As 10 parábolas mais importantes de Jesus

Mushinga wa Musamariya mubuya

25 Inyuma kwaho, mwiisa muuma wa Muomba nianabatuka kweereka Yesu. Nianamubutsa mbu: «Mwiyisa, niirende kwebula mbu nibe na buingo bwa biro byoshe?» 26 Yesu nianamuxubitsa mbu: «Bate ko baandikire mwa Muomba? Unereumpfao ute mwa mango ausomao?» 27 Amwiisa wa Muomba uyo nianamuxubitsa mbu: «Uneretsiyira Ninakuwetu Ongo wawe mwa mutima wawe woshe, na mwa mwete wawe woshe, na mwa nyiki sawe soshe, na mwa bwenge bwawe boshe. Uneretsiyira kandi ne mulikyenyu ngakuno kounaitsiyira wenawene*.» 28 Niyo Yesu amubwira mbu: «Wamexubya kushe! Unerekola nga ko wameneena, nawe wendebaho.»

29 Wetuwe, amwiisa uyo wa Muomba abaa axonda iibwerekya ku ayaitse. Niyo abutsa Yesu mbu: «Nende ye mulikyetu?» 30 Yesu nianamuxubitsa mbu: «Mundu muuma atengaa i Yerusalemu kwekimira mwa mulungu we Yeriko. Abere akinali mwa nchira nianahendwa na bashamutsi. Abashamutsi abo bamunyaa abyoshe byabaa aweteko, niabanamuhirako mihumbo, baiendera, bamusia ni ali ku lwepfa.

31 «Niakunapfumbuka mukungu muuma wa hekalu ni akima mwa nchira iyo. Abere axunga kwa mundu uyo yashahumbwa, nianatsuka hamusike kuye, neiendera.

32 «Mulawi* muuma naye nianahika. Abere axunga kwa mundu yashahumbwa, nianatsuka hamusike kuye aba neyiendera.

33 «Mwa ntsindiro, niakunahika Musamariya muuma naye ni ali mu luendo. aMusamariya uyo ninahika ha mundu yashahumbwa ali. Abere amuxunga, nianamupfira bwoncho kutsibu. 34 Nianaipfunda hofi naye, nianamushakirira abihulu kwepfubulirako tifai na mapfuta, abanefukirabyo. Nianamukukumira kwa punda iwe nemutwala mwa nyumba ya reonchitsamo abaeni kwemulanga umo. 35 Bwabere bwakya, nianahulukya tinari ibiri*, nianahato nina anyumba aba nemubwira mbu: ‹Langa amundu uyu. Na sindi tinari seukaongerera kwemulanga, nendekupfuhato nafuluka.›»

36 Niyo Yesu abutsa amwiisa wa Muomba mbu: «Mwa bandu bashatu aba, inde yauxunga ku yabaa mulikyabo amundu uyo yarahumbwaa na bashamutsi?» 37 Na mwiisa uyo wa Muomba uyo nianaxubya mbu: «Yamupfiraa abwoncho.» Niyo Yesu amubwira mbu: «Enda, nawe unerekola utyo.»

4 «Inde mwimwe, ni angaba ali na mbuli iana, akehetsamo nguma, mbeni atangasia alwenda na mwenda kwa bisibo neya ixonda ambuli nguma yo iherire ihikira akishangi kyakendebonekyayo? 5 Amebonekyayo ni ahekayo mu lumoo kwa bitio biwe. 6 Na mwehika liwe ira ka, ni akongya bera bewe na bahuwene bewe, ni abwirabo mbu: ‹Mumoe kuuma nani, kureba ambuli yani yoyaheraa, namebonekyayo.› 7 Anibabwira ku Ongo na bamalaika baneremoa kubwishi bwa mukotsi muuma wa ntsambi, yamehingya amiberere iwe, irengya bandu lwenda na mwenda bo baixunga ku batunganene, bo batakiri na muhita wehingya amiberere yabo.»

Amushinga wa mwana yaheraa aboneka

11 Yesu nianaxube chirabo amushinga uyu mbu: «Kwabaa mulume muuma, ni awete ku baala bewe babiri. 12 Amulere mubo nianabwira ishe mbu: ‹Tata, unihe amuhango wani wa mwandu wa kwa bitwe byawe.› Ishe nianaabira baala babiri abitwe biwe.

13 «Kwabere kwametsuka biro bike, amulere uyo, nianautsa amwandu uwe nianaya mu kihuo kya hale. Iyo, nianaba’yo mu nchira sa buxuma nemala abitwe biwe byoshe. 14 Abere amemala abitwe biwe byoshe, mwa kihuo umo niamunatoa bulio butsibu ihikira mu luero lwetangira ihusha kangatoetsa mwa nda. 15 Kubwishi bwekyo, nianaya ikolera mundu muuma wa mwa kihuo umo. Amundu uyo nianamutuma mwa maxwa mewe kwelanga ngulube. 16 Amutabana uyo, abaa anaxumira ilya kwa bixuu bya sangulube* sinalya. Wetuwe, ni batatsiya mbu alye kubyo.

17 «Kubwishi bwekyo, nianatangira iibubukya mbu: ‹Oho! Abakotsi ba tata banashata mwa biryo, wetuwe ingye hano anchala yanikonola. 18 Nikafuluka ira mwa tata nemubwira mbu: "Tata, nakolire ntsambi mwa mbere sa Ongo na mwa mbere sawe. 19 Ndangakilukwa kandi mbu ndi muala wawe. Tsene, uniire ngakuno muuma wa mwa bakotsi bawe."›

20 «Amutabana uyo, nianabatuka, nianafuluka ira mwa ishe. Abere akinali hale hake na mwa mwabo, ishe nianamuxunga aba nemupfira boncho bungi. Nianamulibitira nemukokera. 21 Wetuwe muala amubwira mbu: ‹Tata nakolire ntsambi mwa mbere sa Ongo na mwa mbere sawe. Kubwishi bwekyo, ndangakilukwa mbu ndi muala wawe.› 22 Wetuwe, ishe nianabwira abakotsi bewe mbu: ‹Mulete chuba kantsu kabuya kutsibu, mube nemuimbakyako. Mumuimbakye kashee kwa mwolota na bilyato kwa bishando. 23 Mube neleta anyana yo inunire muiteyo nge twakolamo linye, nemoa. 24 Kubwishi muala wani uyu abaa ni apfire, wetuwe amepfuka. Abaa ni aherire, wetuwe ameboneka.› Niabanatangira ikola linye.

25 «Mwa kashangi umo afula ya mundu uyo yabaa ni ikinali mwa maxwa. Mwefuluka liwe, abere ahara hofi na mutsi, nianaumpfa kwa ngoma aixumbira na kwa bandu abatsina. 26 Nianabirangira muuma mwa bakotsi nemubutsa, kyo kiri iyo. 27 Amukotsi nianamuxubitsa mbu: ‹Mulumuna wawe amehika. Ne ixo ameita anyana yo inunire, kubwishi amexunga muala ni mukambwe.›

28 «Amutabana uyo, nianatsibuka aba netinda iingira mwa nyumba. Ishe nianahuluka kweitondoola kuye mbu aingire mwa nyumba. 29 Muala nianamuxubitsa mbu: ‹Umpfa, myaka mingi yametsuka ni anikukolera butsira itenguha mateeko mawe. Naho utatangire waniha kiro na kihalabute mbu nikole mukyo mo linye na bera bani. 30 Wetuwe mwa kashangi muala wawe uyu yamalaa abitwe byawe mwa lusingi amehika, iye wamemwitira anyana yo inunire.›

31 «Ishe nianamuxubitsa mbu: ‹We mwanani, unaba kuuma nani abiro byoshe, na byoshe byoniweteko, binaba byawe. 32 Shatunashushire ikola linye nemoa, kureba muala wenyu uyu abaa ni apfire, wetuwe amepfuka. Abaa ni aherire, wetuwe ameboneka.›»

Amushinga wa Mufarisayo na muhoresi wa koli

9 Nianachirabo kandi amushinga uyu kubwishi bwa bandu bo baixunga ku baimirire netunganana mwa mbere sa Ongo, nesuntsuura abandi bandu mbu: 10 «Lwire luuma, bandu babiri baya ihema Ongo mwa hekalu. Amuuma abaa Mufarisayo, na undi ni mufutishi wa koli. 11 aMufarisayo uyo, nianaimana nehematya mwa mutima uwe mbu: ‹Ongo, anikusima kubwishi nitali ngakuno abandi bandu. Ibo betsi, na babi, na basingitsi. Anikusima kandi kubwishi nitali ngakuno amufutishi wa koli uyu. 12 Ninakola mahemo meihangira ilya kabiri kweinga. Ninerekutula muhango muuma wekumi wa bitwe byani byoshe byo ninabonekya.›

13 «Wetuwe amufutishi wa koli, iye, nianaimana hale, atalinda iereka ibatula amesha kwelalamira mu mbingu. Nianaibandanga kwa kipfuba kubwishi bwa buyongwa nehema shashi mbu: ‹Ee Ongo, unipfire bwoncho, ngye mukotsi wa santsambi!›»

14 Yesu nianaxubebula mbu: «Anibabwira kwa muhoresi wa koli uyu, afulukaa mwamwe Ongo niamemuxunga nga mundu atunganene. Wetuwe aMufarisayo uyo, ihi. Kubwishi kintsi mundu yandaiurukya endekimibwa. Wetuwe yandaihohya, iye, endeurukibwa.»

Amuxoki ne Lasaro

19 Yesu nianacha kandi undi mushinga mbu: «Kwabaa muxoki muuma ni anereimbala ngimba sikwirire, na sa kichiro kinene. Nianaba mu mukene abiro byoshe. 20 Ni hali na muchene muuma aretsina liwe ni ye Lasaro. Ne Lasaro uyo, amubiri uwe woshe ni auchwire binyoho. Na kandi ni ereonchitsibwa halukyo lwa muxoki uyo. 21 Abaa anerexumira ilya ku byobitoanga kwa mesa ma muxoki uyo. Asambwa nato serehika kwekombakomba abinyoho biwe.

22 «Lwire luuma, Lasaro nianapfa. Abamalaika bahika, bamutwala mu mbingu hofi ne Iburahimu*. Na muxoki naye nianapfa, niabanamuta. 23 Abere ali yanuba kutsibu mwa i kutsimu, nianabatula mesha mewe, axunga Iburahimu hale naye ne Lasaro ni ali hamusike kuye. 24 Nianailakira mbu: ‹Eh tata Iburahimu, Unipfire bwoncho! Aninuba kutsibu mwa muliro muno. Unitumire Lasaro atobetse amutwe wa mwolota uwe mwa mechi anitoetse itondi linibobole alulimi.›

25 «Wetuwe, Iburahimu nianamuxubitsa mbu: ‹We mwana wani, iwe, ubuka ku mwa buingo bwawe wabaa muxoki kutsibu, ne Lasaro ni ali bulio. Tsene, Lasaro iye, achirwa mikocho, nawe aunuba. 26 Na kandi, hakati ketu nemwe hali kiribu kire. Kubwishi bwekyo, bobali hotuli ino munda, bali abaxonda iya yomuli, litsibu. Na bobali yomuli, nabo litsibu kwehika hano hotuli.› 27 Amuxoki nianabwira Iburahimu mbu: ‹Unishashire, tata Iburahimu, lika Lasaro mwa mwetu. 28 Ko niwete baala betu batano, aende yatonderebo, nabo batangechehika ahandu ha minubo hano.› 29 Wetuwe, Iburahimu nianamuxubitsa mbu: ‹Baala benyu bawete kwa Bitabo bya Musa na bya batahwa kwetonderabo. Banereumpfa ngakuno ko bibwire.› 30 Amuxoki aneena mbu: ‹Ihi, mbe tata Iburahimu ikyo kyonakyene kitalingirirene. Wetuwe, ali mupfu muuma angaba akepfuka neya yo bali, bangahingya amiberere yabo.›

31 «Wetuwe, Iburahimu amuxubitsa mbu: ‹Baala benyu bali batahulikitse ko abitabo bya Musa na bya batahwa bibwire, ni batangaimirira mundu nakiro mbu shatoka mwa bapfu.›»