2 Pa ruma tana Tamaqu sa soku jola sira na ia susuverena. Vei bike sosoto sa bake pojanigou na veveina ara sapi, goto ara sa kopira sa ma lao vatana vanigou kai ia sagou. 3 Ko pa liguna tu mana lao vatana vanigou sa kai ia isa, sa beto mana mule lame ko mana toni laonigou ketakoi qa suvere, ko ketakoi qa suvere ara sa agou ba muna suvere tugu.

9 Ego ko sa beto tugu paranga vei inara isa, poni sa tonai tugu qai korapa dodogorodia ira sa sa tateku sae pa noka sisa, beto sa sa lame kai lei ko sa vapaea ko qaike batia sa totonai.

10 Ego ko qai korapa tugu enga doro tututia ira sa na saena isa pa noka, poni sa qai votu vasiboro turu tavitiria sa karu tinoni qai popoko keala, 11 ko pira qarigu, <<Boko minete tinoni Qalili! Ai sa vei ko qu korapa tu turu enga sae vei pa noka sagou? Isa tugu i Jisu api, isa sa tapikata tamugou ko sa tateku sae pa noka, sa mina mule lagere pa soana vei tugu qu batia sa sae pa noka sisa,>> qarigu.

20 Isa sa vavakatoniria doru sakasava aipira sa sa paranga, <<E, sa tata gu na lamequ sara!>> sau.

Agua. Mu lame, Bangara Jisu!

12 Sa paranga si Jisu, <<Mu vainongoro! Sa tata gu na lamequ sara. Mana pogosoria lame sa na pinia mana ianiria na tinoni, isa na padana na okokotona na dia roiti qai roitiniria.

36 <<Goto na veveina na rane beto na totoso isa sa sa kepore kai tinoni bi gigilai. Ira na mateana pa noka babi na Tuna ba sake gigilai, goto mekana gu na Tamana sa gigilai. 37 Na bola lame tana Tuna na Tinoni sa kode mina kai muqisi podeke vei tugu pa totoso tai Noa. 38 Ira na rane totonai sa oqoro dururu na abana, sa ira na tinoni sa qai kole gaganigadia, qai kole bukugadia, beto ira na marene na rereko sa qai vavaialavadia, tinganai ko sa kamu sa na ranena sa tome pa leo aka i Noa. 39 Ba qaike isongo vagigila podekia tugu ira sa na sa sa korapa taroiti, tinganai ko sa gore na nyoro ko sa pogoso variu beto paleria. Kode inara tugu mina lame vasiboro vei sa na lame tana Tuna na Tinoni.

32 <<Goto na veveina na rane babi na totoso isa sa kepore kai tinoni sa gigilai. Ira na mateana ba qaike gigilai, na Tuna ba sake gigilai tugu. Mekana gu na Tamana sa gigilai.

1 Goto na veveina na totoso beto na ngutidi na totoso sa, ka visa tavitimei, agei meneke kilu kuti vanigou na veveidi, 2 ura agou mekamiu qu tei gigila vataleamiu tu sa na rane tana Bangara sa kode mina lame vasiboro vei na tinoni ikikona sa lame na bongi. 3 Tonai mai paranga sira na tinoni, pira marigu, <<Na bule beto na vinasare!>> marigu, poni mina bola vasibororia na pipiara sira, mina vei na vivitigi sa kamu vasibororia na rereko bogatana, ko kepore sosoto sa kai tinoni mina boka legasania na pipiara.

42 Ko sa vei sa mu suvere gegele, ura quke gigilai agou sa na rane mina lame na miu Bangara. 43 Qu gigila vataleamiu agou sa vei bi tei gigila momoeona tu na tinoni poreona ruma sa ai totoso mina kamu na tinoni ikiko, sa kode mina suvere gegele ko minake boka pururu tomeia na tinoni ikikona sa nona ruma. 44 Ko sa vei sa agou mu kole suvere vanaqiti doru totoso, ura na Tuna na Tinoni sa mina lame na totoso quke rove veinia mina lame,>> sau si Jisu.

1 Qe tepagou agei sagou, ka visa tavitimei, ko na veveina na mule lamena na oda Bangara i Jisu Karisito beto tonai tana vaikamu gosoria gita sisa 2 sa muke oqani tajou vaneneqerenia babu takulanganiria agou sa kaki nongoro goborodi na lame veidi tana Gagala Tabuna, na vavakato babi na leta sa koko lame vei tamigei qarigu ko qai ulenia sa tei lame tu sa na rane tana Bangara qarigunigou.

3 Muke vaniria na lolomo sira na tinoni ko mai vasianagou, ura minake tei lame tu sa na rane isa tinganai mina kamua mai tu sa na totoso vuvukele riudia tadira na tinoni beto ko na kana tana Tamasa, na isongona na Tinoni Ikikerena Jola, isa mina tapipiara vakilasa sa mina votu lame mai tu. 4 Ko na Tinoni Ikikerena Jola isa sa mina paranga vakekeporeria sira doru sakasava qai tapopoja tamasa babi na sakasava qai tavatarasae, beto sa mina lao tome toqo pa zelepade madina tana Tamasa ko mina gigalia mekana sa isa sa na Tamasa minagu.

16 Tonai sa mina tanongoro sa na kuku lavata, na ovovelena na bangaradi ira na mateana, na vaqorona na kuvili tana Tamasa, beto sa na Bangara mekana mina lagere vei pa noka beto ira na tinoni qai vasosotoa na Karisito ba qai tei mate tu sa mai turu mule momoe. 17 Beto poni sa gita taqe korapa toaoda ko taqe korapa suvere sa tana tasaputu sae tavitiria ira pa vavagalo eqa ko tana gosoria gita sa na Bangara. Ko doru totoso tana mekarai suvere tavitia gita sa na Bangara.

24 <<Ba pana rane ira totonai mina kamua na totoso tapata,

mina rodomo sa na tapo

beto na popu sa minake kabere;

25 mai vukele sira na seru pa noka

beto ira na neqi pa noka mai tajou vakanoko.✝

26 Beto mai batia ira sa na Tuna na Tinoni mina lame vei pa lei tavitia na neqi beto na kabere lavata. 27 Ego beto sa kode mina garunu laoniria isa pa made uquna na kasia gusu sira na mateana ko mina vaikamuniria sira nona tinoni taviledi, podalai pa kai uquna na kasia gusu ko mai lao vaokotia pa vinabetona,>> sau si Jisu.

31 <<Tonai mina lame pana neqi tana bangara sa na Tuna na Tinoni sa kode mai tutia ira doru mateana, ko mina toqo pa ona totoqona bangara sisa. 32 Ko ira doru puku tinoni sa mai vaikamu lao pa moena isa. Ko isa mina vaipikainiria pa karu pikatana kai muqisi podeke vei na sepati sa vile pikata tekuria na sipi tadira na qoti. 33 Ko mina vakoleniria pa kale matuana sira na tinoni tuvisidi, goto ira na tinoni ikikeredi sa mina vakoleria pa kale merina.

11 Beto qa batia sa na oka sa tarevanga, poni qa doro qau sa qa batia sa kai hose keka ko isa sa koi pa narena na hose sa sa tagigala Na Tarangena beto Na Sosoto. Ko pana tuvisi sa tutiniria sira na tinoni beto sa rajaria na ona kana. 12 Na matana sa qai vei na memeana na iku, beto pa batuna na kubo tarapae bangara sa vasaeria. Kai isongona sa takuti kolena pana tana, ba kepore na tinoni sa gigilai goto mekana gu isa sa gigilai sa na isongo isa. 13 Sa vasaea na poko gojo doru sa tavatubulunia na orungudi ira na ona kana. Na isongona sa Na Paranga tana Tamasa. 14 Beto qai tutia ira na minete tinoni vaipera pa noka, qai vasaeria na poko keala poreveveidi, na liosodi, beto qai okoto koi pa naredi na hose. 15 Sa bola votu vei pana mangana sa kai benete vaipera sa jola na ganina, isa mina vakilasaniria ira na pupuku tinoni qai kanai, beto mina bangaraniria ko minake aru qeqeraniria. Mina vakilasa vamateria isa sira pana ona tagigiri na Tamasa vivana jola, mina vei puputa kai tinoni sa kole tetete vakoloria na qurepi pana tete momonyoni vaini. 16 Beto sa takuti pana ona poko gojo doru beto pana avana pa kale nene matuana sa na isongo pira qai paranga vei:

NA KUTA TADIRA NA KUTA BETO NA BANGARA TADIRA NA BANGARA.

26 Na tinoni sa keanisiu ara beto na qua paranga sa na Tuna na Tinoni ba mina keania tugu sisa totonai mina lame sisa pa ona neqi lavata, pa neqi tana Tamasa beto tadira na mateana tabuna.

8 Ba muke roqu mumania agou sa kai sava api, ka visa baere jonga. Pana tana Bangara sa na kakasana na totoso sa sa kepore veveina. Pana tana Bangara kai rane sa sa vei kai tina aoro beto kai tina aoro sa sa vei kai rane gu. 9 Na Bangara sake korapa vavabonginia sa na vagore votuna na ona taringunguti vei qai rorove veinia sa vei qarigu ira kaki tinoni. Goto isa sa korapa mavo veranigou gu sagou ura sake nyoroguania isa sa kai tinoni bi mate. Ba ira doru tinoni sa sa nyoroguaniria isa ko mai gabala loa pale na dia sela. 10 Ba mina lame vasiboro vei kai tinoni ikikona sa na rane mule lame tana Bangara. Pana rane isa na oka mina mumuri tonai mina tanongoro sa na ovangana na qalalana na iku. Beto ko na sakasava pana oka mai tavurungu ko mai tapiara pale pana iku, beto na kasia abana beto doru sakasava qai taroiti pa korapana sa mai mumuri manyao betodia.

11 Ego qu tei nongoria tu agou sa kode doru sakasava sa mai tapiara vei inara, ko sa vei sa qu gigilaimiu ai muna toa goto vei sa agou. Mu toania na uana liosona beto na pangagana na Tamasa 12 totonai qu korapa verania sa na rane tana Tamasa ko mu vasisiqaraia na lamena na rane isa. Pana rane isa sa mina taqalala ko mina vurungia na iku sa na oka ko doru kai sava sa mai nyoro maragutu betodia. 13 Ba gita sa taqe korapa verania isa sa taringunguti vakole vanigita na Tamasa. Sa taringunguti vakole vanigita isa sa na oka koregana beto na kasia abana koregana, ketakoi sa kole na tuvisi tana Tamasa.

27 Doru tinoni sa mai mate kai totoso gu, beto pa liguna isa sa mai gosoroni vaipitu tana Tamasa ira sa na dia sela. 28 Ko pana soana vei isa sa na Karisito ba sa vavakukuvunia sa nona toa mekana kai memeka totoso gu ko sa pogoso variuria sa na sela tadira soku tinoni. Ko tonai mina lame na vinarua totoso sisa sa nake veveina na sela sa mina lamenia isa, goto mina lame aloria tu sira qai korapa verania sisa.