Proteção e segurança: refúgio e amparo nas crises

1 Ang Dios amo ang nagaprotektar kag nagahatag sa aton sang kusog.

Handa gid siya permi nga magbulig sa tion sang kalisod.(Salmo 46:1)

1 Ang bisan sin-o nga magpaprotektar sa Labing Mataas nga Dios nga Makagagahom

protektaran niya.

2 Makasiling siya* sa Ginoo, "Ikaw ang akon dalangpan kag mabakod nga palanaguan.

Ikaw ang akon Dios nga akon ginasaligan."(Salmo 91:1,2)

4 Protektaran ka niya pareho sang pagprotektar sang pispis sa iya mga buto

sa idalom sang iya mga pakpak.

Sa iya katutom, protektaran ka niya kag apinan.(Salmo 91:4)

7 Bisan linibo ka tawo ang magkalamatay sa imo palibot, indi ka maano.(Salmo 91:7)

9 Tungod kay ginhimo mo nga dalangpan ang Ginoo,

ang Labing Mataas nga Dios nga akon manugprotektar,

10 wala sing kalamidad ukon kahalitan nga magaabot sa imo ukon sa imo panimalay.(Salmo 91:9,10)

1 Ang Ginoo amo ang akon kasanag, manluluwas,

kag mabakod nga dalangpan,

gani wala ako sing kahadlukan.(Salmo 27:1)

2 Siya lang ang akon palalipdan nga bato kag manluluwas.

Siya ang akon dalangpan, gani indi gid ako matublag.(Salmo 62:2)

9 Ginoo, ikaw ang dalangpan sang mga ginadaogdaog

sa tion sang kalisod.(Salmo 9:9)

3 Pero ang matuod, pareho ka sa taming nga nagaprotektar sa akon.

Ginapadaog mo ako kontra sa akon mga kaaway,

kag ginapabakod mo ako.(Salmo 3:3)

1 Ginoo, kadamo sang akon kaaway;

kadamo sang nagakontra sa akon!

2 Nagasiling pa sila nga indi mo kuno ako pagluwason.*

3 Pero ang matuod, pareho ka sa taming nga nagaprotektar sa akon.

Ginapadaog mo ako kontra sa akon mga kaaway,

kag ginapabakod mo ako.

4 Nagapanawag ako sa imo, Ginoo,

kag ginasabat mo ako sa imo balaan* nga bukid.

5 Kag tungod kay ginabantayan mo ako,

makatulog ako kag makamata pa.

6 Bisan linibo pa ka kaaway ang nagalibot sa akon,

indi ako mahadlok.(Salmo 3:1-6)

30 Ang imo pamaagi, O Dios, wala sing sala.

Ang imo pulong masaligan gid.

Pareho ka sa taming

sa tanan nga nagapangayo sang proteksyon sa imo.(Salmo 18:30)

35 Ginaprotektaran mo ako pareho sa taming,

gani luwas ang akon kabuhi.

Ginatipigan mo ako paagi sa imo gahom,

kag paagi sa imo bulig nangin bantog ako.

36 Ginahatagan mo ako sang matawhay nga alagyan,

gani wala nagakasandad ang akon mga tiil.(Salmo 18:35,36)

11 Pero kabay pa nga magmalipayon ang tanan

nga nagapangayo sang proteksyon sa imo.

Kabay pa nga magkinanta sila sa kalipay.

Protektari sila nga nagahigugma sa imo

para magmalipayon sila tungod sang imo ginhimo para sa ila.

12 Kay ginapakamaayo mo, Ginoo, ang mga matarong.

Ang imo gugma nagaprotektar sa ila pareho sa taming.(Salmo 5:11,12)

6 O Dios, nagapangamuyo ako sa imo

kay nahibaluan ko nga pagasabton mo ako.

Pamatii ang akon pangamuyo.

7 Ipakita ang makatilingala mo nga gugma.

Paagi sa imo gahom, ginaluwas mo ang mga tawo

nga nagapangayo sang proteksyon sa imo tungod sang ila mga kaaway.

8 Halungi ako pareho sang paghalong sang tawo sa iya nga mata,

kag protektari ako pareho sang pagprotektar sang pispis sa iya mga buto

sa idalom sang iya mga pakpak.

9 Protektari ako sa akon mga kaaway

nga nagasalakay sa akon palibot para patyon ako.(Salmo 17:6-9)

7 Ikaw ang akon palanaguan;

tipigan mo ako sa tion sang kalisod,

kag palibutan mo ako sang mga nagahinugyaw sa kalipay

tungod sang imo pagluwas sa akon.(Salmo 32:7)

1 Dalayawon ang Ginoo nga akon palalipdan nga bato.

Ginahanas niya ako sa pagpakig-away.

2 Siya ang akon mahigugmaon nga Dios kag mabakod nga palanaguan.

Siya ang akon dalangpan kag manughilway.

Siya ang akon taming kag sa iya ako nagapangayo sang proteksyon.

Ginapasakop niya sa akon ang mga nasyon.*(Salmo 144:1,2)

1 Ikaw, Ginoo, amo ang akon manugbantay,

gani indi ako pagkulangon.(Salmo 23:1)

10 Ang leon mahimo nga kulangon sang kalan-on kag gutumon,

pero ang mga nagadangop sa Ginoo

indi gid pagkulangon sang maayo nga mga butang.(Salmo 34:10)

3 Magsalig ka sa Ginoo kag maghimo sang maayo.

Magpuyo ka sa duta nga wala sing may ginakahadlukan nga katalagman.(Salmo 37:3)

25 Halin sang akon pagkabata hasta subong nga tigulang na ako,

wala pa ako makakita nga ang mga matarong ginpabay-an sang Ginoo

ukon ang ila mga kabataan nagapangayo-ngayo sang pagkaon.(Salmo 37:25)

8 Indi ninyo pagsunda ang ila ginahimo. Kay nakahibalo na ang aton Amay sang aton mga kinahanglan sa wala pa kita makapangayo.(Mateo 6:8)

33 Gani unaha ninyo ang pagpasakop sa paghari sang Dios kag ang pagtuman sa iya kabubut-on, kag ihatag gid niya ang tanan ninyo nga mga kinahanglanon.(Mateo 6:33)

13 Masarangan ko nga atubangon ang bisan ano nga kahimtangan paagi sa bulig ni Cristo nga nagapabakod sa akon.(Filipos 4:13)

19 Kag tungod nga kamo ara kay Cristo Jesus, ang akon Dios magahatag sa inyo sang tanan ninyo nga mga kinahanglanon halin sa kabuganaan sang iya manggad.(Filipos 4:19)

1 Nagatan-aw ako sa mga bukid;

diin bala nagahalin ang akon bulig?

2 Ang akon bulig nagahalin sa Ginoo, nga naghimo sang kalangitan kag sang kalibutan.

3 Indi niya pag-itugot nga matumba ka.

Siya nga nagatipig sa imo, wala nagakatulog.

4 Pamati! Ang manugtipig sang Israel wala nagapatuyo-tuyo ukon nagakatulog.

5 Ang Ginoo nagatipig sa imo;

ara siya sa imo tupad sa pagprotektar sa imo.

6 Ang init sang adlaw indi makahalit sa imo ukon ang siga sang bulan kon gab-i.*

7 Tipigan ka sang Ginoo sa tanan nga katalagman;

tipigan niya ang imo kabuhi.

8 Ang Ginoo magatipig sa imo subong kag hasta san-o, bisan diin ka makadto.*(Salmo 121:1-8)

7 Ang anghel sang Ginoo nagabantay

sa mga nagatahod sa Ginoo,

kag ginaluwas niya sila sa katalagman.(Salmo 34:7)

22 Luwason sang Ginoo ang iya katawhan nga iya mga alagad.

Wala sing bisan isa nga nagadangop sa iya nga pagasilutan niya.(Salmo 34:22)

1 O Dios, tipigi ako,

kay sa imo ako nagapangayo sang proteksyon.(Salmo 16:1)

8 Permi ko ikaw ginahunahuna, Ginoo.

Kag tungod nga ara ka sa akon tupad, indi ako matublag.(Salmo 16:8)

1 Kabay pa nga sabton ka sang Ginoo

kon ara ka sa kalisod.

Kabay pa nga protektaran ka sang Dios ni Jacob.

2 Kabay pa nga buligan niya ikaw halin sa templo didto sa Zion.(Salmo 20:1,2)

20 Tipigi ang akon kabuhi kag luwasa ako!

Indi ako pagpakahuy-i, kay sa imo ako nagapangayo sang proteksyon.

21 Matarong ang akon kabuhi* kag wala sing kasawayan,

gani protektari ako.

Kay nagasalig ako sa imo.(Salmo 25:20,21)

17 Ang mga kabayo indi masaligan nga makapadaog sa inaway.

Ang ila puwerte nga kusog indi makaluwas.

18 Nagabantay ang Ginoo sa mga nagatahod sa iya,

nga nagasalig sa iya gugma

19 nga magaluwas sa ila sa kamatayon

kag magatipig sang ila kabuhi sa tion sang gutom.(Salmo 33:17-19)

20 Nagahulat kita nga may pagsalig sa Ginoo.

Siya ang nagabulig kag nagaprotektar sa aton.*(Salmo 33:20)

6 Kaupod ko ang Ginoo, gani indi ako mahadlok.

Ano ang mahimo sang tawo sa akon?(Salmo 118:6)

8 Mas maayo nga magdangop sa Ginoo kaysa magsalig sa tawo.(Salmo 118:8)

10 Ang Ginoo pareho sa mabakod nga tore, kag sa iya nagadangop ang mga matarong para indi sila maano.(Hulubaton 18:10)

26 kay makasalig ka nga bantayan ka sang Ginoo; ilikaw niya ikaw sa katalagman.(Hulubaton 3:26)

9 Ang tawo nga nagakabuhi nga matarong indi maano,

pero ang tawo nga nagakabuhi sing indi husto mahibaluan ang iya ginahimo.(Hulubaton 10:9)

26 Ang pagtahod sa Ginoo nagahatag sang sigurado nga kabakod kag proteksyon sa tawo kag sa iya mga anak.(Hulubaton 14:26)

5 Ang tagsa ka pulong sang Dios masaligan gid.

Pareho siya sa taming sa mga nagapangayo sang proteksyon sa iya.(Hulubaton 30:5)

6 Kay ang Ginoo amo ang nagahatag sang kaalam. Sa iya man nagahalin ang ihibalo kag pag-intiendi. 7 Ginaprotektaran niya kag ginatigan-an sang kadalag-an* ang mga nagakabuhi sing husto kag wala sing kasawayan. 8 Ginabantayan niya kag ginatipigan ang mga ginahimo sang mga matarong kag matutom sa iya.(Hulubaton 2:6-8)

6 Magpakabakod kamo kag magpakaisog. Indi kamo magkahadlok sa ila kay ang Ginoo nga inyo Dios nagaupod sa inyo; indi niya kamo pagbayaan ukon pagpabay-an."(Deuteronomio 31:6)

27 Ang wala sing katapusan nga Dios amo ang inyo dalangpan;

suportaran niya kamo sang iya wala nagauntat nga gahom.

Ipatabog niya sa inyo ang inyo mga kaaway,

kag magsugo siya sa inyo sa paglaglag sa ila.(Deuteronomio 33:27)

14 Ang Ginoo magapakig-away para sa inyo. Indi na kinahanglan nga magpakig-away pa kamo."*(Exodus 14:14)

3 Hatagan mo, Ginoo, sang kompleto nga kalinong

ang tawo nga ang iya hunahuna nasintro sa imo,

kay nagasalig siya sa imo.(Isaias 26:3)

4 Bisan magtigulang na kamo kag mag-ubanon, ako ang magaatipan sa inyo. Ginhimo ko kamo kag tatapon ko gid kamo. Buligan ko kamo kag luwason.(Isaias 46:4)

17 Wala sing armas nga ginhimo nga magadaog sa imo, kag masabat mo ang mga akusasyon kontra sa imo. Amo ina ang maangkon sang akon mga alagad. Mabaton nila ang kadalag-an nga may pagkamatarong halin sa akon. Ako, ang Ginoo, ang nagasiling sini."(Isaias 54:17)

7 Maayo ang Ginoo; mabakod siya nga dalangpan sa tion sang kalisod, kag ginatatap niya ang nagadangop sa iya.(Nahum 1:7)

29 Indi bala barato lang kon baklon ang duha ka maya? Pero wala sing isa sa ila nga mahulog sa duta nga indi suno sa pagbuot sang inyo Amay. 30 Kag kon parte sa inyo, bisan pa ang inyo buhok sa ulo naisip niya tanan. 31 Gani indi kamo magkahadlok, kay mas mahal pa kamo sang sa madamo nga maya.(Mateo 10:29-31)

31 Karon, kon hunahunaon ta ini nga mga butang, makasiling kita nga ang Dios nagaapin gid sa aton, kag wala sing may makahalit sa aton.(Roma 8:31)

6 Gani magpakaisog kita nga nagasiling,

"Ang Ginoo amo ang nagabulig sa akon,

gani indi ako mahadlok. Ano ang mahimo sang tawo sa akon?"*(Hebreo 13:6)

3 Pero masaligan ang Ginoo. Siya ang magapabakod kag magaprotektar sa inyo kay Satanas.(2 Tesalonica 3:3)

15 Wala ako nagapangabay nga kuhaon mo na sila diri sa kalibutan, kundi nga apinan mo sila kontra kay Satanas.(Juan 17:15)

18 Nahibaluan ta nga wala sing tawo nga nangin anak sang Dios nga nagapadayon sa pagpakasala, kundi ginatipigan siya sang Anak sang Dios, gani indi siya matandog ni Satanas.(1 Juan 5:18)

8 Gani sa akon pagtulog indi ako mahadlok

tungod kay ginabantayan mo ako, Ginoo.(Salmo 4:8)

22 Itugyan sa Ginoo ang imo mga palaligban,

kay atipanon niya ikaw.

Indi niya pagpabay-an nga maano ang mga matarong hasta san-o.(Salmo 55:22)

16 Pero ako ya magakanta parte sa imo kusog.

Kada aga magakanta ako sing malipayon sa pagdayaw sa imo gugma.

Tungod kay ikaw ang akon dalangpan, ang nagaprotektar sa akon sa tion sang kalisod.(Salmo 59:16)

114 Ikaw ang akon palanaguan kag manugprotektar;

nagasalig ako sa imo pulong.(Salmo 119:114)

8 Tumanon mo, Ginoo, ang imo mga promisa sa akon.

Ang imo gugma wala sing katapusan.

Indi pagpabay-i ang imo mga ginhimo.(Salmo 138:8)

25 Kay papahuwayon ko ang mga ginakapoy kag busgon ko ang tanan nga nagakaluya sa kagutom. Gani magasiling sila,*(Jeremias 31:25)

12 Amo ini ang kabangdanan nga nagaantos ako subong. Pero wala ko ginakahuya ang natabo nga ini sa akon tungod kay kilala ko si Cristo nga akon ginasaligan, kag nasiguro ko gid nga sarang siya makatipig sang gintugyan niya sa akon* hasta sa adlaw nga siya magabalik.(2 Timoteo 1:12)