Reino dos céus

Umulumbe wakipao kyafiswa

44 "Ubufumu bwa mumulu bwaba nge kipao kyafiswa mwibala kintu umuntu atutwila nokufimbapo, elo aya nasansamuka ngansi, asitisya nafyonse fintu aakwata ayasitamo lilya ibala.

Umulumbe wa bulungu

45 "Nakabili Ubufumu bwa mumulu bwaba ngo muntu wamakwebo ulefwaya ubulungu ubwayemba. 46 Kilya asanga ubwayembesya ayasitisya fyonse fintu aakwata nokuyabusita.

Umulumbe wa luseke lwalubanga

31 Yesu abebele umulumbe naumbi ukuti, "Ubufumu bwamumulu bwaba ngo luseke lwa lubanga ulo umuntu apiitile nokuya byala mwibala lyakwe. 32 Luseke ulunono panseke syonse, lelo ilyo lwakula, luba kimpunsa ikikalamba palifyonse mwibala. Kisanguka ikimuti, ikyakuti nefyoni fipanga ifinsa kumisambo yakiko."

Umulumbe wantutumusi

33 Kabili Yesu abeba naumbi umulumbe ukuti, "Ubufumu bwamumulu bwaba nge ntutumusi sintu namayo apiitile angandwila mufipimo fitatu ifyabunga mpaka umufuba onse watutumuka."

Umulumbe wakalolo

24 Yesu abebele umulumbe naumbi ukuti, "Ubufumu bwa mumulu bwaba ngo muntu uwabyele imbuto isisuma mwibala lyakwe. 25 Lelo lilya abantu bonse bali mutulo ubusiku, umulwani aisile byalamo kalolo muŋano nokuya. 26 Kilya imisonga yamena yapakula nokupakula, elo kalolo nayo yamoneka. 27 Ababomfi baulya muntu baisile kuli ena nokumweba ukuti, ‘Mwemfumu, busye tamwatandile imbuto isisuma mwibala? Nga kalolo aafumine pi?’ 28 Ayaswike ukuti, ‘Umulwani ewakitile ifi. Busye ulefwaya tuleyanukulamo kalolo?’ 29 Abaswike ukuti, ‘Awe, pantu ilyo mulenukula kalolo kuti mwanukwila pamo neŋano. 30 Lekeni iŋano na kalolo fikulile pamo mpaka pa busombosi. Nkeba abakalasombola ukunukulamo kalolo pakwamba, ukuikaka mufikuka nokuyokya, kabili nokulonganya iŋano ukubika mubutala.’ "

Yesu alondolola umulumbe wakalolo

36 Yesu afumine pa mabumba nokwingila muŋanda, abasambi bakwe baisile kuli ena nokumweba ati, "Twebe fintu umulumbe wakalolo mwibala ulepilibula."

37 Yesu abasuka ukuti, "Umuntu uwabyele inseke isisuma Mwana Wamuntu. 38 Ibala lisonde, inseke isisuma bantu aba Mubufumu, kalolo bantu bamubifi, 39 kabili nomulwani uwatandilemo inseke ni Kiwa. Ubusombosi nimpela yankulo, kabili na babomfi babusombosi ni bamalaika. 40 Ngafilya kalolo alonganikwa nokokewa mumulilo, efintu kikaba na pampela yakyalo. 41 Umwana Wamuntu akatuma bamalaika mukukolonganika abo bonse abalenga abantu ukubembuka nabo bonse abakita ifintu ifibi, ukubafumya Mubufumu bwakwe, 42 kabili bakabaposa mwilungu lyamulilo, umukaba ukulila nokusumanya ameno. 43 Elo abalungami bakabengesime nga kasuba Mubufumu bwakwa Tata. Uukwete amatwi naomfwe!

Umulumbe wa Bukonde

47 "Kabili Ubufumu bwamumulu bwaba ngo bukonde ubwaposwa pamumana nokwipaya isabi lyamisango yonse. 48 Lintu isabi lyaisula mubukonde abashila babutintila kunshiko baikala balasala, ilisuma babika mukitunga, ilibi baliposa. 49 Efintu kikaba pakupwa kwakyalo, bamalaika bakesapatula abantu ababifi ukubafumya kubalungami 50 nokuyabaposa mwilungu lyamulilo umo bakalila nokusumanya ameno yabo.

Amapaalo yakine

3 Balipalwa abapiina mumupasi;

pantu Ubufumu bwamumulu bwabo!

4 Balipalwa abaloosya;

pantu bakakoselesiwa.

5 Balipalwa abamutembo;

pantu bakapokelela fintu Lesa alaya!

6 Balipalwa abansala nekilaka kyakukita ubulungami;

pantu Lesa akalenga bakekute.

7 Balipalwa abaluse,

pantu nabo bakabelelwa uluse!

8 Balipalwa abasanguluka imitima,

pantu bakamona Lesa.

9 Balipalwa abaapanga umutende;

pantu baketwa abana bakwa Lesa!

10 Balipalwa abo abapakasilwa pamulandu wabulungami,

pantu Ubufumu bwamumulu bwabo!

11 Muli abapalwa, abantu ngabamituka nokumipakasa nokumibepesya ubufi bwamisango misango pamulandu wandi. 12 Beni abansansa kabili temweni pantu ikilambu kyenu ikikalamba kyasungilwa mumulu. Ifi efintu bakasesema abaliko kale bapakeswe.

Ninani umukalamba?

1 Pali ilya nsita abasambi baisile kuli Yesu mukumwipusya ukuti, "Busye ninani umukalamba mu bufumu bwa mumulu?"

2 Yesu aitile umwaike amwimika pakati kabo, 3 nokulanda ukuti, "Ndemyeba ikisinka ukuti ngatamupilibwike nokuba ngo mwana umunono tamwakengile mubufumu bwa mumulu. 4 Onse uwaikefya ngo mwana umunono, mukalamba mu bufumu bwa mumulu.

14 Lelo Yesu alandile ukuti, "Lekeni abana abanono bese kuli nebo mwibakanya, pantu ubufumu bwa mumulu bwabo."

23 Kabili Yesu aebele abasambi bakwe ukuti, "Ndemyeba ikinekine ukuti, kintu kyasupa uwafyuma ukwingila mu bufumu bwa mumulu. 24 Nakabili ndemyeba ukuti, kyayangukapo Ingamila ukupula mu linso lyansindano ukukila uwafyuma ukwingila mu bufumu bwakwa Lesa."

25 Lintu abasambi baumfwile aya masiwi balipapile umupwilapo. Baipwisye ukuti, "Nomba busye kansi ninani uwingapusuka?"

26 Lelo Yesu abalolesye nokubasuka ukuti, "Ifi fintu fyayafya kubantu, lelo kuli Lesa fyonse fyalyanguka."

5 Ufweni mwebabwananina abatemwikwa bandi! Busye Lesa tasala aba bantu abo abantu pano sonde beta ukuti bapina ukuba abakankala mukitetekelo? Abasala ukupyana ubufumu buntu Lesa alaya abamutemwa.

Nsyakwisiba

21 "Tebonse abangita ukuti, ‘We mfumu, we Mfumu’ abakengila Mubufumu bwamumulu kanofye abo abakita fintu Taata wamumulu afwaya ukuti bakite.

19 Eikyo kansi onse uwatobapo limo pamafunde nangu lingakyepa syani, nokufundisya abantu bambi ukukita fimofine aketwa umunono Mubufumu bwa mumulu. Lubali lumbi nakabili onse uwasunga ifipope nokufundisya baambi ukukita fimofine, akaba umukalamba Mubufumu bwa mumulu. 20 Ndemyeba nati tamwakengile Mubufumu bwa mumulu ubulungami bwenu ngatabwakakile ubwaba Falise naba Kafundisya bamafunde.

9 Ifi nomba efyo mufwile ukupepa:

‘Mwe Taata wesu uwamumulu,

isina lyenu likindikwe,

10 ubufumu bwenu bwise,

ubufwayo bwenu bukitwe pesonde ngamumulu.

Ubusimikilo bwakwa Yohani Kabatisya

1 Muli silya nsiku Yohani Kabatisya aisile alesimikila mukiswebebe kyamu Yudeya. 2 Alandile ukuti, "Lapileni, pantu Ubufumu bwa mumulu nabupalama!"

17 Ukufuma pali ilya nsita, Yesu ayambile ukusimikila ukuti, "Lapileni, pantu Ubufumu bwamumulu nabupalama!"

7 Kabili mukalesimikila ukuti, ‘Ubufumu bwakwa Lesa buli mupepi!’

11 Ndemyeba ukuti, abengi bakesa ukufuma kukabanga nakumasamba nokwikala pamo na Abulahamu, Isaaki na Yakobo pamutebeto Mubufumu bwamumulu.

11 Ndemyeba ukuti Yohani mukalamba ukukila bonse abaikalapo pakyalo. Lelo uwakepesya Mubufumu bwa mumulu mukalamba ukukila Yohani. 12 Ukufuma pansita yakwa Yohani Kabatisya ukufika nandakai Ubufumu bwamumulu bwaba bwakulwila, nababulwila pamaka ebabupoka.