25 Alimwi laanga, umwi muyiisi wamulawu wakabuka, wakali kuyanda kusunka Jesu, wakati, "Mwami, ndichite biyeni kuti ndikajane buumi butamani?"

26 Jesu wakamuvwiila wati, "Niinzi chilembedwe mumulawu? Ubala biyeni iwe?"

27 Alimwi wakamuvwiila wati, "Yanda Mwami Leza wako amoyo wako woonse, amuuya wako woonse, anguzu zyako zyoonse, amuyeeyo wako woonse; mpawo uyande baabo mbumuyakilene aabo mbuli lyaako."

28 Mpawo Jesu wakati, "Waamba kasimpe; zichite ezi kuti, alimwi uyoopona."

29 Pesi wakayanda, kulisalazya wati kuli Jesu, "Ani ngwani ngundiyakilene awe?"

30 Jesu wakamuvwiila wati, "Kwakali mwaalumi wakakunuka kazwa muJerusalemu kaya kuJerikko, wakaswanana ababbi, aabo bakamuuma bamuzuununa zisamo, bakamusiya kalisuntukide. 31 Mpawo kwakaza muPayizi munzila njiyeeyo; naakamulanga mwaalumi ooyu wakabembeleka. 32 Alimwi kwakaza muLevi, naakasika afwiifwi wakamulanga mwaalumi ooyu alakwe mpawo wakabembeleka. 33 Pesi muSamariya, naakali kuyoobuya mulweendo lwakwe, wakasika mpakalilede mwaalumi naakamubona mpawo wakamufwida luzyalo, 34 alimwi wakasika mpakalilede, mpawo wamutila mafuta mpawo awayini; wakamulambila midabba azilonda zyakwe, wamubweza ambongolo yakwe wamweeta kuŋanda yabeenzu ooko nkwaka kumoonga. 35 Alimwi mubuzuba butobela, awo naakali kubambila kunjila nzila mulweendo lwakwe wakabweza makkobili abili, wakapa ooyu siŋanda yabanakweenda, wakamwaambila wati, ‘Ndikumbila umoonge mwaalumi ooyu; kufumbwa nchutabelesye kwiinda mali njindasiya, nzokupa ndaboola.’ "

36 "Lino ngwani alibaba bantu batatu, nguyeeya kuti, wakatondezya kuba muyakizyani wayooyu mwaalumi wakawumwa abasikubba?"

37 Mpawo wakati, "Ngooyu wakamufwida luse mwaalumi ooyo."

Alimwi Jesu wakamwaambila wati, "Kuya ukachite mbuboobo anduwe."

4 "Ngwaani muntu akati kanu, ujisi mbeleele zilimwaanda, kuti wasweekelwa iimwi, tazisiyi na mbelele zilimakumi alimusanu aane amusanu azine abbuwa, mpawo ayinke kukuyanduula imwi iswekede, mane akayijane? 5 Mpawo akuyijana, uyoyipikula amakwiko akwe, kalokukondwa. 6 Mpawo kuti aasika kumuunzi, alimwi uyootamba beenzunyina ambayakilene aabo, uyoobaambila kuti, ‘Atusekeleele aamwi andime, nkaambo ndajana mbelele yangu yakalisweekede.’ 7 Mbumbuboobo, ndamwaambila kuti, kuli lukondo lupati kujulu naakuti sizibi umwi wasanduka, kwiinda balimakkumi alimusanu ane amusanu abane bantu baluleme, batayandi kusanduka."

11 Mpawo Jesu wakati, "Kwakali umwi mwaalumi wakali abana babili. 12 Alimwi muniini wakati kuliwisi, ‘Taata, mundaabile chipanzi chalukono chilangene andime.’ Mpawo wisi wakabaabili umwi awumwi lubono ndwakalaalo. 13 Mumazuba mache biyo, muniini wakabunganiya lubono lwakwe loonse ndwakaalalo, mpawo wakapanga lweendo waya kuli chimwi chisi chilikule, alimwi ooko wakutakanisya lubono lwakwe nkukooko mukupona buumi bwabutakana. 14 Alimwi naakamana kutakanisya zyoonse, kwakaba bbalangwe ipati munyika eeyo, mpawo wakatalika kutama. 15 Mpawo wakayiinka alimwi wakukkala kuluumwi mukkali wamunyika eeyo, wakamutuma mumuunda wakwe kuti akasanine ngulube. 16 Alimwi wakaba achiyandisyo chakuti alipede kuti alye kulya kwangulube; mpawo takukwe muntu wakamupa chakulya pe. 17 Pesi mizeezo yakwe niyakakkalinkana wakati, ‘Mbangee babeleki bataata, balalya chinkwa, balakkuta, akuchisiya, pesi ime ndanyonyoka anzala okuno! 18 Ndilabuka ndiye kuli taata, mpawo ndaakusika ndiyomwaambila kuti, ‘Taata, ndakabisizya ijulu anduwe; 19 nsicheelede kutegwa mwana wako pe; kuli mbubo kuti undibweze mbuli umwi wabalanda bako.’ " 20 Alimwi wakanyampuka waya kuliwisi.

Pesi naakachilikulekule, wisi wakamubona, mpawo wakamufwida luzyalo, wakachijana wakamukumbata mpawo wamumyonta. 21 Mpawo mwana wakamwaambila wati, ‘Taata, ndakabisizya julu akunembo lyako; tandicheelede kwiitwa kutegwa ndilimwana wako.’ 22 Pesi wisi wakati kubalanda bakwe, ‘Amweete mudabba mubotu chakufwambana, alimwi mumusamike, mpawo mumusamike nweenwe kuluboko lwakwe, ansangu kumawulu akwe; 23 alimwi mujate mwana ŋombe unenede mumujaye, mpawo tulye tusekele; 24 nkaambo ooyu mwana wangu wakalifwide, alimwi wabuka lubo, wakaliswekede, mpawo wajanika.’ Alimwi bakatalika kusekelela.

25 Lino mwana akwe mupati wakali mumuunda; mpawo nakali kuyoobuza nakasweena afwiifwi akuŋanda, wakamvwa kabali kwiimba akuzyana. 26 Mpawo wakayiita umwi wabalanda mpawo wabuzya kuti, ‘chambaanzi eechi.’ 27 Mpawo wakati kulinguwe, ‘Mwanike wako wasika mpawo wuso wamujeela kanamani kanenede, nkaambo kakuti wamutambula kali muumi.’ 28 Pesi wakanyema alimwi wakakaka kunjila. Wisi wakazwa anze wamukombelezya, 29 pesi wakavwiila wisi wati, ‘Laanga minyaka myiingi ndalikukukutawukila mbuli muzike, mpawo takukwe nindakaleka kukuswiilila malayilile aako; anukuti takwe nuwandipa pe nikaba kana kampongo, kuti tusekelele abeenzuma. 30 Pesi ooyu mwana wako naasika, ooyo wakatakanisya lubono abasibwamu, wamujeela kanamani kaneneede!’ 31 Mpawo wakati kulinguwe, ‘Mwanaangu, iwe ukkede andime lyoonse, alimwi zyoonse nzindilaazyo nzizyako. 32 Zyaliyeleede kuti tusekelele, alimwi ubotelwe, nkaambo ooyu mwanikaako walifwiide, lino muumi, wakalisweekede, lino twamujana.’ "

9 Wakaamba ooyu mukozyanisyo kuli aabo bakali kulisumpula kabati baliluleme akulangila bamwi boonse aansi: 10 wakati "Baalumi babili bakaya kuŋanda yaLeza kukukomba, uumwi wakali muFarisi alimwi uumwi kali simutelo. 11 Mufarisi wakayimikila wakomba walyambila wati, ‘Leza, ndakulumba kuti ime tandili mbuli bamwi bantu, balisumpula, batasyomeki, basibwaamu, nikuba mbuli ooyu simutelo. 12 Ndilalyiimya tubili amviiki; ndilapa zyakkumi zyazyoonse nzindijana.’ 13 Pesi simutelo, nkayimvwi kulekule, taakakonzya kunyampula meso akwe kujulu, pesi wakalyuuma akaango kakwe kalikulifwinsya, wati, "Leza wangu kondifwida luse ime ndisizibi!’ 14 Ndamwaambila kuti, ooyu mwaalumi simutelo wakabweeda kuŋanda yakwe kaliwalulamikwa kwiinda ooyu muFarisi; nkaambo kufumbwa woonse ulisumpula ulafwiinsigwa, alimwi ooyo ulifwiinsya ulasumpulwa."

19 Eelyo Jesu wakati, "Kwakali umwi mwaalumi muvubi, wakali kusama mudabba wakamweenvwe alimwi muteteete uŋayima alimwi wakali kulya kabotu mazuba woonse. 20 Alimwi kumulyango walubuwa lwamuvubi kwakali kubikwa umwi mwaalumi muchete utegwa Lazarasi, kazwide zilonda, 21 wakali kulombozya kulya zyakali kuwa kuzwa kutebuli lyamuvubi; alimwi bankala bakali kuza kabali kumunyankuta zilonda zyakwe. 22 Mwaalumi muchete wakafwa mpawo wakabwezegwa abaangelo kuchaamba chaAbburahamu. Mwaalumi muvubi alakwe wakafwa mpawo wakavwikwa; 23 mpawo muuya wakwe wakaya muchikkalilo chabafu, kalokupenzegwa, wakabusya busyu bwakwe, alimwi wakabona Abburahamu kulaale aLazarasi nkali kuchaamba chaAbburahamu. 24 Alimwi muvubi wakayita wati, ‘Taata Abburahamu, kondifwida luse, mpawo utume Lazarasi kuti adompe kanwe kakwe mumeenda mpawo azotontozye lulimi lwangu; nkaambo ndatama mumulilo ooyu.’ 25 Pesi Abburahamu wakamuvwiila wati, ‘Mulombe, yeeya kuti iwe muchiindi chabuumi bwako wakajana zintu zibotu, alimwi Lazarasi wakali kujana zintu zibi; pesi lino ulimukuumbulizigwa okuno, mpawo iwe uliikutama. 26 Alimwi kakutali boobo, akati kesu anduwe kubikkidwe mugaano mupati, kuchitila kuti aabo bayanda kuza oko kulinduwe batakonzyi pe, alimwi taakwe uyootimbula kuzwa ooko kaza kulindiswe.’ 27 Alimwi wakati, ‘Eelyo ndakumbila, taata, kuti umutume kuŋanda yataata, 28 nkaambo ndilaabakulana balimusanu, kuchitila kuti akabachenjezye, nkaambo ngabalasika kubusena oobu bwakutama.’ 29 Pesi Abburahamu wakati, ‘Nkwali malembe aMozesi abasinsimi; ngakabakabaswilile.’ 30 Mpawo wakati, "Peepe, taata Abburahamu; pesi kuti umwi wayinka kulimbabo uzwa kubafu, bayoosanduka.’ 31 Wakati kulinguwe, ‘Kuti kabatakonzyi kuswiilila malembe aMozesi abasinsimi, taakwe nibayoozumina pe nikuba kukabuke uzwa kubafu.’ "