O sentido da vida: o que a Bíblia ensina sobre existir

7 Dayon ginhimo sang Ginoong Dios ang tawo halin sa duta. Ginhuypan niya sa ilong ang tawo sang ginhawa nga nagahatag sang kabuhi. Gani ang tawo nangin buhi nga tinuga.(Genesis 2:7)

13 Kilala mo ako kay ikaw ang naghimo sang akon bilog nga kabuhi.

Ikaw ang nagporma sa akon sa tiyan sang akon iloy.

14 Ginadayaw ko ikaw kay makatilingala gid ang paghimo mo sa akon.

Makatilingala ang imo mga binuhatan, kag nahibaluan ko gid ina.

15 Nakita mo ang akon mga tul-an sang ginporma ako sing tago sa sulod sang tiyan sang akon iloy.*

16 Nakita mo na ako bisan wala pa ako maporma.

Ang gintalana nga mga inadlaw nga magakabuhi ako nasulat na sa imo libro,

bisan wala pa ini magsugod.(Salmo 139:13-16)

9 Kay ikaw ang ginahalinan sang kabuhi.

Ginapasanagan mo kami,

kag nagakasanagan ang amon hunahuna.(Salmo 36:9)

33 Magakanta ako sa Ginoo sa bilog ko nga kabuhi.

Magakanta ako sang mga pagdayaw sa akon Dios samtang nagakabuhi ako.(Salmo 104:33)

6 Ang tanan nga nagakabuhi magdayaw sa Ginoo.

Dayawa ang Ginoo!(Salmo 150:6)

6 Nagsabat si Jesus sa iya, "Ako amo ang dalan, ang kamatuoran, kag ang kabuhi. Wala sing may makakadto sa Amay kon indi paagi sa akon.(Juan 14:6)

10 Ang katuyuan sang kawatan amo ang pagpangawat, ang pagpatay kag ang pagpangguba. Pero ako ya nagkadto diri sa kalibutan para mahatagan ko ang mga tawo sing kabuhi kag ini wala gid sing kulang.(Juan 10:10)

25 Nagsiling si Jesus sa iya, "Ako ang nagabanhaw sang mga patay, kag ako man ang nagahatag sang kabuhi. Ang nagatuo sa akon, bisan mapatay pa siya, mabuhi siya liwat. 26 Ang bisan sin-o nga nagakabuhi kag nagatuo sa akon indi na mapatay hasta san-o. Ti, nagapati ka bala sini?"(Juan 11:25,26)

35 Nagsiling si Jesus, "Ako amo ang tinapay* nga nagahatag sang kabuhi. Ang nagapalapit sa akon kag nagatuo indi na gid paggutumon ukon pag-uhawon.(Juan 6:35)

38 Kay nagasiling ang Kasulatan nga ang bisan sin-o nga magtuo sa akon, magailig halin sa iya tagipusuon ang tubig nga nagahatag sang kabuhi."(Juan 7:38)

3 Kag amo ini ang kabuhi nga wala sing katapusan: nga ang mga tawo magkilala sa imo nga amo lamang ang matuod nga Dios kag magkilala man sa akon nga imo pinadala nga hari.(Juan 17:3)

23 Kay ang bayad sa sala amo ang kamatayon, pero ang kabuhi nga wala sing katapusan amo ang regalo sang Dios sa mga ara kay Cristo Jesus nga aton Ginoo.(Roma 6:23)

20 Napatay ako kaupod ni Cristo sa krus. Indi na ako ang nagakabuhi subong, kundi si Cristo na ang nagakabuhi sa akon. Kag ining kabuhi nga akon ginakabuhi subong amo ang resulta sang akon pagtuo sa Anak sang Dios nga naghigugma sa akon kag naghalad sang iya kabuhi para sa akon.(Galacia 2:20)

10 Ang kalawigon sang amon kabuhi 70 ka tuig, ukon 80 ka tuig kon mabakod kami.

Pero bisan pa ang pinakamaayo namon nga mga tinuig madamo sang mga kagamo kag kalisod.

Matuod gid man nga sa indi madugay matapos ang amon kabuhi kag madula kami.(Salmo 90:10)

12 Paintiendiha kami nga kalip-ot lang sang amon kabuhi,

para mangin mainalamon kami sa amon pagkabuhi.(Salmo 90:12)

4 "Ginoo, padumduma ako nga may katapusan ang akon kabuhi

kag naisip na ang akon mga inadlaw.

Padumduma ako nga umalagi lang ang akon kabuhi."

5 Kalip-ot sang kabuhi nga ginhatag mo sa akon.

Baliwala lang ini sa imo panulok.

Sa matuod, ang kabuhi sang tawo daw sa hangin lang nga nagaagi,*

6 ukon pareho lang sang landong nga nagakadula.

Masako ang tawo sa mga buluhaton nga wala sing pulos.

Nagatipon siya sang manggad,

pero indi siya makahibalo kon sin-o ang magapulos sini kon mapatay na siya.(Salmo 39:4-6)

1 May tagsa ka tion ang tanan nga buluhaton diri sa kalibutan:(Manugwali 3:1)

31 Ang katigulangon isa ka kadungganan* nga maangkon sang tawo nga may matarong nga kabuhi.(Hulubaton 16:31)

15 Gani halungan ninyo ang inyo pagkabuhi. Indi kamo magkabuhi pareho sa mga tawo nga wala nakaintiendi, kundi magkabuhi kamo bilang mga tawo nga nakaintiendi sang kabubut-on sang Dios. 16 Kalitan ninyo ang tiyempo nga makasugid kamo parte sa inyo pagtuo tungod nga malain ang ini nga mga inadlaw.(Efeso 5:15,16)

25 "Amo gani nga nagasiling ako sa inyo nga indi kamo magpalibog sa inyo pagpangabuhi, kon ano ang inyo kaunon ukon imnon kag kon ano ang inyo bayuon. Kay kon ginhatagan kamo sang Dios sang kabuhi kag lawas, indi mahimo nga indi niya kamo paghatagan sang pagkaon kag bayo. 26 Tan-awa bala ninyo ang mga pispis sa kahanginan. Wala sila nagatanom, wala sila nagaani, kag wala sila nagatipon sang pagkaon sa bodega, pero ginapakaon sila sang inyo Amay. Indi bala mas labaw pa kamo sang sa mga pispis? 27 Sin-o sa inyo ang makapalawig sang inyo kabuhi bisan diutay lang paagi sa inyo pagpalibog? Wala gid!(Mateo 6:25-27)

15 Dayon naghambal si Jesus sa mga tawo, "Mag-andam kamo sa tanan nga klase sang pagkamainangkunon, kay ang matuod nga pagkabuhi wala nagadepende sa madamo nga manggad."(Lucas 12:15)

36 Ano gid bala ang makuha sang tawo kon maangkon niya ang tanan nga butang diri sa kalibutan, pero mawala ang iya kabuhi? Wala gid!(Marcos 8:36)

34 Dayon gintawag niya ang mga tawo kaupod sang mga sumulunod niya nga magpalapit. Nagsiling siya sa ila, "Kon may tawo nga gusto magsunod sa akon, indi niya dapat pagpasulabihon ang iya kaugalingon. Kag dapat handa siya sa pag-atubang sa kamatayon* sa iya nga pagsunod sa akon. 35 Kay ang bisan sin-o nga luyag magluwas sang iya kabuhi madula niya ini. Pero ang bisan sin-o nga maghalad sang iya kabuhi tungod sa akon kag sa Maayong Balita makaangkon sang kabuhi nga wala sing katapusan. 36 Ano gid bala ang makuha sang tawo kon maangkon niya ang tanan nga butang diri sa kalibutan, pero mawala ang iya kabuhi? Wala gid! 37 Kay wala gid sang butang nga sarang niya mahatag para mapabalik niya ang iya kabuhi. 38 Ang bisan sin-o nga nagakahuya sa akon kag sa akon mga ginatudlo sa sini nga henerasyon, nga ang mga tawo malain kag indi diosnon, igakahuya ko man kon ako nga Anak sang Tawo magbalik na nga nagasilak sa gahom sang akon Amay, kag kaupod ko ang balaan nga mga anghel."(Marcos 8:34-38)

2 Indi kamo magsunod sa mga pagginawi sang mga tawo sa sini nga panahon. Tuguti ninyo ang Dios nga bag-uhon niya ang inyo hunahuna, para mahibaluan ninyo ang kabubut-on sang Dios—kon ano ang maayo, husto, kag kon ano gid ang iya nagustuhan.(Roma 12:2)

7 Kay sa karon nagakabuhi kita sa pagtuo kag indi suno sa aton makita.(2 Corinto 5:7)

10 Anak, pamatii kag batuna ang mga ginasiling ko sa imo, para magalawig ang imo kabuhi.(Hulubaton 4:10)

23 Bantayi sing maayo ang imo hunahuna, kay kon ano ang imo ginahunahuna amo man ang imo kabuhi.(Hulubaton 4:23)

17 Ang tawo nga nagapamati sa mga pagtadlong sa iya pamatasan magaayo

kag magalawig ang iya kabuhi,

pero ang tawo nga wala nagapamati magatalang.(Hulubaton 10:17)

3 Ang nagabantay sa iya ginahambal nagahalong sang iya kabuhi, pero ang nagapataka lang kahambal ginalaglag niya ang iya kaugalingon.(Hulubaton 13:3)

27 Ang pagtahod sa Ginoo makapaayo kag makapalawig sang imo kabuhi,* kag makapalikaw sa imo sa kamatayon.(Hulubaton 14:27)

8 Ang tawo nga nagatinguha nga magmaalamon nagakabalaka sa iya kaugalingon, kag ini nga tawo magauswag.(Hulubaton 19:8)

21 Ang tawo nga nagatinguha gid nga magkabuhi nga maayo kag matarong magakabuhi sing malawig kag madinalag-on, kag padunggan siya sang mga tawo.(Hulubaton 21:21)

19 Subong nga makita ang imo hitsura sa tubig, makita mo man ang imo pagkatawo sa imo tagipusuon.(Hulubaton 27:19)

16 Ginamanduan ko kamo subong nga higugmaon ninyo ang Ginoo nga inyo Dios, magkabuhi kamo suno sa iya mga pamaagi, kag magtuman sang iya mga sugo kag mga pagsulundan. Kon himuon ninyo ini, makaangkon kamo sang maayo nga kabuhi kag magdamo, kag pakamaayuhon kamo sang Ginoo nga inyo Dios didto sa duta nga inyo pagasudlon kag panag-iyahan.(Deuteronomio 30:16)

12 Tahura ang inyo amay kag iloy para magkabuhi kamo sing malawig sa duta nga ginahatag ko sa inyo.(Exodus 20:12)

12 Ang bisan sin-o nga luyag sang malawig kag malipayon nga kabuhi

13 indi siya dapat maghambal sing malain kag indi magbinutig.

14 Dapat likawan niya ang malain kag himuon ang maayo.

Tinguhaan niya nga mangin maayo permi

ang iya relasyon sa iya isigkatawo.(Salmo 34:12-14)

10 Kay nagasiling ang Kasulatan,

"Ang bisan sin-o nga luyag sang malawig kag malipayon nga kabuhi

indi siya dapat maghambal sing malain kag indi magbinutig.

11 Dapat likawan niya ang malain kag himuon ang maayo.

Tinguhaan niya nga mangin maayo permi

ang iya relasyon sa iya isigkatawo.(1 Pedro 3:10,11)

14 Tinguhai ninyo nga mangin maayo ang inyo relasyon sa tanan nga tawo, kag tinguhai man ninyo nga mangin matarong ang inyo kabuhi. Kay kon indi matarong ang inyo kabuhi indi ninyo makita ang Ginoo.(Hebreo 12:14)

11 Tinguhai ninyo nga magkabuhi sang malinong. Indi ninyo paghilabtan ang kabuhi sang iban, kag pareho sang amon ginsiling sa inyo anay, ang kada isa sa inyo dapat magtrabaho para may kaugalingon siya nga palangabuhian. 12 Kon amo ini ang inyo ginahimo, indi na kinahanglan nga magsalig pa kamo sa iban para sa inyo pagpangabuhi, kag pagatahuron kamo sang mga indi tumuluo.(1 Tesalonica 4:11,12)

23 Bisan ano ang inyo ginahimo, himua ninyo sing tinagipusuon, subong nga nagaalagad kamo sa Ginoo kag indi sa tawo. 24 Nahibaluan man ninyo nga may palanublion nga igahatag sa inyo ang Ginoo bilang balos. Kay si Cristo nga aton Ginoo amo ang inyo ginaalagaran.(Colosas 3:23,24)

12 Bulahan ang tawo nga nagabatas sang mga pagtilaw, kay sa tapos nga madaog niya ang mga pagtilaw, magabaton siya sang kabuhi nga wala sing katapusan bilang padya nga ginpromisa sang Dios sa mga nagahigugma sa iya.(Santiago 1:12)

13 May ara bala sa inyo nga maalam kag makaintiendi? Ipakita niya nga maalam kag makaintiendi siya paagi sa maayo nga pagkabuhi nga may pagpaubos. Ang tawo indi maalam kon indi siya makapaubos.(Santiago 3:13)

6 Sigurado gid nga ang imo kaayo kag gugma sa akon magapadayon

samtang nagakabuhi ako.

Kag magapuyo* ako sa imo nga balay,* Ginoo, hasta san-o.(Salmo 23:6)

4 Ginoo, tudlui ako sang imo mga pamaagi.(Salmo 25:4)

4 Nagapangayo ako sa Ginoo sang isa ka butang

nga ginahandom ko gid.

Ini amo nga makapuyo ako sa iya templo

sa bilog ko nga kabuhi.

Kag didto magapamalandong ako sang iya kaayo

kag magapangayo sang iya pagtuytoy.(Salmo 27:4)

3 Tungod kay ikaw ang akon palalipdan nga bato

kag mabakod nga palanaguan,

tuytuyi kag ubayi ako para mapadunggan ka.(Salmo 31:3)

7 Magpakalinong ka sa presensya sang Ginoo

kag maghulat nga may pagpasensya sa iya nga himuon.

Indi ka magpanginit sa mga tawo nga mainuswagon,

nga madinalag-on sa ila malain nga mga plano.(Salmo 37:7)

26 Bisan magluya ang akon lawas kag hunahuna, ikaw, O Dios, amo ang akon kusog.

Ikaw lang gid ang akon ginakinahanglan hasta san-o.(Salmo 73:26)

93 Indi ko gid pagkalimtan ang imo mga pagsulundan,

kay paagi sini ginapadayon* mo ang akon kabuhi.(Salmo 119:93)

7 Tipigan ka sang Ginoo sa tanan nga katalagman;

tipigan niya ang imo kabuhi.

8 Ang Ginoo magatipig sa imo subong kag hasta san-o, bisan diin ka makadto.*(Salmo 121:7,8)