25 Wele tie, bäyugu andikä sã kiyee kalẽ Yesu logo fʉla, kinyã fu ko: «Bäyugu, mi mängi waĩ kagbiã nyenye unga?» 26 Yesu kinyã fu ko: «Gini pai dʉ ni kẽkẽ hẽ logo andikä? Mʉ nageda gini hẽ logo ho yò?» 27 Gu kʉmba le kikalaga ha kinyã: «Mʉ kpi nyämu Baɨla nga gǎ Mbäli na ngbädulo dundukä, na mbisimälo dundukä, na ʉmelo dundukä, na belãlo dundukä. Mʉ kinikpi nyämu kwalo â wa mʉ nakpi nyämulo ni tilo✝.» 28 Yesu kinyã fu ko: «Mʉ kalaga pai wenengaĩ. Mʉ mängi he wo, mʉ adʉ na bata.» 29 Ono gu bäyugu andikä le aidi käyugä tiko ni lulu bolo, kʉ kisana Yesu kinyã: «Da nga kwale?»

30 Yesu kikalaga ha kinyã: «Kʉmba sã aguali Yelusalema yò kazolã ku Yeliko yò, kʉ kiti ku be aɨladĩ. I kigbʉ gako ahẽ dundukä, kita ko, i kimbʉ ko mbembedi na kpio, kindʉ. 31 Fuä hä, bazomutumä sã ǎzolã ti kina gu gene le. Kʉ kibi gu kʉmba le, kisʉsi bändulu gene ku bäni tutũlũ tiko. 32 Levi* sã kida logo gu ba le â, kibi gu kʉmba le, kʉ kisʉsi bändulu gene ku bäni tutũlũ tiko. 33 Ono mbe Samalia sã nǎndʉ ndʉge ngba gu gene le, kida pati gu kʉmba le, kibi ko, lungäko kizi ko. 34 Gi mbe Samalia le kigbisi mbembedi na ko, kizundu bängili gako aolo niuka kpaĩ wasã na vino ku tini, kivo ho. Kʉ kitumba ko ku lii gako nya kindʉ na ko ku bämbu agino yò, kibi pako yò. 35 Ni gu kula gililago, kʉ kikusi zende afalanga uwe, kifʉ he fu bábanda bämbu agino kinyã fu ko: ‹Mʉ bi pa gi kʉmba le. Gu falanga mʉ kagbelesa lu sʉsi gele, mi agasa lu folo ni tile lago yägä mi.›»

36 Yesu kisana hẽ kinyã: «Bala bängilo, da dagba agi abolo biata le nadʉ fu gu kʉmba nati ku be aɨladĩ ni kulako?» 37 Gu bäyugu ändikä le kikalaga ha kinyã: «Guni näbi lungä ko.» Yesu kinyã fu ko: «Mo â tigamʉ, mʉ ndʉ damängi he kina wo!»

4 «Ka bolo sã dagba loni dʉ na akandolo kama sã (100), gu lu sã dagba la kiingi. Nyã mo ni ambu nga ägu la dʉ bisuẽ bäti biama bawe na bisuẽ bäti biama (99) ngbäkungbä yò tɨpa ndʉ kagbata gu lu ingi da ku hõ nikäbi lu ni te? 5 Hõ ni käbi lu ni, ni adʉ na ngbalago kiaka lu pagolõ ni. 6 Hõ ni kayägä ni ku kpuni, ni ayamba abakʉlealani gbiã kuti gäni amulakpolo kinyã fu yo: ‹Oni dʉ na ngbalago wasã na mi, bämbikä mi bi gu gǐ kandolo naingi.› 7 Mi nagʉmba ha fu loni ya: kina wo ngbalago adʉ gbẽ ngbängbätulũ yò tɨpa bangisã bolo ingapai sa ngbäduni. Gu ngbalago le asʉsa gu asʉsa dʉ tɨpa lulu abolo bisuẽ bäti biama bawe na bisuẽ bäti biama (99) ákpi ngä nyämu sa ngbädu yo ya.»

11 Yesu kinyã belewe: «Kʉmba sã adʉ na äwiliko uwe (2) ni akumbagudee. 12 Tame kinyã fu bako: ‹Buba, Mʉ fʉ ägu ahũ kumbä fele kangia gimi.› Wele, bäyo kikpalaka gako ahũ kumukä dagba yo uwe (2). 13 Fuä bete aulu, tame kibägi ägu ahẽ dundukä ku agbiã hã, kilogo gako ahẽ dundukä kindʉ ku logo gu kula ngbiĩ tutulũ. Yò nga ha le, kʉ kigbelesi gako ahẽ dundukä ti luguzu luguzu bata. 14 Hõ kʉ agbelesi agu ahẽ ni dundukä nadʉ beko, bakele gomolõ kiti lii gu ngbiĩ le. Kʉ kida tie logo kele zingä. 15 Sidu, kʉ kindʉ kagbata sʉnge be bolo sã dagba ambe gu ngbiĩ le. Ni kikedi ko ku logo gäni äti tɨpa kʉ nibanda gäni azumbulu. 16 Kʉ ǎkpi nyämu li gu liahẽ azumbulu ǎli he, ono ka bolo afʉ nga ha fu ko ya. 17 Wele, kʉ kitona belã ku ngbäduko yò ninyã: ‹Ku buba yò, abolo sunge waĩ nali liahẽ nimbʉ yangala ha ambu. Ono mi tigimi, mi nakpi be gomolõ! 18 Mi nikaguali kaga ku buba yò. Mi anyã fu ko: Buba, mi mängi ingapai kuti Mbäli na kuti lo. 19 Mi alengba nga belewe mʉ yämbu le ni wilo te. Mʉ di le wa sã gamʉ abolo sunge.› 20 Kʉ kiguali kiga koyò du bako ni. Kʉ adʉ kindi tutulũ, bako kibi ko, lungä kizi bako lii pa ko, kʉ kiolo kiti ku golõ wiliko, kidungä ko.

21 Gi palanga le kinyã fu bako: ‹Buba, mi mängi ingapai kuti Mbäli na kuti lo. Mi alengba nga belewe mʉ yämbu le ni wilo te.› 22 Ono bako kinyã fu gako abolosʉnge: ‹Oni yée na bawene lokoo ni ipä kivo ko na ni, oni kisolo kati kuti wilinzagako kivo katala ku ndʉko yò. 23 Oni yée na palanga bagala nzẽ nzẽnzẽ, oni imi lu, ani li liahẽ kidʉ logo ngbalago. 24 Bämbikä gi wile dʉ le, kʉ aima kpi ono kʉ yägä kuti ʉnga, kʉ aingi ono mi bi ko belewe.› Wele, i kitona pumbä na ngbalago.

25 Ti gu legbo le, wiliko ni anvulũ tigako adʉ äti yò. Hõ kʉ ǎyägä ni, kʉ kimbedi ku kpolo yò, kʉ kigiĩ abia na wolo gbele. 26 Kʉ kiyämbu bolosʉnge sã kisana ni ti gu payi nǎsʉsa. 27 Gu bolosʉnge le kikalaga ha fu ko kinyã: ‹Tamelõ du yägä. Bamʉ imi gu palanga bagala nzẽ nzẽnzẽ gbẽ, bämbikä tamelõ yägä na wene kpotoko.› 28 Anvulũ kizingi, kika pa da kpolo yò. Bako kiyee kinizungädi ko ya kʉ da kpolo yò. 29 Ono kʉ kikalaga ha fu bako ninyã: ‹Badʉngu agalã dʉ le mi nâmanga sunge folo, mi aká nga gǎ lʉgute wasã te. Ono mʉ atafʉ nga zavula kina wili mémé fele sã te tɨpa mi mängi pumbä wasã na abakʉleami! 30 Ono hõ yägä gi wilo le ni tigako, ko naima gbelesa gǎ hũ kumukä dundukä fu abanambala, mʉ imi nzẽnzẽ palanga bagala tɨpa ko!› 31 Bako kikalaga ha fu ko kinyã: ‹Wile, mʉ nidʉ na mi wasã aulu dundukä, ägu ahẽ dundukä nga gimi si ni gamʉ. 32 Ono si ni lẽ alẽ ani li liahẽ kidʉ na ngbalago bämbikä wilinamʉ dʉ le, kʉ aima kpi ono kʉ yägä kuti ʉnga, kʉ aima inga ono mi bi ko belewe.›»

9 Fuä hä, Yesu kipe gi kpia pai le â fu ägu abolo nǎbi tiyo ni lulu abolo kinibisila pa akʉläyo: 10 «Akumba uwe andʉ́ ku bakele bämbu Mbäli yò kakpala fu Mbäli. Gu ko sã angia Falusi, gu kula ko kingia babägi pákʉ. 11 Falusi alʉ ngba ndʉko nikpäli fu Mbäli ku ngbäduko yò wa gele: ‹Akoo Mbäli, mi natambwa lo bämbikä mi wa gu kula abolo te ngia abolo diĩ, ngia hila hila abolo, ngia abolo bäli. Mi natambwa lo bämbikä mi wa gu babägi pákʉ le te. 12 Mi nâginä hẽ bala uwe vulu poso sã kinifʉ sã dagba bawe lii ägu ahẽ dundukä mi nâgbiã hã.› 13 Babägi pákʉ tigako, kʉ alʉ́ tutulũ tǒni, ka kʉ asada nga tumba bängiliko ku ali yò ya. Ono, kʉ kinizädi ngbäduko ni bilatise ninyã: ‹Akoo Mbäli, mʉ bi lungä le, mi nga bolo ingapai.› 14 Mi nápe he fu loni ya: Babägi pákʉ du nagá ku kpʉko yò i naima vu ko ti gako ingapai, ono Falusi te. Bämbikä gu bolo dundukä nakiĩsä pa tini, i aumbäsi päni. Ono gu ni naaumbäsi pa tini, i akiĩsä päni.»

19 Kʉmba sã adʉ yò ni bolo kumukä. Kʉ anavoda bawenewene wesewese alokoo gino ho anidʉ ku ali. Aulu dundukä, kʉ anamanga pumbä kinili bawenewene liahẽ gbẽ. 20 Lungälungä bolo sã adʉ yò limäko angia Lazalo. Kpotoko na ba ha adʉ na kina aalo bagbandua. Kʉ ǎpi pangbändimä gi bolo kumukä le. 21 Kʉ ǎkpi nyämu li gu bete liahẽ nǎtiwa lii ga bolo kumukä mesa, ono kina aango nǎyee kǎsila gako aalo bagbandua. 22 Gu lungälungä bolo le kikpi. Amalaika kiaka ko ku pati Abalahama yò*. Bolo kumukä â ti gako kikpi. I kikpisidi ko. 23 Yò dʉ kpikpí abolo ni*, kʉ adʉ logo bakele egetele. Kʉ kitumba bängiliko kibi Abalahama tutulũ na Lazalo pati ko. 24 Wele, kʉ kita ngbako kinyã: ‹Abalahama, buba, mʉ bi ngä lungäle kikedi Lazalo kʉ́ mogó wili nzagako ku logo ime tɨpa zelesa milãle bämbikä mi naima gbẽ logo ägi amilã we le.› 25 Abalahama kikalaga ha fu ko kinyã: ‹Wilee, mʉ tingidi he ya mʉ agbiã wenewene apai logo gamʉ bata lii kpoto sende. Ono Lazalo ti gako, kʉ agbiã lungä. Awele, kʉ gbiã zelesa ngbäduse nò. Ono mo ti gamʉ, mʉ nagbiã egetele. 26 Ku lii gi pai le, badudungulä ngbungumu gu dʉ dagba lani na oni tɨpa ägu yo käkpi nyämu guali nò kayee fuä loni, ka i lengbe nga kamanga ha ya. Ka bólo lengbe nga kaguali yò dʉ oni ni kasi konò fuä lani â ya.› 27 Bolo kumukä kinyã: ‹Mi nazungädi lo tie buba, mʉ kedi Lazalo ku buba yò. 28 Bämbikä mi na awilibämi bisuẽ. Kʉ́ gbe tuyo tɨpa ka i yée ngä â ti gäyo ku logo gi bá mbusa le ya.› 29 Abalahama kikalaga ha fu ko kinyã: ‹Awilibamʉ na ga Mose andikä sa beyo gbiã kuti ga anäbi abuku. Í gĩ he.› 30 Bolo kumukä kinyã: ‹Ako, buba Abalahama. Ono ka si ngia bolo sã dagba ägu yo naímá kpi guali kindʉ fuä yo, i asá ngbäduyo asá.› 31 Abalahama kikalaga ha fu ko kinyã: ‹Ka i ágiã nga ga Mose andikä na ga anäbi abuku ya, bolo azavula zɨnga be kpio, i aida nga pai sã te.›»