As 10 parábolas mais importantes de Jesus

Eele lyOmusamalia omunamutimanghenda

25 Ndee omulongimhango umwe okwe ya a makele Yesus ta ti, "Mulongi, ondi na okuninga shi opo ndi mone omwenyo waaluhe?"

26 Yesus okwe mu yamukula a ti, "Momhango omwa shangwa kwati ngeepi? Owii uviteko ngeepi?"

27 Okwa yamukula a ti, "Hola Omwene Kalunga koye nomutima woe auhe nomwenyo woe auhe nomavilaavilo yoe ayehe neenghono voye avihe’, oye Hola mukweni nganhyi wu ihole mwene.’" 28 Yesus okwa ti kuye, "Owa yamukula mondjila, shi wanifa ndee to kala nomwenyo." 29 Ndele omulongimhango nhyi a li a hala okwiimonikifa omuyuuki, okwa pula Yesus natango a ti, "Mukwetu olye?" 30 Yesus okwe mu yamukula, "Okwa li ku na omulumenhu wonhumba a za kuJerusalem ta yi kuYeriko nokwa hangika keembuvi. Ove mu vula oikutu noku mu vega, ndee avi mu fii nokamwenyo okashona. 31 Mondjila ndjo omwa hangika amu ende omuyambi. Nhyi e mu mona, okwa kanduka mo mondjila, ndele te mu pitilile. 32 Nomulevi naye nhyi e mu mona, okwa kanduka mo mondjila ndele temu pitilile. 33 Ndele mhanga Omusamaria a li ta ende mondjila ndjo, okwe ya pomulumenhu ngu, nanhyi e mu mona, omutima wae owa li wa uva olukeno. 34 Okwa heena puye, ndele ta panga oipute yaye nomaavi nomaviinyu, ndee te yi manga. Okwe mu londeka kondoogi, ndee temu fala konduda yaayenda ndee temu tonatele. 35 Esiku lya landulako, okwa kufa eedenari mbali, ndee tevi pe mwene weumbo lyaayenda ta ti, ‘Mu tonatela, ndee nge eedenari mbali ina vi wana, andiya ndiku yalulile ashihe nhyi wa longifa muye.’"

36 Yesus okwa hulifa a ti, "Pamavilaavilo yoe, upi mumba yatatu a li mukwawo wangu a hangikilwe keembuvi?"

37 Omulongimhango okwa yamukula a ti, "Oye ngu e mu sila onghenda."

Yesus okwa ti, "Nooye inda hano u ka ninge shafaafana nanhyi."

4 Natu tye umwe womunye okuna eezi efele limwe, ndee yimwe yomuvo te yi kanifa. Ota ningi ngeepi mbela? Ota fiye po eezi vi omilongo omungoyi nomungoyi, ndee ta ka konga ndji ya kana siyo te yi mono. 5 Nge e yi mona, ota hafa neenghono, ndee te yi hindi po komapepe yaye, 6 ndee teyi eta keumbo. Opo nee ota ifana ookaume naashiinda shaye ta ti, "Hafeni pamwe naame, oshonhyi ozi yange ndji ya li ya kana onde yi mona." 7 Andi mu lombwele, "Osho nghaa nomeulu, amu kala ehafo enene, molwomulunde umwe e itevulula, li vulife ndi lyoku hafela omilongo omungoyi nomungoyi, mba ina ya pumbwa eitevululo."

Eele lyomumati a kanene

11 Yesus okwa twikila natango okupopya ta ti, "Okwa li ku na omusamane e na aamati yaali. 12 Ngu omushona kumukwawo okwa ti kuhe, ‘Tate, pe nge ombiga yomaliko ndji ndi na okupewa.’ He okwa topolela oyana yaali eliko ndyo. 13 Inapu pita omasiku omendji, omona ngu omushona okwa landifa po oinima yaye ayihe, ndee ta zi po peumbo, ta ka kala koshilongo shokokule. Okwa hanaunina ko eliko lyaye alihe mokulumba onghalamwenyo youholume. 14 Ndee nhyi a mana po eliko alihe, oshilongo nhyo osha hangika kondjala onene nokwa kala e li momhumbwe onene. 15 Okwa ya, ndee ta ka longela omukwashiwana omuyamba womoshilongo mo. Omuyamba okwe mu tumu kepya lyaye a ka tonatele oingulu. 16 Okwa li e na etimhaumbwile kutya otaka a lya omakunde nga haa liwa koingulu, ndele ine ya pewa. 17 Opo nee okwa vilaavila, ndee ta ti, ‘Aapiya yatate ayehe oye na oshindji shokulya noshoku siikilila, ndele aame ngu andi si ondjala. 18 Andi fikama, ndee andi shuna kutate, ndee andi mulombwele, ‘Tate, onda nyona keulu nokoshipala shoye, 19 ndee ame inandi wana ali ndi ifanwe omona woe, tambula nge nganhyi umwe womaapiya yoe.’ 20 Okwa fikama, ndee ta yi kuhe. Ndele mhanga ali e li kokule, he okwe mu mona, ndee okwa li e mu uvitile onghenda. He okwa tondoka eke mu shakeneka, ndee temu papatela, ndee temu hupita. 21 Ndee omona okwe mu lombwela, ‘Tate, onda nyona keulu nokwooye, onghee ame inandi wana ali okwiifanwa omona woe.’ 22 Ndele he okwa lombwela aapiya yaye, ‘Endeleleni, ka eteni onguwo ndji oiwa lela, mu shi mu zike, nokalinga mu ka zike komunwe wae, neenghaku mu mu zike keemhavi. 23 Ndee indeni mu ka taleko onhana ndji ya ondoka, i tomeni tu lyeni se tu hafeni, 24 molwanhyi omumwange okwa li a sa, ndele paife okwa umuka, okwa li a kana, ndele paife okwa monika.’ Opo nee oya hafela pamwe. 25 Omumwae ngu omukulunhu okwa hangika mepya. Nhyi e uya, a fika popepi neumbo, okwa uva olwiimbo nouvano. 26 Okwa ifana omupiya umwe, ndee te mu pula nhyi shi li meumbo. 27 Omupiya okwa yamukula, ‘Mumwanyoko okwe ya, ho okwe mu tomena onhana yinya ya ondoka, molwanhyi okwe mu mona e na omwenyo.’

28 Omonamati ngu omukulunhu okwa handuka ndee ta kala ina hala okuya mo meumbo. He okwe ya pondje, ndee te mu indile a ye meumbo. 29 Ndele omumati okwa ti kuhe, ‘Tala, onda kala pwooye eevula avihe vi andi ku longele ongomupika, inandi nyona nande oshipango shoye shimwe. Ndele ino pange nande okakombwena ndi hafe pamwe nookaume kange. 30 Ndele omona woe ngu a manena po eliko lyoye meembwada nhyi e uya, owe mu tomena onhana ndji ya ondoka.’ 31 He okwe mu lombwela, ‘Mumwange, oye owa kala aluhe pwaame, ndee ayihe yange oyoe. 32 Ndee paife otu na okutyapula nokuhafa, molwanhyi mumwanyoko, okwa li a sa, ndele paife okwa ninga ali omunamwenyo, okwa li a kana, ndele paife okwa monika.’"

Eele lyOmufalisai nomufendelifi

9 Yesus okwa popya eyele ndi, kumba ya li ye iwete aayuuki, ye ineekela muyo yene, noya li ya vina aanhu yakwawo. 10 "Okwa li ku na aalumenhu yaali ya ka yalikana kotembeli, umwe Omufalisai namukwawo omufendelifi." 11 "Omufalisai okwa fikama e ikalela, ndele ta yalikana puye mwene ta ti, ‘Kalunga, andi ku hambelele, molwanhyi ame inandi fa aanhu yamwe; eembuvi, aakolokohi naahondeli, andi ku hambelele natango molwanhyi inandi fa omufendelifi ngu. 12 Oikulya ohandi ivilike luyali kehe moshiike, ohandi ku pe oshitimulongo shomoilikolwa yange ayihe.’ 13 "Ndele omufendelifi okwa fikama kokule, ye ina vula okutala keulu, oshonhyi okwa sa oluhovi, ndele ta ti, ‘Kalunga sila nge onghenda, oshonhyi ame omulunde!’" 14 Opo nee Yesus okwa ti, "Andi mu lombwele; omufendelifi okwa shuna keumbo a viminwa po koshipala shaKalunga e vule mukwawo. Molwanhyi ngu te inenepeke ota shonopekwa, nangu te ishonopeke ota nenepekwa."

Omuyamba naLasalus

19 Okwa li ku na omulumenhu omuyamba, ha zala oikutu yondilo noha lumbu onghalamwenyo oiwa kehe esiku. 20 Posheelo sheumbo lyaye opwa li hapu kala ohepele yevina Lasalus, yi na omafina olutu aluhe. 21 Ohepele ndji ohai kala ya hala okulya oundjaumuke mbu tau wu koshitaafula shomuyamba. Olundji eembwa oha vi ya, ndee avi lafa omafina yaye. 22 Hano ohepele ndji nhyi ya sa, oya papatelwa kaayengeli ndee taye mu fala meulu puAbeleham. Omuyamba naye okwa sa, ndee ta fundikwa, 23 nomoshaasi okwa kala moululume. Nhyi a yelufa omeho kokule naye, okwa mona Abeleham ye li naLasalus. 24 Okwa ingiva a ti, ‘Tate Abeleham! Sila nge onghenda, u tume Lasalus, a ye omunwe wae momeya, ndee ta taalelife kelaka lyange, oshonhyi ondili moululume omundji momundilo!’ 25 Ndele Abeleham okwa ti kuye, ‘Mumwange, vibuluka kutya mhanga wa li momwenyo, owa pelwe oinima ayihe oiwa, ndele Lasalus okwa pelwe oinima ayihe mbi oiyi. Paife Lasalus okuli mehala oliwa, a mbilipalelwa, mhanga oye to lulumikwa. 26 Ndele nande ongaanhyo, pokati ketu nooye opuna elambo eleka, opo mba ya hala okutaulukila kunye, nenge mba ya hala okutaulukila kuse inaye shi vula.’ 27 Omuyamba okwa ti, ‘Andi ku indile tatekulu, u tume Lasalus keumbo lyatate, 28 ondina ko aamwameme aalumenhu yatano, opo e ke ya londove, ina ye ya mehala ndi lyoululume’ 29 Abeleham okwa ti, ‘Aamwanyoko oye na Moses naahunganeki, naye ya pwiikine.’ 30 Omuyamba okwa yamukula, ‘Ahawe tate Abeleham! Ngeno okwa li taku umuka umwe womaasi, ndee ta yi kuyo, ngeno ota ye itevulula.’ 31 Abeleham okwa ti, ‘Nge inaa pwaikina Moses naahunganeki, natango iha ya itaelifwa nande naku yumuke umwe kaasi.’"