31 Buy inlumatêngaꞌ indu buy pawpatêl Apu Jesus. Nakaêdêng hila ha mahawang buy impabawêg ya. 32 Dêlan tawuy nangakaitnu ha paligid Apu Jesus. Mayin nannunghung kana, "Dilag ha mahawangaꞌ indu yu buy pawpatêl yu, impapabawêg kawu."

33 Tinumbay hi Apu Jesus, "Tanda yu, nu hita indu ku buy pawpatêl ku?"

34 Binalay nay tawtawu ha paligid na, buy ambala, "Hakawuy indu ku buy pawpatêl ku! 35 Ta hitalagyumanaꞌ hinuhumunul ha kaluuban Apu Diyus, habatuy indu ku buy pawpatêl ku."