2 Mwe nyumba ya Tate, mna wikazi mwingi, naho miye nagenda kuwaikilani lumwe hant’hu ho kwikala, vandile hiyo ivo hegu nehimigambilani. 3 Nnaita nnajika kumiikilani lumwe, nenize niwaguheni vileke mnde hadya huunga ninde miye.

9 Eze abinde kulonga ivi, niyo enulwa kulanga iivi wakamsinya, niyo vunde dya mgubika iivi wakamsinya.

10 Umwo wandile wakei wenule meso yawe kulanga umwo Yesu andile akaita, wagosi waidi wavaile suke zing’aile mbe, nawakimala hagihi yawe. 11 Niyo wawagamba, "Nyuwe want’hu wa Galilaya mkimalizwa nii aho mkakaula kulanga? Uyu Yesu aguhuhigwe kulawa mwenyu, naauye enga iivi mmuwone akaita kulanga."

20 Yudya akulonga uwona mwa aya agamba, "Ikindedi nasunguza ukwiza."

Taile. Zumbe Yesu, So.

12 Yesu niyo agamba, "Kaula, nasunguza ukwiza na mageleko ye mwo mkono wangu, neniwageleke want’hu wose viligane no udamanyi wawe aho heza kwiza.

36 "Hahali mnt’hu yoyose amanyize zuwa hegu sa, hi mtumigwa ywa kwe mbingu, hegu Mwana mwenye. Haheina yeyose, Tate ekedu niye amanyize. 37 Enga viya vandaga mwe dizuwa dya Nuhu, nivo nevinde ukwiza kwa Mwana Mt’hu. 38 Kwaviya mwa mazuwa yalongoele ugubiko wa mazi, want’hu wandaga wakanywa no kudya, kulombigwa no kulomba, kubula mwe dizuwa diya Nuhu engile mwe ngalawa, 39 naho hawamanyaga kint’hu chochose chadahaga kulaila, mpaka hadya wezile kukebwiila wose wagubikwa pele na mazi. Ivi nivo vikuunga vinde imiziile ya Mwana Mnt’hu.

32 "Hahali mnt’hu yeyose adimanyize dizuwa hegu isa, hi mtumigwa ywa kwe Mbingu hegu Mwana wakumanya, mna ni Tate mwenye du amanyize.

1 Wandugu zangu, hikuungwa kuwawandikilani mwe zimbuli ze misimo ne zimbuli za mazuwa aho zimbuli izi zikwiza kulaila. 2 Kwaviya nyuwe wenye mmanya vedi kugamba zuwa dya Zumbe nedize haheina kukawiilwa enga mbavi akwiza nekilo. 3 Want’hu hadya nawagambile, kila kint’hu kitondoala, aho naaho ubanangi ukuwezila! Mbuli iyo neilaile aaho enga usungu wa mvele akwingila nyumba, naho want’hu hawadahe kunyilika.

42 "Ivo mnde meso kwaviya hammanyize aho neezile Zumbe ywenyu. 43 Mna mmanye kugamba, yandile mta nyumba amanyize kilo kihi mbavi neezile, hegu nakekala meso no kuyamila inyumba yakwe isekumoligwa. 44 Naivo elo, weye nawe wikale meso, Kwaviya Mwana Mnt’hu naakwizile hadya hwi kawiile.

1 Haluse, wandugu zetu, mwe mbuli yo kwiza kwa Zumbe ywetu Yesu Kilisito no kudugaywa kwetu hamwenga kikale naye chawalombezesani, 2 mse kusunguza kwingila kinyulu mwo moyo, naho mse kugeligwa kituletule na want’hu wakugamba dizuwa dyo kwiza kwakwe Zumbe dibula. Mafa yafanyanywa kugamba nivo kilongile kikalotela hegu kikabilikiza, hegu chandikaga ivo mwe baluwa. 3 Mnt’hu yeyose asekuwadant’hiliza kwa sila yoyose. Kwaviya dizuwa idyo hedize mpaka kudya Kusaguka Kukulu kulawile, na yudya Mwiihi aonekele, yakajika ayo yose naabanangwe pele. 4 Yehe naaketende mwenye kunda mkulu mwe kila kint’hu want’hu wakukiona kugamba nicho Mnungu, hegu wakukivika, naho neengile mwe Nyumba ya Mnungu, no kukelagisa kugamba niye Mnungu.

16 Kwaviya nahalavigwe miko na izwi dya mtumigwa mkulu na izwi dye digunda dya Mnungu, naho Zumbe mwenye naasele kulawa kwe mbingu. Wose wadya wafaga wakamhuwila Mnungu naawauyulwe nk’hongo, 17 niho suwe nekinde wagima mwo lupisi ulo, nekiduganywe hamwenga mwa mavunde kikamsingila Zumbe mwo ulanga. Niho nekikale na Zumbe mazuwa yose.

24 "Mwe mazuwa yadya makunt’ho yakaheza, zuwa nadigeligwe lwiza. Mnenge nawo haulave umwanga wakwe, 25 nt’hondo nazo nezigwe kulawa kwe mbingu, ludole lwa kwe mbingu nolu singisike. 26 Aho Mwana wa Mnt’hu naalaile akeza mwa mavunde kwa udahi mkulu no uwedi utendese. 27 Naye naasigile mtumigwa ywa kwe mbingu nt’endelo zose za isi vileke wawaduganye want’hu wose wasagulwe ni Mnungu, kulawa nt’hendelo imwenga ya isi mpaka nt’hendelo ya mbingu.

31 "Aho Mwana Mnt’hu akeza kwiza mwo wedi wakwe utendese, hamwenga na watumigwa wa kwe mbingu wose, neekale mwe difumbi dyo uwedi wakwe utendese. 32 Want’hu wose mwe isi zose, nawaduganywe hamwenga, naho naawapagule enga viya mdimi akupagula zingoto mwe difyo dye zimbuzi. 33 Ngoto naayapaguile kulume kwakwe, zimbuzi naazipaguile kumoso kwakwe.

11 Naonaga mbingu igubuka, naho kwandaga na falasi ing’aile naho yudya ekale mnanga mwakwe etangwa, Mhuwilwa na Mkindedi, naho akasengela want’hu no kutoana nk’hondo adamanya enga ivo vikuungwa. 12 Naho meso yakwe nayanda enga lulija lwa moto, naho mwo mtwi wakwe mwandaga na taji nyingi za kiseuta, naho ana zina diwandikwe hedikumanywa ni mnt’hu yeyose ila yehe mwenye du. 13 Avalaga suke yatufikagwa mwe sakame, naho dizina dyakwe etangagwa "Mbuli ya Mnungu". 14 Naho watoani wa kwe mbingu wandaga wavaligwa suke zisunt’hike zing’aile naho nt’hana, Awo wakweile falasi zing’aile. 15 Mwo mnomo wakwe mwandaga mkalawa bamba dikutwelesa, akuunga awatoele want’hu we isi. Naye naawalongoze kwa ngoda ya kilama, na kuminya zabibu mndani mwe kiminyilo kimemile maya makulu ya Mnungu Mta Udahi. 16 Naho ana zina diwandikwe mwe suke yakwe na mwe diwambo dyakwe, "Seuta ywa maseuta na Zumbe ywa mazumbe."

26 Uneva mnt’hu ananionele soni miye hamwenga na mbuli zangu, Mwana ywa Mnt’hu naye naamuwonele soni mnt’hu uyo akezakwiza mwo wedi wakwe utendese na wa Ise na watumigwa wa kwe mbingu wakukile.

8 Mna wambuya zangu mse kujala kint’hu kimwenga kugamba, hameso ha Zumbe zuwa dimwenga ni enga myaka magana mlongo, naho myaka magana mlongo ni enga zuwa dimwenga. 9 Zumbe hana kisese mwe kukint’hiza kiya alagane enga ivo wamwenga wakubanikanyanya. Mna ni mbazi zakwe Mnungu kwenyu, hakuunga mnt’hu yeyose abanangwe, mna want’hu wose waleke wavu wawe.

10 Mna dizuwa dya Zumbe nedize enga mbavi, naho mwe dizuwa idyo mbingu neihalawe kwa msindo mkulu, naho vint’hu vose vo mwo ulanaga nevibanangwe nu moto, isi hamwenga na kila kint’hu kifisigwe nevigubulwe na kuikwa mwazi.

11 Uneva vint’hu vose nevibanangwe enga ivo, nyuwe nomnde want’hu wa vivihi? Mnde want’hu wa Mnungu, na wikazi wa kumhuwila Mnungu, 12 mkagojela dizuwa dya Mnungu, no kuditigiza disunguze kwiza, zuwa dyo kokigwa no kubanangwa nu moto kwe isi ne vint’hu va kulanga. 13 Mna enga ivo kili kiya alagane, chagoja mbingu mp’hya, na isi mp’hya ina want’hu wakudamanya yakumwelela Mnungu.

27 Naho want’hu waikilwa kubanika lumwenga, kikutimila aho ni usengelo. 28 Saviya ivo Kilisito naye nakalavigwa nt’hambiko lumwenga du kuusa wavu wa wengi, neeze kaidi kuwayokola wadya wakumgoja.