Reino dos céus

Nongo yi kima kithalu ayi ki lunga ki kitoko

44 —Kipfumu ki Diyilu kidedakani banga kima kithalu, kisueko mu tsola. Mutu niandi kuenda kibakula, maka sueka diaka kiawu. Bosi mu khini yina, buna wela kuenda sumbisa bima biandi bioso ayi sumba tsola beni yina.

45 Kipfumu ki Diyilu kidedakani diaka banga mukhita wowo wuntombanga bilunga bi kitoko. 46 Enati bakudi lunga kimosi kithalu yiwombo, buna wela kuenda sumbisa bima biandi bioso ayi sumba lunga beni.

Nongo yi luteti lu mutalide ayi yi luvi

31 Yesu wuba kamba nongo yinkaka :

—Kipfumu ki Diyilu kidedakani banga luteti lu mutalide. Mutu wumosi wubonga luawu ayi wukuna luawu mu tsolꞌandi. 32 Luteti beni luviokidi zitheti zioso mu keva vayi enati lumenini buna lumviokanga bikunusu bioso mu kula ayi lunkitukanga nti. Muawu zinuni zieti kuiza ayi vanga zindiala ziawu mu matafi mandi.

33 Wuba kamba nongo yinkaka :

—Kipfumu ki Diyilu kidedakani banga luvi lolo nketo kabongidi ayi sobikisidi luawu mu bitezo bitatu bi falina* nate yimvimbisa falina yoso.

Nongo yi kiti ki mbimbi

24 Yesu wuba kamba nongo yinkaka :

—Kipfumu ki Diyilu kidedakani banga mutu wowo wukuna mabongo yimboti mu tsolꞌandi. 25 Vayi batu bu baba baleka mbeniꞌandi wuyiza kuna kiti ki mbimbi va khatitsika ble* bosi wuyenda kuandi. 26 Ble bu kimena ayi kitotula zitsangu buna kiti ki mbimbi diaka kimena.

27 Buna bisadi bi pfumu yi tsola biyiza ku nyuvula :

—Pfumu, keti mbongo yimboti wukunini mu tsolꞌaku e ? Buna kuevi kubedi kiti kiaki kimbimbi e ?

28 Niandi wuba vutudila :

—Mbeni niandi wuvengi buawu. Buna bisadi binyuvula :

—Tidi tuenda vuzi kiti kioki kimbimbi e ?

29 Pfumu wuvutula :

—Nana ! Bila beno vuza kiti kioki buna lulenda vuza ayi ble. 30 Bikanu biabi biodi biyedila va kimosi nate mu thangu yela velo mimbutu. Buna mu thangu yina, ndiela kamba batu ba kisalu : "vuzanu theti kiti kioki kimbimbi bosi lukanga kiawu mu minko mu diambu luyoka kiawu. Bosi luela vela ble ayi luela ku yitula ku yilu banga kiama*."

Tsundu yi nongo yi kiti ki mbimbi

36 Yesu bu kasindika nkangu, bosi wukota mu nzo. Minlonguki miandi mifikama va kaba ayi minyuvula :

—Wutusudikisa nongo yi kiti ki mbimbi kiba mu tsola.

37 Yesu wuvutula :

—Muana Mutu niandi mutu kunini mbongo yi mboti. 38 Tsola yidi nza, mbongo yi mboti yidi bana ba Kipfumu ; kiti ki mbimbi kidi bana ba satana. 39 Satana, niandi mbeni yoyi yikuna kiti ki mbimbi. Thangu yi vela mimbutu yawu tsukulu yi nza, zimbasi ziawu bisadi bi tsola. 40 Boso bumvuzulungu kiti ki mbimbi ayi kimvikulungu ku mbazu ; buawu bobo buela bela mu tsukulu yi nza. 41 Muana Mutu wela fidisa zimbasi ziandi ayi ziela botula, mu kipfumu kiandi, bima bioso biobi bintotulanga masumu ayi bobo beti vanganga mambimbi. 42 Zimbasi ziela loza batu beni ku mfulu yi mbazu. Kuna kuidi bidilu ayi nkuetosolo wu meno. 43 Buna batu basonga, bela lezama banga thangu mu Kipfumu ki Dise diawu. Woso widi matu ma wilu buna bika kawa !

Nongo yi dikondi di zimbizi

47 Kipfumu ki diyilu kidedakani diaka banga dikondi diodi balozidi mu mbu ayi dibuididi zimbisi ziphila mu phila. 48 Diawu wala, banlobi mbizi ba dituta ku disimu. Bosi bavuanda ayi batula mboti mu bipani ayi miloza ziozi zimbimbi. 49 Buawu bobo buela bela mu tsukulu yi ntoto : Zimbasi ziela kuiza mu vambisa batu bambimbi va khatitsika batu basonga. 50 Buna ziela loza batu bambimbi ku mfulu yi mbazu kuna kuidi bidilu ayi nkuetosolo yi meno.

3 Khini kuidi minsukami mu Pheve, bila bawu bavuidi Kipfumu ki Diyilu.

4 Khini kuidi bawu bandila bila bela bombo.

5 Khini kuidi bawu badi mintima milembama, bila bawu bela vinginina ntoto.

6 Khini kuidi bawu beta monanga tsatu ayi phuila yi mambu masonga, bila bela yukutusu.

7 Khini kuidi bawu badi mintima mi kiadi, bila bela kuba mona kiadi.

8 Khini kuidi bawu badi mintima mivedila, bila bela mona Nzambi.

9 Khini kuidi bawu beti tula ndembama, bila bela tedolo bana ba Nzambi.

10 Khini kuidi bawu beta yamusu mu diambu di busonga, bila bawu bavuidi Kipfumu ki Diyilu.

11 Khini kuidi beno enati bakulufinganga, enati bakulu yamisanga ayi enati bakuluvuninanga mambu mambimbi ma phila mu phila mu diambu diama.

12 Lumona kueno khini, lusakadala bila mfutu wunneni wukuluvingila ku Diyilu. Luzaba mboti ti mimbikudi mi lutuamina mamvawu bobo bayamusulu.

Nani lutidi munneni mu Kipfumu ki Diyilu

1 Muna thangu yina, minlonguki miyiza kuidi Yesu ayi minyuvula :

—Buna nani lutidi munneni mu Kipfumu ki Diyilu e ?

2 Yesu wutumisa muana lezi, wuntelimisa va khatitsikꞌawu 3 ayi vutuba :

—Bukiedika ndikulukamba enati lukadi balula mavanga ayi enati lukadi kituka banga bana balezi, lulendi kota ko mu Kipfumu ki Diyilu. 4 Diawu woso mutu wowo wukukikulula banga muana wawu, buna niandi lutidi munneni mu Kipfumu ki Diyilu.

14 Vayi Yesu wuba kamba :

—Lubika bana balezi biza kuidi minu ; kadi kuba kandika bila kipfumu ki Diyilu kidi ki bobo baba dedikini.

23 Bosi Yesu wukamba minlonguki miandi :

—Bukiedika ndikulukamba ti didi diambu diphasi kuidi mutu widi kimvuama mu kota mu kipfumu ki Diyilu. 24 Ndikulukamba diaka ti kadi kuandi phasi kuidi kamela* mu viokila va divudu di tsoma vayi bika kuidi mutu widi kimvuama mu kota mu kipfumu ki Nzambi.

25 Minlonguki misimina buwombo mu diambu di mambu momo, miyuvula :

—A buna nani lenda vuka e ?

26 Yesu wuba sungimina bosi wutuba :

—Kuidi batu malendi baka bu vangimina ko vayi kuidi Nzambi mamo malenda vangama.

5 Luwa bakhomba ziama zi luzolo : a buevi, Nzambi kasia sobula kominsukami va nza muingi mikituka zimvuama mu minu ayi mintambula kipfumu kioki kavanina tsila kuidi batu boso beti kunzola e ?

21 —Bika sia ti batu bobo beta kukhamba : "Pfumu ! Pfumu !" ti bawu bela kota mu kipfumu ki Diyilu, vayi bobo bamvanganga luzolo lu Dise diama didi ku Diyilu.

19 Diawu woso mutu weta bundula muina wawu wumosi wufioti ayi wela longa batu bavanga buawu, wela monika mutu wukhioki mu Kipfumu ki Diyilu. Vayi woso mutu wunlonganga Mina mi Nzambi ayi weta misadila, wela monika mutu wunneni mu Kipfumu ki Diyilu.

20 Bila ndikulukamba enati busonga bueno bukadi viatuka bobo bu Bafalisi ayi bu Minsoniki mi Mina, buna lulendi kota ko mu Kipfumu ki Diyilu.

9 Tala phila lufueti sambidilanga :

Tatꞌeto widi ku Diyilu,

bika dizina diaku diba dinlongo

10 Bika Kipfumu kiaku kiza.

Bika luzolo luaku luvangama va ntoto,

banga bu lueti vangimina ku Diyilu.

Yowani Mbotiki mvuala Nzambi

1 Mu bilumbu bina, Yowani Mbotiki wuyiza ayi wutona longa mu dikanga didi mu tsi Yuda. 2 Wuba longanga :

—Lubalula mavanga ! Bila kipfumu ki Diyilu kinefikimini.

17 Tona thangu yina, Yesu wutona longa bu katuba :

—Lubalula mavanga bila Kipfumu ki diyilu kifikimini !

7 Koso buangu lunkuenda lulonga ti Kipfumu ki Diyilu kifikimini.

11 Ndikulukamba ti batu bawombo bela ba ku Esite ayi ku Wesite bela vuanda mu kipfumu ki diyilu mu kipfumu ki diyilu va kimosi ayi Abalahami, Isaki ayi Yakobi.

11 Bukiedika ndikulukamba : mu batu boso bobo babutu kuidi baketo, kuisi ko mutu wowo viokidi Yowani Mbotiki. Vayi mutu wowo wulutidi kefa mu kipfumu ki Diyilu, wunlutidi. 12 Tona mu bilumbu bi Yowani Mbotiki nate buabu Kipfumu ki Diyilu kilembo bakulu mu kingolo ayi batu ba ngolo bawu kaka banzionanga kiawu.

28 Diawu, sumbu tuela tambula kipfumu kioki kakilendi nikuka ko, bika tuzaba vutudilanga Nzambi matondo ayi tunsadila mu phila yikumonisa khini mu tumamana ayi mu lukinzu. 29 Bila Nzambi eto widi mbazu yeti zinisanga.

11 Bela yolukila nkembo wu kipfumu kiaku

ayi bela tubila lulendo luaku,

12 mu diambu di batu boso bazaba mavanga maku ma lulendo ;

kiezila ki nkembo ki kipfumu kiaku.

13 Kipfumu kiaku kidi kipfumu mu thangu yi kayimani

ayi luyalu luaku lunzingilanga mu zitsungi zioso.

Yave widi wukuikama mu zitsila ziandi zioso

ayi nkua luzolo kuidi batu boso kavanga.

10 Diawu, bakhomba ziama, bika lumonisa bufula mu kindisa lutelo lueno ayi tsobobolo eno. Bila enati lumvanga mambu mama buna lulendi bua ko, 11 ayi buna bela kuluyakula bumbote mu kipfumu ki mvu ka mvu ki Pfumu eto ayi Mvulusi eto Yesu Klisto.

18 Nzebi ti Pfumu wela kukhula mu mavanga mamo mambimbi ayi wela kukheba mu diambu di mu Kipfumu kiandi ku Diyilu. Bika nkembo wubanga yandi mu zithangu zioso. Amen.

32 Bika mona tsisi, ngeyo nkangu wu mameme ! Bila Dise dieno dimuenikhini mu kuluvana kipfumu.

5 Bila luzebi kueno ti nkua kitsuza, nsumuki voti mutu wunzolanga baka bima bi phila mu phila (niandi dedikini ayi mutu wunsambilangabitumba) kalendi baka kiuka ko mu kipfumu ki Klisto ayi ki Nzambi.