Reino dos céus

Simwe da ngama ifisigwe

44 "Ufalume wa kuulanga ulinga vino. Ulinga fana munhu yolawilila kuzahila ngama ifisigwe mumgunda. Munhu imwenga kaifuma na kaifisa kaidi na kadeng’helela ng’hani na kahita kuuza goya yaja yose yoyakalile nayo na kaugula mgunda uja.

Simwe da lulu

45 "Ufalume wa kuulanga ulinga vino. Ulinga fana munhu yozahila lulu inogile. 46 Viyapatile, kahita na kachuuza vinhu vose vayeli navo, muladi yagule lulu iyo.

Simwe da mbeyu ndodo yoitangigwa haladali

31 Yesu kawalongela simwe dimwenga kalonga, "Ufalume wa kuulanga ulinga vino. Ulinga fana munhu yosola mbeyu ya haladali na kuihanda kuna umgunda wake. 32 Mbeyu iyo ndodo kufosa mbeyu zimwenga zose zili umo mumgunda, mbali ihakula yokuwa mbiki mkulu, na ndege wa kuulanga wokwiza kuzenga mvulu zawo muna yamatambi yake."

Simwe da lusu

33 Yesu kawalongela simwe dimwenga, "Ufalume wa kuulanga ulinga vino. Ulinga fana lusu muke yosola lusu na kuditibwiliza muna usage madebe maidi na nusu na usage wose ugongomoka."

Simwe da savu

24 Yesu kawalavila simwe dimwenga kawalongela, "Ufalume wa kuulanga ulinga vino. Ulinga fana munhu yahandile mbeyu zinogile muna umgunda wake. 25 Chilo chimwe, wanhu viwagonile munhu yehile kumwake kahanda savu muna uhemba, maabaho kahita. 26 Ivo uhemba uwo viukulile na kwandusa kukung’hunha, na savu jandusa kuwoneka. 27 Wasang’hana wa mwene ikaye wamuhitila na wamulongela, ‘Mwenevale, huhandile mbeyu zinogile bule muna umgunda wako? Ijo disavu dilawa kulihi?’ 28 Kawedika, iyo yehile niiyo yasang’hane mbuli iyo. Na watumigwa wamulongela kondachihite chikayang’ole? 29 ‘Sekemusang’hane ivo, bule ivo mwizang’ola disavu ijo hamwe na uhemba. 30 Vose umo muvileke vikule hamwe mbaka siku za kugobola, vondazifike siku za kugobola niza walongela wagobolaji wangu, yanduseni kuduganya masavu na muyafunge ng’hinza ng’hiza, hamala baho muyasome moto, mbali uhemba muugwagule na mukaike muna digulu jangu.’ "

Yesu kofambula simwe da masavu

36 Yesu viyaulekile lung’husesa na kwingila muichiheleto, wanahina wake wamuhitila na walonga, "Chilongele fambulo da simwe da masavu muna umgunda."

37 Yesu kawedika, "Munhu yohanda zimbeyu zinogile niiyo Mwana wa Munhu. 38 Umgunda ni isi yose, na ziya zimbeyu zinogile ni wanhu waja weli na ufalume wa Mulungu, masavu ni wanhu wa Msede. 39 Msede yahandile misavu niiyo Mwihi kugozela uhelelo wa isi na waja wogobola ni wasenga wa kuulanga. 40 Fana viya masavu viyozoligwa na kwasigwa muna umoto, niivo vondaiwe uko kuuhelelo wa isi yose. 41 Mwana wa Munhu kezawatuma wasenga wake wa kuulanga wawaduganye wanhu kulawa kuna uufalume wake, waja wose wowatenda wanhu watende uhasanyi na waja wose wotenda yehile, 42 na wasenga wa kuulanga wezawasa wanhu wawo muna ditanuli da moto, umo wezalila na kudunda meno. 43 Maabaho wanhu wa Mulungu wezakwiva yauyau muna ufalume wa Tati yawo. Yeli na magutwi ya kuhulika nayahulike!

Simwe da lwavu

47 "Kaidi Ufalume wa kuulanga ulinga fana mvuwaji yategile lwavu utegigwe muna ibahali na uzola somba wa chila mbasakanyo. 48 Lwavu vilumemile, walukwega na wakala hasi. Maabaho wasola somba wanogile waweka muna ivipipa na somba wehile wawasa. 49 Ivo niivo vondaiwe muna isiku iyo ya uhelelo wa isi yose, wasenga wa kuulanga wezalawilila na kuwaduganya wanhu wehile hagati ha wanhu wanogile. 50 Wanhu wihile wezakwasigwa muna ditanuli da moto, na uko wezalila na kuduna meno."

Deng’ho da kweli

3 "Wamweda waja ngayengaye wa muhe,

kwaviya Ufalume wa kuulanga ni wawo!

4 Wamweda waja weli na usungu,

kwaviya wezanyamazigwa.

5 Wamweda waja weli wahole,

kwaviya Mulungu kezawatenda wawe wahazi wa isi.

6 Wamweda waja weli na nzala na ng’hilu ya kutenda yoyomnogeza Mulungu,

kwaviya Mulungu kezawegutiza.

7 Wamweda waja weli na ubazi,

kwaviya Mulungu kezawawonela ubazi.

8 Wamweda waja weli na moyo unogile,

kwaviya wawo wezamuwona Mulungu!

9 Wamweda waja woibenela vibiki,

kwaviya wezatangigwa wana wa Mulungu!

10 Wamweda waja wogazigwa kwa ichimu cha yoyolonda Mulungu,

kwaviya Ufalume wa kuulanga ni wawo!

11 Mumweda mweye wanhu wahamuligani na kungazani na kulongigwa vihile kwa usungu

kwaviya mwawanahina wangu.

12 Sekeleleni na mudeng’helele

kwaviya gweko jenu ni kulu kuulanga,

ivo niivo vowagazigwe walotezi wa umwaka fana mweye.

Yelihi yeli mkulu?

1 Lusita ulo ulo wanahina wamuhitila Yesu, wamuuza, "Yelihi yeli mkulu muna Ufalume wa kuulanga?"

2 Yesu kamtanga mwana ndodo, kamwimiza haulongozi wawo, 3 kalonga, "Nowalongela kweli, one hamugaluke na kuwa fana wana wadodo, hamwizakwingila bule muna Ufalume wa kuulanga. 4 Munhu yoyose yotenda fana mwana ino, niiyo mkulu muna Ufalume wa kuulanga.

14 Yesu kalonga, "Walekeni wana wadoododo weze kumwangu, sekemuwalemese. Kwaviya Ufalume wa kuulanga ni wa wanhu fana wawo."

23 Maabaho Yesu kawalongela wanahina wake, "Nowalongelakweli, izakuwa vidala ng’hani kwa matajili kwingila muna Ufalume wa kuulanga. 24 Kaidi nowalongelani kweli, izakuwa vibuha kwa mnyama yotangigwa ngamiya kwingila muna ichizonzo cha sanziya sembuse munhu tajili kwingila muna Ufalume wa Mulungu."

25 Wanahina viwahulike ivo, wazanywa ng’hani na wamuuza, "Lelo yelihi basi yondayakomboligwe?"

26 Yesu kawalola, kawedika, "Kwa munhu haidahika bule, mbali kwa Mulungu chila chinhu chodahika."

5 Mweye ndugu zangu tegelezeni, Mulungu kawasagula wanhu ngayengaye wa isi yose ino wawe na uhuwilo mwigi na kuhazi ufalume uja uyawalongele wanhu waja wowomulonda.

Mweye siwamanyileni bule

21 "Siyo chila munhu yonitanga ‘Mndewa, Mndewa’ kezakwingila muna Ufalume wa kuulanga, mbali waja muhala wowotenda yaja Tati yangu wa kuulanga yoyolonda wayatende.

19 Munhu wowose ija yondayabene lagilizo dimwe da yaja yamadodo sembuse yose na imunhu kowafundiza wamwenga wasang’hane ivo, imanyike munhu iyo kezakuwa munhu ndodo muna Ufalume wa kuulanga. Munhu yondayayamhe Malagilizo na kuno kowafundiza wanhu wamwenga, iyo kezakuwa mkulu muna Ufalume wa kuulanga. 20 Nowalongelani kweli, one hamutogoligwe munoga haulongozi wa Mulungu kuwafosa wafundiza Malagilizo na Mafalisayo, hamwizakwingila bule muna Ufalume wa kuulanga.

9 Mbali mweye toseni vino, ‘Tati yetu wa kuulanga, zina jako ditunhizigwe, 10 Ufalume wako wize, jojose diulonda udisang’hane, hano hana iisi, fana viya viusang’hana uko kuulanga.

Yohana Mbatizi kowapetela wanhu

1 Muna zisiku izo, Yohana Mbatizi keza muna dibwilingu da Yudeya, kandusa kuwapetela wanhu. 2 Kalonga, "Lekeni uhasanyi wenu, kwaviya Ufalume wa kuulanga wahabehi!"

17 Kulawa lusita ulo, Yesu kandusa kuwapetela wanhu usenga wake, "Lekeni uhasanyi wenu, kwaviya Ufalume wa Kuulanga wa habehi."

7 Hiteni na peteni, ‘Ufalume wa kuulanga wahabehi!’

11 Nowalongela kweli, wanhu wengi wezakwiza kulawa ubanzi wa ulawilo wa zuwa na ubanzi wa uswelo wa zuwa, nawo wezakala hamwe na Bulahimu, Isaka na Yakobo muna Ufalume wa kuulanga.

11 Nomulongelani kweli, viweli wana wa wanhu wose habule hata imwe yeli mkulu kufosa Yohana Mbatizi. Munhu mdodo ng’hani ni mkulu muna Ufalume wa Mulungu, ni mkulu kufosa Yohana. 12 Kulawa siku ziya Yohana Mbatizi viyakalile kopetela mbaka kufika vino sambi, wanhu weli na ludabwa wageza kuusola Ufalume wa kuulanga kwa ludabwa.

28 Kwa ivo cheye chotogoligwa kuhokela ufalume haudaha kutingisigwa bule, chiwe wanhu wa kumwing’ha hewela Mulungu. Chilaguse hewela fana voilondeka kwa hishima ng’hani, 29 kwaviya Mulungu wetu kweli ni moto woudanganiza.

10 Ivo lelo ndugu zangu, iyoheni ng’hani kuutenda uwo umtango wenu na kusaguligwa kumwenu na Mulungu iwe mbuli ya kugendelela fana muhakala ivo hamwizakugwa ng’oo!. 11 Mana mwizalekigwa kwingila bila begete muna ufalume wa siku zose wa Mndewa na Mulopozi wetu Yesu Chilisito.

18 Na Mndewa kezanilopola kwa chila sang’hano ihile, na kunika nikale bila ya kugaya muna ufalume wake kuulanga. Mndewa yeng’higwe ukulu siku zose. Ivo!

Utajili kuulanga

32 "Sekemudumbe, mweye bumbila dodo, kwaviya Mulungu wenu kawasagulani kumwing’hani mweye ufalume.

5 Mumanye kuwa habule muashelati hebu munhu yotenda mbuli zihile na himu hebu munhu yambule mwiko, kalinga fana munhu yotambikila nyang’hiti, munhu fana iyo hezakwingila bule muna ufalume wa Chilisito na Mulungu.