As 10 parábolas mais importantes de Jesus

Мўй щирән и пўша уԓты уԓәпса мŏщатты: йӑм сӑмпи Самария ху эԓты

25 И пўш, Закона утәԓтәты и ики нŏх ԓойәс пӑ, Иисус артаԓәты урәӈән, ищмәсԓы: "Утәԓтәты Ху! И пўша уԓты уԓәпса мŏщатты урәӈән, мӑнэма мўй верты мосәԓ?"

26 Иисусән пӑ ищмәса: "Закон хŏща мўй хӑшман уԓԓа? Мўй ԓўӈәтԓән?"

27 Щитэн йŏхԓы йастәс: "Турәм Кущайэн нӑӈ Турмен арат сӑменән, арат ԓыԓэнән, арат йурэнән, арат ŏшенән сӑмәӈа тӑйи, пӑ ванән уԓты хŏйатэн ищи сӑмәӈа тӑйи, хŏты нӑӈен нӑӈ сӑмәӈа тӑйԓэн".

28 Иисус ԓўвеԓа йастәс: "Нӑӈ йӑна йастәсән; щиты вера, пӑ уԓты питԓән".

29 Щитэн, ԓўвеԓ йӑма пайәтты ԓӑӈхаман, Иисус ищмәсԓы: "Ма ванән уԓты хŏйатэм – хŏй?"

30 Ши йасәӈ пеԓа Иисус йастәс: "И хŏйат Иерусалим эԓты Иерихон воша шушәс пӑ хорахщетән мŏщатса. Щитәтән ԓумтәмԓаԓ хŏԓ нŏх эхсайәт, напрыйэ сэкса пӑ туп ай ԓыԓыйэԓ хӑйса, ин ŏтәт мӑтсәт.

31 Щи пŏрайән йуш хўват и Турма йир верты хŏйат шушәс пӑ ԓўвеԓ шийаԓәмаԓ кемән, ԓўв пўӈԓәԓ эԓты мŏхты мӑнәс.

32 Левит ики* ищи, хун щи шома йŏхтәс, вана шушиԓыйәс, ватсәԓԓы па ԓўв пўӈԓәԓ эԓты йэԓԓы мӑнәс.

33 Самария мўвәӈ и ху, щи йуш хўват мӑнман, ԓўв хŏщайәԓ уйтантәс пӑ, ԓўвеԓ шийаԓәмаԓ кемән, ԓўвеԓ щаԉәтсәԓы

34 пӑ, вана шушәс, ԋўләмԓаԓ оливка вŏйән, ўнайән ԉŏхәтмаԓ йўпийән лӑп йӑрсәԓы; щӑԓта ԓўв осёләԓ шӑнша нŏх омәсман, хоԓты хота ԓўвеԓ тусԓы пӑ щита хŏԓна ԓўвеԓ пӑйкәԓтман тӑйсәԓы.

35 Кимет хӑтәԓән пӑ, мӑнтаԓ йэԓпийән, кӑт динарий лакәптәс, хоԓты хотәӈ икийа мӑсԓы пӑ йастәс: "Тӑм хŏйат ԋоты. Тӑԓта аршәк ки посатԓән, йŏхәттэмән, нӑӈена йŏхԓы мӑԓэм".

36 Нӑӈ хŏты нумәсԓән, тӑм хуԓәм хŏйат эԓты, хорахщет йоша питыԓыйәм ху хŏща, хŏй вана уԓ?"

37 Закона утәԓтәты ики йастәс: "Хŏй ԓўвеԓа сӑмәӈ вер верәс, щит". Щишән Иисус ԓўвеԓа йастәс: "Мӑна, нӑӈ па ищиты вера".

4 "Хŏй нын эԓтан, сот ош тӑйман ки, пӑ щиԓта итәԓ уштәԓԓы, йӑрсот йӑрәԏйаӈәԓ щӑхәрән мўй ӑт хӑйԓәԓы пӑ уштәм ошәԓ йўпийән мўй ӑт мӑнәԓ, уйәттаԓ унты?

5 Пӑ уйәттаԓән, ўԓԓы пӑ, амәтман, порхәԓа пŏнԓәԓы;

6 пӑ, йŏхи йŏхәттаԓән, пиԓйохԓаԓ пӑ ԓўв ԉэпәԓән уԓты хŏйатԓаԓ вохԓәԓы пӑ ԓывиԓаԓа йастәԓ: "Ма пиԓэмән йэша амтәтԓыйаты: ма уштәм ошем уйәтсэм".

7 Нынана пŏтәртԓәм, щиты турәмән кӑрэкԓаԓ эԓты шӑшән керԓәты и кӑрэкәӈ хŏйат урәӈән амәт аршәк питәԓ, хун йӑрсот йӑрәԏйаӈ тўӈа–щира уԓты хŏйатәт урәӈән, хŏйа кӑрэкԓаԓ эԓты шӑшән керԓәты ӑт мосәԓ.

Ушиԓыйәм пŏх эԓты утәԓтәты пŏтәр

11 Иисус йэԓԓы пŏтәртәс: "И хŏйат кӑт пŏх тӑйәс;

12 айшәк пŏхәԓ ащеԓ пеԓа йастәс: "Ащи! Ма йўкан хот уԓпәсэм мӑнэма мийи". Щӑԓта ащанән хот уԓпәсэԓ ԓынана ортса.

13 Кӑмәтса хӑтәԓ хӑщәм йўпийән, ай пŏхәԓ мŏԓтыԓаԓ иса ӑкәтмаԓ йўпийән, хўв мўва мӑнәс пӑ щита ԓўв йўканәԓ, уԉԋайа уԓман, посатсәԓԓы.

14 Хун ԓўв йўканәԓ хŏԓ ԓэсԓы-тӑйсәԓы, щи мўвән ун ԓэԓԓы пŏрайа йис, пӑ ԓўв нўшайа питәс;

15 щӑԓта мӑнәс пӑ щи мўвәӈ и ху хŏща ԓŏӈәԓтыйәс, щитән пӑ ԓўв мўв хӑрԓаԓа пурәщԓаԓ шавиты китса;

16 ԓўвеԓән пурәщ ԓэтŏтән сӑмәԓ вŏԓԓәтты ԓуԓән амәт ус, туп нэмәԓты хŏйатән щитән хŏԓна ӑт мийԓыса.

17 Нŏпсәԓ нумәԓмимаԓән, йастәс: 'Мўй арат митйох ащем хŏща мŏԓтас ԓэтәт тӑйԓәт, ма пӑ ԓэԓԓы тӑта щи хӑԓԓәм;

18 нŏх ԓойԓәм пӑ ащем хŏща мӑнԓәм, ԓўвеԓа йастәԓәм: Ащийэ! Ма турма пӑ нӑӈена кӑрэк версәм

19 пӑ нӑӈ пŏхена ԓўӈтәсты щирэм ӑнтом; мӑнэм митйохԓан кўта ўйи".

20 Нŏх ԓойәс пӑ ащеԓ хŏща мӑнәс. Хун ԓўв хŏԓна йэԓән йўвмаԓән, ащеԓән шийаԓәса пӑ щаԉәтса; щӑԓта, ащеԓ йэщаԓт хухәԓмәман, сапԓәԓа ӑпәԓмәс пӑ ԓўвеԓ мосәԓтәсԓы.

21 Пŏхәԓ пӑ ԓўвеԓа йастәс: "Ащи! Ма турма пӑ нӑӈена кӑрэк версәм пӑ нӑӈ пŏхена ԓўӈтәсты ўш щирэм ӑнтом".

22 Ащеԓ пӑ митйохԓаԓ пеԓа йастәс: "Мет йӑм ԓумәтты сŏх тўваты пӑ ԓумәттаԓән, пӑ йошәԓа веншәӈ ԓуйәт, кўрԓаԓа пӑ ԓумтәм мийаты;

23 щӑԓта, веԓмәӈ мис пŏшәх тўваты пӑ нŏх хŏраԓән; ԓэты пӑ каш верты питԓув!

24 Пӑ хŏты, тӑм пŏхем пӑрман ус пӑ нŏх ԓыԓәӈԓәс, ушман ус пӑ уйәтса". Щӑԓта ԓыв каш верты питсәт.

25 Ун пŏхәԓ пӑ мўв хӑрән ус; йŏхи йитаԓән, хун йŏхи ванамәс, арыты пӑ йакты сый хуԓмәс;

26 и митху вана вохман, ищмәсԓы: "Щит пӑ мўй?"

27 Митху пӑ ԓўвеԓа йастәс: "Апщен йŏхтәс, пӑ ащен веԓмәӈ мис пŏшәх хŏрәс, ԓўв пŏхәԓ тўмтака йоша пайәтмаԓ урәӈән".

28 Ԓўв ԉикащәс пӑ йŏхи ԓŏӈты ӑт ԓӑӈхас. Ащеԓ пӑ, ким этәс пӑ ԓўвеԓ йŏхи пойәкты питсәԓы.

29 Туп ԓўв ащеԓ пеԓа йŏхԓы йастәс: "Ма мўй арат тӑԓ нӑӈена ԋотԓәм пӑ нэмәԓты пŏрайән нӑӈ йасӈен шŏппи ӑт ўншиԓысэм, нӑӈ пӑ нэмәԓты пŏрайән мӑнэм пиԓйохԓам пиԓән каш верты урәӈән, хŏԓна ош пŏшәх ӑт мийԓысән;

30 хун пӑ тӑм пŏхен, нӑӈ хот уԓпәсэн уԉԋа нэӈәт пиԓән лакки йовәԓмаԓ йўпийән, йŏхтәс, нӑӈ пӑ ԓўв урӈәԓән веԓмәӈ мис пŏшәх хŏрсән".

31 Ащеԓ пӑ ԓўвеԓа йастәс: "Пŏхийэ! Нӑӈ иса ма пиԓэмән уԓԓән, хŏԓ ма ŏтэм нӑӈен,

32 мўӈев щит эԓты амтәтԓыты пӑ каш верты мосәс, апщен пӑрман ус пӑ нŏх ԓыԓәӈԓәс, тӑпиԓыйәс пӑ уйтантәс".

Фарисей эԓты пӑ налогәт ӑкәтты хŏйат эԓты утәԓтәты пŏтәр

9 Тухԓәт пеԓа па, хŏй ԓыв нумәссәт ԓыв тўӈа–щира уԓты хŏйатәт, пӑ па хŏйатәт ԋэрсәт, Иисус щимәщ утәԓтәты пŏтәр пŏтәртәс:

10 "Кӑт хŏйатӈән Турәм хота пойәкщәты ԓŏксәӈән: итәԓ - фарисей, киметәԓ - налог ӑкәтты ики.

11 Фарисей, утща щира ԓойман, ԓўв турмәԓән шитаман пойәкщәс: "Йэшәк Турәм! Пумащипа Нӑӈена йастәԓәм, ма ӑнта щимәщ, ӑнта па хŏйатәт хŏрпи - ԓоԓмахәт, хорахщет, пакрасԓәты ŏтәт, мўй пӑ тӑм налог ӑкәтты ики иты:

12 ԓапәт кӑт пўш вўщԓыԓәм,* кашәӈ шитты ŏтэм эԓты, йаӈмет шупәԓ мӑԓэм".

13 Налог ӑкәтты ики пӑ, йэԓәншәк ԓойман, сэмԓаԓ турма хŏԓна нŏх аԓәмты пӑԓәс; туп мевԓәԓ хӑтщиман, пŏтәртәс: "Йэшәк Турәм, ма, кӑрэкәӈ ху, ма пелайэм йӑмен этәԓты!"

14 Нынана йастәԓәм, щит, фарисейа пŏнман, Турәмән вещката пайәтман, йŏхи мӑнәс: кашәӈ ԓўвеԓ ԓўв ԓӑтәӈа тӑйты хŏйат ԓӑтԓыйа пӑйәтԓа, пӑ ԓўвеԓ ԓӑтԓыйа тӑйты хŏйат ԓӑтәӈа пайәтԓа.

Тащәӈ хŏйат пӑ Лазарь эԓты утәԓтәты пŏтәр

19 И тащәӈ хŏйат ус, ԓўв тынәӈ питы ўрты ԓумтәма пӑ пирыйәм ухәԓ щӑшкана ԓумәтԓыйәс пӑ кашәӈ хӑтәԓ поры пӑсан верыԓыйәс.

20 Щӑԓта пӑ Лазарь нэмпи и куԋар хŏйат ус, ԓўв пушас овәԓ иԓпийән керәтԓыйәс, эԓәԓ ԓайӈәӈ ԋўләмән лӑп каритәм

21 пӑ тащәӈ ики пӑсан эԓты иԓ рыйты пўләта ԓуԓән хŏԓна амәтман ус, сӑмәԓ вŏԓәттыйа, ампәт вана йŏхтыԓысәт пӑ ԓўв карԓаԓ ԋŏԓыԓысԓаԓ.

22 Куԋар ху пӑрәс пӑ ԓўв ангеләтән Авраам хŏща туса. Тащәӈ ики па пӑрәс, пӑ мўва иԓ лоттәса.

23 Иԓта турәмән шукащман ус, ԓўв сэмԓаԓ нŏх аԓәпсәԓы пӑ йэԓән Авраам, ԓўв пўӈԓәԓән пӑ Лазарь ики шийаԓәс.

24 Такан ўвман йастәс: "Авраам ащи! Ма урӈемән сӑмен ат ԋŏхԓәԓ пӑ Лазарен киты, ԓўй тӑйәԓ йиӈка ат метшиԓыԓԓы пӑ ԋаԓмем ат йолхәԓԓәԓы, тӑм тўт хŏща щикем шукащԓәм!"

25 Авраам йастәс: "Пŏхийэ, нумәԓми, нӑӈ йӑмен уԓмен сыс мŏщатсэн; Лазарь пӑ – туп атәм тӑйәс. Ин пӑ ԓўв тӑта тŏрамтыйәԓ, нӑӈ пӑ шукащԓән;

26 щи тўмпийән мўӈ пӑ нын кўтәнән ун ус шики верман уԓ, тӑԓта нын хŏщайән мӑнты ԓӑӈхаты ŏтәт ӑт веритԓәт щи мӑнты, ищиты щиԓта мўӈ хŏщайэв ӑт ўншиԓыԓәт".

27 Щиӈәԋща тащәӈ ху йастәс: "Щи ԓŏват йӑм вера, ун ащи, ма ащем хота ԓўвеԓ киты,

28 ма вет ху апщи тӑйԓәм, ԓўв ԓывиԓаԓа ат йастәԓ, ԓуԓән ԓыв пӑ тӑм шукәӈ тӑхайа ӑт аԓ йŏхәтсәт".

29 Авраам ԓўвеԓа йастәс: "Ԓыв Моисей пӑ Турәм йасәӈ туты икет тӑйԓәт; ԓывиԓаԓ ат хуԓәтԓәт".

30 Ԓўв пӑ йастәс: "Ӑнта, Авраам ун ащи, туп хун пӑрәм хŏйатәт эԓты ԓыв хŏщайэԓ мӑтты ŏт йŏхәтәԓ ки, щи пŏрайән ԓыв кӑрэкԓаԓ эԓты керԓәԓәт".

31 Щӑԓта Авраам ԓўвеԓа йастәс: "Моисейа пӑ Турәм йасәӈ туты икета ӑт хуԓәтԓәт ки, пӑ пӑрәм хŏйатәт эԓты мӑтты ŏт нŏх ԓыԓәӈԓәс ки, хун эвәԓԓәт".