Reino dos céus

खोवायला नो दाखलो

44 "ह़रग नु राज खेतर मे खोवायला धन ने तेवु से, जे काना माणेह ने जड़्‌यु अने तीहयु माणहे ह़ताड़ देदु अने तीहयु खुस हय जाय अने आखु कंय वेचीन तीहया खेतर ने वेचातु लेदो।"

घणा मोगा मो‌ती नो दाखलो

45 "अळी ह़रग नु राज एक वेपारीन तेवु से जे वारला मोती नो ह़ोदवाळ्‌या हतो। 46 जत्‌यार तीने एक मोगलो मोती जड़्‌यो ता तीहयो जाय्‌न आह़फा नु आखु कंय वेच देदो अने तीने वेचातु ली लेदो।"

राय ना दाणा नो दाणो दाखलो

31 ईसु तीमने एक अळी दाखलो ह़मळायो, "ह़रग नु राज राय ना दाणान तेवु से, जीने लीन कानो माणेह आह़फा ना खेतर मे वेर देदो। 32 तीहयु ते बीजा आखा बीज मे गेथु नानु रेय, पण उगीन वदीन वाड़ी ना भाजी-पाला ना झाटवा गेथु मोटु हय जाय, अने एवु झाटवु बण जाय के ह़रग ना चड़ा आवीन तीना डाळ्‌या पोर पोतरा बांदीन रेवा बाज जाय।"

खमीर नो दाखलो

33 ईसु तीमने अळी एक दाखलो ह़मळायो, "ह़रग नु राज तीहया खमीर ह़रकु से, जीने लीन कानी बयर तीन कांगणी लोट मे भेसकी अने आखो लोट खमीर वाळो हय ज्‌यो।"

गम अने जंगली बीज नो दाखलो

24 ईसु तीमनी अगळ एक अळी दाखलो केदो, "ह़रग नु राज तीहया माणेह नु ह़रकु से, जे आह़फा ना खेतर मे वारलु बीज वेर्‌यो। 25 पण जत्‌यार माणहु ह़ुव्‌वा बाज रेला, ता तीनो वेरी आयो, अने गम मे जंगली बीज ने वेरीन जत र्‌यो। 26 जत्‌यार ह़ुका फुट्‌या अने उंब्‌या नीकळ्‌या ता जंगली बीज देखाव पड़्‌या।" 27 एतरे पावर्‌या मालीक ना घोर आवीन मालीक ने केदा, "मालीक तु तारा खेतर मे वारलु बीज नी वेर्‌यो ह़ु? ता तीनी मे जंगली बीज कीकम उग आया?" 28 मालीक तीमने केदो, "आहयु काना वेरी नु काम से।" ता पावर्‌या तीने पुछ्‌या, "तारी मरजी हय ता आमु जाय्‌न जंगली बीज ने उखड़ दीया?" 29 मालीक केदो, "नी ईसम ना करो नीता कंय माय्‌न जंगली बीज ना झाटवा ह़ाते, गम बी नी उखड़ी जाय। 30 वाडणी आवते लग भेळात वदवा देवो। वाडवा नी टेम पोर वाडवा वाळा ने केही, ‘पेले जंगली बीज ना झाटवा भेळा करो अने धपाड़वा करीन हीमना पुळा बांदो। अने अळतेण गम ना दाणा ने मारी मोहटी मे भेळा करो।’"

जंगली बीज नो दाखलो

36 ईसु माणहु ने वळाय दीन पासो घोर आयो। तीना चेला तीनीन्‌तां आवीन केदा, "खेतर मे वाळा जंगली बीज ना दाखला नु मतलब ह़ु हये तीहयु आमने ह़मजाड़ दे।"

37 ईसु तीमने केदो, "वारलु बीज वेरन्‌यो कीरसाण, मनख्‌या नो सोरो से; 38 अने खेतर आहयी कळी से: वारलु बीज भगवान ना राज ना माणहु से; अने जंगली बीज कुहर्‌या भुतड़ा ना माणहु से; 39 अने वेरवा वाळो वेरी भुतड़ो से; वाडणी कळजुग नु खत्‌तम हयणु से; वाडण्‌या ह़रगदुत से। 40 जीसम माणहु जंगली बीज ना झाटवा ने भेळा करीन आक्‌ठु मे धपाड़ देय, तेमेत आहयी कळजुग खत्‌तम हयहे। 41 मनख्‌या नो सोरो ह़रगदुत ने मोकलहे अने तीहया तीना राज मे गेथा आखा पाप करन्‌या ने अने गलत काम करन्‌या माणहु ने भेळा करहे, 42 अने तीमने आक्‌ठु नी दर्‌या मे धकली देहे; अने तीहया माणहु तीहयी आक्‌ठु नी भाटी मे ढोळो-ढोळो अने फुकु-फुकु रड़हे 43 तीना वारा मे धरमी माणहु आह़फा ना बाह ना राज मे दाड़ान तेम भबळहे। जीना कान्‌टा हय तीहयो ह़मळी लेय।"

माछला धरवा ना जाळ नो दाखलो

47 "अळी ह़रग नु राज तीहयी मोट्‌ली जाळ ने तेवु से तीहया दर्‌या मे नाख देदा, अने आखी भाती ना माछला हापकी लायो। 48 अने जत्‌यार जाळ भराय जी, ता काहर्‌या तीनी जाळ ने धेड़े हापकी लाया, अने बहीन वारु-वारु तां ठाहरा मे भेळा कर्‌या अने बगड़ला-बगड़ला माछला ने नाख देय। 49 कळ खत्‌तम हयवान टेमे बी एमेत हयहे। ह़रगदुत आवीन पापी माणहु ने धरमी माणहु मे गेथा सेटा करहे, 50 अने तीमने आक्‌ठा ना खाडा मे नाखे। ता तीहया माणहु रड़हे अने दातु ककड़ावता रेहे।"

जुगाळा बोल

3 "जुगाळा से तीहया जे मन ना गरीब से! काहाके ह़रग नु राज तीमनुत से।" 4 "जुगाळा से तीहया, जे दुखी हय्‌न रड़े काहाके तीमने सांती जड़हे।" 5 "जुगाळा से तीहया जे नीचळा से! काहाके आहयी धरती ना हकदार्‌या से।" 6 "जुगाळा से तीहया, जे धरमीपणा ना भुकला अने तरहेला से! काहाके भगवान तीमने नीरहा कर देहे।" 7 "जुगाळा से तीहया, जे गीणाळ्‌ळा से! काहाके भगवान तीमनी पोर गीण करहे।" 8 "जुगाळा से तीहया, जीमना मन चोखला से! काहाके तीहया भगवान ने देखहे।" 9 "जुगाळा से तीहया, जे मेळ कराव्‌वा वाळा से! काहाके तीहया भगवान ना सोरा केवायहे।" 10 ✝"जुगाळा से तीहया, जे धरमीपणा ना कारण दुख झेले, काहाके ह़रग नु राज तीमनुत से।" 11 ✝"जुगाळा से तमु, जत्‌यार माणहु मारीन करते तमारी नामबद्‌दी करे अने वेला पाड़े, अने तमारी पोर आखी भातीन कुहराय करीन झुटो गुनो लगाड़े। 12 ✝तमु खुस रेजो अने खुसी मनावजो काहाके तमारी वाटु ह़रग मे घणु मोटु ईलाम से। काहाके आहयीत रीते भगवान वगे गेथा केण्‌या माणहु ने वेला पाड़ता हता।"

ह़रग राज मे मोटु कोय?

1 ✝तीहयी टेमे चेला ईसुन्‌तां आवीन पुछ्‌या, ह़रग राज मे आखा सी मोटु कोय से? 2 ईसु एक नान्‌लु सोरु ने बोलायो अने तीने तीमनी वच मे उबो कर्‌यो, 3 ✝अने केदो, मे तमने ह़ाचलीन केम, कदी तमु नी फीरो अने सोरान तेम नी बणो, तां तक ह़रग राज मे नी भराय सके। 4 एतरे जे कोय बी आह़फा ने आहयु नान्‌लु सोरुन तेम नीचळो बणावहे, तीहयो ह़रग राज मे आखा करते मोटो रेहे।

14 बाखीन ईसु केदो, "सोरा ने मारीन्‌तां आव्‌वा देवो, अने हीमने ना रोको, काहाके ह़रग नु राज हीमनी ह़ारका नु से।"

23 ता ईसु आह़फा ना चेला ने केदो, "मे तमने ह़ाचलीन केम, मालदार जुगु ह़रग राज मे भरायवा काठु से।" 24 मे अळी केम "के ह़ोय ना डुचा मे हय्‌न उटड़ा ने सरकवा नु सरल से, बाखीन मालदार ने भगवान ना राज मे भरायवा घणु काठु से।"

25 आहयु ह़मळीन चेला घणा वहराय ज्‌या अने केदा, "ता कोयने छुटकारो जड़हे?"

26 ईसु तीमनी भणी भाळीन केदो, "माणहु जुगु ते आहयु, नी बणे एवु से। पण भगवान जुगु आखु कंय बण जाय।"

5 ए मारा भायु, ह़मळो। भगवान आहयी कळी ना गरीब माणहु ने भरहा मे मालदार अने भगवान ना राज ना हकदार्‌या बणाव्‌वा करीन टाळलो से। जे भगवान ने मोंग करे, तीमने तीहयो आह़फा राज नो हकदार्‌यो बणाव्‌वा करीन पेले गेथोत वायदो करलो से।

18 पण आखा मे मुख्‌या भगवान ना चोखला माणहुत राज्‌य हात करहे, अने जलम तक तीना अदीकारी बणीन रेहे।"✝

मे तने नी जाणतो

21 जे मने "ए मालीक! ए मालीक! केय, तीमनी माय्‌न कोय बी ह़रग राज मे भराय नी सके, पण तीहया एतरा जे मारा ह़रग वाळा बाह नी मरजी पोर चाले।"

19 एतरे जे कोय आहया हुकम मे गेथा काना बी नान्‌ला हुकम ने पाळवा सोड़ देय, तीहयो ह़रग राज मे नानो केवायहे। पण जे कोय तीहया हुकम ने पाळ्‌या करहे अने तीमने ह़ीकाड़हे, तीहयो ह़रग ना राज मे मोटो केवायहे। 20 मे तमने केम, कदीम तमु चोखली सास्‌तर ह़ीकाड़न्‌या गेथा अने फरीसी माणहु गेथा वदीन धरमपणा मे नी चालो ता तमु ह़रग राज मे नी भराय सके।

9 एतरे ईसम वीन्‌ती करो, "ए अमारा बाह, तु जे ह़रग मे से तारु नाम चोखलु मनाये। 10 तारु राज आवे। तारी मरजी जीसम ह़रग मे पुरी हये, तेमेत आहयी धरती पोर बी पुरी हये।

बपतीस्‌मा आपवा वाळा युहन्‌ना नो परच्‌यार

1 तीहया दाड़ा मे बपतीस्‌मा आपण्‌यो युहन्‌नो, युहदी जीला ना बड़ा मे आवीन, आड़ीन आहयु परच्‌यार करवा बाज ज्‌यो, 2 ✝"पापु ने सोड़ीन आह़फाम ना मन ने भगवान वगा वाळो, काहाके ह़रग नु राज ह़ातेत आय जेलु से।"

17 ✝तीहयी टेमे गेथो ईसु आहयु परच्‌यार करवा बाज ज्‌यो, पाप भणी गेथु मन फीरवीन भगवान वगा वळो। ह़रग नु राज ह़ाते आय लागलु से।

7 अने वाट्‌ये चालता जाय्‌न ज्‌योरे आड़ीन ईसम परच्‌यार करो के ह़रग राज ह़ाते आय जेलु से।

11 ✝मे तमने केम, ढेरेत आड़जात्‌या माणहु उगवणा अने बुडवणा गेथा आवीन अब्‌राहम, ईसाक अने याकुब भेळता ह़रग राज मे बठहे।

11 मे तमने ह़ाचलीन केम के, जे आह्‌य सी पयदा हयलो से, तीमनी मे गेथो युहन्‌ना बपतीस्‌मा आपवा वाळा सी कोय मोटो नी हय, पण जे ह़रग राज मे नाना सी नानो से तीहयो बपतीस्‌मा आपण्‌या युहन्‌ना गेथो मोटो से। 12 ✝युहन्‌ना बपतीस्‌मा आपण्‌यो आयो तां गेथात आज तक माणहु ह़रग राज मे ताखत भेळ भरायता रेता हता, अने ताखत वाळा तीने हापकी लेता हता।

28 अने जत्‌यार एक एवु राज जड़ र्‌यु जीने हीलाय नी सकता, ता आवो आमु घणा वारु से केण्‌या बणया अने ईज्‌जत भेळ बीक नी ह़ाते भगवान नी उपाह़ पाळया के भगवान तीने हुकारे। 29 काहाके अमारो भगवान खत्‌तम करवा वाळु आक्‌ठु से।

10 एतरे ए भाय-बेन्‌या, आपणु ने बोलायो अने टाळ लेदो तीने उजन्‌तु करवा आखी भाते कोसीत करता जावो काहाके कदीम आसम करहु ता कदी ठोकर नी खावो। 11 पण आहयीत रीते आपणा मालीक अने छुटकारो आपण्‌या ईसु मसी ना अमरकाय राज मे घण-जबर ईज्‌जत भेळ भरायहु

18 अने मालीक मने आखी भाती नी कुहराय ना कामु सी बचाड़हे, अने मने छुटकारो आपीन ह़रग ना राज मे पुगाड़ देहे। तीहयात मालीक नी जलम बड़ाय हयती रेय। आमीन।

ह़रग नु धन

32 ए नान्‌ला टोळा ना माणहु, बीहो ना, काहाके तमारो बाह तमने राज आपवा करीन खुस से।

5 काहाके तमु आहयु जाणो के काना बी छीनाळ्‌या, वीटळ्‌ळा माणहु, अने लालच्‌या से, जे मुर्‌ती पुजा करवा वाळा बराबर से तीमने कदी बी मसी अने भगवान ना राज मे वाटो नी जड़े।