Como era a relação de Jesus com pedro: os maiores ensinamentos de Cristo ao seu seguidor

Si Jesus ug si Pedro

15 Pagkahuman nilag pamahaw, miingon si Jesus kang Simon Pedro, "Simon nga anak ni Juan, gihigugma mo ba ako labaw pa niining imong mga kauban?"

Mitubag si Pedro, "Oo, Ginoo, nahibalo ka nga gihigugma ka nako."

Miingon si Jesus kaniya, "Atimana ang akong mga karnero."

16 Miingon pag-usab si Jesus kaniya, "Simon nga anak ni Juan, gihigugma mo ba ako?"

Mitubag siya pag-usab, "Oo, Ginoo, nahibalo ka nga gihigugma ka nako."

Miingon si Jesus kaniya, "Atimana ang akong mga karnero."

17 Sa ikatulong higayon miingon pag-usab si Jesus, "Simon nga anak ni Juan, gihigugma mo ba ako?"

Nahiubos si Pedro tungod kay katulo na siya pangutan-a ni Jesus kon gihigugma ba niya siya. Busa miingon si Pedro kaniya, "Ginoo, nahibalo ka sa tanan, ug nahibalo ka nga gihigugma ka nako."

Miingon si Jesus kaniya, "Atimana ang akong mga karnero.

28 Unya miingon si Pedro, "Ginoo, kon ikaw kana, paanhaa ako diha kanimo nga maglakaw usab ibabaw sa tubig."

29 Miingon si Jesus kaniya, "Sige, dali!"

Busa nanaog si Pedro sa sakayan ug milakaw ibabaw sa tubig paingon kang Jesus. 30 Apan sa dihang namatikdan ni Pedro nga kusog ang hangin, nahadlok siya ug inanay siya nga naunlod. Busa misinggit siya, "Ginoo, luwasa ako!"

31 Diha-diha gigunitan siya ni Jesus ug giingnan, "Kulang ang imong pagtuo! Ngano bang nagduha-duha ka man?"

Gilimod ni Pedro si Jesus

54 Gidakop nila si Jesus ug gidala ngadto sa balay sa pangulong pari. Misunod usab si Pedro, apan didto lang siya sa layo. 55 Didto sa tunga sa tugkaran naghaling ug kalayo ang mga tawo ug nanglingkod didto sa duol aron mainit-initan. Si Pedro nagpaduol usab didto kanila ug milingkod. 56 Adunay usa ka sulugoon nga babaye nga nakakita kang Pedro nga naglingkod duol sa kalayo. Gitutokan niya si Pedro, ug miingon, "Kini siya kauban usab nianang tawo."

57 Apan milimod si Pedro nga nag-ingon, "Day, wala man gani ako makaila kaniya."

58 Wala madugay adunay nakakita na usab kaniya nga lalaki nga nag-ingon, "Ikaw usa usab sa iyang mga kauban."

Apan mitubag si Pedro, "Dili uy! Dili niya ako kauban."

59 Mga usa ka oras ang milabay ug aduna na usab miingon, "Tinuod gayod nga kining tawhana kauban niya kay siya taga-Galilea usab."

60 Apan mitubag si Pedro, "Dili uy! Wala ako makahibalo sa imong gipanulti." Samtang nagsulti pa si Pedro, mituktugaok ang manok. 61 Milingi ang Ginoo ug gitutokan niya si Pedro. Unya nahinumdoman ni Pedro ang gisulti sa Ginoo nga sa dili pa motuktugaok ang manok, ilimod na niya siya sa makatulo. 62 Busa migawas si Pedro ug mihilak gayod sa hilabihan.