As 10 parábolas mais importantes de Jesus

3 Adigl meglko, Jisas ka ebrie mere kaima beke togwa. Ta dugwa i, yegl dugwa, Ene prio. Yagl ta kugl mogo i pi sudragledi ede ogwa. 4 Kugl mogo i pi sudugl ake pia sugo, kugl mogo tau yage konbauna sigwa. Kugl mogo i, kua pru di u neimiwe dugwa. 5 Te, tau, yage makan gaba kuri ta kobuglo bolamugl moglmara yage sigwa. Kugl mogo i, makan gaba mere yeikrumara yage sigwa pre tabre parikwa 6 ba ade ede mitna ugwa igne, duglane ede atne pikrukwa pre kugl i tabre ade de, yaminugwa. 7 Te, tau yage kan kagigle yaglkwa bogl moglmara sigwa. Kugl mogo i pare wi sigo, kan kagigle yaglkwa i ama akie pare ede mitna pi, kugl i atne edugwa. 8 Te, kugl mogo tau yage makan wakai yomara sigwa. Kugl mogo i, pare ede mitna pi, mogo wakai koglkwa. Tau 100 keglko, tau 60 keglko, tau 30 keglmiwe di, yegl dugwa. 9 Didre, ama yegl dugwa, Yoba na kana ta pramnedi praiglkwa i, na ka diga i wakai ere kinano gudu prio! dugwa.

Juda yagl ta yubun yumara Samaria yagl ta ake ple di togwa

25 Ana ege ta, God lomo beke togwa yagl ta adigl mogl, Jisas ka ta aglau ere dinabo mo di, pragledi yegl dugwa, Tisa yo, na siragl mere ersre, aimadi kamin kor moraiglkwa ikra kaima inagle? dugwa. 26 Yegl dugo, Jisas di ikne ede yegl dugwa, God lomo mina siragl mere beglkwa i do. Te, ene ama kersre, siragl mere dumedi pitne? dugwa. 27 Yegl dugo, yagl i di ikne ede yegl dugwa, God lomo yegl dugwa, Ene den mudun bogl mudu Yaglnen Kade God tedre, ene nomanen ya yobugln bogl mudu te ene mudu motnere God to* dumiwa, te ene enene wakai kanere mere yegl, yoba ta magigl akie kipanaiglkwa i, ama yegl mere wakai kano* di, God lomo yegl dume dugwa. 28 Yagl i yegl dugo, Jisas aglke kor yegl dugwa, Ene kuno ere dinga. Ene dinere yegl etn, kor moratniwe dugwa.

29 Ana Jisas yegl dugo, God lomo beke togwa yagl i aglaumo nogugl pai dinabedi Jisas yegl di prukwa, God lomo suna, yoba ta yobanma we dugwa i, ira pre dume? dugwa. 30 Yegl dugo, Jisas di ikne edidre, ka ebrie ta yegl dugwa, Yagl ta dumo Jerusalem kide kodo, ede dumo Jeriko enagledi konbo bage ugo, kunogl gogl yoba u ere sidre, kuguglmo gaglmo ya taraglmo mudu kunogl idre, ede eigo, yagl i gorabuka magigl eruko, pai moglkwa. 31 Ana igne i tawa togwa yagl ta ere mogl, konbo swara i mina udre, yagl i pai moglko, kandre, ede bina pi, kan kor erekre, ede ogwa. 32 Mokomugl i, Livai yagl ta ama yagl i pai moglmara u kandre, yagl ta erumere mere ama ede bina pi, kan kor erekre, ede omiwe dugwa.

33 Ana yagl suo i yegl ere ede ebrika ba Samaria yagl ta konbauna ede pi yagl i pai moglmara u kandre, mirie gogl, ye ta erekrabere mere ye ersre, 34 ye pai moglmara pi ye sigwa boglmara i wain nuglo ya oliv nuglo toide edidre, tu si togwa. Tu si tedre, yagl i yene donkimo bolamugl edidre, auro i pi haus pasindia ta yomara pidre, suglmo moglkwa. 35 Ana taganamogl Samaria yagl i ere mogl, mige silva suo i meda ede, haus pasindia nem yagl moglkwa i tedre, ye yegl di togwa, Ene yagl i suglmo moglsre, taragl tau inabuka mere yegl panabuka i te moglo. Mige suo i dudinan, okuo siragl ta eratnga i, na wan ikne wibo, dina mere yegl panan, ene te ikne edinaluwe di, yagl i yegl dumiwe di, Jisas yegl dugwa.

36 Ana Jisas yegl didre, God lomo beke togwa yagl i yegl di prukwa, Ana yagl suota konbauna wimara i, yagl ira ta kunogl gogl yoba ere sigwa i ye yobamo mere yegl moglmedi ake ple di tome? dugwa. 37 Yegl dugo, yagl i di ikne ede, yegl dugwa, Yagl ta ye mirie goglkwa i, ye yobamo moglmiwe dugwa. Yegl dugo, Jisas aglke kor yegl dugwa, Ana ene pi yagl i erumere yegl ero! dugwa.

4 Yagl ta sipsip 100 kurabuka ba sipsip swara ta wau boran, ye siragl erabe? dugwa. Ye sipsip 99-pela yoko moraiglkwa i kanige ersre, swara ta wau boglkwa i, dokinabuka. 5 Doko kanabuka igne, ye gun yedre, sipsip i kugro i pi 6 yugugl edidre, kabaglemo ya yoba magigl akie kipanaiglkwa i, agle di, yegl di tenabuka, Nono akie gun yenamniwa. Na sipsipna swara ta wau boglkwa ba na doko kan iwe di, yegl dinabuka. 7 Kuno yegl mere tadaglme yoba swara ta nomane yake tenan, God ye angeloma bogl gun podo yenaiglkwa. Ye yoba 99-pela ta yoba du mogl kodigwa i pre gun kebra yenaiglkwa ba tadaglme yoba swara ta nomane yake tenan, gun podo kide yenaiglmiwe dugwa.

Yagl ta wam wau bogl, ede ikne yugomugl ugwa ka ebrie

11 Ana Jisas ka yegl di pai moglsre, ta ama yegl dugwa, Aglke ta yagl ta moglkwa, ye wam suo miuriwe dugwa. 12 Ye wam suo miurka ba wam okuo ye pi nem di te, yegl dugwa, Nina yo, ene gogln, na ene makanen ya taraglnen inaglka panabere i, erme yubu si naro! di, yegl dugwa. Yegl dugo, yagl i kanige ere, taraglmo mudu yubu si, wam suo i tomiwe dugwa.

13 Ana yubu si togo, ye wam okuo ege sugunagle keme mogl, ye nem makanmo ya taraglmo togwa ikra, mudu topo bogl idre, ede kantri eglke ta enagledi ede ogwa. Ye kantri eglke ta omara i, ye migemo mabuno gua gua mina ere ede ogwa, dudugwa. 14 Ye migemo dudugwa igne, ye kantri ta moglmara i, ama kidan podo yogwa. Kidan podo yogo, ye migemo ta yoko yenan, ye kaya mokna i nenabuka ta manugo, kidan podo goglkwa. 15 Ye kidan goglsre, ede pi makan nem ta moglmara pidre, kogon eragledi di pruko, makan nem i ye bugla ere kuglmara buglamo kaya mokna tenabedi dedugwa. 16 Ye dedugo, pi kaya mokna kie bugla te moglsre, kidan podo goglkwa pre ye ama kie i nenagledi prukwa. Prukwa ba makan nem swara ta ye kaya mokna nenabedi ta tekrime dugwa.

17 Ana wam okuo i kidan yegl goglsre, kogon ere moglmara i, nomane kor ta yugwa. Nomane kor ta idre, yegl kina gudu prukwa, Na nina niglmo kogonmo yoba i, ege ege kaya mokna podo nedre, dano eruko, ikne moglade yei, yegl erikwa ba na po pai, goraglka pamiwe di, yegl di kina gudu prukwa. 18 Yegl prisre, ye, Na ede ikne nina moglmara pidre, na yegl dinaluwedi prukwa, Nina yo, erme God gumuglo mina ya ene gumugln mina na tadaglme eriwa. 19 Ene erme na wana we dinatnga i, kuno ta erekrukwa pre ene na wana we dikitn, na nigl kogonen yoba mere yegl moraluwe di, yegl dinagledi kina gudu prukwa. 20 Yegl prisre, ye ede ikne nem moglmara enagledi ede ome dugwa.

Ana wam ikra ede ikne nem moglmara enagledi ede ogwa. Ye nem kipamara ede magigl ogo, nem kan eglke iro ede, wam i ugo, kandre, mirie gogl, muku di ede pi ye wam umara pidre, kogl kare di, nugu kugro, pauna si nogwa. 21 Yegl eruko, wam ye nem di tedre, Nina yo, na God gumuglo mina ya ene gumugln mina tadaglme erika pre ene erme Na wana we dinatnga i, kuno ta erekrumiwe di, yegl dugwa. 22 Wam yegl dugwa ba nem mirie goglkwa pre ye niglmo kogonmo yoba meglkwa i di te, yegl dugwa, Ene tabre pidre, ir gagl olto wakai kaima ta yenabuka i, yu na wana ede tedre, ogo ring ya kagle towo ta yenabuka i yu ede teo dugwa. 23 Yegl didre, ama yegl di togwa, Ene pi kau nagigle gumamugl ta kuglka moglkwa i, yu si kebi, nono pra pra nedre, gun yenamniwe dugwa. 24 I siragl pre na wana i, goglmedi prika ba adigl u kor ogwa mere yegl paugwa. Te, ye wau boglkwa ba erme aglke ede ikne umiwe dugwa. Yegl dugo, niglmo kogonmo yoba bogl akie makai si, kaya mokna kei, gun yemiwe di, Jisas yegl dugwa.

25 Ana kaya mokna ne, gun yei meglko, yagl i wam komono kaya mokna ere yaiglmara wan moglkwa. Ye kogon ere wan ede ikne kipamara magigl udre, prukwa i, ye gigagle di, katno egre meglkwa prisre, 26 ye nigl kogon yoba ta magigl moglkwa i ye di pre, siragl taragl plau dugwa i pragledi kira pogl prukwa. 27 Kira pogl pruko, nigl kogon yagl i ere mogl, agigle komono i di te, Ene agitn okuo ikra we, kor mogl, ede ikne umiwa. Yegl pre ene nen, gun yei, kau nagigle gumamugl ta kuglkwa ikra si keigo, nedre, gun yeimiwe di, nigl kogon yoba yegl dume dugwa.

28 Jisas ka yegl didre, ama yegl dugwa, Yoba i kaya mokna ne, gun yei ere meglkwa ba ye wam komono dem kubro, ede yugugl enakiurukwa. Yegl erukwa pre ye nem ede meda u, wam komono dem muduo aragan erabedi ka wakai di togwa 29 ba ye wam komono nem di te, yegl dugwa, Nina yo, ene pro! Na bugla yugu tau mere ene kogonen ere tedre, ege swara ta kanen sedekriwa. Yegl erika ba ene ege swara ta taragl kebra, meme nagigle mere yegl ta na kabaglena bogl si kei ne, gun yenaiglmedi pre ta narekitnga. 30 Ba ene wan okuo ene migenen mudu i pi, konbauna abu te ede ogo, dudugo, ye aglke ede ikne ugwa ba ene kau nagigle gumamugl ta kuglnga ikra si kei teniwe dugwa. 31 Yegl dugo, ye nem wam komono di te, yegl dugwa, Wana yo, ene ege ege akie mugliwa. Te, na taraglnana ta yogwa i, mudu ene pre yomiwa. 32 Yogwa ba erme we, nono kaya mokna kedre, gun yenabuglka pamiwe dugwa. I siragl pre agitn okuo wau bogl, gorabuka ba erme ede ikne ugwa i, adigl u kor ogwa mere yegl pamiwe di, yagl i wam komono yegl di tomiwe di, Jisas yegl dugwa.

Jisas bis nuguno ta mige podo boglkwa pre ka ebrie dugwa

45 Jisas yegl didre, ama yegl dugwa, God yoba kingno mogl, suglno morabuka i pre ka ebrie ta ama yegl dinaglka. Bisnis man ta bis nugo kruo wakai wakai yenabuka i, idre, aglke kor topo bogl inagledi doko wan moglkwa. 46 Doko wan mogl, ege swara ta pi mige podo kaima borabuka ta kanugwa. Kandre, pi taraglmo mudu ta kan nogwa i, topo bogl idre, bis nugo ikra topo sumiwe di, Jisas yegl dugwa.

Farisi yagl ya taks yugwa yagl kamage eribrere Jisas ka ebrie dugwa

9 Ana yoba tau ye yene mabuno erimara yoba du munedi pre, yoba tau mudu kide meglmedi prikwa i, Jisas ere mogl, ka ebrie ta yegl di togwa, 10 Aglke ta yagl suo ere mogl, God kamage ere tenabugledi ede tawa teigwa yugu yomara ebre dugwa. Ta Farisi yoba moglko, ta taks yugwa yagle moglkwa. 11 Ana ye ede suna ebriko, Farisi yoba i nomane mina kamage yegl erukwa, God yo, na yoba kide meglmere yegl ta moglkrika pre na ene di wakai yei teiwa. Yoba tau yoba pere bakagl tedre, mabuno kide bogl, abu kunogl nedre, erimere yegl na ta erekrika. Te, taks yugwa yagle magigl moglkwa i moglmere ama moglkrika pre diwa. 12 Na wakan swara swarade ege suo mina kaya mokna mawagl ersre, taragl mudu iga i br 10-pela boglsre, ene swara ta teiwe di, Farisi yoba yegl dugwa. 13 Yegl dugwa ba taks yugwa yagle i we, ye kuri ta mogl eglke ido edidre, Na kan heven ibo edenaglka i, kuno ta erekrumedi kan atne edidre, na yoba kide moledi prukwa i, i nogugl edenagledi yene pirie wagle sidre, yegl dugwa, God yo, na tadaglme yoba moliwa. Ene na mitna goglo! di, yegl dume dugwa.

14 Na ene di teiga, God taks yugwa yagle i yagl du moglmedi kanugo, ye ede ikne yugomugl ogwa. Ba Farisi yagl i, God ye yagl du moglmedi kankrukwa. I siragl pre yoba ta yene pre i mitna edenabuka i, God ye i atne edenabuka. Ba yoba ta yene pre i atne edenabuka i, God ye i mitna edenabiwe di, Jisas yegl dugwa.

Kogon yagl 10-pela mige imere ka ebrie

14 Jisas yegl didre, ama yegl dugwa, I siragl pre God yoba kingno mogl, suglno morabuka i, ama yegl mere pame dinaglka. Yagl ta ede bage ta enagledi ersre, yene nigl kogonmo yoba agle dugo, wigwa. Wigo, ye yoba i na taraglna sugl mogl naraiglmedi yubu si togwa. 15 Ye migemo yubu si togwa i, nigl kogon yagl swara swarade kogon siragl mere eribi, kuno erabuka i pre kodidre, yubu si togwa. Ye nigl kogon yagl swara ta mige 5,000 mere yegl tedre, swara ta 2,000 tedre, swara ta 1,000 tedre, ede ogwa. 16 Ede ogo, tabre yagl ta mige 5,000 yugwa i, ere mogl, kwia 5,000 koglo i tebe ede yugwa. 17 Kuno yegl mere yagl ta mige 2,000 yugwa i, ere mogl, kwia 2,000 koglo i tebe ede yugwa. 18 Ba nigl kogon yagl ta mige 1,000 yugwa i, ye Yaglmo Kade migemo silva i, i pi maugl sumiwe dugwa.

19 Ana ye yaglno kade tau kanana wan mogl, aglke ikne udre, ye kogon siragl mere erikwa i, di naraiglmedi agle dugwa. 20 Agle dugo, nigl kogon yagl ta mige 5,000 yugwa i, ye mige 5,000 kia yugwa i yudre, yegl dugwa, Yagl kade yo, kano. Ene mige 5,000 natnga i mina na mige 5,000 aglke kor i tebe ede padigl, i wiwe dugwa. 21 Yegl dugo, ye yaglmo kade i, ye yegl di togwa, Wakai etniwa. Ene nigl kogon yoba wakai moglsre, taraglna sugl wakai motnga. Na taragl kebra ta ene teiga i, ene sugl wakai motnga pre na erme taragl podo ene sugl moratnedi tenaglka. Na ene bogl akie gun podo yenabugliwa. Wo, dugwa. 22 Yegl dugo, nigl kogon yagl ta mige 2,000 yugwa i udre, yegl dugwa, Yagl kade yo, kano. Ene mige 2,000 natnga ikra mina na mige 2,000 aglke kor i tebe ede padigl, i wiwe dugwa. 23 Yegl dugo, ye yaglmo kade i, ye yegl di togwa, Wakai etniwa. Ene nigl kogon yoba wakai moglsre, taraglna sugl wakai motnga. Na taragl kebra ta ene teiga i, ene sugl wakai motnga pre na erme taragl podo ene sugl moratnedi tenaglka. Na ene bogl akie gun podo yenabugliwa. Wo di, yegl dume dugwa.

24 Ana okuo nigl kogon yagl ta mige 1,000 yugwa i, udre, yegl dugwa, Yagl Kade yo, ene ede enga igne, na prika i, ene yagl gigledi moglsre, yoba taraglno idre, yoba pere toglno mina ene kaya mokna ama singa yoba motnga 25 pre na kudugl gogl, migenen i pi, maugl siga. Kano, ene mige natnere kuno mere te ikne ediwe dugwa. 26 Nigl kogon yagl i yegl dugo, ye yaglmo kade di ikne ede, yegl dugwa, Ene oglka ersre, nigl kogon yoba wakai ta moglkitniwe dugwa. Ene pitnga i, yoba pere taragl tau yeigwa i, na idre, yoba pere kaya mokna ere yaiglkwa i, na si yumedi pitnga paugwa. 27 Na yegl moglmedi pitna, ene migena i pi beng edingo. Ene yegl etna, na migena kia bogl igo we dugwa. 28 Yegl didre, yoba tau magigl adigl meglkwa i yegl di togwa, Ye kide erukwa pre mige 1,000 ake moglkwa i, ene idre, yagl ta 10,000 akumara i tebe ede teo dugwa. 29 I siragl pre yoba taragl tau mere kan neigwa i, na tau ama i tebe ede tebo, ye taragl mere inaiglkwa. Ba yoba ta taragl tau mere kan nekrikwa i, ye taragl kebra ta ake moraiglkwa i ama i eglke edenaglka. 30 Te, nigl kogon yagl ta kogon wakai erekrukwa i, ene si meda edibi, ye meda mim erumara morabuka. Meda i, yoba kai ersre, signo gikr eraiglmiwe dugwa.

Yagl ta mige mere kan nogwa ya yagl ta goduglme moglkwa ka ebrie

19 Ana Jisas ka ta yegl dugwa, Mige moni mere kan nogwa yagl ta okna moglme dugwa. Ye mige moni mere kan nedre, kugugl gagl gogl ya kruo wakai kaima ersre, kaya mokna wakai kaima keme nei, gun yei moglkwa. 20 Ye yegl ere moglko, yagl goduglme ta ama moglkwa, kagie Lasarus we digwa. Yoba ege ege yagl Lasarus i boglo ere i pi ye ogo kugl, mige ki yana dinabedi mige moni mere kan nogwa yagl ikra kipamara togl pgla meda kra edigo, pai moglkwa. Lasarus ogo nagie mina num mere kide dogwa. 21 Ana Lasarus togl pgla meda kra pai moglsre, kidan gogl, yagl mige mere kan nogwa i kaya mokna nogwa tau yage maginagle sugwa i nenagledi prukwa. Te, ye ogo nagie num domara we, agl ege ege u bare neime dugwa.

22 Ana okuo yagl goduglme moglkwa ikra goglko, angelo tau u, ye boglo ere i pi Abraham moglmara edigwa. Te, mige mere kan nogwa yagl ikra ye ama goglko, yoba ye maugl sigwa. 23 Ye maugl sigo, ye ede dumo kidile pi giugl podo prisre, kan eglke iro ede, Abraham ya Lasarus akie miurko, kanugwa. 24 Ye kandre, agle di, yegl dugwa, Nina Abraham yo, ene na mitna goglo! dugwa. Na doga domara mogl, giugl podo kide prika. Ene Lasarus di ten, ye ogo mogo nigl kor mina edidre, yu na drabna mina si banan, kuri ta bi yenabiwe di, yegl agle dume dugwa.

25 Yagl i yegl dugwa ba Abraham di ikne ede te, yegl dugwa, Wana yo, ene pro! Ene kor mogl, taragl wakai kane kane inga igne, Lasarus taragl kide keme yugwa. Ba erme we, ye dem muduo aragan eruko, wakai moglko, ene giugl podo pitnga. 26 Te, Lasarus ene motnara unabuka i, kuno erekrukwa. No muglara ya ene motnara suna i, God bidai podo sugwa, paugwa. Ye bidai sugwa i, yoba no muglara yegl mogl, ene motnara enamnedi pribi, ye ta pikraiglkwa pre, ya te, yoba ene motnara meglkwa i no muglara ta ukraiglkwa pre bidai podo si paduglme di, Abraham yegl dume dugwa.

27 Abraham ka yegl dugo, yagl i aglke kor dugwa, Nina yo, yegl panan, na ene yegl di praglka, ene Lasarus dedin, ye na nina agrama meglmara enabuka. 28 Na agrama 5-pela meglkwa pre diga. Ye na agrama meglmara pi, ka giglede di tenan, na agrama prisre, dumo kidile na moglmara i ta ukraiglmiwe di, yegl dugwa. 29 Ye yegl dugo, Abraham aglke kor dugwa, Moses ka tau bogl atne edugwa i ya ka kep yoba pere pere ka bogl atne edigwa i, ene agiglnma kersre, ka i praiglkwa pamiwe di, yegl dugwa. 30 Abraham yegl dugwa ba yagl mige mere kan nogwa i di ikne ede, yegl dugwa, I ta kuno erekrabuka. Ba yoba goglkwa ta ede ikne pi ye meglmara pidre, ye ka di tenan, ye nomano yake tenaiglmiwe dugwa. 31 Yegl dugwa ba Abraham aglke kor dugwa, Ene agiglnma Moses kamo ya ka kep yoba pere pere kano i prikribi, yoba goglkwa ta ede ikne pi ye meglmara pidre, ka di tenan, ye pre mediglkraiglmiwe di, Abraham yegl dumiwe di, Jisas yegl dugwa.

Jisas ye kugl kide tau kugl wit bogl akie parikwa pre ka ebrie dugwa

24 Ana Jisas ye yoba makai si meglkwa i, ka ebrie ta ama di tedre, yegl dugwa, God yoba kingno mogl, suglno morabuka i pre ka ebrie yegl dinaglka. Yagl ta kugl wit mogo i pi ye makanmo mina suduglkwa. 25 Sudiglsre, ugl paugo, ye niglmo kogonmo yoba ama ugl paigwa. Ugl paigo, eduer i, kudamo ikne meglkwa i, kugl kide mogomo akie sudiglsre, ede eigwa. 26 Ana okuo kugl wit pare ede mitna pidre, mogo keglko, kanigwa i, kugl kide i ama akie paimedi kanigwa. 27 Makan nem yagl i niglmo kogonmo yoba kandre, u yegl di teigwa, Yagl kade yo, no prumga i, ene kugl mogo wakai i pi suduglnedi prumga. Ba siragl eruko, kugl kide tau mere suna parume? digwa. 28 Yegl digo, ye di ikne ede, yegl dugwa, Na kudana ikne ta moglkwa i, kugl kide mogo tau suduglkwa pamiwe dugwa. Yegl dugo, ye aglke kor yegl di prikwa, Yegl panan, no kugl kide i pru edinamno? di priko, 29 ye mane didre, Kanige erio dugwa. Kugl kide i pru edinamnedi eribi, kowai wit akie pru ede dinaiglmiwa. 30 Kanige eribi, wit denabuka igne, si yunaiglkwa yoba dedibo, enaiglkwa i, kugl kide komono kana si koglo sidre, doga mina garaiglkwa pre i pere edidre, wit mogo i pi yugugl makai simara edinaiglmiwe di, makan nem yagl i yegl dumiwe di, Jisas yegl dugwa.

Abai 10-pela kan lam ere gaiglkwa ka ebrie

1 Ana Jisas yegl didre, ka ta ama yegl dugwa, Ege i, God yoba kingno mogl, suglno morabuka i, yegl mere panabuka, Yagl kade ta abu inagledi bage ta pidre, eduer ede ikne unabuka mere yegl paugo, abai 10-pela ye unan, tegigl yenamnedi ken lamno idre, konbo bage sugl meglkwa. 2 Abai 10-pela eimara i, 5-pela nomano wakai paugo, 5-pela nomano wakai paikrukwa. 3 Ana abai 5-pela ye nomano wakai paikrukwa i, ye ken lamno idre, eigwa ba ye oliv nuglo tau suru i pikrikwa. 4 Yegl erikwa ba abai 5-pela ye nomano wakai paugwa i, ye ken lamno gagl idre, oliv nuglo tau suru idre, ede eigwa. 5 Ana abai 10-pela i, pi yagl abu yugwa ikra unan, tegigl yenamnedi sugl meglko, ye tabre ukrukwa pre ye ugl guko sidre, ugl paimiwe dugwa.

6 Ana abai 10-pela i, ugl paigo, eduer suna yoba ta agle didre, yegl dugwa, Ene adilo! Yagl ta abu yugwa ikra umiwa! Adigl tabre pi tegigl yeo! dugwa. 7 Yegl dugo, abai 10-pela mudu i, adiglsre, ye lamno ere wakai eriko, 8 abai 5-pela ye nomano wakai paikrukwa i, ye abai nomano wakai paugwa i, yegl di teigwa, No lamno goginamnedi erikwa pre ene oliv nuglo yuigwa i, tau suru norio digwa. 9 Yegl digwa ba abai nomano wakai paugwa i, ere mogl, yegl digwa, No oliv nuglo yumga i, ene pre ya no nono pre akie ta yukrumniwa. Ene ede pi yoba oliv nuglo topo beglmara pidre, topo sio digwa. 10 Yegl digo, ye oliv nuglo doko ede eigo, yagl ta abu yugwa ikra ugo, abai 5-pela ake kun ere meglkwa i, ye bogl akie kaya mokna podo keimara ede yugugl eigwa. Ede yugugl eigo, yagl i yugu dua yoguglkwa. 11 Dua yoguglko, abai 5-pela oliv nuglo dokidre, ikne u agle didre, yegl digwa, Yagl kade yo, yagl kade yo, no umniwa. Ene dua yauro noro! digwa. 12 Yegl digo, yagl i di ikne ede, yegl dugwa, Na ene kaima di teiga, na ene kankrika wimiwe dugwa. 13 Kuno yegl mere na aunake unaglka i, ene ege ya ade kwia pre kan erekrikwa pre kwi ere molo, di Jisas yegl dugwa.