As 10 parábolas mais importantes de Jesus

3 Yesu walamba ne bantu aba bintu bingi mumikoshano, walambeti, "Muntu naumbi walaya kumwaya mbuto. 4 Mpwalikumwaya mbuto, nashimbi mbuto shalawila munshila, shalalyewa ne bikeni. 5 Imbuto nashimbi shalawila pabulongo bwa mabwe, apo palikubula bulongo bwingi, shalamena bwangu pakwinga bulongo nkabwalikuba bwingi. 6 Nomba lisuba mpolyalatako, shalapya ne lumwi, neco shalanyana, pakwinga miyanda nkayalikuba yayapanshi sobwe. 7 Imbuto nashimbi shalawila pa myunga. Pakukula matewu, myunga yalashinkilila kukula kwa mbuto shisa. 8 Nomba mbuto nashimbi shalawila pa bulongo bwabolela cena, shalasema mifuko ingi namumbi mwalikuba nseke mwanda, namumbi nseke makumi asanu ne limo, namumbi nseke makumi atatu, kupita shalabyalwa" 9 Yesu walambeti, "Uyo ukute matwi, anyumfwe!"

Mukoshano wa mwine Musamaliya waina

25 Popelapo kwalesa shikwiyisha Milawo kwambeti asunkwe Yesu ne kumwipusheti, "Amwe beshikwiyisha, nicani ncendela kwinsa kwambeti nkatambule buyumi butapu?" 26 Yesu walamwipusheti, "Nomba mu Milawo mwalembwa cani? nomba mukute kubelengamo cani?" 27 Shikwiyisha Milawo walakumbuleti, "Suna Mwami Lesa wakobe ne moyo wakobe wonse, ne buyumi bwakobe bonse, nengofu shakobe shonse kayi ne miyeyo yakobe yonse, ‘Kayi kosuna munobe mbuli ncolisuni omwine.’ " 28 Yesu wamwambileti, "Ulakumbulu cena, uye winseco, nukabe ne buyumi butapu*."

29 Lino shikwiyisha pakuyanda kulibonesheti walulama, walepusha Yesu eti, "Nomba muname niyani?"

30 Yesu walakumbuleti, "Kwalikuba muntu ku Yelusalemu walikuya ku Yeliko. Mpwalikuya munshila, walakumanya kapondo balamwikata, balamufulula ne kumuma, nekumushiya nkali wawisuka. 31 Lino shimilumbo walikapita munshila yopeleyo, mpwalabona muntu uyo walomwa, walapitila kumbali. 32 Neye Mulevi walikapita munshila yopeleyo, mpwalashika palikuba muntu walomwa walamubona nomba neye walapitila kumbali. 33 Nsombi Musamaliya walikuba pabulwendo munshila yopeleyo mpwalamubona muntuyo walanyumfwa inkumbo. 34 Walaya mpwalikuba wona waletila mafuta ne waini pabilonda byakendi nekusungapo bikwisa. Mpwalapwisha kwinseco walamumanta pambongolo yakendi ne kumutwala kung’anda ya bensu uko nkwalamubamba cena. 35 Bushiku bwalakonkapo mu Samaliya uyo walapa mali mwine ng’anda ya bensu nekumwambileti, ‘Mumusunge cena, na mukasebensenshe mali naambi ninkese nkalipile ndakabwelanga.’"

36 Lino Yesu pakupwisha walepusha shikwiyisha milawo eti, "Lino mumuyeyo wakobe, niyani pabantu batatu aba welela kuba munendi wamuntu walomwa ne kapondo?" 37 Shikwiyisha milawo walakumbuleti, "Uyo walamunyumfwila inkumbo." Lino Yesu walamwambileti, "koya lino winse mbuli copeleco."

4 "Na umbi pali amwe kakute mbelele shili mwanda, lino imo itaika sena nkela kushiya mbelele shili makumi asanu ne ana ne shisanu ne shina ne kuya kulangaula kushikila wicana? 5 Lino na layicana ukute kukondwa ne kwinyamuna pamafushi 6 nekwitwala kung’anda. Lino ukute kukuwa banendi ne beshikamukowa nekubambileti, katukondwani pamo pakwinga mbelele yakame yanga yataika ndaicana, 7 ndamwambilingeti, nakoyo kwilu nikukabe kukondwa pamuntu umo wabwipishi lasanduku kubwipishi, kupita bantu bali makumi asanu ne ana ne basanu ne bana balulama batasuni kusanduka."

Mukoshano wa mwana wataika

11 Yesu kayi walabambileti, "Kwalikuba mutuloba naumbi walikukute bana batuloba babili. 12 Lino kanike bantu walabambila baisheti, ‘Ta, kamumpani buboni mbomwela kunjabilako ame mumpele limo.’ Nabo bameshabo balabayabanya buboni bwabo. 13 Kapatana papita masuba angi, kanike bantu uyo walolisha buboni bwakendi nekumanta mali kuya pabulwendo kucishi ca kutali uko nkwalaya akononga mali akendi onse mubwikalo bwaipa. 14 Mpwalapwisha mali akendi onse, mucishi umo mwalaba nsala inene, lino walatatika kupenga. 15 Lino walaya kumuntu naumbi wa mucishi umo. Lino muntu uyo walamupa incito yakwembela ne kusanina nkumba. 16 Mutuloba uyo walatatika kukumbwa bufufu bwamusekese mboshali kulya nkumba. Nomba kuliya nambi muntu umo walikumupa byakulya."

17 "Lino mpwalekalikana mano mumoyo wakendi walambeti, basebenshi bonse ba bata bakute byakulya bingi balekutunga, lino ame kuno ndayandanga kufwa kunsala. 18 Ndanyamukunga njenga kuli bata njengambeti, Ta, ndalepisha kuli Lesa ne kuli njamwe. 19 Nkandelela kukwiweti mwanenu, nsombi munsuminishe nsanduke musebenshi wenu." 20 Lino walanyamuka nekubwelela kuli baishi.

"Nkacili patali baishi balamubona, lino bamunyumfwila inkumbo, ne kumukonka akumukumbata ne kumumyanguta mwakukondwa. 21 Mwana uyo walabambila baisheti, ta, ndalepisha kuli Lesa ne kuli amwe. Nkandelelela kukwiweti mwanenu. 22 Nomba baishi balambila basebenshi babo eti, ‘Kamufwambanani mulete byakufwala byaina afwale. Mumufwalike likosa kumunwe ne nkwabilo kumyendo. 23 Salaniponi ng’ombe yansuka inene mushine kwambeti tulye tukondwe. 24 Pakwinga uyu mwaname wanga wafwa, lino laba muyumi kayi wanga wataika lino lacaniki.’ Pacindici balatatika kusekelela."

25 Pacindico mukulene bantu walikuba kulibala. Lino mpwalashika pepi ne ng’anda, walanyumfwa bantu bali kabembila ne kushana ne kulubisha. 26 Walakuwa musebenshi umo nekumwipusheti, "cilenshikinga kuno nicani?" 27 Musebenshi walakumbuleti, "Mukwenu lesa neco baiso bamushinini ng’ombe yansuka inene pakwinga lesa nkali muyumi." 28 Mpwalanyumfweco popelapo walakalala kayi walakana nekwingila mung’anda. Nomba baishi balapula pansa kuya kumukombeleleti engile mung’anda. 29 Nendi walakumbula baishi eti, kamubonani! byaka kufula mbyondamusebensele eti ndemusha kayi ndiyawa kumwipishilapo nambi pang’ana nomba muliya kumpapo nambi kapongo konka kwambeti kondwepo nebaname. 30 Nsombi mwanenu uyu walononga buboni bwenu mubatukashi bapombo, mpwalesa kung’anda, mulamushinini ng’ombe yansuka! 31 Baishi balamwambileti, "Omwaname, obe uli nenjame cindi conse kayi bintu byonse mbyonkute nibyakobe. 32 Nsombi lino katukondwa nekusekelela pakwinga kanike wakobe walikuba wafwa, lino nimuyumi, walikuba wataika, lino lacaniki."

Mukoshano wa malungu amulo wadula

45 "Kayi Bwami bwakwilu ngatubwelanika cisa; Muntu naumbi shimakwebo, walayakulangaula malungu a mulo wadula. 46 Mpwalacana libwe limo lya mulo wadula, walaya kuyakulisha bintu byonse mbyalikukute ne kuyakula libwe lyamulo wadula lisa ndyalikuyandishisha.

Mukoshano wa Mufalisi ne weshikusonkesha musonko

9 Lino Yesu walamba mukoshano umbi kulyabo bali kabayeyeti balulama kupita bonse nekunyansha banabo. 10 Walambeti, "Kwalikuba bantu babili balaya akupaila ku Ng’anda ya Lesa. Umbi walikuba Mufalisi naumbi walikuba weshimisonko.

11 "Lino Mufalisi walanyamuka nekupaileti, ndamulumbunga obe Lesa, pakwinga ame nkandipo eti bantu nabambi bonse. Nabo nibantu babula kululama kayi ni bapombo. Kayi ndalumbu pakwinga kandipo eti uyu weshi kusonkesha musonko uyu. 12 Ndalikanishinga kulya mankanda abili munsondo, kayi nkute kubenga calikumi pabintu byonse mbyonkute kucana.

13 "Nsombi weshikusonkesha musonko usa walemana patali, liya kulangapo kwilu. Nsombi walikalyuma pantiti nekwambeti, Lesa, kamunyumfwilako inkumbo ame ndemwipishi." 14 Yesu walabambileti, "Cancine ncine, weshimusonko walabwelela kucomwabo kali walulama pamenso a Lesa, mu Falisi neye liya. Pakwinga muntu uliyense weshi kulisumpula nakacepeshewe, nomba muntu weshi kulicepesha nakasumpulwe."

Mukoshanyo wa basebenshi batatu

14 "Bwami bwakwilu tubwelanike cisa, muntu naumbi walaya pabulwendo. Katananyamuka walakuwa basebenshi bakendi, ne kubashiyila ngofu shakwendelesha buboni bwakendi. 15 Walapa uliyense mbuli ncelela kukonsha, naumbi walamupa mali amukuba myanda makumi asanu, naumbi myanda makumi abili kayi naumbi myanda likumi. Nendi walafumapo. 16 Musebenshi usa walapewa mali myanda makumi asanu, walacaninapo kayi mali apelu akwana myanda makumi asanu. 17 Nendi usa walapewa mali myanda makumi abili, walacaninapo kayi mali apelu akwana myanda makumi abili. 18 Nomba usa walapewa mali myanda likumi, walemba cisengu ne kwafumbika mali asa ngalapewa ne mwami wakendi."

19 Mpopalapita cindi citali, mwami usa walabwela, walabakuwa basebenshi bakendi bonse, kwambeti bamwambile mobalasebenseshela mali asa. 20 Usa musebenshi walapewa mali myanda makumi asanu, walaletelapo kayi mali ali myanda makumi asanu, ne kwambeti "Mwami ‘pamali asa ngomwalampa ndacaninapo kayi mali akwana myanda makumi asanu.’ 21 Mwami wakendi walamwambileti, wensa cena, njobe musebenshi waina washomeka, lino pacebo cakuba washomeka pabintu bing’ana, nindikupe lino ncito yakwendelesha bintu bingi. Kwesa usamwe pamo nenjame ndemwami wakobe. 22 Nendi musebenshi usa walapewa mali akwana myanda makumi abili, walaletelapo mali ali myanda makumi abili ne kwambeti, mwami pamali asa ngomwalampa ndacaninapo kayi mali akwana myanda makumi abili. 23 Mwami wakendi walamwambileti, ‘Wensa cena, njobe musebenshi waina washomeka, lino pacebo cakuba washomeka pabintu bing’ana, nindikupe ncito yakwendelesha bintu bingi. Kwesa usamwe pamo nenjame ndemwami wakobe.’

24 "Nendi musebebenshi walapewa mali myanda likumi, walambeti, ‘Nkambo ndacishibangeti mwaipa moyo, mukute kutebula nkomwabula kubyala, ne kuyobolola nkomwabula kumwaya mbuto. 25 Neco ndatinanga, encondalafumbikila mucisengu mali enu, nomba ntawa mali enu.’ 26 Mwami wakendi usa walamwambileti, njobe musebenshi waipa, kayi mutolo. Anu wacishibangeti, nkute kutebula nkondalabula kubyala ne kuyobolola nkondalabula kumwaya mbuto. 27 Neco wanga welela kuya kwibikisha ku banki kwambeti mpondesa ne ndatambulu mali ne bwili. 28 Lino mulamuneni awo mali, mupe uyo ukute mali myanda makumi mwanda. 29 Ecebo cakendi uliyense ukuteko cintu, nibaka mubikilepo nabimbi, neco nakabe ne bintu bingi. Nomba uyo wabulapo cintu, nibaka mulamune nakaba kantu nkakute. 30 Musebenshi uyu waipa wabula ncito, muwaleni kunsa mu mushinshe, uko eti kukabenga kulila ne kukokota meno."

Muntu mubile ne Lazalo

19 Kwalikuba muntu mubile walikufwala byadula uyo walikulya cena lyonse. 20 Lino kwalikuba muntu wapenga lina lyakendi walikuba Lazalo. Walikukute bilonda mubili wonse, walikusuna kona pa cishinga ca ng’anda ya muntu mubile uyo. 21 Lazalo walikaminina mate uto twakulya twalikulaka panshi pa tebulu ya muntu mubile uyo, naboyo bakabwa bali kabesa akumyanguta pabilonda byakendi.

22 Muntu wapenga uyo walafwa, bangelo balamutwala kwilu mumakasa a Abulahamu. Muntu mubile uyo neye walafwa nekumufukila mumanda. 23 Lino mubile uyo mpwalikupenga mumusena wa bafu, walalanga kwilu nekubona Lazalo kulubasu lwa Abulahamu nkali patali. 24 Lino walolobesha eti, "Ta Abulahamu kamunyumfwilako inkumbo. Kamutumani Lazalo kwambeti abike cikumo cakendi mumenshi kwambeti atontoshe lulemi lwakame pakwinga ndashupiki mumulilo muno."

25 Lino Abulahamu walambeti, "Mwaname kwanuka mpowalikuba muyumi walatambula bintu byonse byaina, neye Lazalo walatambula bintu byeshikubaba. Lino neye kuno wakondwa, obe uli mumapensho anene. 26 Kayi pakati petu nenjobe pali cisengu, cakwambeti kuliya muntu ulikuno wela kucikonsha kusabuka kwisa uko, nambi uli uko kwisa kuno."

27 Kufumapo mubile uyo walambeti, "Anu ndasengenga Ta, mutume Lazalo kung’anda ya bata. 28 Pakwinga nkute bakwetu basanu. Enga abacenjeshe kwambeti naboyo batakesa kumusena wa mapensho kuno." 29 Nsombi Abulahamu walambeti, "abo bakute mabuku alalembwa ne Mose ne bashinshimi, kabanyumfwani byalembwamo." 30 Nendi walakumbuleti, sobwe ta Abulahamu, na umbi ufuma kubafu nekuyako, mpobela kusanduka kubwipishi bwabo. 31 Abulahamu walamwambileti, "na nkabanyumfwilinga Mabala alalembwa ne Mose ne bashinshimi nteshi bakanyumfwepo nambi umbi akapunduke kubafu."

Mukoshanyo wa musonde ne maila

24 Yesu walabambila kayi mukoshanyo naumbi, walambeti, "Bwami bwakwilu bwakoshana ne muntu walabyala mbuto shaina mulibala lyakendi. 25 Nomba cindi ncobalikuba bonatulo bantu bonse, mulwani wakendi walesa kubyalamo musonde pakati pa maila, ne kufumapo. 26 Lino mumena wa maila mpowalikukula nekuba ne mapumpu, nawo musonde walatatika kuboneka." 27 Basebenshi bakendi mwine libala usa, balamwipusheti, "Nkambo, sena nte mwalabyalamo’wa mbuto shaina mulibala lyenu? Inga nawo musonde ulabonekenga mongeconi?" 28 Nendi walabakumbuleti, "Nimulwani wakame wenseco," Nabo basebenshi balamwipusha kayi, "Sena twenga tutumunemo?" 29 Walambeti, "Sobwe! Mwenseco ngamutumwina kumo ne maila mwatumunanga musonde uwo. 30 Kamubilekani bikulile pamo mpaka cindi cakucesa. Pacindico ninkambile beshikucesa Kamucesani nanshi musonde, musunge mitolo mitolo, muutente. Panyuma pakendi mubunganye maila ne kuya kwabika mu lyanga lyakame."

Mukoshanyo wabalindu likumi

1 "Pacindico Bwami bwakwilu nibukabeti calenshika ku balindu likumi, balamanta malampi abo ne kumucinsha shibwinga. 2 Basanu balikuba bapusa kayi nabambi basanu balikuba bacenjela. 3 Basa basanu bapusa, balamanta malampi abo kwakubula kumantako mafuta apalubasu. 4 Basa bacenjela basanu, balo balamantilila mafuta apalubasu munsupa shabo akuya kwisusha malampi. 5 Nomba shibwinga usa walacelwa, neco bonse balatatika kushinshila, balona tulo."

6 "Pakati pamashiku, kwalanyumfwika maswi abantu balikubilikisheti, ‘Shibwinga uyo lesanga! Pulani mwenga mumutambule!’ 7 Lino balindu basa likumi balapunduka, ne kutatika kubamba cena malampi abo. 8 Basa basanu bapusa, balatatika kusenga mafuta ku banabo bacenjela, ‘Kamutupako mafuta, malampi etu alashimikinga.’ 9 Lino basa bacenjela balakumbuleti, ‘Bacu! Mulayandanga ne njafwe mafuta atupwile twamuyabilako, amwe kamuyani mule mafuta kuli beshikulisha.’ 10 Pacindi cindi ncobalafumapo kuya kula mafuta, nendi shibwinga walashika. Basa balindu basanu balikuba balibambila, balengila pamo mu ng’anda ya malyalya abwinga, ne cisasa calacalwa.

11 "Panyuma pakendi balindu basanu bapusa basa balesa, balambeti, ‘Nkambo! Nkambo! kamutucalwilako.’ 12 Nomba shibwinga walakumbuleti, ‘Kumwambila cakubinga, nkandimwishipo sobwe.’ "

13 Yesu pakupwililisha walambeti, "Amwe kamubani balibambila, pakwinga nkamubwishi busuba, nambi ola lyakwisa kwakendi."