2 Tari Ḇaḇa 'ai wala 'age kamara ma repe. Ngoi ḏuanga i’a to tagi di’a ta sidodahe ngini ninga kamara-kamara. Ngoi to kanau ra ngini so’o gena sababu mode-mode’e 'age rema kamara-kamara gena-ge di’a ngini. 3 Ngoi ḏuanga i’a to tagi to sidodahe kamara di’a ngini. Sababu gena-ge, Ngoi dadunu to sapolo moju di’a Tini gasa Tari ngi’i, la le’a Ngoi gena, ngini gena ḏi’i.

9 Yesus 'o kanau so’o gena togumu i’a, Ma Jou’ongu Madutu 'o sibere Unanga sie da’u soroga ra ananga manga biono re 'aḏi tatamo ie Unanga singadolo 'o kakamo 'i sao Unanga singadolo ananga 'U oḏi’i riwara.✝

10 Toma 'orasa ananga 'aḏi tatamo ie moju da’u diwanga wakutu Yesus 'o pere toma soroga, kage-kage ngowa’a nga muḏiḏi ga’a manga pakeanga bu-buḏo 'aḏi made-de’oso ra ananga manga gagoro. 11 Ananga 'aḏi kanau, "Hai ngowa-ngowa’a Galilea, i’a sa’olo ngini ni made-de’oso 'age re ni tatamo da’u diwanga? Yesus, ga’a Ma Jou’ongu Madutu 'o sibere da’u toma soroga ra ngini ninga biono, ḏuanga i’a dadunu 'O sapolo moju ma duhu 'i ma tero sa’olo ngini nu oḏi’i Unanga 'o pere toma soroga."

20 Unanga, Yesus, ga’a singadolo habari nena-ne 'o kanau, "Mode’e, Ngoi ḏuanga i’a capati to sapolo!"

Re, ngoi, Yohanes 'o kanau ḏi’i: " 'Amin! Sapolo ḇato, Ma Jou Yesus!"

12 Yesus 'o kanau, "Tailako la-la ino! Ti’ara riwara Ngoi ḏuanga i’a to sapolo re To gasa ninga ngogele di’a Ta balasa 'oru ga’a ni 'a’a pasala ḏua.✝

36 "Mada’a matengo i’a mai ua 'o waro ma wangere ngau, bolo ca’olo muḏuo: Mala’ekata-mala’ekata toma soroga mai ya waro ua, re Ma Jou’ongu Madutu 'ai Ngowa’a Nau’u masiretene mai 'A waro ua; pa’i 'Ari Ḇaḇa masiretene ḇato 'A waro. 37 Wakutu Ngoi, Manusia ma Ngowa’a Nau’u dadunu To sapolo moju, gena-ge ma tero sa’olo 'oru 'i dadi toma 'orasa nabi Nuh 'ua re 'au wali.✝ 38 Wakutu ngu’uisi 'i sapolo nyangu, wangere re lobi’i ngowa-ngowa’a 'aḏi oromo re ka’e re 'aḏi ma’u molo’ara sa’olo biasa singadolo Nuh 'o osama toma kapala ma dara. 39 Pa’i wakutu ananga mo-moini ya basono ḇanyo ri romanga, ananga gena-ge aro sahe 'oru ga’a 'i dadi. So’o gena ḏi’i ḏuanga i’a 'i dadi na’o Ngoi, Manusia ma Ngowa’a Nau’u dadunu to sapolo moju.✝

32 "Mada’a matengo i’a mai ua 'o waro ma wangere ngau bolo ca’olo muḏuo: Mala’ekata-mala’ekata toma soroga mai ya waro ua, re Ma Jou’ongu Madutu 'ai Ngowa’a Nau’u masiretene mai 'a waro ua, pa’i 'Ari Ḇaḇa masiretene ḇato 'a waro.✝

1 Ioronongoḏu ngo-ngaku rimoi, ngomi paralu mi lefo surata riwara masiḏingoto ra ngini mangale ma 'orasa bolo ma wangere ngau wakutu Ma Jou dadunu 'o sapolo moju, 2 sababu ngini masiretene na waro ḏua Unanga gena-ge dadunu 'o sapolo moju ma tero sa’olo ngowa’a tori-tori’i 'aḏi sapolo toma 'orasa lobi’i.✝ 3 Toma 'orasa gena-ge, ngowa’a ḏuanga i’a 'aḏi makanau, "Ngene mo-moini wo 'ahu toma la re wo salamata." Mada’a toma 'orasa gena-ge kage-kage ananga 'aḏi sanga bahala re matengo i’a ua 'aḏi poloi’i. Gena-ge ma tero ḇato sa’olo we-were’a matengo kage-kage 'ami 'orasa ma ḏe-ḏegoro i’a enanga ri ngadolo mo mabasono mo go-goḏi, re munanga mo wiḏi yoḏu’u singadolo mo maḏe-ḏegoro i’a.

42 Sababu gena-ge, ma’istiari sababu ngini ni waro ua ngau Ma Jou ḏuanga i’a dadunu 'o sapolo moju. 43 'Eli-'elingi nena-ne: Na’o wala ma dutu 'o waro ca’olo muḏuo, lobi’i gena-ge ngowa’a to-tori’i 'o sapolo, wala ma dutu 'o otu ua, la ngowa’a to-tori’i osama yoḏu’u tai wala. 44 Sababu gena-ge, ngini nena-ne ḏi’i balasu ni maḏu-ḏuanga ḏua sababu Ngoi, Manusia ma Ngowa’a Nau’u, 'Ari ta-sapolo moju ma 'orasa ni masiwaro ua."✝

1 Ioronongoḏu ngo-ngaku rimoi, ngoi to siajele ra ngini mangale ḏuanga i’a Ma Jou Yesus Kristus dadunu 'o sapolo moju re mangale ḏuanga i’a Unanga na lomu ngene ga’a wo 'ahu marimoi ra Unanga. Dadi ngoi to golo’o ra ngini:✝ 2 Kalaha ngini ni 'isene habari, bae nubuata, bae do-doto’o bolo surata 'age rema ngowa’a 'aḏi kanau ra ngomi ino, mangale ma 'orasa enanga 'i ngadolo ḏua di’a Unanga dadunu 'o sapolo, awa ninga 'akala re sinyingara 'i waro gogare riwara, bolo 'i kangela! 3 Awa ngini ni mete’e ngowa’a lelegu gena-ge manga demo ga’a sihaga ngowa’a dadi ngini ni ta’ajiri ma 'orasa gena-ge 'i ngadolo ḏua; mada’a 'i ngadolo nyangu. Mo-moini nena-ne balasu 'i dadi siḏa: Ngowa’a repe 'aḏi masoloto Kristus re 'aḏi 'ahu 'i marimoi riwara ra Ma Jou’ongu Madutu re ngowa’a matengo 'ai 'akala re sinyingara lai cira madutu, unanga gena-ge ro waiti ga’a Ma Jou’ongu Madutu 'u sitantukanga ḏua 'o osama toma naraka. 4 Ngowa’a matengo gena-ge Ma Jou’ongu Madutu 'ai lawana re 'o matoro 'ai diri toma jou’ongu ma somoara mo-moini ga’a ngowa’a ya si’aro’o jou’ongu-jou’ongu, bolo ya silamo’o re siḏubuso. Unanga ḏuanga i’a 'o tegoro ra Ma Jou’ongu Madutu 'ai Wala re 'a sibobita mangale unanga masiretene sa’olo Ma Jou’ongu Madutu.✝

16 Toma 'orasa gena-ge, mala’ekata ma sae’e unanga ḏuanga i’a 'o kanau 'o siduga-duga re 'o wusu Ma Jou’ongu Madutu 'ai torompet. Enanga gena-ge 'i dadi didina’o mangale Ma Jou masiretene 'O 'uci da’u soroga tala, kara Unanga 'o dadunu si’ahu moju ngowa’a ngaku Yesus ga’a raḏi sengene siḏa. 17 Gena ḏua, ngene wo 'ahu moju re ananga 'aḏi sengene siḏa, Ma Jou na tede singosama toma kakamo ma dara, la ngene ma’u sanga ra Unanga toma diwanga. Gena-ge ḏua, ḏuanga i’a ngene wo 'ahu marimoi ra Unanga kasingado-ngadolo i’a.

24 "Mada’a toma 'orasa gena-ge wakutu susa re sangisara togumu i’a, wangere ma la’o 'i dadi hafu-hafu re ngara 'i taḏusu;✝

25 re mumuḏungu toma diwanga ḏuanga i’a 'i matai turono, re kuasa-kuasa toma ngawa-ngawa ḏuanga i’a 'i matai kaco.✝ 26 Toma 'orasa gena-ge, ngowa-ngowa’a 'aḏi oḏi’i Ngoi, Manusia Ma Ngowa’a Nau’u, dadunu to sapolo moju da’u diwanga tala to osama toma kakamo ma dara Rari kuasa lamo’o re Rari kabasarana.✝ 27 Re Ngoi to soma’a 'Ari mala’ekata-mala’ekata 'aḏi supu re 'aḏi lomu Ma Jou’ongu Madutu 'ai 'umata ga’a Unanga ro cumutu toma dungia ḇuḇuku rata, toma dungia ma didiki singadolo toma diwanga ma didiki."

31 "Wakutu Ngoi, Manusia ma Ngowa’a Nau’u To sapolo moju sa’olo 'Olana rari kabasarana lamo’o, mala’ekata mo-moini 'aḏi mete’e Ngoi, re Ngoi ḏuanga i’a to tegoro tari ḏe-ḏegoro ga’a 'i mulia.✝ 32 Bangsa mo-moini toma dungia ma dara 'aḏi malomu ra Ngoi 'ari biono. Ḏua Ngoi ta’u siwo-wola ngowa-ngowa’a gena-ge dadi balangu romoḏiḏi, ma tero sa’olo sowohi siwo-wola doba reo 'abingi. 33 Ngowa’a ga’a 'aḏi mete’e Ma Jou’ongu Madutu 'ai 'akala ma mau Ta’u lomu Tari giama ma kuwiḏa, re ngowa’a ga’a mete’e ua Ma Jou’ongu Madutu 'ai 'akala ma mau Ta’u lomu Tari giama ma kuḇali.

11 Gena ḏua, ngoi to oḏi’i soroga enanga 'i welanga, kara to oḏi’i ḏi’i jarana bu-buḏo rimoi. Ma Ga-gasa toma jarana gena-ge 'ai lomanga: 'A Setia re Banari. Unanga gena-ge 'o parangi re 'o sijuruhakimi ngowa-ngowa’a mete’e 'Ai 'adili.✝ 12 'Ai la’o sa’olo u’u malejanga re Tai sae’e 'o pake lastari ma repe. Tai lese 'i silefo lomanga rimoi; pa’i Unanga masiretene ḇato 'a waro lomanga gena-ge ma ngale.✝ 13 Juba ga’a unanga 'a pake sitono ḏua toma ngaunu re Unanga si’aro’o "Ma Jou’ongu Madutu 'ai 'Idini."✝ 14 Sordado-sordado soroga 'aḏi mete’e Unanga re 'aḏi palene jarana-jarana bu-buḏo re manga pakeanga ḇa’a lenan buḏo lai 'ofi. 15 Tai madanga ma dara 'i supu samaranga mangono ḇotu moi. Rai samaranga gena-ge Unanga ḏuanga i’a 'o sita’aloko Tai lawana toma bangsa-bangsa, kara Unanga 'o parenta ananga Rai didiki ḇesi. Dadi Unanga ḏuanga i’a 'o co’o 'anggur toma 'anggur ma jo-jo’o ma ngi’i. Gena-ge ma ngale: Unanga 'o siḏagi Ma Jou’ongu Madutu ga’a 'Ai kuasa ma pari cua, Unanga 'ai borata Tai lawana.✝ 16 Tai juba re Tai busuu’u 'i silefo lomanga so’o ne:

" 'Olana toma 'olana mo-moini

re Ma Jou toma tuanga mo-moini."

26 Na’o ngowa’a 'aḏi mara’a mangaku Ngoi re 'ari do-doto’o wakutu Ngoi, Manusia ma Ngowa’a Nau’u 'o ḏuanga i’a dadunu to sapolo rari kuasa, re Ḇaḇa 'ai kuasa re mala’ekata-mala’ekata 'ofi-'ofi ma kuasa; Ngoi ḏi’i mai to mara’a mangaku ngowa’a gena-ge.

8 Mada’a ioronongoḏu ngo-ngaku rimoi ga’a ngoi tunu dadalara, 'age 'ori i’a rimoi ngini ni sidaioranga awa: Wangere moi ra Ma Jou’ongu Madutu 'ai momina ma tero musungu cala moi ra ngene manusia nanga momina. Re musungu cala moi ra Ma Jou’ongu Madutu 'ai momina ma tero re wangere moi ra ngene manusia nanga momina. 9 'Age ngowa’a 'aḏi aje Ma Jou’ongu Madutu 'ai jaji lai kohi. Momongolo ua, Unanga 'o romanga reo 'akala ḇanyo, sababu Unanga oḏu’u matengo i’a mai ua 'o sanga hukumu. Unanga 'o mau ngowa-ngowa’a mo-moini 'aḏi sanga donga di’a maḏibo toma ngo’omo boloto.

10 Mada’a Ma Jou 'ai Wangere ḏuanga i’a 'i ngadolo ma tero sa’olo ngowa’a to-tori’i. Toma wangere gena-ge diwanga 'i iranga rema rurusu lai siḏi, re 'ori i’a i’a mo-moini toma diwanga 'i ro’u mo-moini. Re dungia re ma dara mo-moini, enanga 'i iranga.

11 Sababu mo-moini gena-ge Unanga 'a singi-ngiranga, dadi ninga 'ahu ma duhu sa’olo?! Ngini balasu ninga 'ahu 'ofi-'ofi re siboloto ninga 'akala re sinyingara di’a pa’i Ma Jou’ongu Madutu ḇato, 12 sababu ngini ni totoma Ma Jou’ongu Madutu 'ai Wangere 'i ngadolo, Wangere gena-ge ga’a Unanga 'a sitantukanga. Re Ngini balasu ni munara, la Wangere gena-ge 'i ngadolo caiti. Wangere gena-ge diwanga 'i ro’u simoini. Re sababu sau’u siḏi woḏi, 'ori i’a i’a mo-moini ḏuanga i’a 'i 'uisi. 13 Mada’a ngene wo totoma 'oru ga’a Ma Jou’ongu Madutu 'o sijaji pasala ḏua ra ngene: Diwanga su-sungi re dungia su-sungi ga’a 'i romanga reo ngowa’a loasa re banari.

27 Re mete’e Ma Jou’ongu Madutu 'ai 'akala ma mau, manusia 'aḏi sengene pa’i soi moi ḇato. Togumu i’a kara Unanga na sijuruhakimi. 28 So’o gena ḏi’i, Kristus ro sidoa’a 'Ai lese masiretene soi moi ḇato sa’olo jou-jou ra Ma Jou’ongu Madutu, la 'O singi-ngiranga ngowa’a repe manga ḏosa. Re ḏuanga i’a Unanga dadunu 'o sapolo moju ma soi ḏiḏi, Unanga 'o singi-ngiranga ḏosa riwara, mada’a 'O gasa salamata di’a ngowa’a ga’a 'aḏi totoma Unanga.✝