4 Mbameni IMNDEWA na tsingupfu tsake,

mghendelele kuubama uhanga wake.

11 Mghendeleni IMNDEWA yane ngupfu;

Muubame uhanga wake ghamatsuwa ghose.

4 Chinu chimwe nimlomba IMNDEWA,

nacho chicho chanitsobama,

nene nikale mna ing’anda ya IMNDEWA matsuwa ghose gha ugima wangu,

nilolese ukunogha kwa IMNDEWA,

na ukumbama yeye mna ing’anda ya Imulungu.

10 Kwaapfila tsuwa limwe mna ipfibwalu pfa ing’anda yako linogha

kubita matsuwa elufu imwe hanu hangi.

Nene nisaghula ukwima hamlango mng’anda mwa Imlungu wangu,

kubita ukukala mna ghamahema gha iwanu iwehile.

11 Ila kutsonilangulitsa nitsimanye tsinzila itsilongotsa kuna ugima,

na kutsonimemetsa indeng’elo kwa ukuwa kwako habehi na nene,

mana kuna ubali wako wa kujilo kumema ighanoghile ing’aghomala baye.

17 Iwanu wana ihaki womlilila IMNDEWA, naye kowahulika,

kowakombola kulawa mna ghamaghayo ghawo ghose.

18 IMNDEWA kahabehi na iwanu awala iwatenyuke imimoyo,

na awala iwalihela chinu cha ukwihuwila.

5 Uhole wenu umanyike ne iwanu wose, Imtwatsa ka habehi ukuya.

13 Lekeni sambi, kwa kwilunga na Yesu Kiristu mwemwe yamkalile kutali ghumwande, mghalighwa habehi kwa Kiristu.

6 Ona ghendo, uluso wako na libatsi lyako pfitsonikoleletsa,

mna ghamatsuwa ghose gha ugima wangu,

na nene nitsokala mna ing’anda ya IMNDEWA kwa matsuwa ghose.

18 "Sitsowaleka mwawachuwa baye, nakutsa kuna mwemwe.

57 IMNDEWA, Imulungu wetu, yakale na twetwe, ka pfayakalile na iwahenga wetu, yaleke kutuleka wala kutwasa.

31 Lekeni kwa libatsi lyako ng’uwalekile baye wahupe wala wakomighwe,

kwaapfila ghwehwe kwa Imulungu wa libatsi na uluso.

16 Imtwatsa imwenyegho iyolapfa tindiwalo yamwing’eni tindiwalo ghamatsuwa ghose na kwa nzila tsose. Imtwatsa yakale namwe wose.

11 Ndughu tsangu lelo nowaagha, muwe wanoghile kwa chila chinu, mwalangule chinu chimwe, ghakindeni ghose ghaniwalongele, kaleni bila kwisonga, na Imulungu wa unoghelo na tindiwalo katsokala namwe.

13 Apfi pfipfo pfatumanya ka twokala mghati mwe Imulungu naye kokala mghati mwetu, kwaapfila katwing’a Ghumuhe wake.

18 Tsa kuduhu munu wowose ma iyamwonile Imulungu, ila Imlungu Mwana yaliyeka, iyali habehi ghendo na Baba, yuyo iyomtenda Imulungu yamanyike.

28 Musa tsakakala ne IMNDEWA ako kuchidunda matsuwa alubaini, chilo na misi, ng’ajile chijo wala kunwa matsi. Tsakandika mbuli tsose tsa laghano, ghamalaghitso ghala kumi.

9 Muwahonetse iwatamu iwali hao muwalongele, ‘Undewa we Imulungu wa habehi yenu.’

1 Ghumuhe ghwa Imulungu kamtsila Azaria mwanaghe Obedi, 2 naye kaghenda kumbokela Asa, kuya kamlongela, "Unihulikitse, ghwe mfalume Asa na iwanu wose wa Yuda na Benjamini, IMNDEWA kahamwe na mwemwe, ka namwe mtsakuwa hamwe naye. Mng’ambama mtsomwona, lekeni mng’amleka, naye katsomlekani. 3 Kwa matsuwa mengi, wanu wa Isiraeli tsawakala aku wahela Imulungu iyolongesa, wala watambika wakuwafunda, wala ghamalaghitso, 4 lekeni hawapatile ghamaghayo, wawo wamuyila IMNDEWA, Imulungu wa Isiraeli, wambama, kuya wamwona. 5 Mna ghamatsuwa agho isi ng’aikalile tulu ghendo baye, kwaapfila tsakuduhu munu iyadahile ukwingila au ukulawa aku kamgima, iwanu wose wa isi ayo wang’ali woghaya sideke. 6 Isi imwe ing’ali itowa na isi ingi, mji ghumwe ghung’ali ghwitowa na mji ghungi, kwaapfila Imulungu yang’ali yowatenda waghaye na waghanzike. 7 Lekeni mwemwe mgangamale, wala mleke kutenyuka, kwaapfila mtsoghwekighwa kwa tsisang’ano tsamtenda." 8 Asa hayahulike tsimbuli atsino tsa unabii wa Azaria mwana wa Obedi, ghumoyo ghwake ghupata ingupfu. Kapfibomola ipfinyagho pfose ipfidesa ipfili mna isi yose ya Yuda na Benjamini na kulawa mna imiji yose iyaibokile mna isi ya pfidunda pfa Efremu. Kuya kaitsenga keli imatsabahu ya IMNDEWA ikalile hambele ha ichibwalu cha ing’anda ya IMNDEWA. 9 Asa kawakema hamwe iwanu wose wa Yuda na Benjamini, na iwanu wangi iwang’ali wokala muisi mwake, kulawa Efuremu, Manase na Simeoni, awo tsawamtsila hawonile ka IMNDEWA, Imulungu wake kahamwe naye. 10 Wose wetingana Yerusalemu mna ghumwetsi ghwa kadatu mna ghumwaka ghwa kumi na tano ghwa utawala wa Asa. 11 Mna litsuwa alyo wamlapfila IMNDEWA nambiko tsa ng’ombe miya saba, na ng’olo na mene elufu saba kulawa mna wanyama iwawabokile iwoyile nawo. 12 Kuya watenda laghano ka watsomtegheletsa IMNDEWA, Imulungu wa iwahenga tsawo kwa ghumoyo ghwose na kwa muhe ghwawo ghwose. 13 Na imunu wowose iyoleka kumhilikitsa IMNDEWA, Imulungu wa Isiraeli yakomighwe, yawe msongolo au mnzehe, yawe mmale au ipinga. 14 Welighita kwa IMNDEWA kwa litsi kulu, kwa kukemelela aku wotowa talumbeta na malati. 15 Iwanu wose wa Yuda wadeng’elela sideke, kwapfila tsawelaha kwa ghumoyo ghwao ghwose. Wambama Imulungu kwa ghumoyo ghose, kuya wampata. Naye IMNDEWA kawaleka wakale tseghamba chila ubali. 16 Asa pfipfila kamlapfa Maaka, mai wake, mna ulongotsi wa umalikia kwaapfila tsakatenda chinyagho ichidesa cha Ashera. Asa kachibena na kuchihondahonda na kuchilakatsa ichinyagho acho mna lwanda lwa Kidroni. 17 Hata apfo ng’ahahinyile baye hanu henulighwe ha ukutambikila milungu ingi mna isi ya Isiraeli, lekeni yeye kaghulapfa ghumoyo ghwake ghose kwa IMNDEWA mna ghamatsuwa ghake ghayakalile mgima. 18 Kapfuyitsa ipfinu mna ing’anda ya Imulungu, apfila aba wake pfayapfilapfile kwa Imulungu, na apfila pfayapfilapfile yeye mwenyegho kwa Imulungu, tsakoyitsa fetsa, nzahabu, na pfombo pfingi. 19 Tsakuduhu keli ng’ondo, mbaka mna ghumwaka ghwake ghwa salasini na tano ghwa ufalume wa Asa.