesho elugulu, sy’aliko achishuurha egifuba omu kuyeerekana oku arhakwaneene. Aderha ntya: ‹Yoo! Nnamahanga, ombeere obonjo, nye munyabyaaha!› 14 Yeesu aja aderha ntya: ‹Mbabwirire, oyu mufurhiisa w’amakooli yi wagalukire emwage ey’akwaneene, si arhali ola Mufarisaayo. Kwenge ngasi muntu yeeshi wachizamuula nj’ayandagazwa, aliko ola wachiyandagaza nj’azamuulwa.›»

Omugani gw’abakozi basharhu

14 «oBwami bw’empingu, rhwakabushushanya n’omugani gw’omuntu muguma washondaga kubalama. Oyo muntu ahamagala abakozi baage n’okubalekera ebikulo byaage yi babikolese. 15 Aheereza mukozi muguma talanta erhaano*, owindi talanta ebiri, n’owindi talanta nguma. Oyo muntu ajiraga ntyo gukulikirana n’obuhashe bwa ngasi mukozi. Oku buzinda abalama.

16 «Ho n’aho, ola mukozi bahaaga talanta erhaano, aja kuzirhimbuula mo. Ayunguka zindi erhaano. 17 N’olaala bahaaga talanta ebiri, naye aja kuzirhimbuula mo ayunguka zindi biri. 18 Aliko, olaala bahaaga talanta nguma, yeewe aja kujokola edaho n’okubisha mo ela talanta ya nnahamwabo.

19 «Enyuma w’esiku zinene, oyo nnahamwabo agaluka. Ahamagala abakozi baage yi bamubwire gurhe bakoleseze ebikulo byaage. 20 Olaala mukozi bahaaga talanta erhaano, aleerha enyungu ya zindi erhaano. Aderha ntya: ‹Nnahamweerhu, wampaaga talanta erhaano, leero tala zindi erhaano ezi nayungukire.›

21 «Nnahamwabo amubwira ntya: ‹Wajirire bwinja! Oli mukozi mwinja orhanali muhemusi. Okubona oku orhabeere muhemusi omu bikulo bigeeke, naaja nakujira mwimangizi w’ebikulo binene. Cho girhumire, oje wayinja oshagaluke haguma na nnahamwenyu!›

22 «Olaala mukozi bahaaga talanta ebiri, naye ahika. Aderha ntya: ‹Nnahamweerhu! Wampaaga talanta ebiri, leero tala zindi talanta ebiri ezi nayungukire.›

23 «Nnahamwabo amubwira ntya: ‹Wajirire bwinja! Oli mukozi mwinja orhanali muhemusi. Okubona oku orhabeere muhemusi omu bikulo bigeeke, naaja nakujira mwimangizi w’ebikulo binene. Cho girhumire, oje wayinja oshagaluke haguma na nnahamwenyu!›

24 «Oku buzinda, ola mukozi bahaaga talanta nguma, naye ahika. Aderha ntya: ‹Nnahamweerhu, nyinji okw’oba muntu mudaarhi, wooyo onashaluula eby’orhabyaalaga, onagusha eby’orhashandaazaga. 25 Elugulu w’oko, nayuubaha, naja nagenda kubisha etalanta yaawe omu daho. Leero, etalanta yaawe eyi, oyirhoole!›

26 «Nnahamwabo amushubiza ntya: ‹Oli mukozi mubi na mwolokazi! Waliyinji oku nanshaluula ebi ntabyaalaga n’okunangusha ebi ntashandaazaga! 27 Leero, walikwaneene kubika ebikulo byaani omu banki, y’olusiku nji nagaluka, mbirhoolere mo haguma n’enyungu ya byo.› 28 Oku buzinda, aj’aderha ntya: ‹Mumunyege eyo talanta, munayihe olaala ogwerhe talanta ekumi. 29 Kwenge omuntu ogwerhe akantu ye nji wayushuulirwa akandi, anaja agwarha binene. Aliko omuntu orhagwerhe kantu, nj’anyegwa chiro na hilaala hityu agwerhe. 30 Na kandi, oyo mukozi orhagwerhe kamaro mumukabule embuga omu mwizimya. Na mw’ogo mwizimya, abantu nji balira n’okulibuka bweneene.›»

Omugani g’omuchire na Lazaaro

19 «Haliiri mulume muguma w’omugale wagendaga ayambala emyambalo edukwire y’engulo nene. Oyo mugale agendaga ajira edinye ngasi lusiku. 20 Haliiri n’omukene muguma oyirikwa Lazaaro wabaaga alyaama embere w’omulyango gw’enju yaage. Omubiri gwa Lazaaro gwali guyunjwire ebihulu. 21 Lazaaro aliiri guchifiija kulya orhuboole rhw’ebiryo rhwagendaga rhwarhoga oku meeza m’oyo mugale. Na kandi embwa zagenda zayinja kumiima ebihulu byaage. 22 Hagera olusiku oyo mukene afa. Bamalahika bamuheeka aha burhambi bw'Abrahaamu. Ola mugale naye afa, bamuhamba. 23 Agerere ekuzimu, alibuka bweneene. Ayinamula ameesho, alangiira Abrahaamu na Lazaaro ali eburhambi bwage. 24 Ava ayaama ntya: ‹Daarha Abrahaamu, ombeere obonjo; obwire Lazaaro ahire esongi ly’omudoke gwage omu menji, ambobeeze olulimi, bulaala ndi nalibuka bweneene m’ogu muliro.› 25 Aliko Abrahaamu amushubiza ntya: ‹Mwana waani, yibuka oku waliyankiriire bintu binja binene omu kalamo kaawe, aliko Lazaaro yeewe aligwerhe malibuko manene. Bunoola, yeewe y’arhuleerezwa, aliko wooyo yi walibuka. 26 Na kandi, hali omuhonga guleehere bweneene ahagarhi kenyu neerhu. Cho girhumire, abashondere gurhenga eno kuja emunda muli barhakabigala. Na kandi ntaaye wakagala kugera eno munda rhuli gurhengera eyo munda muli.› 27 Omugale aderha ntya: ‹Daarha wee, nguhemere n’obonjo, orhume Lazaaro omu mwerhu; 28 bulaala ngwerhe beene beerhu barhaano, aje kubahanuula yi nji barhayinja nabo hano hantu h’amalibuko.› 29 Abrahaamu amushubiza ntya: ‹Beene benyu bagwerhe ebitaabu bya Muusa na eby’abaleebi, babiyunve.› 30 Omugale aderha ntya: ‹Nangwa, daarha Abrahaamu, aliko nk’omuntu muguma afuukire akaja emunda bali, bakaleka ebyaaha byaabo.› 31 Aliko Abrahaamu abwira omugale ntya: ‹Akaba barhashondere kuyunva Muusa n’abaleebi, barhakayemeera chiro omuntu wafuukire gurhenga omu bafu.›»

Omugani guyerekeere ebirhi bibi

24 Yeesu abachiira ogwindi mugani, aderha ntya: «Obwami bw’empingu bushushanyizwe na muntu muguma wabyaalaga emburho nyinja omu shwa lyaage. 25 Aliko lusiku luguma obudufu, amango abantu booshi babaaga balyaamire, omushombanyi waage ayinja n’okubyaala ebirhi bibi omu ngano, anachigendera. 26 Engano zabeere zamera n’okuyaasa, ebyo birhi bibi nabyo byabonekana.

27 «Abaja ba nyina eshwa bayinja kumubwira ntya: ‹Waliha, k’arhali mburho nyinja wabyaalaga omu shwa lyaawe? Ngahe leero ebi birhi bibi birhengeere?› 28 Naye abashubiza ntya: ‹Omushombanyi ye wajirire ntyo.› Abo baja baashuba kumubaza ntya: ‹K’oshondere rhuje kubishigulanga?› 29 Aliko abashubiza ntya: ‹Nangwa! Hali okuntu mwakabishigula haguma n’engano. 30 Mubileke bikulire byooshi haguma guhika amango m’ogushaluula. Amo mango nji nabwira abashaluuzi ntya: "Murhange mushigule ebirhi bibi munabigushe bilundo-bilundo n’okubichumika. N’oku buzinda mugushe engano omu nguli yaani."›»

Omugani gwa banyere ekumi

1 «Leero, oBwami b’empingu, nji bwashushanywa n’omugani gw’abanyere ekumi. Abo banyere, barhoolaga amatara maabo yi baaje kuyankirira muhya-mulume. 2 Barhaano mubo baliiri bihwinja na bandi barhaano baligwerhe obwenge. 3 Ebyo bihwinja barhoola amatara maabo, aliko barharhoolaga ebitorooli by’oguhira mo. 4 Aliko abaligwerhe obwenge, barhoola amatara maabo haguma n’ebitorooli omu masupa. 5 Okubona okw’oyo muhya-mulume alilegamire kuyinja, abo banyere ekumi booshi bahunira n’okuva balyaama.

6 «Ahagarhi k’obudufu, omulenge gwayunviikana guderhere ntya: ‹Tala! Muhya-mulume ayinjire! Muhuluke kuja kumuyankirira!› 7 Ho n’aho, abo banyere booshi bazuuka, barheganya amatara maabo.

8 «Bila bihwinja byabwira abaligwerhe obwenge ntya: ‹Murhuhe oku bitorooli byenyu, bulaala amatara meerhu marhondere kuzima.› 9 Aliko bala baligwerhe obwenge babashubiza ntya: ‹Nangwa! Ebi bitorooli rhugwerhe, birhangarhulumira rhweshi. Muje emw’abarhimbuuzi yi muchigulire ebyenyu.›

10 «Ebyo bihwinja, byabeere byajire kugula ebitorooli, muhya-mulume ahika. Bala banyere barhaano baligirheganyize miira, baaja omu dinye ly’obuhya haguma naye. Oku buzinda, omulyango gwachingwa.

11 «Enyuma z’aho, balaala bandi banyere bahika n’ogurhondera kuderha ntya: ‹Nnaweerhu! Nnaweerhu! Orhuchinguulire!› 12 Aliko muhya-mulume abashubiza ntya: ‹Okuli mbabwirire, ntabamenyere!›»

13 Oku buzinda, Yeesu ashuba kuderha ntya: «Leero mutarame, kwenge murhamenyere olusiku changwa ebishanji nji nagaluka.