As 10 parábolas mais importantes de Jesus

Serekä Ngakä Apangza Apo tä Samriya

25 Xongenendäng, me lelericcä asiriyenä Musa kangäsa paye ka läbä Yasuwa, na ngade täma ka, "Me bäldic, oxadi kädäppa ka asog ndey a’dox aygä liliyang?" 26 Na Yasuwa ngade täma ka, "Oxadi gärekärejesawa tä asiriyenä Musang? Anggo käbäleng wi tängang?" 27 Na me lelericcä asiriyenä Musa kabuc ka, "Asiriye ngade ka, ‘Paya Bazuwec Kalägägi na mägaxsägi nuxung, na rongiccägi kä’day, na kutegtägkägi kä’day, na ngakä zägi kä’day’, na ‘paya menggä sogalinygägi kä’day ka’das paygi mpayis ngasäging.’" 28 Na Yasuwa ngade täma me lelericcä asiriyenä Musa ka, "Gi kubuc ngakong appoyo, soga mänang ndey nay."

29 Ndä me lelericcä asiriyenä Musa paye bokung ngase tuny, na ngade ta Yasuwa ka, "Xänang näs me sogaldangang?"

30 Na Yasuwa kabuc täma näs legedänic ka, "Apangandäng kacoccoleza tä Ursalim 'docco tä owda säbangäs Arixa, na kadel ta asänggä menggä bärada na kamen ma kawi’d ma, käbadä ma ndä wangasa ma tä enggä xäska bälaxiny.

31 "Na todi me tämed tä Kaläg kälaxäng kacoccoleza na nya akäsogi ma’doxung apangzi menggä bärada käbadäng sängo täzäg na mapopporeza mägälang cengic. 32 Na mändey me Lawi me posakä me tämed kawung kälaxäng na kox apangzi sängo täzäg na kapopporeza kälang cengic. 33 Yä me Samriyani näs me pungutang wede kawung tänya owdu 'doxti sägäbadäng na mägox nya 'doxti sängo na agäma kawasa täng.

34 "Na mägä’doc täng masenyndä penduge ndä mädoga mid täng ndä mäbodey ndä mäpoka tä kaccänäma. Magoya taxä aloc ndä mädäxä. 35 Na edekenydeneni mabag ariyaliny pädax madoga ta me aloc, mängade täng ka, ‘Meskäde 'doxtong appoyo ndä wegki noco wanyäs tämang awunodung ameledäng tägi kä’day.’

36 "Tä känggong kodosakang, xänang kädäppa ka näs me sogal tä 'doxti menggä bärada käbadäng?" 37 Na me lelericcä asiriyenä Musa ngade ka, "Käxi age kawasa tämang." Na Yasuwa ngade täma ka, "Neng wede soga ka’das ma mänang."

4 "Xänang tanggo sagunu täng udiny mädäg (100) ndä nuxung mes ndä wangatasa aki udiny tesped wang asiny wang paye nuxung (99) tä korongic yä 'doco tä nyamgä ani nuxung kämesang basa 'dox songang? 5 Ndä kala ma’doxang mäpoko tä baccugäma mälededeswa nang tä akäsog. 6 Mämelede tä pa, mäbange aminuguma na menggä akäsogalinygäma ka, ‘Posa agä nycugo aledäning xa ka’dox sagändanggi kämesang.’ 7 Aläpedäng tanggo ka, ka’das nya bangi kän lededäning paccey tä pang Kalägi tiyating tä ngakä käxa nuxungza käxajä tä ngaka tasiny. Xa ledi tiyati tä pang Kalägkang kamo’du ledä aki udiny tesped wang asiny wang paye nuxung (99) lelexiny kamen ngakä Kalägkang."

Seredäniccä Apang na Pengge Pädax

11 Yasuwa ngade ka, "Apangandäng mägaccäng na enggä pengge pädax. 12 Penämani biyeyang lapada täma ka, ‘Appa, ampaye larä male täwas.’ Na kala mesa kälarä male kadoga käma.

13 "Na tä sängga bälaxiny mäguduri malenäma manganya kä’day mägä’docco nang tä cabära täxande. Mägä’doc mawanye nang tä wexekä tawustug winy.

14 "Na kala mägä’dese malenäma, na buxu kamen nya cabäri na xas kapax ma paccey. 15 Na mängade tä ngasäma ka, ‘Anoco ta nuxu me cabärong ani buduruginyge tängang ndey ameskädä buduruginyge.’ 16 Mägä’doc ndä säleye siyad täma kasog ma mäpaye siyakä sa säpärki mädogada ta buduruginyang.

17 "Na xongonendäng manimäng pang mesa na mängade tä ngasäma ka, ‘Wi siye agä anycu todong xas paxe agä, yä appanang wekenetäng mange menggä wexeke siyacca matasa de kulung tegeteseng.’ 18 Mängade ka, ‘Anoco tä pa ta appanang aläpede täma ka, "Appa, kasog ngaka tasiny tagä Kaläg na tagä gi. 19 Kandäppas ka bandäs agä penägi mändey song. Wanga agä alayis me wexiccägi."’

20 "Na kala mamen sog mämele tä pa ta mesa. Na mesa kox ma täxande na age kawasa täma käpaxas ma kagapas ma. 21 Na mängade ta mesa ka, ‘Appa, kasog ngaka tasiny tagä Kaläg na tagä gi. Kandäppas ka agä anäs penägi mändey song.’

22 "Neng mesa kabandä cäläxinyge ka, ‘ 'Dägana goyining tandäni appoyong laga ma nang, na baga kälingic loxi tä päxä andäma na laga ma na käbadaga apoccu.’ 23 Na mesa kabandä menggä wexed ka, ‘Goyining päxä 'dämädi kawingang nycugo ampärki ma nang, na aledäning, 24 xa päxä penanggong kämes neng sa’dox ma! Oxodig ka mägäxsä, neng manang mawung moxacca.’ Na kän käledäno.

25 "Yä päxä penämani ngondeyang nyandäng tä pelow na kala kawung wede dänge tädäxä kän buldi na coxad na langad tä pa. 26 Na kala mägädokala täxande mabandä me wexed mamän ka, ‘Oxadi kasiwa tä pang?’ 27 Na me wexed lapada täma ka, ‘Päxä bonggo kämel kawung, neng menggo käpärkä ma na päxä 'dämädi kawing pacceyang, xa mawung wanäma apo.’

28 "Na mägäsänga malewa täxande na mesa kä’doc täma mäne ma ka, ‘Wi siye gi zaxe wunad towang?’ 29 Na mängade ka, ‘Za, kalayigädä nagi ewexecce tägi kala cäläx ndä ande ngagigi, yä kax taxä nuxu kädong päxä ayis ka apax asig na aminugang song. 30 Yä päxä penäginong kasax gi, kabag malene kä’doc kawanye nang na tabany, ndä kawung kämpärkä na käledäwa täng.’

31 "Na mesa kabuc täma ka, ‘Penang, ging nagä tol ndä wegkang kä’day kinggig. 32 Yä päxä bonggonong kämese täpox neng sa’dox, oxodig ka käxsä neng manang mawung moxacca, nyang kasog kampärkä mang ndey ledänig.’"

Yasuwa Kaser Ngakä Farisic na me Yawgä Tuluba

9 Mändey Yasuwa kaser seredäniccong ta kulung känggi kabogkasa ngastängga ka yex ngaki wexeng ndä laleyis kän kängga winyang ka, 10 "Apanginyatäng pädax kä’docco taxä tämed tä paley, nuxung Farisiccang yä ani nuxungang me yawgä tulubang.

11 "Na Farisic kangäsa tiyati kapaleza ngade ka, ‘Kaläg, alogo gi xa agänangang kala kulung kän song, kala menggä celdug song, na kala menggä ngananganegä nga song, na kala menggä ramiccu song, ndä agäng kala me yawgä tulubanani song. 12 Tä sängga paxtinding, agä amene uxkud tä sängga pädax ndä aluwu asiny tä wegkanggi a’doxo udiny mädägkang (100) adogodung tägi.’

13 "Yä me yawgä tuluba kädokol täxande ndä gunusawa na zänggä mayad ngade ka, ‘Kaläg, wanga agägi wayesäng tagä, xa kasog ngaka tasiny!’

14 "Aläpedäng tanggo ka kala tä 'dockäsa tä pa, Kaläg kagixi me yawgä tuluba xa mägaxse bow, yä Farisic, Kaläg kagixi song. Käxa poko ngaseneng, Kaläg maye ze yä käxa coccolo ngaseneng, Kaläg pokada tiyati."

Yasuwa Kälegä Ngakä Apangza Kadangandey na Apangza Wiywa

19 Yasuwa ngade ka, "Apangandäng kadangandey ndä lagewa na tanduga dulatulajeccä ndä todotol siye siyaka apoccu. 20 Ndä apangandäng säbangäs Liyasir wane bägälic käpoposu wunodung sängo tä akäsogaldä pang nyapangzi kadangandeyang, 21 paye ka 'dox enggä siyaki teldeccä tä tumunu siyakämang ndey ka si. Ndä isu wunosung laxte wanämani käpoposung.

22 "Na kala ani Liyasir käxsäsang, malayikada kabag ma kagoyas ma tä owdi Apraxim tängang. Na apangzi kadangandeyang mändey käxsä na sabosu. 23 Na mägä’doc tä mas na mägäsa tiyati moxada Apraxim täxande na Liyasir käcca tä wane käsac. 24 Na mabandäsa ka, ‘Wawa Apraxim, wanga agägi wayesäng tagä, lapi ta Liyasir ka mä’doc mäluji päxä andäma tä ma mäwung mädälbes tä nyipärang xa agänanganang tä cäläxtäg tä mas.’ 25 Na Apraxim kabuc täma ka, ‘Atä, bäli ka tä cuku gi täzäg kä’dox wegkä apoccu kä’day yä Liyasir ka’dox wegka apoccu song, tabewa winy. Neng gang ma mägäluki buduldug yä gi käwalas tabi. 26 Ndä tä ngakong kä’dayakang, salu ow tägog tä pidi ndey ka kängga paye ca’dsa wuno tanggo tä owdiyang, wunosung song na kängga tanggo tä owdi paye wuno täwas tä owdongang, cogo owduskonong song.’

27 "Na sax mändey apangzi kadangandeyang ngade ta Apraxim ka, ‘Wawa, ampaye gi ka yaxsa Liyasir tä menggä panäsko täzäg 28 xa enggä bongguskotäng kawangasa mädäg ndey Liyasir 'doc daxä sa ndey säccagä exenggäsa ndakä sädelese tä mas ka’das agä.’ 29 Neng Apraxim ngade täma ka, ‘Asiriyenä Musandäng na sorunu menggä logey wanga sa sädäng ngaki legeng.’ 30 Na apangzi kadangandeyang ngade ka, ‘A’a, wawa Apraxim, basa nuxung käxa käxsä kangäsa tä xäs kä’doc kaläpe ngakong täsang, säxajeccä säwange ngaka tasiny.’ 31 Neng Apraxim kämeley täma ka, ‘Känox sägädäng ngakä me logey Musa na menggä logeygi nasa songang, kax kig äxsä ndä ngäsa 'doc läpe nga täsa na sädänge säxong.’"