As 10 parábolas mais importantes de Jesus

3 Kawalongela mbuli nyingi kwa simo.

"Kukala na munhu kachola kuhanda mbeyu. 4 Viyakalile komiza, mbeyu ziyagwe zilagalila mnzila, ndege weza na kuzija. 5 Ziyagwe zilagalila mgamabwe hakalile na udongo mdodo. Zota himahima kwavija udongo ukala mdodo. 6 Lakini zuwa vidilawile, mimea inyala kwavija imizizi haingile hasi. 7 Mbeyu ziyagwe zilagalila mvisolo va miba, miba ayo ikula na kuizonga imimea. 8 Lakini mbeyu ziyagwe zilagalila hanhu heli na udongo unogile, zota zikula na kulela mbeyu nyingi kubanza zija zihandigwe, ziyagwe zilela gana dimoja, ziyagwe zilela malongo sita, na ziyagwe malongo madatu."

9 Yesu kamambukiza kwa kulonga, "Munhu yeli na magwiti yahulike."

Lusimo lwa Msamalia yanogile

25 Munhu imoja yagajuwile goya Malagizo ga Musa, kachola kwa Yesu yamgeze. Avo kamuuza, "Mfundiza, vino nhende choni niupate ugima wa milele?"

26 Yesu kamwidika, "Vino, Malagizo golongaze na gweye kogajuwaze?"

27 Munhu ija kamwidika, " ‘Mnogele Mndewa Imulungu wako kwa moyo wako wose, na kwa loho yako yose, na kwa nguvu zako zose, na kwa nzewele zako zose,’ na ‘Umnogele miyago kamba viuinogela mwenyego.’ "

28 Yesu kamwidika, "Kulonga goya, tenda vivo na gweye kokuwa na ugima."

29 Lakini munhu ija kalonda kuilagusa kamba kanoga, avo kamuuza Yesu, "Vino miyangu ayo nani?"

30 Yesu kamwidika, "Munhu imoja kakala kolawa Yelusalemu kochola Yeliko. Mnzila, wabavi wamgoga, wamboka vinhu vake, na kumtowa, wamuleka habehi na kufa. 31 Abaho mulava nhosa imoja kakala yohumuluka kubitila nzila iija. Viyamone, kainega, kabitila kumgwazo. 32 Vivija Mlawi imoja viyavikile aho, kamulola munhu ija, nayo kainega, kabitila kumgwazo. 33 Lakini Msamalia imoja yakalile muumwanza kavika aho hayakalile munhu ija. Nayo viyamone, kamonela bazi. 34 Kamcholela, kamgela mavuta na divai mna ivilonda vake na kavifunga goya. Abaho kamkweza mumgongo wa kihongwe wake, kamgala mbaka kuna ing’anda ya wageni na kumulolesa goya. 35 Imitondo yake kalava sente kamgwaa mwene ng’anda, kamulongela, ‘Mulolese goya munhu ino. Chochose chonda umsang’hanile, nahabwela nokugwaa fungu jako.’ "

36 Abaho Yesu kamuuza, "Viukona gweye, mna iwanhu awo wadatu, nani yakalile miyage munhu ija yatoigwe na wabavi?"

37 Munhu ija kamwidika, "Ija yamonele bazi."

Yesu kamulongela, "Na gweye genda ukatende vivo."

4 "Vino kamba imoja wenu kana ng’hondolo gana, abaho ng’hondolo imoja kapotela, vino kotenda choni? Kowaleka waja malongo tisa na tisa kuluwala, na kuchola kumzahila ija yapotele mbaka yampate. 5 Yahampata, kodeng’helela na kumwika mmaega gake, 6 na kumgala ukae. Abaho kowakema hamoja mbwiga zake na wanhu weli behi nayo na kowalongela, ‘Miyenu nodeng’helela kwavija nimpata ng’hondolo wangu yapotele. Avo tudeng’helele hamoja!’ 7 Nowalongela, avo vonda iwe, hokuwa na ndeng’helelo ng’hulu kuulanga mbuli ya munhu imoja mwene nzambi yahaleka nzambi zake, kubanza waja malongo tisa na tisa ogesa wanoga na hawalonda kuzileka nzambi zao."

Lusimo lwa mwana yapotele

11 Yesu kagendelela kulonga, "Kukala na munhu imoja yakalile na wana wabili. 12 Ija imdodo kamulongela tatake, ‘Tata, nigwelele uhazi wangu sambi.’ Avo munhu ija kawagolela uhazi wao wanage awo wabili. 13 Hazibitile siku nyingi, ija imdodo kachuuza uhazi wake. Abaho kafunga mwanza na sente ziyapatile, kachola isi ya kutali, ako kazinanga sente zose ziyapatile. 14 Kamambukiza kila kinhu kiyakalile nacho. Abaho lufilili lwa nzala lulawilila mwiisi ija, nayo kakala kabule kinhu chochose kisigale. 15 Avo kachola kusang’hana kibaluwa kwa munhu imoja wa isi ija, munhu ayo kamtuma mumgunda wake yasusile nguluwe. 16 Kakala kosulukila kuja maganda gawadile nguluwe, lakini kuduhu munhu yamgwelele kinhu chochose chakuja. 17 Abaho kagelegeza na kulonga, ‘Tatangu kana wasang’hanaji wengi, oja mbaka osigaza na niye hano nofa na nzala! 18 Nosegela na kuchola kwa tatangu na kumulongela, Tata, nimtenda Imulungu nzambi, na vivija nikutendela gweye nzambi. 19 Sifaya kukemigwa mwanago. Nhende kamba imoja wa wasang’hanaji zako.’ 20 Avo kafunga mwanza wa kubwela kwa tatake.

"Viyakalile yang’hali kutali, tatake kamona. Kamonela bazi mwanage, avo kamkimbilila, kamuhagatila na kamnonela. 21 Mwanage kamulongela, ‘Tata, nimtenda Imulungu nzambi, na vivija nikutendela gweye. Sifaya kukemigwa mwanago.’ 22 Lakini tatake kawakema wasang’hanaji zake. Kawalongela, ‘Lopoleni! Galeni kiwalo kinogile mumvaze. Mvazeni pete mkidole chake na vilatu mmagulu gake. 23 Abaho choleni mdigale bofu da ng’ombe dinonile mudichinje, wose tuje na kudeng’helela! 24 Kwavija mwanangu ino kakala yafile lakini sambi mgima. Kakala yapotele lakini sambi koneka.’ Avo wasonga kudeng’helela.

25 "Kipindi acho mwanage imkulu kakala kumgunda. Viyakalile behi na ing’anda, kahulika nyila na wanhu ocheza. 26 Avo kamkema msang’hanaji imoja, kamuuza, ‘Ako kuna choni?’ 27 Msang’hanaji ayo kamwidika, ‘Mdodo wako kabwela ukae, na tatako kamchinjila bofu da ng’ombe dinonile, kwavija kabwela mgima!’

28 "Ija imwana mkulu kagevuzika ng’hani, avo kalema kwingila mng’anda. Tatake kalawa kunze na kumpula yengile mng’anda. 29 Lakini kamwidika tatake, ‘Lola, miyaka yose ino niye nokusang’hanila kamba msang’hanaji, na silemile lagizo jako jojose. Kungwaa choni? Hunigwelele hata mbuzi nideng’helele na mbwiga zangu! 30 Lakini mwanago ino kananga vinhu vako mbuli ya ugoni, na viyabwelile ukae kumchinjila bofu da ng’ombe dinonile!’ 31 Tatake kamwidika, ‘Mwanangu, kipindi chose kukala na niye, na vinhu vose vinilinavo vako. 32 Lakini tolondigwa tudeng’helele na kusekelela, kwavija mdodo wako kakala yafile lakini sambi mgima, kakala yapotele lakini sambi koneka!’ "

Lusimo lwa lulu

45 "Vivija Undewa wa Imulungu uigala na munhu yozahila lulu inogile, 46 viyaiyonile lulu imoja inogile ng’hani, kachola na kuuza kila kinhu kiyalinacho, ili yaigule lulu ayo."

Lusimo lwa Mfalisayo na mbokela kodi

9 Abaho Yesu kawalongela lusimo luno wanhu waja wakalile oitapa wanoga na kuwabeza wayagwe. 10 "Kukala na wanhu wabili wacholile kumpula Imulungu kuna Ing’anda ya Imulungu. Imoja kakala Mfalisayo na iyagwe kakala mbokela kodi.

11 "Mfalisayo ayo kainega kumgwazo na kumpula Imulungu, ‘Go Imulungu, nokugwaa nhogolwa kwavija niye sili kamba wanhu wayagwe, wabokaji, otenda gehile, hebu wagoni. Wala sili kamba ino mbokela kodi. 12 Niye nofunga kuja miyanza mibili mzisiku saba, na nolava fungu da longo da vinhu vangu vose vinipata!’

13 "Lakini ija mbokela kodi kema kutali, hadahile hata kwinula meso gake kuulanga, lakini kaitowa mhambaga yake kwa usungu, kalonga, ‘Go Imulungu, nyonele bazi, niye na mwene nzambi!’ 14 Nowalongela, mbokela kodi ija kachola ukae kumwake kuno katendigwa kanoga mgameso ga Imulungu kubanza ija Mfalisayo. Kwavija wose oitenda wanhu wakulu ohumulusigwa, na waja oihumulusa otendigwa wanhu wakulu."

Lusimo lwa wasang’hanaji wadatu

14 "Vivija Undewa wa kuulanga uigala na kija kilawilile kwa munhu imoja yafungile mwanza, kawakema wasang’hanaji zake kaweka walole goya vinhu vake. 15 Kila imoja kamgwaa kamba viyadahile, imoja kamgwaa mifuko mitano ya sente, iyagwe kamgwaa mifuko mibili ya sente, na iyagwe kamgwaa mfuko umoja wa sente. Abaho kachola mwanza wake. 16 Msang’hanaji yagweleligwe mifuko mitano ya sente kachola kazisang’hanila zisente kapata mifuko mitano iyagwe ya sente. 17 Vivija msang’hanaji yagweleligwe mifuko mibili ya sente kazisang’hanila na kupata mifuko mibili iyagwe ya sente. 18 Lakini msang’hanaji yagweleligwe mfuko umoja wa sente, kachola kauhimbila mfuko wa sente wa mkulu wake.

19 "Vizibitile siku nyingi mkulu wao awo iwasang’hanaji kabwela kapeta zisente hamoja nao. 20 Msang’hanaji yagweleligwe mifuko mitano ya sente keza kagala mifuko mitano iyagwe ya sente, kalonga, ‘Go mkulu, kunigwaa mifuko mitano ya sente, lola mhata mifuko mitano iyagwe.’ 21 Mkulu wake kalonga, ‘Kutenda goya, msang’hanaji unogile na utamaniligwa! Kwavija kotamaniligwa kwa kulolesa vinhu vidodo, avo nokwika ulolese vinhu vingi. Wize udeng’helele hamoja na niye!’

22 "Abaho msang’hanaji ija yagweleligwe mifuko mibili ya sente keza kalonga, ‘Go mkulu, kunigwaa mifuko mibili ya sente, lola mhata mifuko mibili iyagwe.’ 23 Mkulu wake kalonga, ‘Kutenda goya, msang’hanaji unogile na utamaniligwa! Kwavija kotamaniligwa kwa kulolesa vinhu vidodo, avo nokwika ulolese vinhu vingi. Wize udeng’helele hamoja na niye!’

24 "Abaho msang’hanaji ija yabokele mfuko umoja wa sente keza, kalonga, ‘Go mkulu, nikujuwa gweye kuna gahigahi, kosenga hanhu huhahandile, kokwika hamoja indiya hanhu huhamizile mbeyu. 25 Avo nidumba, nyhola niuhimbila mfuko wako wa sente. Lola, uno awo mfuko wako wa sente.’

26 "Mkulu wake kamwidika, ‘Gweye kwa msang’hanaji wihile na mnyeke! Ona, kujuwa nosenga hanhu sihahandile na kwika hamoja hanhu sihamizile mbeyu. 27 Wahawikile mfuko wangu wa sente kwa iwanhu okwika sente, ili vonda mbwele na niye nyambulile faida. 28 Sambi baha, mbokeni umfuko wa sente mumgwee ayo yeli na mifuko longo ya sente. 29 Kwavija munhu yoyose yeli na kinhu kokongezelwa, lakini ija yelibule kinhu, kobokigwa hata kija kidodo kiyelinacho. 30 Na msang’hanaji ino yehile mwaseni kunze kudiziza, ako kolila na kudafuna meno.’

Munhu tajili na Lazalo

19 "Kukala na tajili imoja yavalile viwalo va sente nyingi ng’hani na kuja goya kila siku. 20 Vivija kukala na munhu imoja mkiwa yakemigwe Lazalo, kamema vilonda lukuli lose, kakala yokwikigwa muulwivi lwa tajili ija. 21 Lazalo kakala yosulukila kuja vilagale muimeza ya tajili ayo. Na umbwa wakala okwiza na kumulambita mvilonda vake.

22 "Abaho mkiwa ija kafa na kasoligwa na wasenga wa kuulanga mbaka behi ya Abulahamu. Tajili ayo nayo kafa na kazikigwa. 23 Ako kowochola wanhu wafile, kakala kodununzika ng’hani. Kenula meso gake, kamona Abulahamu kwa kutali na Lazalo kakala behi yake. 24 Avo kamkema kwa sauti ng’hulu, ‘Tata Abulahamu! Nyonele bazi! Mtume Lazalo yazabike kidole chake mgamazi, yaluhoze lulimi lwangu, kwavija nogaya ng’hani muumoto uno!’

25 "Lakini Abulahamu kamulongela, ‘Mwanangu, kumbuka muugima wako kubokela vinhu vinogile, nayo Lazalo kabokela vihile. Lakini sambi Lazalo kobwihila, na gweye kodununzika. 26 Hata avo, hagati yetu siye na mweye hekigwa kolombo kulu, ili munhu yolonda kuloka kulawa kuno kwiza kumwenu sikuyadahe, hebu munhu yoyose kulawa kumwenu sikuyaloke kwiza kumwetu!’ 27 Tajili ija kalonga, ‘Nokupula gweye, tata Abulahamu, umtume Lazalo kuna ikae ya tatangu, 28 ako kuna ndugu zangu watano. Muleke yachole yakawazume ili sikuweze hanhu hano ha kudununzika!’

29 "Abulahamu kalonga, ‘Ndugu zako wanago maandiko ga Musa na ga watula ndagu wa Imulungu ga kuwazuma. Wawategeleze wao kiwolonga!’ 30 Tajili ija kamwidika, ‘Bule tata Abulahamu! Lakini kamba munhu yahazilibuka kulawa kwa wafile na kuwacholela, baho ozileka nzambi zao!’ 31 Lakini Abulahamu kamulongela, ‘Kamba hawagagoga maandiko ga Musa na watula ndagu wa Imulungu, honda wategeleze hata kamba munhu yahazilibuka kulawa kwa wafile!’ "

Lusimo lwa sani

24 Yesu kawalongela lusimo luyagwe, "Undewa wa kuulanga uigala na gaja galawilile kwa munhu yahandile mbeyu inogile mumgunda wake. 25 Kilo kimoja, wanhu viwawasile, munhu yamwihile keza na kuhanda sani hagati ya uhemba abaho kasegela. 26 Uhemba viukulile na kusonga kuzamiza, sani nayo yoneka. 27 Wasang’hanaji zake wamgendela wamulongela, ‘Go mkulu, gweye kuhanda mbeyu inogile mumgunda wako. Lelo sani ilawa kwahi?’ 28 Mkulu ayo kawedika, ‘Ija yanihile heyo yatendile vivo.’ Wamuuza, ‘Kolonda tuchole tukaing’ole isani?’ 29 Kawedika, ‘Bule, kwavija mwahang’ola sani modaha kung’ola na uuhemba. 30 Lekeni uhemba na sani vikule hamoja mbaka kipindi cha kusenga. Baho nowalongela wasengaji wasonge kuikanha isani na kuifunga makinza na kuisoma moto, abaho wausole uhemba na wawike kukanho jangu.’ "

Lusimo lwa wali longo

1 "Undewa wa kuulanga oigala na kija kilawilile kwa wali longo wasolile taa zao na kuchola kumbokela munhu yosola. 2 Wali watano wakala wabozi na watano wakala wabala. 3 Waja iwabozi wasola taa zao, lakini hawasolile ngama yoyose ya mavuta. 4 Waja iwabala wasola nyhupa zimemile za mavuta hamoja na taa zao. 5 Munhu yosola viyakawile kwiza, wali wose wasonga kukukila na wawasa.

6 "Kilo kikulu, kulawilila nyangi, ‘Msola mwehe kavika! Laweni mukambokele!’ 7 Wali wose walamuka wazitanda taa zao. 8 Waja iwabozi wawalongela waja iwabala, ‘Mtuhunguzile mavuta genu kidogo kwavija taa zetu zolonda kufa.’ 9 Lakini waja iwabala wawedika, ‘Bule, twabule mavuta gakutwenela siye na mweye. Vinoga muchole mkagule genu.’ 10 Avo waja iwabozi wachola kugula mavuta, viwakalile ochola, munhu yosola kavika. Waja watano waitandile wengila nayo mna ing’anda ya dizengele, lwivi luhindigwa.

11 "Kumwande kidogo waja iwali wabozi wavika, wasonga kukemelela, ‘Go mkulu, go mkulu! Tuvugulile!’ 12 Ayo yosola kawedika, ‘Bule! Niye siwajuwile bule mweye.’ "

13 Yesu kamambukiza kwa kulonga, "Muiteganye, kwavija hamuijuwile siku hebu saa.