As 10 parábolas mais importantes de Jesus

3 Yesu kawalongela mbuli nyingi kwa masimwe,

"Kukala na muhandi yoyahitile kuhanda mbeyu. 4 Viyakalile komiza, mbeyu zimwenga zilagalila habehi na inzila, na ndege weza wazidomola 5 Mbeyu zimwenga zilagalila hana uluwe, hohakalile na ulongo chidogo. Zimbeyu zota himahima, kwaviya ulongo haugendelele hasi bule. 6 Mbali zuwa vidilawile, zimbeyu zilungula kwaviya mizizi yake haitile hasi ng’hani, na zuwa vidilawile inyala na ifa. 7 Mbeyu zimwenga zilagalila muna imiwa na miwa ikula na iibana. 8 Mbali mbeyu zimwenga zilagalila muna ichisangamhanya na zilela imwe gana na imwenga malongo sita na imwenga malongo matatu."

9 Yesu kakomelezela kulonga, "Yeli na magutwi ya kuhulika nayahulike."

Simwe da Msamaliya yanogile

25 Hamwande mfundiza Malagilizo keza kwa Yesu muladi yamgeze, kamuuza, "Mfundiza, vino nitende choni niupate ugima wa siku zose?"

26 Yesu kamwidika, "Vino malagilizo yolongaze? Weye koyamanyaze?"

27 Munhu ija kamwidika, "Mulonde Mndewa Mulungu wako kwa moyo wako wose na kwa muhe wako wose na kwa ludabwa lwawo lose, na kwa nzewele zako zose. Mulonde mkaya miyago fana vouilonda mwenyewo."

28 Yesu kamwidika, "Kwidika goya. Tenda ivo na weye kwizakuwa mgima."

29 Mbali munhu ija kalonda kulagusa kanoga, ivo kamuuza Yesu, "Mkaya miyangu iyo yelihi?"

30 Yesu kamwidika, "Kukala na munhu imwe yoyalawile Yelusalemu kuhita Yeliko. Wabavi wamgwila, wambawila vinhu vake, wamtowa na wamuleka habehi na kudanganika. 31 Baho kalawilila mkulu wa nhambiko kofosa muna inzila ija, mbali viyamuwone munhu ija yoyatowigwe, kagwaza. 32 Iviya na Mulawi viyafosile haja na kumuwona munhu yoyatowigwe, nayo kagwaza. 33 Mbali Msamaliya imwe yoyakalile kofosa nzila ija kamfika munhu ija. Viyamuwone, kamuwonela ubazi. 34 Kamkwenhukila habehi, kamfunga malonda yake na kuyaguma mavuta na divai. Maabaho kamkweza mchanyha ya chihogwe wake, kamgala mbaka kwiikaye ya wageni na kamwimiliza. 35 Siku disondelele Msamaliya ija kamwing’ha dinali mbili mkulu wa mwene kaye ya wageni. Maabaho kamulongela, ‘Mkalize munhu ino. Hondanibwele nizakuliha chochose chousang’hanile.’ "

36 Maabaho Yesu kamuuza munhu ija, "Vino mwa iwanhu waja iwatatu, yelihi yakalile mkaya miyage ija yatowigwe na wabavi?"

37 Nayo kedika, "Ni ija yoyamuwonele ubazi."

Yesu kamulongela, "Hita, na ukatende ivo ivo."

4 "Vino munhu yelihi kumwenu mwene ng’hondolo gana, ng’hondolo imwe yahaga, hawaleka waja malongo kenda na kenda hanhu ha kudimila, na kuhita kunzahila ija yoyagile mbaka yamuwone? 5 Na yahamuwona kezadeng’helela na kumwika mmayega yake, 6 na kumgala ukaye. Maabaho kezawatanga mambwiya zake na wakaya wayage na kuwalongela, ‘Deng’heleleni hamwe na niye, kwaviya nimuwona ng’hondolo wangu yagile.’ 7 Iviya nowalongelani, kwizakuwa na deng’ho kulu kuulanga kwa ichimu cha munhu imwe mwene uhasanyi yoyosamha kufosa wanhu malongo kenda na kenda wanogile wohawalonda kusamha."

Simwe da mbwanga yagile

11 Yesu kagendelela kuwalongela, "Kukala na munhu imwe yoyakalile na wana waidi wa chilume. 12 Mbwanga imdodo kamulongela tati yake, ‘Tata, ning’he vinhu vangu va uhazi sambi.’ Ivo tata ija kawagolela vinhu vake sawa sawa wabwanga waja waidi. 13 Viyafosile siku ndodo, mbwanga imdodo kagula vinhu vake. Maabaho kahita isi ya kutali, uko kadanganya hela zake kwa kusang’hanila chakachaka. 14 Viyakomeleze kudanganya chila chinhu, kulawilila nzala ng’hulu mwiisi ija, nayo kakala kabule chinhu chochose. 15 Ivo kahita kusang’hana usang’hano kwa munhu imwe yoyakalile mkaya wa isi ija, nayo kamgala kumgunda yakawadime nguluwe. 16 Kalonda kuja makang’ha yowakalile woja nguluwe, mbali habule munhu yamwing’hile chinhu ndiya. 17 Mbali nzewele zake vizimbwelele, kailongela mwenyewo, ‘Vino ni watumigwa wengahi wa tati yangu woja na kusigaza, na niye hano nofa na nzala? 18 Nizasegela na kuhita kwa tati yangu na kumulongela, Tata, nimbananga Mulungu wangu na nikubananga na weye iviya. 19 Sifaya kutangigwa mwanago kaidi, nitende fana imwe wa watumigwa wako.’ 20 Ivo kasegela, kahita kwa tati yake.

"Mbali viyakalile yang’hali kutali, tati yake kamuwona, kamuwonela ubazi, kamkimbila, kamuhagatila, na kamnonela. 21 Mbali mwana ija kalonga, ‘Tata, nimbananga Mulungu wa kuulanga na weye iviya. Sifaya kutangigwa mwanago.’ 22 Mbali tata kawatanga watumwa wake, kawalongela, ‘Himahima! Galeni walo dinogile mumuyawaze. Mvazeni na mhete mchidole na vilatu mmagulu. 23 Maabaho hiteni mkagale dang’ang’a dinenehe na mudichinje, chije na chideng’helele! 24 Kwaviya ino mwanangu kakala kadanganika, lelo kazilibuka, kakala kaga mbali sambi kawoneka.’ Ivo wandusa kudeng’helela.

25 "Dugila vidikalile dogendelela, ija mbwanga mkulu kakala kumgunda. Viyakalile habehi na ikaye, kahulika, nyila na wanhu wovina. 26 Ivo kamtanga imwe wa wasang’hani, kamuuza, ‘Vino kuna choni?’ 27 Msang’hani ija kamwidika, ‘Mdodo wako kabwela ukaye na tati yako kamchinjila dang’ang’a dinenehe kwaviya kampata yang’hali ngima!’

28 "Mbwanga ija imkulu kehiligwa ng’hani, kalema kwingila mnyumba. Tati yake kalawa kunze, kamulamba yengile mnyumba. 29 Mbali kamwidika tati yake, ‘Lola, miyaka ino yose nikusang’hanila fana mtumwa, na silemile bule kukutegeleza ndagilizi yako. Kuning’ha choni niye? Huning’hile hata luti nitende dugila na mambwiya zangu! 30 Mbali ino mwanago kadanganya vinhu vako na malaya, na viyabwelile ukaye kumchinjila dang’ang’a dinenehe!’ 31 Tati yake kamwidika, ‘Mwanangu, lusita lwose kukala na niye, na chila chinhu chinili nacho ni chako. 32 Mbali chitende dugila na chideng’helela, kwaviya mdodo wako kakala kadanganika mbali sambi ngima, kakala kaga mbali sambi kawoneka!’ "

Simwe da lulu

45 "Ufalume wa kuulanga ulinga vino. Ulinga fana munhu yozahila lulu inogile. 46 Viyapatile, kahita na kachuuza vinhu vose vayeli navo, muladi yagule lulu iyo.

Simwe da Mfalisayo na msola kodi

9 Maabaho Yesu kawalongela simwe dino wanhu waja wowoiwona wanoga na kuwazeha wamwenga. 10 Na kalonga, "Kukala na wanhu waidi wowahitile kutambika Mwiikaye ya Mulungu. Imwe kakala Falisayo na imwenga kakala msola kodi. 11 Mfalisayo ija kema yaidumwe, katosa vino muumoyo wake, ‘Weye Mulungu, nokwing’ha hewela kwaviya niye silingile fana wanhu wamwenga, wahokaji na wowotenda yehile na wazinzi, na wala silingile fana msola kodi ino. 12 Niye nofunga kuja miyanza midi muna zisiku saba, na nolava zaka muna ichila chinhu chonichipata.’

13 "Mbali msola kodi ija kema kutali, wala hagezile bule hata kwinula meso yake kuulanga. Mbali kaitowa mhambaga yake kwa usungu na kulonga, ‘Weye Mulungu, niwonele ubazi, niye mwene uhasanyi.’ 14 Yesu kawalongela, msola kodi ino kahita ukaye yake kanoga haulongozi ha Mulungu kumfosa ija Mfalisayo. Kwaviya munhu yoyose yoyoitenda mwenyewo mkulu kezatendigwa kuwa mdodo, na munhu yoyose yoyoitenda mwenyewo mdodo keza tendigwa kuwa mkulu."

Simwe da wasang’hani watatu

14 "Kaidi ufalume wa kuulanga wizakuwa fana vino. Kukala na munhu imwe kalonda kuhita mwanza, kawatanga wasang’hani wake na kuwalongela wakalize vinhu vake. 15 Kamwing’ha imwe masanduku matano ya hela, imwenga masanduku maidi ya hela, na imwenga sanduku dimwe da hela, chila munhu fana viyadahile. Maabaho kasegela, kahita mwanza wake. 16 Msang’hani ija yoyeng’higwe masanduku matano ya hela, kahita kazisang’hanila, kapata faida masanduku matano yamwenga ya hela. 17 Iviya ija yoyeng’higwe masanduku maidi kasang’hanila kapata faida masanduku maidi yamwenga. 18 Mbali ija msang’hani yoyeng’higwe sanduku dimwe, kahita, kahimba hasi na kaifisa hela ya mwenevale wake.

19 "Vilufosile lusita lutali, mwenevale wa watumigwa waja kabwela na kandusa kupeta hela ziyaweng’hile watumigwa wake. 20 Msang’hani wa mwanduso yoyeng’higwe masanduku matano, kagala masanduku yamwenga matano, kamulongela mwenevale wake, ‘Mwenevale, kuning’ha masanduku matano, na hano hana masanduku yamwenga matano ya hela faida yonipatile.’ 21 Mwenevale wake kamulongela, ‘Vinoga msang’hani unogile na wa kwaminika! Kwaminika kwa madodo, nizakwika mchanyha ya mengi. Ingila umo mwa kudeng’helela mwa mwenevale wako.’

22 "Maabaho msang’hani yoyeng’higwe masanduku maidi keza, kamulongela mwenevale wake, ‘Mwenevale, kuning’ha masanduku maidi, lola masanduku maidi ya hela yamwenga faida yonipatile.’ 23 Mwenevale wake kamulongela, ‘Vinoga mtumigwa unogile. Kukala kunoga kwa madodo nizakwika mchanyha ya mengi. Izo udeng’helele hamwe na mwenevale wako.’

24 "Maabaho ija yahokele sanduku dimwe da hela imwe keza kalonga, ‘Mwenevale, nivimanya kuwa weye kwa munhu ndala. Kogobola hanhu huhahandile, na koduganya hanhu huhamizile mbeyu. 25 Nidumba, ivo nihita nidifisa sanduku da hela muna umsanga. Lola hela yako aino.’

26 "Mwenevale wake kamwidika kamulongela, ‘Weye mtumigwa wihile na mbwa! Kovimanya kuwa niye nogobola hanhu sihahandile na noduganya hanhu sihamizile mbeyu. 27 Viilondeka weye wiike hela yangu kwa iwaja wolava limangwe, na niye niheza nisole iyangu na kuhokela yoileligwe. 28 Muhokeni hela iyo iyeli nayo, mwing’heni ija yeli na masanduku longo ya hela. 29 Kwaviya munhu yoyose yeli na chinhu kokongeziligwa, mbali ija yeli bule kezahokigwa mbaka chiya ichidodo chiyeli nacho. 30 Na mtumwa ija yelibule faida mwaseni kutali kunze kuna diziza, uko kezalila na kudunda meno.

Munhu tajili na Lazalo

19 "Kukala na munhu imwe tajili yoyakalile koyawala viwalo va chitani inogile ng’hani, na chila siku kakala kotenda dugila koja ndiya zinogile ng’hani. 20 Haulongozi ha lwivi lwake ulukulu, kekigwa ngaye-ngaye imwe, zina jake Lazalo yoyakalile na vilonda vingi. 21 Ngaye-ngaye iyo kakala kolonda kuja masigavu yalagale munaimeza ya tajili ija. Na zimbwa zikala zokwiza kumulambita vilonda vake.

22 "Hamwande, Lazalo kadanganika na kasoligwa na wasenga wa kuulanga mbaka mwiimhambaga ya Bulahimu. Tajili ija nayo kadanganika na kawandigwa. 23 Kuja kuzimu, munhu ija yakalile na vinhu vingi kakala kogaya ng’hani, kenula meso yake, kamuwona Bulahimu kwa kutali hamwe na Lazalo mwiimhambaga yake. 24 Katanga kwa dizi kulu, ‘Tata Bulahimu, niwonele ubazi! Mtume Lazalo yavabike nhonga ya chidole chake munayamazi, yaluhoze lulimi lwangu, kwaviya nogaya ng’hani munaumoto uno!’

25 "Mbali Bulahimu kamwidika, ‘Mwanangu, kumbuka weye kuhokela vinhu vinogile munaugima wako, mbali Lazalo kahokela vihile. Sambi Lazalo kahano kodeng’helela, na weye kwolumizigwa. 26 Iviya hagati yetu cheye na mweye hekigwa kombo kulu muladi wanhu wolonda kulawa kuno kwiza kumwenu wapotigwe, na wanhu wa kumwenu sekewadahe kwiza kumwetu!’ 27 Munhu tajili kalonga, ‘Basi nokulamba tata Bulahimu, mtume Lazalo kuikaye ya tati yangu. 28 Kwaviya ninawo ndugu watano. Mulekelele yahite yakawalongele waleke kutenda yehile muladi na wawo sekeweze hanhu hano ha magayo.’

29 "Bulahimu kalonga, ‘Wandugu zako wanayo Malagilizo ya Mulungu yoyamwing’hile Musa na walotezi wa Mulungu, wawategeleze wawo chiwolonga.’ 30 Tajili ija kamwidika, ‘Bule tata Bulahimu. Fana munhu yoyazilibuke yahawahitila, wezaleka uhasanyi wawo.’ 31 Mbali Bulahimu kamulongela, ‘Fana hawawahulike Musa na walotezi wa Mulungu, hawezamuhulika hata munhu yahazilibuka.’ "

Simwe da savu

24 Yesu kawalavila simwe dimwenga kawalongela, "Ufalume wa kuulanga ulinga vino. Ulinga fana munhu yahandile mbeyu zinogile muna umgunda wake. 25 Chilo chimwe, wanhu viwagonile munhu yehile kumwake kahanda savu muna uhemba, maabaho kahita. 26 Ivo uhemba uwo viukulile na kwandusa kukung’hunha, na savu jandusa kuwoneka. 27 Wasang’hana wa mwene ikaye wamuhitila na wamulongela, ‘Mwenevale, huhandile mbeyu zinogile bule muna umgunda wako? Ijo disavu dilawa kulihi?’ 28 Kawedika, iyo yehile niiyo yasang’hane mbuli iyo. Na watumigwa wamulongela kondachihite chikayang’ole? 29 ‘Sekemusang’hane ivo, bule ivo mwizang’ola disavu ijo hamwe na uhemba. 30 Vose umo muvileke vikule hamwe mbaka siku za kugobola, vondazifike siku za kugobola niza walongela wagobolaji wangu, yanduseni kuduganya masavu na muyafunge ng’hinza ng’hiza, hamala baho muyasome moto, mbali uhemba muugwagule na mukaike muna digulu jangu.’ "

Simwe da wali longo

1 "Chipindi icho, ufalume wa kuulanga wizakuwa fana vino. Kukala na wali longo wowasolile mawenge yawo, maabaho wahita kungozela msolaji. 2 Watano wawo wakala wabozi, na watano wakala wabala. 3 Waja iwabozi wasola mawenge yawo mbali hawasolile ngama ya mavuta ya moto. 4 Mbali waja iwabala wasola mavuta mwiizinyhupa zawo hamwe na mawenge yawo. 5 Msola viyakalame kwiza, wose wandusa kukukila na wagona nhongo.

6 "Chilo chikulu, nyangi zigutigwa kunze, ‘Izoni msolaji kafika! Laweni muhite mukamuhokele!’ 7 Wali wose longo walamka na wasola mawenge yawo. 8 Waja iwabozi wawalongela iwabala, ‘Ching’heni mavuta yenu chidogo kwaviya mawenge yetu yazimika.’ 9 Waja iwabala wawedika, ‘Haidahika bule kwaviya yano yeli muno hayafaya mweye na cheye. Vinogile muhite kwa wachuuza mavuta mukagule mavuta yenu wenyewo.’ 10 Ivo waja wali iwabozi wahita kugula mavuta. Viwakalile wang’hali mwiinzila, msolaji kafika, wali wakalile waisasala wamala wengila nayo mwiikaye ya sola, na wahinda ulwivi.

11 "Hamwande waja wali iwabozi weza, wandusa kutanga, ‘Mwenevale! Mwenevale! Chivugulile ulwivi.’ 12 Mbali mwenevale kawedika, ‘Nowalongela kweli, mweye simmanyileni bule.’ "

13 Yesu kakomeleza kwa kuwalongela, "Kaleni meso, kwa ichimu hamvimanyile siku wala saa.