28 Əndje vêrə aləba nə̂ ye tə̂ ye gâ ye â yî ə̈bə̈ ə̂drɔ̂ əgerə ləba gâ tə̂ ye. 29 Mandânə, əndje djô ə̈bə̈ kpɔtɔ ngerə də aəshi â zâ gâ tə̂ kumu ye, ə zâ ə̈bə̈ wara gâ lə ndəkɔ ye. Â əndje gbə̂te gâ tshekudu ye ə mɔ̂ ətshə ə pa: «Wanda, əyïngerə nə̂ Ajuwufu!»

21 Mbrə ərə səkɔ də̂ Ndjapä ê e kɔ, mbrə ə̂në Kristə ndje wû əyo mbrə e gâ ye, ə yisə̂ äwä nə kə e, kanika e za kʉtə̂ tshelə əndʉ ye.

10 Ərə bale ə̂në mə yində nə kə də̂ kə pa mə yerɔ ətshə kpro də awlra ə̂në ə shê ətshə lə takpa tə̂ akuzu gâ ye kɔ ə wu marä tə̂ aəyo ə̂në tshə wû kɔ ə tshu marä tə̂ kuzu ə̂në tshə tshû kɔ

3 Gâ pâ nə ndje, a sə kə da əkro əzə̂ tə̂ əpʉ aərə əyo nə̂ əzə̂, mbrə ə̂në a wusə̂ nə ə pa ərə əyo mbrə â əzü wusə̂ kə ru tshelə ye, 4 kə ru tshelə nə mbrə â əzü lï ndə kə pa tshə ka gbʉ gbʉ gbʉ lə ərə kə tra ətshə â kə ka gbʉ gbʉ gbʉ nə mbrə â əzü za lɔsu ye gâ pâ ndəma Ndjapä.

18 Mə wu ənə̂ əmə ə pa aəyo ə̂në a wu kpəsəye kɔ lï lï də ə̂yî ə̂në Ndjapä ə yisə̂ nə kə əzə̂ gashu tala je kɔ ne.

17 Mbrə ə̂në aərə əyo ə̂në ä sə lə nə kʉ mbrə ə̈bə̈ alɔ kɔ, ə sə kʉ teashe, ə gamba ä mbrə ə̂yî ə̂në ə sə piii, ə̂në ə lʉ ə lʉ kɔ, ə̂në ə lï lï də aərə əyo səkɔ ne kɔ.

5 Mbrə ə̂në äwä bale ndje ə̂në əzə̂ sə kə wu əyo ngbatshe mata Kristə nə kɔ, Kristə nə ndje sə kə tru ngɔla əzə̂ ngbatshe ndje rə.

29 Mbrə ə̂në, gâ pâ əpʉ Kristə nə, Ndjapä nə mbrə̂ ə̂rɔ̂tə̂ ye mbrə̂ kə e kʉ ndə kə pa e za lɔsu e kə ətshə ne, bale ndje ndə kə pa e wu əyo mbrə ətshə,

1 Mata ə̂në Kristə nə wû əyo tə̂ tshekotə̂ ye gâ ye kɔ, rəkɔ, e-e ndje, e zä kʉtə̂ əpʉ sə̂ bale gâ lə kumu e tə ə̈bə̈ ərə koshe. Mbrə ə̂në, əzü ə̂në tshə wû əyo lə akwa ye gâ ye kɔ, tshə tshî äwä nyaka tʉ gâ ye,

3 A tɔ̈lɔ Ndjapä tə Abä Âgbɔ̂ Əyïngerə nə̂ əzə̂ Jezu Kristə, tə Abä ə̂në tshə wu əyo azü ə wu kɔ, ndje tə Ndjapä ə̂në tshə tru ngɔla azü ə tru lə aərə nɔ̂ kɔ! 4 Tshə sə kə tru ngɔla əzə̂ lə aərə əyo nə̂ əzə̂ nɔ̂, ndə kə pa kʉ mata ə̂në tshə tru ngɔla əzə̂ nə kɔ, a tru ndje ngɔla azü ə̂në əndje sə lə aâkâ aərə əyo nɔ̂ kɔ.

2 E kö akongbɔ nə̂ angâ e lə takpa tə̂ e, â rə də̂ e sə kə mbrə ndəma âgbɔ̂ əpʉ ə̂në Kristə nə pâ kɔ.

10 Alɔ ə̂në e wu əyo lə ə̈bə̈ ə̈ndö əlo gâ ye, Ndjapä, ə̂në tshə mbrə ə̂rɔ̂tə̂ ye kə azü kɔ, ə̂në tshə ê e, tə̂ äwä Kristə, ndə kə pa e sə lə ə̂yî ye ə̂në ə sə piii kɔ, tshə gamba əndʉ e də ə̂tə̂ ye je, ə gbɔgbɔ lɔsu e je, ə gbɔgbɔ e je â ə̈bə̈ ərə sə sə kə meme e bale ne.

14 Bale, kədə e wu əyo kəmə mbrə kə mbrə ərə də äwänə, ənə̂ e tə ə̂rɔ̂nə! E mbrə̈ mbrə̈ awa azü bale ne, ə kätə̂ äwä kä kə ə̈bə̈ ərə ə djingli tshelə akrɔ e ne.

38 Əzü ə̂në tshə za masheyɔ nə̂ ye za gâ pâ əgʉ ye ne ə za äwä əmə za ne, tshə lï lï ndə kə sə tə trawaya nə̂ əmə ne.

39 Əzü ə̂në tshə yində kə bata əwu ye, tshə sə kə tshu nə. Bale, əzü ə̂në tshə yində kə tshu nə mbrə əmə, tshə sə kə sə tə sorô.»

23 Mâ ə̂sə̂ akuzu nə, əyïrishi nə wû əyo tə bandanə. Tshə lîshi gâ lafɔ ə wû Abraamo ngrʉ̂ gâ ndə Lazarə gâ ngotə̂ ye. 24 Bale, tshə tâ râwâ ə pa: "Abä, Abraamo, wü əyo əmə ə wlä Lazarə ndə kə pa tshə yi mato kəna ye lə ə̂ngû ə ta gâ pâ tima əmə ndə kə pa ə zɨtɨ, mbrə ə̂në mə sə kə wu əyo tə bandanə lə ala əwo səye."

35 Əde kə lï ndə kə pa tshə sɔ əzə̂ gashe tə̂ kə yində əzə̂ ə̂në Kristə nə yîndə əzə̂ kɔ? Ərə əyo wala âgbɔ̂ awa wala ərə kanga ə̂në azü ə mbrə tə̂ əzə̂ kɔ wala əgo wala aərə ə̂në a sə sə də nə ne kɔ wala ə̈bə̈ əmbrʉ ərə wala kuzu a?

3 Bale, kədə mə krû kəmə tshelə aərə nə̂ əmə nɔ̂ tə̂ alayïəyo â kâ kəmə tə̂ əmə gâ ala əwo, â yində angâ əmə də̂ azü yi ne, mə sə sə kə sɔtə̂ ə̈bə̈ ərə bale mandânə ne.

22 Bale, Ndjapä bâta əmə â mə daka pə ʉrrr ndjɔ kpəsəye â yisə̂ əpʉ səye ətshi azü nɔ̂: aəngʉ azü də aâgbɔ̂ azü kɔ. Mə yîsə̂ ə̈bə̈ əpʉ yî kpî tə̂ əpʉ ərə ə̂në aawopandəma Ndjapä gâ ndə Mayïzə pâ ə wutu je kɔ ne. 23 Əpʉ nə də̂: Kristə nə ə wu əyo je ə she tə əlî əzü lə takpa tə̂ akuzu je, ə mʉ əpʉ ə̂yîəwo kə she azü lə kuzu kɔ kə azü əgɔ nə̂ ä də azü ə̂në əndje sə sə tə Ajuwufu ne kɔ je.»

14 E prä äwä ndə kə pa e sə də blatshe də azü nɔ̂, ə prä äwä kə sə kpî ə̂në əzü â sə sə rə ne, tshə sə sə kə wu Âgbɔ̂ Əyïngerə ne kɔ.