As 10 parábolas mais importantes de Jesus

Mushinga w’eMusamaria murongu

25 Kuruma nampo, muhani uma w’emyomba wasimana mwiereka Yesu. Wamushisha mbu: «eMuhani, mbeni namuronja buni kongo nashee ekaramo k’ematu ati?» 26 Yesu wasako mbu: «Inki chatirwa mu myomba yitu? Buni nge burukiranga ǒngo yo kuba usoma yo?» 27 Emwea ngo wasako mbu: «‹Ushimanga Nyere kurinu Ongo mu mutima wabe uti, mu mihaki yabe iti, mu maa abe ati na mu bwenge bwabe buti. Ushimanga hotu minu imbu bwishima ǒngo kisine.›»* 28 Nampo, Yesu wamwire mbu: «Umasubya shu, wenda uronja ebwameba ǒngo, kongo usheeyo ekaramo.»

29 Ina emwea ngo, mwisonda kwininka eriira, washisha Yesu mbu: «Na inye nge mitu?» 30 Yesu wasako mbu: «Mwea uma watukanga ku Yerusaremu mwihite ku Yeriko. Warekia uri mu munse, ebanyai bamuhenda, bamunyaa ebiti byabesenga nae. Bamuhumbaka n’imusia mu nsanga nareke, biire rabo. 31 Isisimuke, kwasaa kuhani uma uhitirengi munse njo. Warekia wasunga emwea o, weta kumushi nae, witeane rae. 32 Bumbo hotu, Murawi uma nae weya mpo. Wakianga wamusunga, nae weitire mu uharo rwanse, na kwiire. 33 Ina Musamaria uma wabesenga wetange munse njo, weya mpo hari emwea ngo. Wakianga wamusunga, wamukwire bonso. 34 Wákensere kwihi nae, wakubure mu bihuru ndifai na mafuta mwimushakire, wamina byo. Kuruma nampo, wamutarisha hiyo n’embunda yae, wamusicha hankambi y’ebeni n’irangana nae. 35 Mu richa r’ebutu, wakuto byunda bibí bya rufaranga n’itua byo kuri mine numba n’imwire mbu: ‹Uranganga emwea uno ishu, n’esafaranga siti sakoresha tu ǒngo hiyo nansi faranga mu rimushakire, nasekurucha to mu rikuruka rani.›»

36 Ngerikia ke Yesu washisha ingo muhani w’eMyomba mbu: «Inye mu bashatu bano ngwasunga ǒngo buri munachabo emwea ingu wahendwanga n’ebanyai?» 37 Emuhani w’eMyomba wasako mbu: «Ingu wamukwirenga ebonso.» Nampo ke Yesu wamwire mbu: «Na ǒngo hotu, wenda ukia mbo.»

4 «Kuba mwea uma mu banu uri na mburi sae iyana, na nima mu to yamarimina, buni bwamuronja we? Ngebumbo wahwa isia emakumi mwenda n’emwenda mu muchacha n’ienda kasonda eyakurimina mupaka washei yo! 5 Wasekia wamashee yo, wasekuruka na ngoa ntwaria yo mu bituri byae! 6 Na wasekia wameya mu mwae, wasebikira bira bae n’ebanunsane n’iere bo mbu: ‹Mweye mumoe hima nani, bushwa mbu emburi yani nji yariminanga namashee yo!› 7 Nibwirengi mbu, mu mbingu murikanga ngoa ningi kuba mwea uma ho wansambi wamabunduka n’ireke esansambi sae, irenga bea makumi mwenda na mwenda baombokara imbi ntíbarae tu mwireke esansambi sabo.»

Mushinga w’emwana ngu wariminanga

11 Yesu wakere bo umpe mushinga mbu: «Kwarikanga mwea uma nt’uri na basike bae babi. 12 Emwansare were ishe mbu: ‹Etita, nikuhemange umbesi emuhango w’emwandu wani mu butumba bwabe.› Nampo ishe wabanyie bo ebutumba bwae.

13 «Kuruma na matu makeke, emwansare wachuya emwandu wae na kwiire mu kimpe chuo cha kore. Nanko washata n’ebehe byae mu bikai bya busa-busa. 14 Warekia wamakinda ebehe byae biti, mu chuo ncho mwakime rwaka rwasuma, wabucha irukwa na bio byeririsa. 15 Nampo, wenda kakore mwea uma w’echuo ncho. Emwea ngo wamutuma mu mashwa ae karanga esampunu* sae. 16 Wabesenga uhunange mbu wamurisange mu bio ebirisange mo esampunu, ina watashei mwea werimuninka mu byo.

17 «Nampo ke, emushukira ngo wabucha kwiebesha mbu: ‹Ebakori ba tita bashatange n’ebio, ina ani nge nikwange n’erwaka kuno! 18 Nasesimana n’ienda kuri tita, n’imwire mbu: "Etita, namakora nsambi kuri Ongo na kuri ǒngo hotu. 19 Ntínakomenwa tu ibikirwa mbu ani musikyabe, ina unitingenga buri uma mu bakori babe."›

20 «Nampo, emushukira wasimana n’ienda kuri ishe. Na warekia ukiri kore n’enumba, ishe wamusunga, wamukwire bonso nguru. Wamukanyahe, wamukoke n’imurimba.

21 «Musike we wamwire mbu: ‹Etita, namakora nsambi kuri Ongo na kuri ǒngo hotu. Ntínakomenwa tu ibikirwa mbu ani musikyabe.› 22 Ina ishe were ebakori bae mbu: ‹Mwendi tete karisha nchangi yakoma na mumwambiche yo. Mumwambiche n’upete na birato.* 23 Na murishe chana cha nkambu echanone, mubae cho kongo twaronja bio bya kibimbi, 24 bushwa mbu musikyani uno wabesenga wamakwa ina wamafuka, wabesenga wamarimina ina wamashekana.› Nampo babucha irisa bio by’ekibimbi.

25 «Mu kashangi nko, entangi yae yabesenga iri ekwishwa. Murikuruka rae, warekia uri kwihi n’enumba yabo, warukira engoma n’ebea basimbange n’imina. 26 Wabikira uma mu bakori n’imushisha kuba kinki nge chasaa nko. 27 Emukori ngo wamusako mbu: ‹Moto wabe ngwamarembera, na iso wamamukere nkambu, bushwa mbu emwana e wameya na nti munkangwe.› 28 Mukuwae wasubuka nguru n’itina ikime mu numba. Nampo ishe wasaa n’imuhema mbu wakimi. 29 Ina emusike wasako ishe mbu: ‹Namakukore myaka mingi, na nironjanga ebiti byinirenga ǒngo. Ina utunganininkanga n’echana ch’empene mbu nani nirise bio bya kibimbi hima na bira bani. 30 Ina musikyabe uno ewakukindanyanga ebehe byabe biti mwisingirana n’ebihanga, entambi yameya we, umamukere nkambu nji yanone!›

31 «Ishe wamwire mbu: ‹Emwana’ni, turikanga hima nabe kirotu, n’ebiti mbi birikanga nani byabe. 32 Kai rakomenwa irisa bio by’ekibimbi n’imoa, bushwa mbu moto wabe uno wabesenga wamakwa ina wamafuka. Wabesenga wamarimina ina wamashekana.›»

Emushinga w’eMufarisayo n’emukongori w’ehoro

9 Kwarikanga bea mbi babesenga bitatange mbu ibo nge bea baombokara mu makako a Ongo na nti banena bampe. Ngerikia ke Yesu wakere bo emushinga uno mbu: 10 «Otu ruma, bea babi bendanga kǎhema kumunda n’eNumba ya Ongo. Uma wabesenga Mufarisayo na umpe nti mukongori wa horo. 11 eMufarisayo wasimana nt’uhemange mu mutima wae mbu: ‹Tita Ongo, nakutata bushwa mbu ani ntarikanga buri ebea bampe: ibo banyai, bea ba bibí na basingirani. Nikutatange hotu bushwa mbu ntíniri buri emukongori uno w’ehoro. 12 Nihemanga mahemo erikwitinisha irisa n’iomo meta abi muriinga, na nininkananga echakumi ch’ebikai biti mbi bisheenga ani.›

13 «Ina emukongori w’ehoro iwe wasimana kore, na watashimi n’irarame ekwio. Ina wikaso-kaso mu bukuba murishea ebonso bwae na nt’uhemange mbu: ‹Tita Ongo, nikwiri bonso bushwa mbu ani mwea w’ebibi!›» 14 Nampo ke, Yesu weba mbu: «Nibwirengi mbu emukongori w’ehoro wakuruka kukwae na ntwamaansirwa eriira mu makako a Ongo, ina ntí eMufarisayo ngo. Bushwa mbu kinsi mwea ngu witarishanga wasehichiwayo, ina kinsi mwea ngu wihichanga wasetarishiwayo.»

Mushinga w’emutumba bana Rasaro

19 Yesu wakera tu emushinga uno mbu: «Kwarikanga mutumba uma. Emutumba ngo wabesenga umbaranga nchangi sakonda nguru na sa busi bwasuma nguru, na nt’urisanga shu kirotu. 20 Kwarikanga hotu na musene uma mbu nge Rasaro. Rasaro ngo, emubi wae uti wabesenga urisere bihuru. Wabesenga urikanga hamiango mw’emutumba ngo. 21 Wabesenga wisanenga ebio mbi bikirengi itukire mu mesa y’emutumba ngo. N’esambibi sabesenga seyangǎ karamba ebihuru byae.

22 «Otu ruma, Rasaro wakwa. Ebamaraika beya kamuringa n’imuria hari Iburahimu. Emutumba nae wakwa, n’ebea benda kamutaa. 23 Emutumba warekia uri mu marunga nt’unubange nguru, watarisha emeso, wasunga Iburahimu kore, na Rasaro kumushi nae. 24 Warake Iburahimu n’ieba mbu: ‹Etita, ninubange nguru mu kasha kano, nikwiri bonso! Nitumiri Rasaro warubike entonga y’emurimba wae mu mecha kongo waboboya erwami rwani.›

25 «Ina Iburahimu wamusako mbu: ‹Emwana’ni, uanikiranga mbu ubesenga na butumba bwingi mu chuo, ina Rasaro iwe nt’unubange. Na hano ke, uri mu sangoa na ǒngo unubange. 26 Usibanga tu mbu hari kiribu kikiri nguru munkati na bate ninu. Ngebumbo, ebari kuno, kuba bahunange isoka kuri banu nko, batamukocha. N’ebari kuri banu nko, batamukocha isoka kuno kuri bate.› 27 Emutumba weba mbu: ‹Etita, nikuhemange utume ke Rasaro mu mwitu, 28 bushwa mbu basike bitu basanu bari mo, wendi katonde bo kongo batahieriyo mu minubo ino.› 29 Iburahimu wamusako mbu: ‹Basike binu bari n’ebitabo bya Musa nambi by’ebatahwa, bendi bamisange imbu ebweba byo!› 30 Emutumba weba mbu: ‹Anga, etita Iburahimu! Ritamende mpo nensi. Ina kuba kuri ingu wamufuka wamenda katonde bo, basereke esansambi sabo.› 31 Ina Iburahimu wamwire mbu: ‹Kuba banakinu mbo batamukocha irukira emitiro ya Musa na y’ebatahwa, batakoche hotu irukira emahano angu wafuka.›»