Reino dos céus

Yoba ta mige moni podo teke yeigo, ta u kanugwa pre ka ebrie dugwa

44 Jisas yegl didre, ama yegl dugwa, God yoba kingno mogl, suglno morabuka i yegl mere paugwa, yoba ta boks mige ya bonagana podo borabuka ta makan mitna atne yogo, yagl ta wake kandre, gun podo yedre, tabre makan si kegl didre, ye pi taraglmo ya yugumo toglmo mudu topo bogl idre, ye tabre pi makan ta box i yogo, kanumara ikra topo si yumiwe dugwa.

Jisas bis nuguno ta mige podo boglkwa pre ka ebrie dugwa

45 Jisas yegl didre, ama yegl dugwa, God yoba kingno mogl, suglno morabuka i pre ka ebrie ta ama yegl dinaglka. Bisnis man ta bis nugo kruo wakai wakai yenabuka i, idre, aglke kor topo bogl inagledi doko wan moglkwa. 46 Doko wan mogl, ege swara ta pi mige podo kaima borabuka ta kanugwa. Kandre, pi taraglmo mudu ta kan nogwa i, topo bogl idre, bis nugo ikra topo sumiwe di, Jisas yegl dugwa.

Ede mastet mogomo ka ebrie

31 Ana Jisas ye ka ebrie swara ta ama yegl di togwa, God yoba kingno mogl, suglno morabuka i, ede mastet mogomo mere yegl ta pame dinaglka. Yagl ta mastet mogo ta i pi kaya mokna ere yaglmara suna yaglkwa. 32 Ana mastet mogo i, kebra kaima yedre, kaya mokna mogo tau togwa ba mastet pare ede mitna ogwa igne, ede mere yegl pai, kaya mokna mudu egre i atne edugwa. Ede mere yegl paugo, yogagle mina kua tau mere u yugo bagl paimiwe dugwa.

Yis ka ebrie

33 Jisas yegl didre, ye ka ebrie ta ama yegl di togwa, God yoba kingno mogl, suglno morabuka i, yis mere yegl pame dinaglka. Abu ta flaua mere yomara i, yis kunabe kaima ta i atne edugo, flaua mudu ake poia di, ede u podo ome dugwa.

Jisas ye kugl kide tau kugl wit bogl akie parikwa pre ka ebrie dugwa

24 Ana Jisas ye yoba makai si meglkwa i, ka ebrie ta ama di tedre, yegl dugwa, God yoba kingno mogl, suglno morabuka i pre ka ebrie yegl dinaglka. Yagl ta kugl wit mogo i pi ye makanmo mina suduglkwa. 25 Sudiglsre, ugl paugo, ye niglmo kogonmo yoba ama ugl paigwa. Ugl paigo, eduer i, kudamo ikne meglkwa i, kugl kide mogomo akie sudiglsre, ede eigwa. 26 Ana okuo kugl wit pare ede mitna pidre, mogo keglko, kanigwa i, kugl kide i ama akie paimedi kanigwa. 27 Makan nem yagl i niglmo kogonmo yoba kandre, u yegl di teigwa, Yagl kade yo, no prumga i, ene kugl mogo wakai i pi suduglnedi prumga. Ba siragl eruko, kugl kide tau mere suna parume? digwa. 28 Yegl digo, ye di ikne ede, yegl dugwa, Na kudana ikne ta moglkwa i, kugl kide mogo tau suduglkwa pamiwe dugwa. Yegl dugo, ye aglke kor yegl di prikwa, Yegl panan, no kugl kide i pru edinamno? di priko, 29 ye mane didre, Kanige erio dugwa. Kugl kide i pru edinamnedi eribi, kowai wit akie pru ede dinaiglmiwa. 30 Kanige eribi, wit denabuka igne, si yunaiglkwa yoba dedibo, enaiglkwa i, kugl kide komono kana si koglo sidre, doga mina garaiglkwa pre i pere edidre, wit mogo i pi yugugl makai simara edinaiglmiwe di, makan nem yagl i yegl dumiwe di, Jisas yegl dugwa.

Kugl kide ka ebrie i, mem siragl mere paugwa

36 Ana Jisas yoba mere kide makai si meglmara kide kodidre, ede yugugl ta ogo, ye duglo beglkwa yagl ye omara i pidre, ye yegl di prikwa, Ene kugl wit ya kugl kide pre ka ebrie dinga i, mabunomo di pogl notn, pramniwe digwa.

37 Ana Jisas duglo beglkwa yagl i yegl digo, Jisas ye di ikne ede te, yegl dugwa, Yagl ta kugl mogo wakai i pi suduglme diga i, na Yoba Wam moglka i pre diga. 38 Te, kugl mogo i pi makan mina suduglme diga i, makan i dumo makan mudu pre diga. Te, kugl mogo wakai we diga i, God yoba kingno morabara yoba ta suna moraiglkwa i pre diga. Te, kugl kide parime diga i, yagl kide gagiglma meglkwa i pre diga. 39 Ana kuda ikne ta kugl mogo kide suduglme diga i, Satan pre diga. Te, kugl mogo denabuka ege we diga i, taragl mudu dudunabuka ege i pre diga. Te, kogon yoba pre diga i, na angelo pre diga. 40 Ana kogon yoba kugl kide koglo si, i pi doga mina gaiglme diga i, ege erme dudunabuka igne, taragl yegl mere plau dinabuka. 41 Na Yoba Wam moglka i, angelona dedibo, na king moraglmara i, taragl kide ta suna yei dinabedi ake i suna ede, i meda ede, eraiglkwa. Taragl kane kane ta yoba yage sinaiglmedi eraiglkwa mo yoba ta mabuno kide eraiglkwa i, ye i meda edidre, 42 puk si doga podo ta denabara edenaiglkwa. Doga domara i, yoba kai ersre, signo gikr eraiglkwa. 43 Ege i, yoba du moraiglkwa i, ye Neno Kade king morabara suna i, ade abuglage sumere yegl abuglageno podo sinabuka. Na ka diga i, ene pramnedi pribi, ene wakai ere kinano gudu prio! di, Jisas yegl dugwa.

Jisas ye buglo bagle ere sigwa degigl gagl pre ka ebrie dugwa

47 Jisas yegl didre, ama yegl dugwa, God yoba kingno mogl, suglno morabuka i, yegl mere paugwa. Yoba tau buglo bagle ere sinamnedi degigl gaglno nigl nubun mina pia si atne edigo, buglo bagle kane kane ede atne eigwa. 48 Degigl gagl kau sugo, ye gudu i meda edidre, nigle bina ame di mogl, buglo bagle wakai ya kide aglade i pere pere edigwa. Ye fis wakai gagl girsre, fis kide kide kodigwa. 49 Kuno yegl mere ege erme dudunabuka igne, angelo wagle ede bage bage pidre, yoba du moraiglmara suna i, yoba kide ama suna mogl dinaiglmedi ye ake i swara edidre, 50 pia si doga podo domara edenaiglkwa. Doga domara i, yoba kai ersre, signo gikr eraiglmiwe di, yegl dugwa.

3 Yoba ta God gumuglo mina goduglme munedi prikwa i, gun yenaiglkwa paugwa.

I siragl pre God yoba kingno morabara dumo i, ye inaiglkwa.

4 Yoba ta erme kai ere meglkwa i, gun yenaiglkwa paugwa.

I siragl pre God ye deno muduno wida di padigl tenabuka.

5 Yoba ta mogl atne edigwa i, gun yenaiglkwa paugwa.

I siragl pre ye dumo makan mudu inaiglkwa.

6 Yoba ta mabuno du eramnedi pre kidan gogl, nigl mere yegl geglkwa i, gun yenaiglkwa paugwa.

I siragl pre okuo mabuno du ye meglmara kau sinan, ye aragan eraiglkwa.

7 Yoba ta yoba pere mitno geglkwa i, gun yenaiglkwa paugwa.

I siragl pre God ye ama mitno gorabuka.

8 Yoba ye deno muduno ta pe sugwa meglkwa i, gun yenaiglkwa paugwa.

I siragl pre ye God kanaiglkwa.

9 Yoba ta yoba pere deno muduno swara yenaiglmedi erikwa i, gun yenaiglkwa paugwa.

I siragl pre yoba i, ye God gagiglma meglmiwe dinaiglkwa.

10 Yoba tau ye mabuno du erimara yoba ye ere kide ere teigwa i, gun yenaiglkwa paugwa.

I siragl pre God yoba kingno morabara dumo i, ye pre yenabuka.

11 Ana ene na duglo boraiglkwa pre yoba ka tenaiglkwa mo, ere kide ere tenaiglkwa mo, ka kibi kogl ka kide kane kane ta ene di beglbi, ene gun yenaiglkwa paugwa. 12 Okna ibo God kamo kep yoba kuno yegl ere teigwa pre ene heven ibo topo podo inamnedi gun yedre, grigle dio di, Jisas yegl dugwa.

Jisas duglo beglkwa yagl i, ira kra mogl mitna edibedi pre ka drano digwa

1 Ana igne i Jisas duglo beglkwa yoba Jisas moglmara udre, kira pogl yegl di prikwa, God yoba kingno mogl, suglno morabuka igne i yoba ira mogl mitna edidre, kagie kade inabe? digwa. 2 Yegl digo, Jisas gak kebra ta agle di, u ye meglmara suna adigl moglo, dugo, adigl moglkwa. 3 Adigl moglko, Jisas yegl dugwa, Na ene kaima di teiga. Ene nomano yake tedre, u gak kebra mere yegl enaiglkwa paugwa. Yegl ta erekribi, God yoba kingno mogl, suglno morabara suna ta pikraiglkwa. 4 Te, yoba ta ye yene ake atne edidre, gak kebra magigl moglmere yegl moran, God yoba kingno morabuka ege i, yoba i mogl mitna edenabiwe dugwa.

14 Mane digwa ba Jisas ye yegl di togwa, Gak kebra na moglmara unaiglkwa i, ene mane dikre, kanige erio. I siragl pre yoba ta gak meglmere yegl ta moraiglkwa i, God ye yoba kingno mogl, suglno morabara yoba i pre yenabiwe dugwa.

23 Ana yagl i ede ogo, Jisas ye duglo beglkwa yagl yegl di togwa, Na ene kaima di teiga, Yoba taragl podo ere neigwa i, God yoba kingno morabara ede suna enaiglkwa i, waragne paugwa. 24 Te, na ama ene yegl di tenaglka, Bugla kamel ta kar nil kwie yomara ede suna enabuka i, yuaglke paugwa ba yoba ta taragl podo kan neigwa i, God yoba kingno moglmara ede suna enaiglkwa i, waragne kaima pamiwe dugwa. 25 Jisas yegl dugo, ye duglo beglkwa yagl prisre, nagino podo koglsre, yegl digwa, Yegl panan, God yoba ira ere inan, kuno erabe? digwa. 26 Yegl digo, Jisas ye toro kandre, ye yegl di togwa, Yoba ta ye yene ere inaiglkwa i, kuno ta erekrabuka ba God taragl mudu erabuka keme paugwa pre ye ere inabuka i, waragne ta paikrumiwe dugwa.

5 Agrama abarama wagle, na dena muduna suna meglkwa i, ene prio! Makandigle yoba ta erme goduglme meglkwa i, God di padigl, ye pre mediglkwa i u podo kaima enabiwe dugwa. Te, God yoba kingno morabara yoba taragl wakai wakai inaiglmara i, goduglme ama inaiglmedi di paduglkwa. Te, yoba ta deno muduno God tenaiglkwa yobama i, ama inaiglmedi di padigl kodugwa.

21 Yoba mere na di narsre, Yaglno Kade motniwe dinaiglkwa ba ye mudu ta God yoba kingno morabara suna pikraiglkwa. Yoba ta na Nina, kamin mitna moglkwa i, ye eraiglmedi prumere ta eraiglkwa i keme ede suna enaiglkwa.

19 Yegl pre God lomo swara ta kebra yenabuka i, yoba ta kide kodidre, yoba pere ama lo i duglo boglkraiglmedi beke tenan, God yoba kingno morabuka igne, ye kagie atne kaima yenabuka. Ba yoba ta God lomo duglo boglsre, yoba pere duglo boraiglmedi beke tenan, God yoba kingno morabuka igne, ye kagie kade panabuka. 20 I kaima yegl mere paugwa pre na ene di teiga, Farisi yoba ya God lomo beke teigwa yoba du kaima meglkwa. Ba ye du meglmere ene ta egre atne edidre, du kaima moglkribi, God yoba kingno morabara ede suna pikraiglmiwe di, Jisas yegl dugwa.

9 Ene kamage eraiglkwa i, kamage yegl erio,

Neno Kade, ene heven ibo motnga i,

Ene kagn pere kaima padre, mina kaima panabedi prumga.

10 Te, ene king moratnga igne i tabre plau dinabedi prumniwa.

Ene pitnere keme heven ibo, plau dumere yegl,

No makandigle munara i, ama yegl keme panabedi prumga.

Jon yoba ka mabuno di togwa

1 Ana okuo Jon, yoba nigl bugl togwa yagle moglkwa i, ede distrik Judia udre, dumo wau yomara ugo, yoba ye moglmara eigwa i ye di te, yegl dugwa, 2 God yoba kingno mogl, suglno morabuka egemo i, ede magigl ugwa. Yegl pre ene nomano yake teo! dugwa.

Jisas ye yagl 4-pela na duglo boraiglmedi agle dugwa

17 Ana igne i Jisas mabuno bogl yoba ka mabuno di tedre, yegl dugwa, God yoba kingno mogl, ye suglno morabuka egemo i, ede magigl u kodugwa. Yegl pre ene nomano yake teo! dugwa.

7 Ene pidre, ye yegl di tenaiglkwa, God yoba kingno mogl, suglno morabuka i, ede magigl u kodumiwe di teo.

11 Na ene di teiga, Yoba tau mere ade umara ya ade beimara mogl udre, Abraham ya Aisak ya Jekop bogl akie God yoba kingno morabara kaya mokna nenamnedi ame dinaiglkwa.

11 Na ene kaima di teiga, Jon yoba nigl bugl togwa moglkwa i, yagl kade mogl, yoba mudu erme makandigle meglkwa i egre togwa. Ba okuo kaima God yoba kingno morabuka igne i yoba yoko kaima ta morabuka i, Jon erme makadigle moglmere mere yegl moglkrabuka ba mogl mitna kaima edenabiwe dugwa.

12 Ana Jon nigl bugl togwa yagle kogon mabuno bogl erukwa igne ede u ege erme ugwa i, God yoba kingno mogl, suglno morabuka ka i, yobuglo ere, ede eglke eglke pi pai moglko, yoba yobuglo ere, God kingno morabara ede suna u pai meglkwa.

28 Ana nono ede suna umgo, God nono kingno moglsre, suglno moglmara dumo i, ta piga dinan, kuno erekrabuka. Dumo i aimadi kamin yei pai morabuka pre nono God di wakai yei tenamga paugwa. Te, nono ye kuduglmo goglsre, ye pre i mitna ede, yene wakai ta kanabere mere ye kogonmo ere tenamga paugwa. 29 I siragl pre nono Godno moglkwa i, doga ta taragl kane kane de tege erumere mere yegl, ye yobuglomo podo kide yegl paugwa* pre nono ye kuduglmo goramga paugwa.

10 Ana agrama abarama wagle, God ene ye yobama moraiglmedi kere i pere edidre, agle dugwa. Yegl pre ene yoba pere ido kanaiglmedi i nogugl edidre, na mabuno wakai pre dimere yegl erio. Ene yegl ere meglbi, ene ege swara ta yage sikraiglkwa. 11 Te, nono Yaglno Kade Jisas Krais, nono ere yugwa yagl moglkwa i, yoba bitno moglsre, suglno aimadi kamun morabara ene i suna edenabuka igne i ye ene di wakai yei tedre, ene i suna edenabuka.

18 Te, yoba mabuno kide kane kane ere naramnedi eraiglkwa i, Yagl Kade ama na ere i pai moglsre, na suglna wakai mogl enan, okuo ye heven ibo king morabara i, na i suna edenabuka. Ye kagie kade aimadi kamin inabuka paugwa. Kaima.

Taragl wakai wakai okuo inamnedi eramga paugwa

32 Ana Jisas ka ta ama yegl dugwa, Ene na sipsipna yugobuno kebra meglkwa i, kudugl goglkrio. I siragl pre ene Neno moglkwa i, ye king mogl, yoba suglno morabara ene tebo, inatnedi wakai prukwa.

5 Ene pre kan ere kodigwa, yoba yagl abu pere bogl kunogl nedre, agl bugla mabuno beglmere yegl boglsre, te yoba pere taraglno bubuno geglkwa i, God ya ye Kere Yugwa Yagl yoba kingno mogl, suglno morabrara taragl swara ta ikraiglkwa. Yoba ere mogl, yoba pere ta taraglno bubuno geglkwa i, ye taragl i pre gumano kagle edigwa pre ye god kibi ta kagie kade teigwa mere yegl paugwa. Yegl pre ye ka kaima ede suna ta pikraiglkwa.