Ressurreição

5 Mala’ekata gena-ge 'o kanau toma we-were’a--we-were’a, "Ni mojongo awa! Ngoi to waro ngini disa Yesus, ga’a ngowa’a 'U sisalib. 6 Unanga 'o cua 'ane. Unanga dadunu ro 'ahu moju sa’olo 'au nga’ene Ro kanau ḏua ra ngini. Ino ni oḏi’i ga’a ngowa’a ya sigare 'Ai mayeti,

6 Tubaie gena-ge 'o kanau, "Ni mojongo awa. Ngoi to waro ngini ni tutumu Yesus ngowa’a Nazaret, ananga 'U salib. Unanga ro cua 'ane. Ma Jou’ongu Madutu dadunu 'U si’ahu ḏua! Oḏi’i ḇato 'Ai ngi’i, ananga 'U sigare.

6 Unanga ro cua 'ane-ne, Unanga ro dadunu 'o 'ahu moju. Ni 'elingi 'oru ga’a Unanga 'o kanau pasala ḏua ra ngini wakutu Unanga toma Galilea 7 mangale Manusia ma Ngowa’a Nau’u ḏuanga i’a sipula’a toma ngowa’a baraḏosa re 'U sisalib, kara toma wangere ma soi ro’ange, Unanga dadunu 'o 'ahu moju."✝

8 Yesus 'ai me-mete’e lelegu ga’a 'o sapolo siḏa nange-ge toma kubu ma aḏu’u, unanga 'o osama ḏi’i, 'o oḏi’i re 'o ngaku Yesus dadunu 'o 'ahu moju. 9 Kalaha toma Boku 'Ofi-'Ofi 'i silefo ḏua mangale Unanga dadunu 'o 'ahu moju, singadolo 'orasa gena-ge ananga ya sahe ua moju, Yesus balasu dadunu 'o 'ahu moju toma ngowa’a senge-sengene manga sigolona.

3 'Oru ga’a ngoi reta dawongo ra Ma Jou, ngoi reto singadolo ra ngini ḏi’i. Enanga ma la-lamo’o ma re’u i’a nena-ne: Kristus 'o sengene di’a 'O tuusu ngene tananga ḏosa-ḏosa, gena-ge 'i silefo pasala ḏua toma Boku 'Ofi-'Ofi,✝ 4 Unanga 'u siotomo mada’a pasala i’a toma wangere ma soi ro’ange dadunu 'O 'ahu moju. Gena-ge ḏi’i 'i silefo pasala ḏua toma Boku 'Ofi-'Ofi.✝

25 Yesus 'o kanau i’a ra munanga, "Ngoi nena-ne dadunu to si’ahu ngowa-ngowa’a sengene, re To pula’a 'ahu ḏi’i. Kalaha ngowa-ngowa’a raḏi sengene, ananga gena-ge ga’a 'aḏi ngaku Ngoi, dadunu 'aḏi 'ahu moju. 26 Re 'a guna ḇato 'o 'ahu-'ahu ga’a 'o ngaku Ngoi, unanga kama sengene ua nena-ne re si’a. Ngana no ngaku bolo ua, 'oru ga’a Ta kanau?"

21 Ngene mo-moini wo sengene sababu pa’i matengo ḇato ga’a 'o mete’e ua Ma Jou’ongu Madutu 'ai parenta. So’o gena ḏi’i ngowa-ngowa’a nga’unu dadunu 'aḏi 'ahu moju toma ngowa’a senge-sengene manga sigolona, sababu pa’i Matengo ḏi’i 'Ai ga’a.

14 Ngene wo ngaku mangale Yesus 'o sengene ḏua mada’a Ma Jou’ongu Madutu dadunu 'o si’ahu Unanga moju. Sababu gena-ge, ngene wo ngaku ḏi’i mangale ḏuanga i’a Ma Jou’ongu Madutu dadunu 'o si’ahu moju ngowa’a senge-sengene mo-moini ga’a ngowa’a ngaku Yesus, la ananga 'aḏi 'ahu marimoi ra Unanga.

14 Ngomi mi 'a’a so’o gena-ge sababu Kristus 'ai dadalara 'i sinyanyasele minga 'akala re sinyingara. Sababu ngomi mi ngaku mode-mode’e ga’a ngowa’a matengo 'O sengene di’a ngowa’a mo-moini. Sababu gena-ge, ma tero sa’olo ngowa’a mo-moini raḏi sengene. 15 Gena-ge ma ngale: Kristus ro sengene di’a 'o tuusu ngowa’a mo-moini, la ngowa’a 'aḏi 'ahu di’a pa’i 'aḏi sisanangi manga 'akala re sinyingara ḇato ua, mada’a di’a 'aḏi sisanangi Unanga 'ai 'akala re sinyingara. Unanga gena-ge ga’a Ro sengene, dadunu Ro 'ahu moju di’a ananga.

5 Dadi na’o ngene rewo marimoi ra Yesus re Unanga 'ai se-sengene, tantu ḏua, ngene ḏi’i dadunu wo si’ahu moju ma tero Unanga. 6 Ngene rewa waro nanga tabeata baraḏosa ma siḏa ri sengene mamete’e ra Kristus toma salib, la ḏosa ma kuasa ri wejere singadolo ngene ngowa’a budaka toma ḏosa riwara.

Masinganono mode-mode’e

3 Ino ngene wo puji re silamo’o Ma Jou’ongu Madutu, Yesus Kristus nanga Jou 'ai Ḇaḇa. Sababu Unanga 'o sijumu 'Ai 'akala re sinyingara ma la-la ra ngene, singadolo 'O pula’a 'ahu su-sungi ra ngene. Gena-ge 'i nyengara, sababu Yesus Kristus ro sengene, mada’a dadunu 'o 'ahu moju. Sababu gena-ge nanga ngo-nganono 'i dadi de-de’e rimoi.

21 Dadi sibere ḇanyo sa’olo didina’o rimoi mangale ananga sanga salamata ra Ma Jou’ongu Madutu 'ai hukumu. So’o gena-ge ḏi’i, nange-ne baptis sa’olo nana’o rimoi mangale ngini ni sanga salamata Tai hukumu. Baptis gena-ge ma maksudu di’a si’ofi ua ninga lese, mada’a mangale ngini reni golo’o ra Ma Jou’ongu Madutu di’a si’ofi ninga 'akala re sinyingara ma kanau. Ḏua sababu Ma Jou’ongu Madutu dadunu 'o si’ahu moju Yesus Kristus, ngini nga’unu ni ngaku ninga 'akala re sinyingara ma dara ri 'ofi re reni sanga salamata.

Nyiata ma ḏo-ḏogumu

20 Ngoi to manyiata ra Ma Jou’ongu Madutu, Unanga 'o dame ma cimi ga’a dadunu 'o si’ahu moju Ma Jou Yesus. Unanga gena-ge ro dadi ngene nanga Sowohi La-lamo’o re ngene wo dadi 'Ai doba-doba sababu Tai se-sengene. Re ḏi’i Tai se-sengene gena-ge si’aku sah Ma Jou’ongu Madutu 'ai jaji ga’a kasingado-ngadolo i’a di’a ngene. 21 Dadi ngoi to golo’o ra Ma Jou’ongu Madutu ga’a 'O dame ma cimi ga’a 'O siti-tiai ngini reo 'ori i’a mo-moini ma la-la ga’a ngini paralu di’a na si’a’a Unanga 'ai 'akala ma mau. Ngoi ḏi’i to golo’o mangale sababu Yesus Kristus nanga lese to golona, Ma Jou’ongu Madutu 'o munara tananga 'akala re sinyingara 'oru ḇato 'i sisanangi Tai momina. Ino ngene wo puji re silamo’o Yesus Kristus kasingado-ngadolo i’a. 'Amin.

10 Sidogo ḏi’i, mo-moini gena-ge ngoi ta site-tero ma tero sa’olo jeremoto, la ngoi to nana’o Kristus: Ngoi ta basono 'Ai kuasa tari 'ahu ma dara. Kuasa gena-ge ma tero Ma Jou’ongu Madutu 'ai kuasa ga’a dadunu 'U si’ahu moju Unanga toma ngowa’a senge-sengene manga sigolona. Re ḏi’i ngoi ta basono sangisara ma tero sa’olo Unanga ra basono singadolo ngoi nyengara to sengene ma duhu ma tero sa’olo Unanga 'o sengene.

6 Ngowa-ngowa’a ga’a dadunu 'aḏi 'ahu moju toma 'orasa ma mulaingi gena-ge, ananga ngowa-ngowa’a 'ofi-'ofi re bara’utungu. Re ananga gena-ge ḏuanga i’a 'aḏi basono ua sengene ma soi ḏiḏi,* mada’a 'aḏi dadi 'imam-'imam ga’a 'aḏi de-de’oso Ma Jou’ongu Madutu re 'a Kristus. Re ananga ḏuanga i’a 'aḏi parenta mamete’e ra Kristus ma di’ara musungu cala moi ma dara.

12 Re ngoi to oḏi’i ngowa’a senge-sengene: ngowa’a ma pake ua re ngowa’a la-lamo’o 'aḏi made-de’oso toma ḏe-ḏegoro gena-ge ma biono. Ḏua boku-boku 'i welanga, kara singe-ngeta’a hukumu toma ngowa’a senge-sengene site-tero mete’e ananga manga ga’a 'i silefo toma boku-boku gena-ge ma dara. Re ḏi’i boku rimoi ma lelegu 'i welanga. Re boku gena-ge 'i si’aro’o ngowa’a 'ahu-'ahu manga boku.✝ 13 Re ngowa’a senge-sengene toma ngoloto re toma Maut re Maut ma pareta, ananga 'aḏi sipula’a ra Ma Jou’ongu Madutu. Unanga 'a singe-ngeta’a hukumu toma ngowa’a senge-sengene gena-ge site-tero mete’e ananga manga ga’a ḏi’i.

22 Mada’a singadolo 'orasa nange-ne Ma Jou’ongu Madutu ri saolo ngoi dadi ngoi to 'ahu moju re to pula’a sakisi toma ngowa’a repe manga biono: bae ngowa’a la-lamo’o, bae ngowa’a ma pake ua. Dadi 'oru ga’a ngoi to siajele nange-ne, gena-ge enanga 'i supu ua 'oru ga’a nabi-nabi re 'a Musa ya siajele pasala ḏua: 23 'O Kristus* ga’a Ma Jou’ongu Madutu 'a sijaji pasala ḏua, Unanga balasu 'a basono sangisara. Ḏua Unanga gena-ge 'O dadi ngowa’a ma mulaingi ga’a dadunu 'O 'ahu moju toma ngowa’a senge-sengene manga sigolona, la Unanga gena-ge 'o singadolo habari ma tero sa’olo tarangi toma ngowa’a mo-moini: bae ngowa’a Yahudi bae ngowa’a Yahudi ua."✝

18 " 'Isene! Ngene nange-ne wo si’a toma limau Yerusalem. I’a da’a Ngoi, Manusia ma Ngowa’a Nau’u, ḏuanga i’a sipula’a toma 'imam-'imam ma sae’e re guru-guru 'agama. Re Ngoi ḏuanga i’a ananga Ri singe-ngeta’a hukumu sengene. 19 Gena ḏua, Ngoi sipula’a ḏi’i toma ngowa-ngowa’a Yahudi ua. Ngoi, ananga Ri sije-jengere re Ri sipo, kara Ri sisalib. Mada’a toma wangere ma soi ro’ange, Ngoi dadunu to 'ahu moju."