As 10 parábolas mais importantes de Jesus

3 Kawalongela vinhu bwando mmahala.

"Mulimi kachola kuhanda mbeyu. 4 Viyakalile yozihanda, ziyagwe zilagalila mnzila, na ndege weza wazija. 5 Mbeyu ziyagwe zilagalila mmabwe kukalile na ulongo mdodo. Avo zota himahima kwavija ulongo ukala mdodo. 6 Ila zua vidilawile diilukuza imiche na kwavija mizizi yake haingile hasi ng’hani imiche inyala. 7 Mbeyu ziyagwe zilagalila mmizomola, imizomola ikula na kuizingiliza imiche. 8 Ila mbeyu ziyagwe zilagalila muulongo unogile, ziyagwe zilela mia, ziyagwe zilela malongo sita, na ziyagwe zilela malongo madatu. 9 Yali na magwiti na yahulike."

Hala da Msamalia Yali na Moyo Unogile

25 Abaho, mfundiza Malagizo ga Musa kakwenhuka behi na Yesu, kageza kumwikila kitega, kamuuza, "Mkulufunzi, nhende choni kileka ningile muugima wa digunge?"

26 Yesu kamulongela, "Nyandiko Zing’alile zolongaze? Gweye kozisomaze?"

27 Ija imunhu kedika, "Mnogele Mndewa Mulungu wako na moyo wako wose, na loho yako yose, na mhiko zako zose, na nzonzi zako zose, na mnogele munhu wa habehi nagwe kamba vuukiinogela mwenyego."

28 Yesu kamulongela, "Kulonga goya, tenda vino avo kokwingila muugima wa digunge."

29 Ila ija imfundiza Malagizo ga Musa kalonda kuilagusa kamba kakimanya kija chayakalile youza, kamuuza Yesu, "Munhu wa habehi yangu iyo yalihi?"

30 Yesu kamulongela, "Munhu imwe kakala yohumuluka kulawa Yelusalemu kachola Yeliko, mibokonyi im’vamhila, im’bokonya vinhu vake vose, abaho, wamtoa ng’hani, wamuleka behi na kudanganhika. 31 Baho kalawila mkulu wa nhambiko imwe kahumuluka mnzila ija, viyamuwene ija imunhu, kakuluguta, kagendelela na mwanza wake. 32 Vivija mnzila ija kabita Mulawi, kamkwenhukila, kamulola, abaho, kakuluguta, kagendelela na mwanza wake. 33 Ila Msamalia yakalile yobita nzila ija kavika hayali munhu ija, viyamuwene, kamonela bazi. 34 Kamkwenhukila, kamgela mavuta na divai m’vilonda vake, na kumfungiliza ivilonda, abaho, kamkweleza mkihongwe wake kamgala kung’anda ya wahenza kumuguza. 35 Imitondo iyagwe kalava vidanga vibili va hela, kamgwelela ija imwimilizi wa ing’anda ya wahenza. Kamulongela, ‘Muguze, nihabwela, nokuliha kinhu chochose chuulavile sama yake.’ "

36 Baho Yesu kalonga, "Kokonaze, yalihi muwanhu wano wadatu yali munhu wa habehi wa munhu ija yavamhilwe na mibokonyi?"

37 Ija imfundiza Malagizo ga Musa kamwidika, "Ija yamonele bazi."

Yesu kalonga, "Genda ukatende kamba avo."

4 "Tutende munhu imwe mmwanza wenu kana ng’hondolo mia, abaho, ng’hondolo imwe kapotela, kotendaze? Kowaleka waja iwang’hondolo malongo tisa na tisa muluwala na kuchola kumzahila ija yapotele mbaka yamone. 5 Yahamona, kodeng’helela ng’hani avo kompapa mmaega 6 na kum’bweza ukae. Abaho, kowakema hamoja wambwiga zake na wanhu wa mzing’anda za habehi na kuwalongela, ‘Nodeng’ha ng’hani kwavija nimona ng’hondolo wangu yapotele, avo izoni tudeng’he chose!’ 7 Avo nowalongela, kowa na ndeng’helelo ng’hulu kuulanga avija munhu imwe yali na vilozo yahaleka vilozo vake, kubanza wanhu malongo tisa na tisa walibule vilozo na hawalonda kuleka vilozo vao.

Hala da Mwana Yapotele

11 Yesu kagendelela kulonga, "Kukala na munhu imwe yakalile na wana wabili wambigalo. 12 Imdodo kamulongela tataake, ‘Tata, ngwelela uhazi wangu sambisambi.’ Avo ija imunhu kawagolela mali gake wanage wose wabili. 13 Mkipigiti kiguhi ija imwanage imdodo kaguza vinhu vake vose, kasegela hakae na izihela. Kachola isi ya kutali, ako kwayasile hela zake mmbuli za mzanyamzanya. 14 Viyamambukize vinhu vose, ingila nzala mpamanho muisi ija yose, avo kasonga kuzahila vinhu vakuja. 15 Avo kachola kusang’hanika ha munhu imwe mwenekae wa isi ija, na heyo kamgala kumgunda wake yakemilize mitumbi. 16 Kasulukila kuigutiza na mikamhi iidile imitumbi, na haduhu munhu yamgwelele kinhu chochose. 17 Ngelegeza zinogile vuzimwizile, kalonga mmoyo wake, ‘Wasang’hana wangahi wa tataangu woja na kusigaza, ila nie hano nofa nzala! 18 Nosegela nibweleganye ha tataangu nikamulongele, "Tata, niloza ha Mulungu na hamwako gweye. 19 Silumbile kukemigwa mwanago, nitende kamba vija imwe wa wasang’hana zako." ’ 20 Avo kenuka na kusonga kubwela ha tataake.

"Viyakalile yang’hali kutali, tataake kamona, kamonela bazi, avo kamkimbilila, abaho, kamkumbatila na kumnonela. 21 Ija imwana kalonga, ‘Tata, niloza ha Mulungu na hamwako gweye. Silumbile kukemigwa mwanago.’ 22 Ila tataake kawakema nyakadala zake, kalonga, ‘Hima mgalileni ng’hanzu inogile mum’vaze. M’vazeni kitindi mkidole chake na vilatu mmagulu gake. 23 Abaho, gendeni mkamsole mwanang’ombe yanonile mumchinje, na tutende lusona, tudeng’he! 24 Kwavija mwanangu ino kakala kamba yadanganhike, ila sambi mgima, kakala yapotele, ila sambi koneka!’ Avo lusona lusonga.

25 "Kipigiti kikija mwanage imkulu kakala yobwela kulawa kumgunda, mnzila viyakalile behi na ing’anda, kahulika ngoma na sing’hino za mvina. 26 Avo kamkema imwe wa nyakadala, kamuuza, ‘Kuna choni?’ 27 Ija inyakadala kamulongela, ‘Mdodo wako kabwela, na tataako kachinja mwanang’ombe yanonile kwavija kabwela yali mpile.’

28 "Ija imwana imkulu kagevuzika ng’hani mbaka kalema kwingila mng’anda. Avo tataake kalawa hanze kamuyalalila yomulonda yengile mng’anda. 29 Ila heyo kamulongela tataake, ‘Lola! Milao ino yose nikusang’hanikila sang’hano zako kamba nyakadala, na siduluke ndagizi zako zozose. Kungwelela choni? Hungwelele hata menhe mdodo nhende lusona na wambwiga zangu! 30 Ila mwanago ino kasa mali gako gose mkutenda ugoni ndwanga, abaho, kabwela ukae, komchinjila mwanang’ombe yanonile!’ 31 Tataake kamulongela, ‘Mwanangu, gweye kokala hano na nie mazua gose, na vinhu vose vinilinavo nie vako gweye. 32 Avo vinoga tweye tuvine na kudeng’ha kwavija mdodo wako kakala kamba yadanganhike, ila sambi mgima. Kakala yapotele, ila sambi koneka!’ "

Hala da Lulu

45 "Vivija, Undewa wa Kuulanga ulinga na mchuluzi yozahila lulu zinogile, 46 na viyaiwene lulu imwe ya hela bwando, kachola na kuguza vinhu vake vose viyalinavo, na kuigula.

Hala da Mfalisayo na Muwila Kodi

9 Vivija Yesu kawalongela hala dino wanhu wokiiyona kamba hewo iwo iwende na kuwabeza wayagwe. 10 "Wanhu wabili wakwela wachola Kung’anda ya Mulungu kutambika, imwe kakala Mfalisayo na imwe muwila kodi.

11 "Ija Mfalisayo kaibagula kema yeiyeka katambika yolonga, ‘Nokuheweza, Mulungu, kwavija nie sili kamba wanhu wayagwe, mibokonyi ama vizenzeleganye ama wagoni ama kamba ino muwila kodi. 12 Nofunga mianza mibili mmazua saba, nolava zaka m’vinhu vangu vose vinipata.’

13 "Ila ija imuwila kodi kema kutali na hadahile hata kwinula kihanga chake kuulanga, kaitoatoa mmhambaga kulagusa giogio na kulonga, ‘Go Mulungu, nyonela bazi, nie nili na vilozo.’ " 14 Yesu kawalongela, "Ija imuwila kodi kabwela ukae yopetigwa kutenda gamnogele Mulungu kubanza ija Imfalisayo. Kwavija munhu yoyose yokiinula mwenyego kohumuluswa, na ija yoihumulusa mwenyego kokwinuligwa."

Hala da Watumigwa Wadatu

14 "Kipigiti kija Undewa wa Kuulanga wolinga na munhu yochola mwanza, kawakema watumigwa zake na kuwatenda wemilizi wa vinhu vake. 15 Kila munhu kagweleligwa kulingana na vija viyadahile, imwe kagweleligwa talanta* tano na iyagwe talanta mbili na iyagwe talanta imwe. Abaho, ija imunhu kachola mwanza wake. 16 Ija imtumigwa yagweleligwe talanta tano, baho kachola kuzitendela uchuluzi talanta zake, na kapata talanta tano ziyagwe. 17 Vivija na ija yagweleligwe talanta mbili, kapata talanta mbili ziyagwe. 18 Ila ija imtumigwa yagweleligwe talanta imwe, kachola kuhimba lwingila, abaho, kaifisa italanta ya mndewa wake.

19 "Vikibitile kipigiti kitali, ija imndewa wa waja iwatumigwa kabwela na kutenda mheta ya talanta zao. 20 Ija imtumigwa yagweleligwe talanta tano, kagala talanta tano ziyagwe, kalonga, ‘Mndewa, kunigwela talanta tano, hano hana talanta tano ziyagwe zinipatile!’ 21 Mndewa wake kamulongela, ‘Kutenda goya mtumigwa unogile na ulibule uzenzeleganye! Na kwavija hutendile uzenzeleganye m’vinhu vidodo, avo nokutenda uwe mwimilizi wa vinhu bwando. Izo udeng’he hamoja na nie, mndewa wako!’

22 "Vivija na ija imtumigwa yagweleligwe talanta mbili keza kalonga, ‘Mndewa, kunigwelela talanta mbili, hano hana talanta mbili ziyagwe zinipatile.’ 23 Mndewa wake kamulongela, ‘Kutenda goya mtumigwa unogile na ulibule uzenzeleganye! Na kwavija hutendile uzenzeleganye m’vinhu vidodo, avo nokutenda uwe mwimilizi wa vinhu bwando. Izo udeng’he hamoja na nie, mndewa wako!’

24 "Abaho, ija imtumigwa yagweleligwe talanta imwe keza kalonga, ‘Mndewa, nivitanga kamba gweye kwa munhu mdala, kohuna vija huvihandile, na kokunzanya haja haulekile kumiza mbeyu. 25 Avo nidumba, nichola kuifisa talanta yako hasi muisi. Avo talanta yako ino hano.’

26 "Mndewa wake kamulongela, ‘Gweye mtumigwa mwavu na mkoka! Kuvitanga kamba nie nohuna vija sivihandile na nokunzanya haja hanilekile kumiza? 27 Kulondigwa talanta yangu ukaike benki, vinibwelile nihaivikile talanta yangu na kija chongezeke. 28 Avo, m’bokeni italanta, abaho, mumgwelele ija imtumigwa yali na talanta longo dimwe. 29 Kwavija munhu yali na kinhu kokongezelwa, na kowa navo bwando. Ila munhu yalibule kinhu, hata kija ikidodo chayalinacho kobokigwa. 30 Ino mtumigwa mwavu, mwaseni hanze hana diziza. Ako kowa na kililo na kugegedula meno.’

Mgoli na Lazalo

19 "Kukala na munhu imwe mgoli yakalile yovala vivalo va zambalau vene hela bwando na kakala yoja goya mazua gose. 20 Vivija kukala na munhu imwe mkumbulu yokemigwa Lazalo, yakalile na vilonda lukuli lugima, yakalile yogaligwa halwivi lwa ija imgoli, 21 yosulukila kuja vakuja vilagale kulawa hameza ya ija imgoli. Hata mibwa iza kumulambita vilonda vake.

22 "Hakimambukizo, ija imkumbulu kadanganhika, kapapigwa na wasenga wa Mulungu wa kuulanga kekigwa behibehi na Ablaham. Vivija ija imgoli na heyo kadanganhika na kazikigwa. 23 Avo akuja kuzimu ija imgoli kakala mumgayo mkulu ng’hani, kenula meso gake hatalitali kamona Ablaham na Lazalo hamgwazo wake. 24 Avo kenula dizwi yolonga, ‘Tata Ablaham! Nyonela bazi, mulongele Lazalo yazabike kidole chake mmazi yaluhoze lulimi lwangu, kwavija nie na mumgayo mkulu mmoto uno!’

25 "Ila Ablaham kamulongela, ‘Kumbukila tanhu, mwanangu, vuukalile muulumwengu kugweleligwa vinhu vose vinogile, ila Lazalo kagweleligwa vinhu vose vihile. Ila sambi kohozigwa moyo na gweye kogaya. 26 Uhaleka gose gano, hana kolongo kulu dikigwe hagatigati yetu mweye na tweye, giladi waja wolonda kuloka kulawa hano kwiza hamwenu sambiwadahe, na munhu yoyose yolonda kuloka kulawa hiko kwiza kuno sambiyadahe.’ 27 Ija imgoli kalonga, ‘Basi, tata Ablaham, nokuyalalila, mulagize Lazalo yachole kung’anda ya tataangu, 28 hiko kuna ndugu zangu watano, yakawazume, giladi sambiweze kuno kuli na mgayo!’

29 "Ila Ablaham kamulongela, ‘Wandugu zako wana Malagizo ga Musa na Nyandiko Zing’alile za wahokozi, waleke wazitegeleze hizo vuzilonga.’ 30 Ija imgoli kalonga, ‘Hivo havitosha, tata Ablaham! Ila munhu yahazuka na kuwacholela, woleka vilozo vao.’ 31 Ila Ablaham kalonga, ‘Kamba hawazitegeleze Nyandiko za Musa na wahokozi, hawatogola hata kamba munhu yahazuka.’ "

Hala da Lolo

24 Yesu kawalongela hala diyagwe, "Undewa wa Kuulanga ulinga na munhu yahandile mbeyu inogile mumgunda wake. 25 Ila wanhu wose viwakalile wawasile, mdumuka wake keza kahanda lolo muingano, abaho, kachola. 26 Ija ingano viyotile na kusonga kufumula, idilolo disonga koneka. 27 Nyakadala wa ija mwene mgunda keza kamulongela, ‘Mndewa, huhandile mbeyu zinogile mumgunda wako? Dilolo dilawa kwahi?’ 28 Kamwidika, kamulongela, ‘Mdumuka iyo yatendile vino.’ Abaho, ija inyakadala kamuuza, ‘Kolonda tweye tuchole tukading’ole dilolo?’ 29 Kamulongela, ‘Bule, kwavija kipigiti vondamding’ole dilolo, moding’ola hamoja na ingano. 30 Leka ingano na idilolo vose vikule hamoja mbaka kipigiti cha kuhuna. Na kipigiti hicho nowalongela wahunaji, tanhu dilundizeni idilolo, mdifunge makinzamakinza mkadisome moto, abaho, ilundizeni ingano mkaike kukano jangu.’ "

Hala da Wandele Longo Dimwe

1 "Kipigiti kija Undewa wa Kuulanga wolinga na wandele longo dimwe wasolile viwenge vao na kuchola kum’bokela mulawilamhambe. 2 Wandele watano wakala wabozi na watano wakala wabala. 3 Waja iwabozi wasola viwenge vao, bila kugela mavuta mgati yake. 4 Ila waja iwabala wasola viwenge vao hamoja na via va mavuta. 5 Kwavija mulawilamhambe kakawa kwiza, wose wakukila na kuwasa.

6 "Kilo kikulu kukala na nyangi, ‘Mulawilamhambe kavika! Laweni mkam’bokele!’ 7 Abaho, waja iwandele wose walamuka na kuvigongomanya viwenge vao. 8 Abaho, waja iwabozi wawalongela waja iwabala, ‘Tugweleleni mavuta genu, kwavija viwenge vetu vofa.’ 9 Waja iwabala wawalongela, ‘Hagatutosha tweye na mweye. Ila gendeni ha wachuluzi mkagule.’ 10 Viwakalile mnzila wochola kugula mavuta, mulawilamhambe kavika. Na waja watano wakalile waisasale wengila hamoja nayo mulusona lwa zengele, abaho, lwivi luhindigwa.

11 "Kipigiti waja iwandele wabozi viwezile, wakemelela, walonga, ‘Mndewa, Mndewa! Tuvugulile!’ 12 Mulawilamhambe kawalongela, ‘Nowalongela ikweli! Siwatanga mweye.’

13 "Avo, goneleleni, kwavija hamditanga zua ama saa yondanibweleganye.